Me Baleti ira na Lalai—Vakarautaki Ira na Gone ki na Bula Taucoko e na Salatu ni Veiyalayalati ni Kalou

Solia vei ira na gone na iyaloyalo e matataka na vakabauti Jisu Karisito, veivutuni, papitaiso, kei na veivakadeitaki (raica na iVola ni iYaloyalo Vakosipeli, naba 1, 111, 103, kei na 105). Wilika se cavuqaqataka vata kei ira na gone na ikava ni yavu ni vakabauta, ka kerei ira mera taura cake na nodra iyaloyalo ni tukuni na ivakavuvuli se cakacaka vakalotu oya. Vukei ira na gone mera kila vinaka na sala e vukei keda kina na veivakavuvuli kei na veicakacaka vakalotu yadua oqo meda vakataka vakalevu cake na Tamada Vakalomalagi kei Jisu Karisito.

Ona vukei ira vakacava na gone mera kila ni vakabauta, veivutuni, papitaiso, kei na veivakadeitaki era sega ni ka ni dua ga na gauna, ia era vakayarayarataka na noda tubu vakayalo ena noda bula taucoko? Me ivakaraitaki, e rawa nio vakaraitaka vei ira edua na iyaloyalo ni dua na sorenikau kei na dua na vunikau levu (se droinitaka na veika oqo ena vava ni volavola). Vukei ira mera vakasamataka na veika e vukea na sorenikau me tubu me dua na vunikau levu, me vaka na wai, qele, kei na rarama ni matanisiga. Vukei ira mera raica ni oqo e vaka na veika eda cakava meda toro voleka kina vua na Kalou ena noda bula taucoko—tara cake na noda vakabauti Jisu Karisito, veivutuni e veisiga, bulataka na noda veiyalayalati ni papitaiso, vakayagataka na sakaramede, ka ciqoma na Yalo Tabu.

Wasea vei ira na gone na italanoa me baleta na rokete mai na itukutuku nei Elder Dale G. Renlund “How Can Repenting Help Me Feel Happy?” (iTokani, Tise. 2017, 12–13, se Liahona, Dec. 2017, 70–71; raica talega na vidio “Veivutuni: E Dua na Digidigi Rekitaki” [Valenivola Vakosipeli]). Ena veitikina duidui eso ena italanoa, sureti ira na gone mera vakasamataka na veika a rawa ni vakila o Elder Renlund. Na cava na vuna eda reki kina nida veivutuni? Wasea vei ira na gone na reki kei na loloma o sa vakila ena nomu kerea vua na Tamada Vakalomalagi me vosoti iko.

4:36

Vakaraitaka edua na iyaloyalo ni nona papitaiso na iVakabula kei na nona papitaiso edua tale na tamata (se raica na iVola ni iYaloyalo Vakosipeli, naba. 35 kei na naba. 103 se naba. 104). Kerei ira na gone mera wasea na cava e duidui kei na cava e tautauvata ena kedrau maliwa na iyaloyalo e rua. Wilika vata na Maciu 3:13–17 se “Wase e 10: Sa Papitaiso ko Jisu” ena iTalanoa ni Veiyalayalati Vou, 26–29. Mera dusia na gone ena iyaloyalo na ka era rogoca ena veiitalanoa oqo. Tukuna vei ira na gone me baleta na nomu lomana na iVakabula kei na nomu gagadre mo muri Koya.

1:52

Vakarogoca se lagata na sere ni papitaiso me vaka na “When Jesus Christ Was Baptized” (Children’s Songbook, 102). Na cava eda sa vulica me baleta na papitaiso mai na sere oqori? Wilika na 2 Nifai 31:9–10, ka sureti ira na gone mera vakarogoca na vuna a papitaisotaki kina o Jisu Karisito. Sureti ira mera droinitaka na kedra iyaloyalo ena siga era a papitaiso kina.

Vakamacalataka ni veiyalayalati edua na yalayala ena kedrau maliwa edua na tamata kei na Tamada Vakalomalagi. Nida saga meda maroroya na noda yalayala vua na Kalou, sa yalataka na Kalou ni na vakalougatataki keda. Vola ena vava ni volavola na Noqu Yalayala vua na Kalou kei na Nona Yalayala na Kalou vei Au. Wilika vata na Mosaia 18:10, 13 kei na Vunau kei na Veiyalayalati 20:37, ka vukei ira na gone mera cakava e dua na lisi ni yalayala era raica ena ruku ni ulutaga e veiganiti (raica talega Dallin H. Oaks, “Your Baptism Covenant,” Friend, Feb. 2021, 2–3). Wasea na sala sa vakalougatataki iko kina na Tamada Vakalomalagi ena nomu segata mo maroroya na nomu veiyalayalati ni papitaiso.

