N̄an Pāāren ro—Kōpooj Ajri ro Nejum̧ n̄an juon Mour Ejjeļo̧k Jemļo̧k ilo Iaļen Bujen in an Anij

Nipai ekar kwaļo̧k bwe “kōjām eo [jej] aikuj deļo̧n̄ ie” iaļan bujen eo “ej ukeļo̧k im peptaij kōn dān” (2 Nipai 31:17). Kijejeto eo am̧ n̄an jipan̄ ajri ro nejum̧ kōppopo n̄an peptaij im kapen emaron̄ jino kapen neer ilo iaļ in. Kijejeto kein rej ijjino kōn katakin kōn tōmak ilo Jisōs Kraist im ukweļo̧k. Rej barāinwōt kobaik katak eo kōn wāween kōkāāl bujen peptaij ko ilo ad bōk kwojkwoj eo kajjojo wiik.

Errein jet iaan kein katakin ko me remaron̄ jipan̄ eok: 2 Nipai 31; enaan eo ilo Jera māākjiin kōn peptaij; Unin Kōnono ko im Kajjitōk ko, “Baptism,” Gospel Library.

• Jabdewōt iien ewōr am̧ en̄jake eo ej kōkajoor tōmak eo am̧ jān Jemedwoj Ilan̄ im Jisōs Kraist, kwaļo̧k n̄an ajiri eo nejim. Jipan̄ er meļeļe bwe tōmak ej juon men me emaron̄ kajoor im bar kajoorļo̧k ilo aolepen mour in. Ta jet iaan men ko ajri eo nejum̧ remaron̄ kōm̧m̧ane n̄an kakajoorļo̧k tōmak ilo Kraist m̧okta jān aer peptaij?

• Eļan̄n̄e ajri eo nejum̧ ej kōm̧m̧ane juon kāālet ebōd, kōnono kōn m̧ōņōņō eo kōn menin letok eo an ukweļo̧k. Im n̄e kwoj kōm̧m̧ane juon kāālet ebōd, kwaļo̧k m̧ōņōņō in me ej itok n̄e kwoj ukeļo̧k kajjojo raan. Kwaļo̧k am̧ naan in kamool bwe kōn an Jisōs Kraist kar en̄taan im mej kōn jerawiwi ko ad, jemaron̄ ukweļo̧k aolep raan, im jeorlo̧k ad bōd, im bōk kajoor n̄an oktak. N̄e ajri eo nejum̧ ej pukot jeorļo̧k bwōd, jeorļo̧k an bwōd ilo ejjeļo̧k wōņāān im m̧ōņōņō.

• Ba n̄an ajri ro nejum̧ kōn iien peptaij eo am̧. Kwaļo̧k pija ko im kwaļo̧k iien ko rekam̧ōņōņō. Kwaļo̧k kōn en̄jake ko am̧, wāween am̧ kōjparok bujen peptaij eo am̧ bwe en em̧m̧anļo̧k am̧ jeļā kōn Jisōs Kraist, im wāween an bujen eo kōjeraam̧m̧an mour eo am. Rōjan̄ ajri eo nejum̧ n̄an kajjitōk kajjitōk ko.

• Eļan̄n̄e ewōr juon ej peptaij ilo baam̧le eo am̧ ak ilo ward eo am̧, bōk ajri eo bwe en lale. Kōnono n̄an doon kōn ta eo kwe kab ajri eo nejum̧ eaar loe im en̄jake. Eļan̄n̄e emaron̄, kōnono ippān armej eo em̧ōj an peptaij im kajjitōk kajjitōk ko āinwōt in: “Elmen am̧ kar kōm̧m̧ane kāālet in? Elmen am̧ kar kōppopo?”

• Jabdewōt iien kwoj kile ke ajri ro nejum̧ rej kōm̧m̧ane juon men raar kallim̧ur in kōm̧m̧ane, m̧ool in leļo̧k nōbar. Kwaļo̧k bwe kōjparok kien ko ej jipan̄ kōj pojak n̄an kōjparok bujen ko jej kōm̧m̧ani ke jaar peptaij. Ta eo jej kallim̧ur ippān Anij n̄e jej peptaij? Ta ko E ej kallim̧uri kōj kaki? (Lale Mosaia 18:8–10, 13.)

• Kōnono elmen am̧ kar kapen im erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata kar kōjeram̧m̧an eok. N̄an waanjon̄ak, elmen am̧ epaake Jemedwoj Ilan̄ im Jisōs Kraist āinwot am̧ kar jipan̄ ro jet im an ro jet kar jipan̄ eok? Jipan̄ ajri eo nejum̧ ļōmņak kōn waween ko n̄an jipan̄ im kōkajoorļo̧k ro jet āinwot juon membōr ilo Kabun̄ in. Bar jipan̄ er en̄jake im kile m̧ōņōņō eo me ej itok jān jerbal in jipan̄.

• Eļan̄n̄e kwe im ajri eo nejum̧ ewōr ami en̄jake ekwojarjar ippān doon (āinwōt ilo im̧ōnjar eo, ilo iien riiti jeje ko rekwojarjar, ak ilo iien eo komiro ej jerbal in jipan̄ n̄an juon), ba n̄an e kōn en̄jake eo an jetōb ak im̧we ko kwoj en̄jaki. Karuwainene ajri eo nejum̧ n̄an kwaļo̧k elmen aer en̄jake. Je wāween ko rokkotaktak me Jetōb emaron̄ kōnono n̄an armej ro, ekoba wāween ko E ej kōnono n̄an eok make. Jipan̄ ajri ro nejum̧ kile iien ko ippam̧ me remaron̄ en̄jake im̧we eo an Jetōb Kwojarjar.

• Alooj ippān doon jejjo bitio ko ilo Gospel Library eo ņa etan “Ron̄jake E!” Kōnono kōn wāween ko rokkotaktak me rijerbal ro an Irooj rej ron̄ Ainikien. Kajjitōk ippān ajri eo nejum̧ bwe en jin̄aik juon pija ak kōm̧m̧ane juon pija kōn elmen aer ron̄ ainikien Rilo̧mo̧o̧r eo.

• Kōm̧m̧an bwe iien kwojkwoj eo en juon iien ekwojarjar im elem̧ōņōņō n̄an baamle eo am̧. Kwaļo̧k n̄an ajri eo nejum̧ elmen am̧ mije Jisōs Kraist ilo iien kwojkwoj eo. Jipan̄ ajri ro nejum̧ kōm̧m̧ane juon karōk n̄an kwaļo̧k bwe kwojkwoj eo ekwojarjar n̄an er. N̄an waanjon̄ak, ron̄jaki naan in jar ko an kwojkwoj eo emaron̄ kakeememej kōj kōn bujen peptaij ko ad.

• Aolep māākjiin ko rededelo̧k ilo Eo Jera ekoba ennaan ko, bwebwenato ko, im m̧akūtkūt ko n̄an jipan̄ ajri ro kōppopo n̄an peptaij im kapene. Kōtļo̧k bwe ajri eo en kāālet jet n̄an riiti im lem̧ōņōņō ippam̧ kaki. (Lale barāinwōt collection eo “Preparing for Baptism” ilo jekjōn eo an ajri ilo Gospel Library eo.)

Priesthood ej mālim im kajoor eo an Anij eo me E ej kōjeraam̧m̧an ro Nejin. Priesthood eo an Anij ej pād laļ in rainin ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. “Aolep membōr in Kabun̄ in me rej kōjparok bujen ko aer—kōrā ro, em̧m̧aan ro, im ajri ro—rej jeraam̧m̧an kōn kajoor in priesthood eo an Anij ilo im̧ōko im̧wer n̄an kōkajoorļo̧k er make im baam̧le ko aer” (Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 3.6, Gospel Ļaibrāre). Kajoor in enaaj jipan̄ membōr ro n̄an kōm̧m̧ane jerbal in lo̧mo̧o̧r im mour āinwōt Anij ilo mour ko aer make im baam̧le ko (lale Bok in Bōk Meļeļe Eļap2.2).