Vakaraitaka vei ira na gone na iyaloyalo ni veika a cakava o Jisu Karisito ena Nona gauna ni veiqaravi (me baleta eso na ivakaraitaki, raica na iVola ni iYaloyalo Vakosipeli, naba 33–49). Kerei ira na gone mera vakamacalataka na ka e cakava tiko o Jisu ena iyaloyalo yadua. Wilika na Mosaia 18:8–10, 13, ka sureti ira na gone mera vakarogoca na veisala eso e rawa nira maroroya kina na veiyalayalati ni papitaiso (raica talega na “Noqu Veiyalayalati ni Papitaiso,” iTokani, Oko. 2023, 10–11). Ena rawa vakacava ni vakayarayarataka na noda ivalavala ena veisiga na veiyalayalati ni papitaiso? Sureti ira na gone mera droinitaka edua na kedra iyaloyalo nira vukea tiko edua me vaka ena cakava o Jisu.

Sureta edua ka se qai papitaiso ka vakadeitaki vou ka sa vakadeitaka ni na lako mai ki na kalasi ka mai wasea se a vakaevei tu nona a vakadeitaki. Kerea na tamata oqo me tukuna se cava na kena ibalebale vua na nona mai lewena Na Lotu i Jisu Karisito ni Yalododonu Edaidai. Vukei ira na gone mera vakasamataka na sala eso e rawa nira maroroya kina na nodra veiyalayalati ni papitaiso nira lewe ni Lotu. Wasea na sala sa vukei iko kina na nomu cakava na veika oqo mo vakila na reki nio lewena na Lotu i Karisito.

Vakaraitaka e dua na kedra iyaloyalo na tamata ena Wai o Momani (raica na iVola ni iYaloyalo Vakosipeli, naba 76), ka kerei ira na gone mera vakamacalataka na veika era raica ena iyaloyalo. Tukuna na italanoa kei Alama kei ira na nona tamata nira papitaisotaki tiko e kea (raica na Mosaia 18:1–17; “Alama ena Wai ko Momani,” ena iTalanoa ni iVola i Momani). Railesuva na Mosaia 18:8–9 ka sureti ira na gone mera matanataka, me vukei ira mera nanuma na veika era a lomarawarawa kina na tamata mera cakava nira sa lewe ni Lotu i Karisito. Wasea edua na ka o sa sotava ena nomu raici ira na lewe ni Lotu nira veiqaravi tiko ena veisala vata oqo.

2:41

Wilika na Vunau kei na Veiyalayalati 33:15, ka kerei ira na gone me ra vakarogoca na isolisoli digitaki e solia vei keda na Tamada Vakalomalagi nida papitaiso ka vakadeitaki. Me vukei ira mera vulica vakalevu cake na sala ena vukei ira kina na isolisoli ni Yalo Tabu, railesuva vata na Joni 14:26; Kalatia 5:22–23; 2 Nifai 32:5; 3 Nifai 27:20. E rawa talega nio railesuva na itukutuku na “E Dua na iSolisoli Talei” (iTokani, Okosita 2023, 18–19).

Ni se bera na kalasi, kerea edua se sivia na itubutubu ni gone mera wasea na sala era sa vakalougatataki kina baleta ni tu vei ira na isolisoli ni Yalo Tabu. E vukei ira vakacava o Koya? Era rogoca vakacava na Domona?

Lagata vata e dua na sere baleta na Yalo Tabu, me vaka na “Jisu Karisito” (Volanisere ni Gonelalai, 56). Vukei ira na gone mera kila vakavinaka na cava e vakavulica vei keda na sere me baleta na sala e rawa ni vukei keda kina na Yalo Tabu.

Vukei ira na gone mera vakasamataka na sala duidui eso eda rawa ni vosa kina vua edua na itokani e tiko vakayawa sara, me vaka na volai ni dua na ivola, vakauta e dua na imeli, se vosa ena talevoni. Vakavulica vei ira ni rawa ni vosa vei keda na Tamada Vakalomalagi ena sala duidui eso mai vua na Yalo Tabu. Vakayagataka na itukutuku nei Peresitedi Dallin H. Oaks “How Does Heavenly Father Speak to Us?” me vukei ira na gone mera kila na duidui ni sala e rawa ni vosa kina na Yalo Tabu kina noda vakasama kei na yaloda (iTokani, Maji 2020, F2–F3).se Liahona, Mar. 2020, F2–F3).