Eļan̄n̄e m̧aan im kōrā ro rej kōm̧m̧ane jerbal in kūr ko ilo Kabun̄ in, rej kōm̧m̧ane kōn mālim eo an priesthood eo, ium̧win tōl eo an ro rej kabwijer priesthood kii ko. Aolep ajri ro nejin Jemedwōj Ilan̄—ļadddik ro Nejin im leddik ro Nejin—renaaj jeraam̧m̧an ilo an ļapļo̧k aer meļeļe kōn priesthood eo An.

Jej bōk kain̄i kein kōn mālim eo an priesthood eo. “Em̧m̧aan ro rōrreo uwaan Kabun̄ in rej bōk mālim eo an priesthood kōn leļo̧k im ekkapit an priesthood eo n̄an opij ko an priesthood” (Bok in Bōk Meļeļe Eļap, 3.4). Ro rej kabwijer opiij ko an priesthood remaron̄ bōk mālim jān juon eo ej kabwijer kii ko an priesthood n̄an kōm̧m̧ane kain̄i ko an prieshood.

N̄an katak eļapļo̧k kōn priesthood, lale Russell M. Nelson, “Mennin Aorōk ko ilo Jetōb,” Liaona, Nov. 2019, 76–79; Russell M. Nelson, “Oņāān Kajoor in Priesthood eo,” Liaona, Māe 2016, 66–69; “Pedped in Katak ko an Priesthood,” jebta 3 ilo Bok in Bōk Meļeļe Eļap.

• Kōm̧m̧an bwe kain̄i ko an priesthood ren pād ilo mour ko an baam̧le eo am̧. N̄an waanjon̄ak, jipan̄ ajri ro nejum̧ kōppopo ilo jetōb n̄an kwojkwoj eo kajjojo wiik. Rōjan̄ ajri ro nejum̧ n̄an pukōt kōjeraam̧m̧an eo an priesthood eļan̄n̄e rej nan̄inmej ak aikuj kaeņōm̧m̧an ak tōl. Kōm̧m̧an bwe en juon iminene n̄an kwaļo̧k wāween ko Irooj ej kōjeraam̧m̧an baam̧le eo am̧ kōn kajoor eo An.

• Ilo am̧ riiti eoon kein, lale iien ko rem̧m̧an n̄an kōnono kōn wāween an Anij kōjeraam̧m̧an armej kōn kajoor eo An. Kwaļo̧k en̄jake eo am̧ make an Anij kar kōjeraam̧m̧an eok jān priesthood eo An. N̄an waanjon̄ak kōn kōjeram̧m̧an ko jej būki jān Anij jān priesthood eo, lale Bok in Bōk Meļeļe Eļap, 3,23,5.

• Katakin ajri eo nejum̧ bwe ālkin peptaij, remaron̄ bok kajoor an Anij ilo aer kōjpārok bujen peptaij eo aer. Etale ippān doon ennaan eo an Būreejtōn Russell M. Nelson “Mennin Aorōk ko ilo Jetōb” (Liaona, Nob. 2019, 76–79). Ba n̄an ajri eo nejum̧ elmen an kain̄i ko boktok kajoor n̄an mour eo am̧. N̄an juon laajrak in wāween ko jej jeraam̧m̧an jān kajoor eo an Anij, lale Bok in Bōk Meļeļe Eļap, .3.5.

• Kōnono kōn kajjitōk in “Ta eo juon rijerbal an Irooj ej āinwōt?” Riit ippān doon Katak im Bujen ko 121: 36-42, im pukot uwaak ko. Jabdewōt iien kwoj kile an ajri eo nejum̧ (ak bar juon armej) mour kōn juon iaan katak ko ak waanjon̄ak ko ilo eoon kein, kwaļo̧ki.

• Eļan̄n̄e kwe im ajri eo nejum̧ ej kōjerbale kii n̄an kōpeļļo̧ke juon kōjem ak kajoe juon wa, bōjrak jidik im keidi kii ko n̄an kii ko me ritōl ro an priesthood ro rej kabwijeri. (N̄an meļeļe kōn priesthood kii ko, lale Bok in Bōk Meļeļe Eļap, 3.4.1). Ta ko priesthood kii ko rej “kōpeļļoke” ak “jinoe” n̄an kōj? Bar lale Gary E. Stevenson, “Ewi Ki ko im Mālim eo an Priesthood?,” Liaona, Māe 2016, 29–32; “Ewi Ki ko?”

  

  2:51

Tampeļ ko rej m̧ōttan karōk eo an Jemedwōj Ilan̄ n̄an ro Nejin. Ilo m̧weo m̧ōn Irooj, jej kōm̧m̧an bujen ko rekwojarjar ippān Jemedwōj Ilan̄ ilo ad bōk kuņaad ilo kain̄i ko rekwojarjar, eo me aolepen enaaj tōllok n̄an Jisōs Kraist. Jemedwōj Ilan̄ ekar kōpooj juon iaļ n̄an aolep ajri ro Nejin n̄an kōm̧m̧an bujen ko n̄an bōk kunaad ilo kain̄i ko, ekoba ro rekar jab būki ilo mour in. Ilo jinoin juon iiō me ajri eo nejum̧ ej jejjet 12, an iiō, ebwe aer erūtto n̄an peptaij im kapene ilo tampeļ eo n̄an rūtto ro aer remej (bar lale 1 Korint 15:29).

• Em̧akijkij am̧ etal n̄an m̧weeo im̧ōn Irooj n̄e wāween ko am̧ rekkar. Kōnono ippān ajri eo nejum̧ etke kwoj etal im elmen an tampeļ eo jipan̄ eok epaakeļo̧k Jemedwoj Ilan̄ im Jisōs Kraist.

• Bar etale im kōnono kajjitōk ko n̄an bōk mālim n̄an deļon̄e tampeļ ippān doon. Kwomaron̄ loi ilo peij 36–37 in N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko Kōnono n̄an ajri eo nejum̧ kōn ta eo ej waļo̧k ilo iien intōrpiu eo n̄an bōk mālim n̄an deļon̄e tampeļ. Kwaļo̧k etke eaorōk n̄an bōke juon pepa in mālim n̄an deļo̧n̄e tampeļ n̄an kwe.

• Riit ippān doon Malakai 4:6. Kōnaan kōn wāween am̧ ukōt būruom̧ n̄an ro jibūm̧ im jim̧aam̧. Katak eļapļo̧k kōn ro jibūm̧ im jim̧m̧aam̧ ilo am̧ etale bwebwenato in baam̧le ko ami ippān doon ilo FamilySearch.org. Pukōt jibūd im jim̧aad ro rej aikuj peptaij im kapene. Rijipan̄ eo an ward im tempeļ menmenbwij an baam̧le emaron̄ jipan̄ eok.

• Etale ippān doon jet kein jipan̄ ko ilo collection eo ņae etan “Temple” ilo jekjōn eo an ajri ilo Gospel Library eo. (Bar lale “Preparing Your Child for Temple Baptisms and Confirmations” ilo ChurchofJesusChrist.org.)

Juon kōjeraam̧m̧an an petriak emaron̄ juon kein jipan̄ n̄an tōl, aeņōm̧m̧an, im im̧we. Epād ie ko̧o̧njeļ eo ad make jān Jemedwōj Ilan̄ n̄an kōj n̄an jipan̄ kōj meļeļe wōn kōj im jibadbad eo ad n̄an indeeo. Jipan̄ ajri eo nejum̧ pojak n̄an bōk juōn kōjeraam̧m̧an an petriak ilo am̧ katakin er aorōkin im piktok in ekwojarjar kōn kōjeraam̧m̧an ko an petriak.