Wasea edua na gauna a vosa kina vei iko na Yalo Tabu, ena nomu vakanananu se mai na dua na ka o vakila e lomamu (raica na Vunau kei na Veiyalayalati 6:22–23; 8:2–3; raica talega na Henry B. Eyring, “Open Your Heart to the Holy Ghost,” Liahona, Okosi. 2019, F2–F3). Vakadinadinataka vei ira na gone ni rawa ni vukei ira na Yalo Tabu ena sala eso vaka oqori.

Vukei ira na gone mera kila na veigauna eso era a vakila kina na Yalotabu—me vaka, ni lagati edua na sere me baleta na iVakabula se nira cakava edua na ka vinaka vei ira na tani. Vukei ira mera kila na nanuma vakayalo e kauta mai na Yalo Tabu, vakabibi na Nona veivakauqeti meda cakacaka. Na cava o nanuma e vu ni nona solia vei keda na Yalo Tabu na vei yalo vakaoqori? Vukei ira na gone mera vakasamataka na veika e gadrevi meda cakava meda rogoca kina na Yalo Tabu ni vosa vei keda. Veitalanoataka na veika o dau cakava mo rogoca vakamatata cake kina na Yalo.

Sureti ira na gone mera rokataka na “Jesus Introduced the Sacrament to the Nephites” ena Scripture Stories Coloring Book: Book of Mormon (2019), 26. Kerei ira mera dusia na veika era vakasamataka tiko na tamata ena iyaloyalo. Wilika vei ira na gone na iwasewase eso ni 3 Nifai 18:1–12 se “Jesus Shares the Sacrament,” ena Book of Mormon Stories. Na cava e rawa nida cakava me da dau vakasamataki Jisu kina ena gauna ni sakaramede?

Kerei ira na gone mera tukuna vei iko eso na ka e dodonu mera dau nanuma tiko ga mera cakava, me vaka na vesuki ni nodra ivava se savati ni ligadra ni bera nira kana. Na cava na vuna e bibi kina meda nanuma tu na veika oqo? Wilika na Moronai 4:3 vei ira na gone, ka sureti ira mera vakarogoca na veika eda yalataka meda dau nanuma ena gauna eda vakayagataka kina na sakaramede. Na cava e bibi kina na noda nanumi Jisu Karisito? Vukei ira na gone mera kila na ivakarau e vukei keda kina na madrai kei na wai ni sakaramede me da nanuma na veika esa cakava ena vukuda o Jisu (raica na Moronai 4:3; 5:2).

Vola ena papa “Au yalataka me …” Wilika na masu ni sakaramede vei ira na gone (raica na Vunau kei na Veiyalayalati 20:77, 79). Nira rogoca edua na yalayala eda cakava vua na Kalou, cegu ka vukei ira mera vakacavara na iyatuvosa ena vava ni volavola vata kei na yalayala era rogoca.

Na cava na kena ibalebale mo taura ena nomu bula na yaca i Jisu Karisito? Me vukei ira na gone mera sauma na taro oqo, wasea e dua na ivakaraitaki ni dua na ka eda biuta kina na yacada. Cava na vuna eda biuta kina na yacada ena veika oqo? Na cava na vuna ena vinakata kina o Jisu Karisito meda taura vei keda na Yacana? Sa rawa mo wasea na ivakamacala oqo mai vei Peresitedi Russell M. Nelson: “Na taura na yaca ni iVakabula e oka kina na kena cavuti ka vakadinadinataki vei ira na tani—mai na noda ivalavala kei na noda vosa—nio Jisu na Karisito” (“Na Yaca Dodonu ni Lotu,” Liaona, Nove. 2018, 88).

Vukei ira na gone mera raica na veivakalougatataki era ciqoma ena vuku ni matabete. Me soli vei ira eso na vakasama, sa rawa mo vakaraitaka na vidio “Blessings of the Priesthood” (Gospel Library). Sa rawa mo vola na veivakalougatataki oqo ena vava ni volavola. Na cava era bibi kina vei keda na veivakalougatataki oqo? Vakadinadinataka ni veivakalougatataki oqo e lako mai vei keda ena vukui Jisu Karisito kei na Nona kaukauwa ni matabete.

3:5

Vukei ira na gone mera kunea na iyaloyalo eso e vakaraitaka na sala e vakayagataka kina na Kalou na Nona kaukauwa me vakalougatataki keda. Me ivakaraitaki, e rawa nira kunea edua na iyaloyalo kei vuravura a bulia vei keda, ivakaraitaki ni nodra vakabulai na tauvimate, kei na veicakacaka vakalotu tabu sa vakarautaka tu vei keda o Koya (raica na iVola ni iYaloyalo Vakosipeli, naba 3; 46; 104; 105; 107, 120). Wasea na vuna o vakavinavinakataka kina na matabete kei na veivakalougatataki e kauta mai. Vukei ira na gone mera vakasamataka na veika era sotava nira a vakalougatataki ena kaukauwa ni matabete ni Kalou.

Edua vei ira na sala bibi eda ciqoma kina na veivakalougatataki ni kaukauwa ni Kalou ena noda bula sa ikoya mai na cakacaka vakalotu ni matabete (raica na Vunau kei na Veiyalayalati 84:20). Me vukei ira na gone mera vulica na dina oqo, e rawa nio vola na ivolanikalou eso oqo ena vava ni volavola: 3 Nifai 11:21–26, 33 (papitaiso); Moronai 2 (veivakadeitaki); Moronai 4–5 (sakaramede). Era rawa nira digitaka yadua na gone edua vei ira na veitikina oqo ka vakaraica na cakacaka vakalotu e vakamacalataka tiko. Sureti ira na gone mera wasea na sala era sa vakalougatataki kina ena nodra ciqoma na cakacaka vakalotu ni matabete.

Vukei ira na gone mera kila nira na ciqoma na kaukauwa mai vua na Kalou nira papitaiso oti ka maroroya na nodra veiyalayalati ni papitaiso. Tarogi ira na gone se ena rawa ni vukei ira vakacava na kaukauwa oqo.

Wilika vata kei ira na gone na Marika 3:14–15, ka vakaraitaka vei ira edua na iyaloyalo ni veika a yaco e vakamacalataki e kea (me vaka na iVola ni iYaloyalo Vakosipeli, naba 38). Tarogi ira na gone se era sa bau raica oti edua me vakatikori kina dua na veikacivi se tabaki kina dua na itutu ni matabete (se tukuna vei ira na veika o sa sotava oti). E tautauvata vakacava kei na veika a vakayacora na iVakabula vata kei iratou na Nona iApositolo? Vukei ira na gone mera tuva ena vava ni volavola na itutu ni matabete se veikacivi e rawa ni soli vei ira na lewe ni Lotu, me vaka na qasenivuli se iliuliu ena dua na mataisoqosoqo. Tikiva na itutu ni matabete se veikacivi yadua, sa rawa nio vola kina na cava e rawa ni vakayacora e dua ka tiko vua na itutu se veikacivi oya. Tukuna vei ira na gone na sala cava sa vukei iko kina ena nomu veiqaravi na nomu vakatikori mai vua edua ena veidusimaki ni idola ni matabete.

Sureti ira na gone mera vakasamataka edua na ka o gadreva kina edua na ki, me vaka edua na motoka se katuba. Na cava ena yaco kevaka e sega vei iko na ki? Wilika vata na Vunau kei na Veiyalayalati 65:2, ka wasea na nomu ivakadinadina me baleta na bibi ni kena tiko na idola ni matabete e vuravura. E rawa talega ni o sarava na vidio “Evei na Ki kei na Lewa ni Matabete?” (Valenivola Vakosipeli) ka vakaraica na veika e vakavulica o Elder Gary E. Stevenson me baleta na idola ni matabete.

2:51

Vakaraitaka edua se sivia na iyaloyalo ni valetabu. Tarogi ira na gone se cava na vuna e vakasakiti kina na valetabu. Dusimaka ni tu ena veivaletabu yadua sara na ivakamacala oqo: “Vakatabui me Nona na Turaga: Na Vale ni Turaga.” Tarogi ira na gone na cava era nanuma ni rawa ni kena ibalebale “Vakatabui me Nona na Turaga.” Na cava e vakatokai kina na valetabu me vale ni Turaga? Na cava e vakavulica vei keda oqo me baleta na valetabu? Kevaka edua vei ira na gone sa gole oti kina valetabu, e rawa talega nira wasea na veika era a vakila ena gauna era a tiko kina e kea. Kevaka o sa lesu mai na valetabu, wasea nomu vakila na Turaga ni tiko e kea, ka tukuna na vuna e vanua tabu kina vei iko na valetabu.