N̄an katak eļapļo̧k, lale Topics and Questions, “Patriarchal Blessings,” Gospel Library.

• Kwaļo̧k n̄an ajri eo nejum̧ en̄jake eo am̧ ilo am̧ bōk juon kōjeraam̧m̧an an petriak. Kwomaron̄ kwaļo̧k men ko āinwōt elmen am̧ kar pojak n̄an bōke, elmen an jipan̄ eok epaaketok Anij, im elmen an wōnm̧aanļo̧k in tōl eok ilo kōjeraam̧m̧an in. Kwomaron̄ barāinwōt kajjitōk ippān ajri eo nejum̧ n̄an kōnono ippān ro uwaan baam̧le ko jet ro me rekar bōk kōjeraam̧m̧an ko an petriak.

• Etale ippān doon enaan eo Elder Randall K. Bennett “Kōjeraam̧m̧an an Petriak eo Am—Im̧we in Tōl jān Jemedwōj Ilan̄” im enaan eo an Elder Kazuhiko Yamashita “N̄aat Kwoj Bōk Petriak Kōjeraam̧m̧an Eo Am̧” (Liaona, Māe 2023, 42–43, 88–90). Kwaļo̧k n̄an doon ta eo kom̧ij ekkatak jān ennan kein etke Jemedwōj Ilan̄ ekōn̄aan bwe jen bōk juon kōjeraam̧m̧an in petriak. N̄an ekkatak kōn bun̄tōn ko n̄an bōke kōjeraam̧m̧an an petriak, lale Bok in Bōk Meļeļe Eļap, 18.17.

• Eļan̄n̄e ewōr ro nukum raar bōk kōjeraam̧m̧an eo an petriak, emaron̄ im̧we eok n̄an riiti jet iaer n̄an ajiri ro. N̄an kajjitōk kōjeraam̧m̧an ko an rūtto ro remej, deļon̄e ChurchofJesusChrist.org, jipede Tools ilo tuanmiin̄ lōn̄ in kona eo an screen eo, im jipede Patriarchal Blessing.

• Ālkin an ajri eo nejum̧ bōk juon kōjeraam̧m̧an in petriak, karuwaineneik ro uwaan baam̧le eo me raar pād ijo bwe ren je en̄jake ko aer im kwaļo̧k ippān ajri eo nejum̧.

Anij ekōņaan kakwojarjar, ak kōjeraam̧m̧an, aolep ajri ro Nejin ippān “kajoor jān ijo euteij” (Katak im Bujen ko 95:8). Jej etal n̄an tampeļ n̄an bōk menin letok kwojarjar eo ad make juon wōt kōttan, ak bujen eo jej kōm̧m̧āne ippān Anij im kajoor in jetōb eo Ej letok n̄an kōj ekoba menin letok kwojarjar eo emaron̄ kōjeraam̧m̧an kōj aolep raan ilo mour ko ad.

• Likūt juōn pijain tampeļ ilo m̧weo im̧ōm̧. Ba n̄an ajri eo nejum̧ kōn en̄jake ko am̧ ilo m̧weeo im̧ōn Irooj. En ekkā am̧ kōnono kōn iakwe eo am̧ n̄an Irooj im M̧weo Im̧ōn im bujen ko kwar kōm̧m̧ane ijōņ. Pukot iien ko rem̧m̧an n̄an etal n̄an tampeļ ippān ajri eo nejum̧ n̄an kōm̧m̧ani peptaij im kapen ko n̄an rūtto ro aer.