Wilika vata na Vunau kei na Veiyalayalati 97:15–17. Kerei ira na gone mera vaqara na veika e namaka na Turaga vei ira na tamata era via curu kina Nona vale tabu. Na cava na vuna e gadrevi kina meda bula kilikili meda curu kina kina Nona vale? Me tiki ni veitalanoa oqo, tukuna vei ira na gone me baleta na ivolatara ni valetabu, oka kina na sala ni kena ciqomi edua. Sa rawa mo sureta edua na lewe ni matabisopi me wasea vei ira se vakacava tu na veivakatarogi ni ivolatara ni valetabu kei na taro eso e tarogi kina.

Kerei ira na gone mera vukei iko mo railesuva na veiyalayalati eda cakava vua na Kalou nida papitaiso kei na noda vakaivotavota ena sakaramede (raica na Mosaia 18:10, 13; Vunau kei na Veiyalayalati 20:77, 79). Vakaraitaka edua na itaba ni dua na valetabu ka vakamacalataka ni Tamada Vakalomalagi e tu vei Koya e levu sara na veivakalougatataki ka vinakata me solia vei keda ena valetabu.

Droinitaka e dua na matamata e mua kina dua na sala. Tarogi ira na gone se cava na vuna era nanuma kina ni na veivuke me tiko e dua na salatu meda lako kina. Wilika vata na 2 Nifai 31:17–20, ka vakatauvatana kina o Nifai na veiyalayalati ni papitaiso kina dua na matamata ka sureti keda meda lako tiko ena salatu ni oti na papitaiso. E levu tale na veiyalayalati e tiko mena vakayacori ni oti na papitaiso, oka kina na veiyalayalati e vakayacori ena valetabu. Vakamacalataka ni vakatoka o Peresitedi Nelson na salatu oqo me “salatu ni veiyalayalati.”

Veitalanoataka edua na gauna ea cakava kina edua na tamata edua na ka vei iko ka o sega ni rawa ni cakava vei iko. Sureti ira na gone mera wasea na veigauna vaqori. Vakamacalataka ni gauna eda gole kina i valetabu, sa rawa nida ciqoma na cakacaka vakalotu tabu me vaka na papitaiso ena vukudra na tani era sa mate. Eda sa vakataki Jisu vakacava nida vakayacora tiko na cakacaka me baleti ira na mate? Na cava esa vakayacora ena vukuda na iVakabula ka da a sega ni rawa ni cakava vei keda?

Sureta edua se sivia na itabagone ka sa papitaiso oti ena vukudra na nodra qase e liu mera wasea na veika era sotava. Tarogi ira se a vakacava tu na tiko e loma ni valetabu. Vakayaloqaqataki ira mera wasea na veika era a vakila nira cakava tiko na cakacaka oqo me baleti ira na nodra qase e liu.

Droinitaka edua na vunikau ena vava ni volavola, oka kina na wakana kei na tabana. Kerei ira na gone mera vakasamataka se tautauvata vakacava kei na dua na vunikau e dua na matavuvale. Vakayacana na wakana me Qase e Liu, na veitabana mera Kawa, kei na tolo ni vunikau me o iKo. Wilika vata na iyatuvosa oqo mai na Vunau kei na Veiyalayalati 128:18: “Nida na sega ni rawa ni vakavinakataki sara koi keda kevaka e sega [o ira noda qase e liu]; era na sega talega ni vakavinakataki sara ko ira kevaka e sega o keda.” Taroga na taro vakaoqo: “Na cava eda gadrevi ira kina na noda qase e liu? Na cava era gadrevi keda kina na noda qase e liu? Era sa vukei keda vakacava na noda itubutubu, tubuda, kei ira na noda qase e liu tale eso?” Sureti ira na gone mera vakasaqaqara ena vo ni Vunau kei na Veiyalayalati 128:18 me baleta e dua na malanivosa e vakamacalataka na sala eda rawa ni vukei ira kina na noda qase e liu.

Sa rawa mo cakacaka vata kei rau na itubutubu ni gone yadua me kunea na yaca ni dua na tubuda e gadreva na cakacaka vakalotu ena valetabu (raica na FamilySearch.org).