• Etale temples.ChurchofJesusChrist.org ippān doon. Riit enaan ko āinwōt “About the Temple Endowment” im “Prepare for the House of the Lord.” Kōtļo̧k an ajri eo nejum̧ kajjitōk jabdewōt kajjitōk ko ewōr ippāer kōn tampeļ eo. Kōn unin tōl ko kōn ta eo kwomaron̄ kōnono kake nabōj in tampeļ, lale ennaan eo an Elder David A. Bednar “Pojak n̄an Bōk Aolep Aikuj Otemejeļo̧k” (Liaona, Māe 2019, 101–4; lale eļaptata jekjōn eo etan “Ekkatak eo Ejelet M̧weo im Kabun̄ ej Rie im Kōpopo n̄an Tam̧peļ”).

• Ilo am̧ im ajri eo nejum̧ bok kwonaam̧ ie ak kam̧ool kain̄i ko jet (āinwōt kwojkwoj eo im kōjeraam̧m̧an eo an kōmour), bōk jidik iien n̄an kōnono kōn kōkaļļe ko ekoba ippān kain̄i ko. Ta kōkaļļe ko rej jutak kaki? Ewi wāween aer kam̧ool kōn Jisōs Kraist? Menin emaron̄ jipan̄ kōpooje ajri eo nejum̧ n̄an lin̄uri kōkaļļe in melele eo an kain̄i ko an tampeļ, eo ej kam̧ool kōn Jisōs Kraist.

• Jipan̄ ajri ro jeļā ekōjkan aer kōjpārok bujen peptaij eo aer kar kōmeļeļeik ilo Mosaia 18:10, 13 (bar lale eoon 8–9, eo me ej kōmeļeļeik le ko leen bujen eo. Barāinwōt jipan̄ ajri eo nejum̧ kile elmen an Irooj kōjeraam̧m̧ane er. Kalek lōke eo an ajri eo nejum̧ ilo aer maron̄ in dāpij bujen ko.

• Emakijkij kōnono kake kōn wāween an bujen tampeļ ko tōl kāālet ko am̧ im jipan̄ eo epaakeļo̧k Jisōs Kraist. Kwomaron̄ kōjerbal Bok in Bōk Meļeļe Eļap, 27,2, n̄an etale bujen ko jej kōm̧m̧ani ilo tampeļ. N̄e em̧ōj am̧ bōk menin letok kwojarjar(endowment) eo am̧, jiron̄ ajri ro nejum̧ elmen an kaarmen eo an tampeļ jipan̄ eok keememej bujen ko am̧ ippān Jisōs Kraist (lale “Sacred Temple Clothing” [video], Gospel Library; Anette J. Dennis, “Likūt Eok Ioon Irooj Jisōs Kraist,” Liaona, Māe 2024, 10–13).

  

  4:12

Elder David A. Bednar ekar katakin: “Men eo aorōktata kwomaron̄ kōm̧m̧an n̄an kōppopo n̄an juon kūr ej n̄an erom̧ juon mijenede m̧okta jān am̧ etal n̄an juon mijen. … Menin ejjab n̄an etal n̄an juon mijen; ijjeļo̧kin, menin ej n̄an erom̧ juon mijinede im jerbal ilo aolepen mour ko ad kōn aolepen būruōd, maron̄, ļōmņak, im kajoor. … Kwoj kōppopo ilo jerbal in mijenede ilo aolepen mour eo am̧” (“Becoming a Missionary,” Liaona, Nov. 2005, 45–46). En̄jake ko an ajri eo nejum̧ ilo erom juon mijenede renaaj jipan̄ kōjeraam̧m̧an er indeeo, ejjab iien eo wōt me rej jerbale juon mijen.

N̄an ekkatak eļapļo̧k, lale Russell M. Nelson, “Kwaļo̧k Gospel in Aenōm̧m̧an eo,” Liaona, Māe 2022, 6–7; Gary E. Stevenson, “Iakwe, Kwaļo̧k, Karuwainene,” Liaona, Māe 2022, 84–87; “Adjusting to Missionary Life,” Gospel Library.

• Kwaļo̧k ekōjkan am̧ kwaļo̧k gospel eo ilo wāween ko rekkar. Aolep iien lale iien ko rem̧m̧an n̄an kwaļo̧k ippān ro jet en̄jake ko am̧ kōn Jemedwōj Ilan̄ im Rilo̧mo̧o̧r eo im kōjeraam̧m̧an ko kwoj būki gospel eo kar kōjepļaaktok an Rilo̧mo̧o̧r eo āinwōt juon membōr in Kabun̄ eo An. Kūrtok ro jet n̄an kobatok ippān baamle eo ilo m̧ōnjar eo im m̧akūtkūt ko an baam̧le.

• Lale iien ko rem̧m̧an n̄an baamle eo n̄an bōk kwoņaer ippān mijenede ro. Kajjitōk ippāer n̄an katakin ro mōttam̧, ak kōtļo̧k er n̄an katakin armej ro ilo m̧weo imōm̧. Kajjitōk ippān mijenede ro kōn en̄jake ko aer me ewōr ippāer im elmen an jerbal in mijenede jipan̄ er epaakeļo̧k Jisōs Kraist. Barāinwōt kajjitōk ta eo rekar kōm̧m̧ane (ak rekar kōņaan kōm̧m̧ane) n̄an kōppopo n̄an erom̧ mijenede ro.

• N̄e kwar jerbal ilo juon mijen, kōnono ilo alikkar im emakijkij kōn en̄jake ko am̧. Ak kūrtok m̧ōttam̧ ak ro uwaan baam̧le eo am̧ me rekar mijen n̄an kōnono kōn en̄jake ko aer. Kwomaron̄ barāinwōt kōnono kōn wāween ko kwar kwaļo̧k kōn gospel eo ippān ro jet ilo mour eo am̧. Jipan̄ ajri eo nejum̧ ļōmņak kōn wāween ko emaron̄ kwaļo̧k kake kōn gospel eo.

• Leļok n̄an ajri eo nejum̧ iien ko rem̧m̧an n̄an katakin baam̧le eo am̧ pedped in katak ko an gospel in. Ajri eo nejum̧ emaron̄ bar ekkatak kilen kwaļo̧k kōn tōmak ko aer n̄an ro jet. N̄an waanjon̄ak, kwomaron̄ kwaļok kajjitōk ko āinwōt “Elmen ad kwaļo̧k kōn Bok in Mormon n̄an juon armej eo ejjan̄in kar ron̄ kake?” ak “Elmen ad kōm̧eļeļeik aikuj eo an Rilo̧mo̧o̧r n̄an juon armej eo ejjab Kūrijin?” (Lale Ahmad S. Corbitt, “Kwojeļā Etke N̄a Āinwōt juon Rikūrijtin Ij Tōmak ilo Kraist?,” Liaona, Māe 2023, 119–21.)

• Jipan̄ ajri eo nejum̧ bwe en em̧m̧an an kōnono ippān armej. Ta jet iaan wāween ko rem̧m̧an n̄an jino juon ekōnono? Rojan̄ ajri eo nejum̧ n̄an ekkatak elmen n̄an ron̄jake ta ko ro jet rej ba, meļeļe ta eo ej pād būrueer, im kwaļo̧k m̧ool ko an gospel eo emaron̄ kōjeraam̧m̧an būrueer.

• Lale iien ko rem̧m̧an bwe ajri eo nejum̧ en ekkatak kōn m̧anit ko jet im tōmak ko. Jipan̄ er kile im kaorōk em̧m̧an eo im pedped in katak ko rem̧ool kōn tōmak eo an ro jet.

Ilo tampeļ eo, ļeo pālele im lieo pālele remaron̄ m̧are n̄an indeeo. Men in ej waļo̧k ilo kain̄i eo ņae etan “sil ilo tampeļ” Men̄e kain̄i in emaron̄ lōn̄ iiō ko remootļo̧k wōt n̄an ļaddik eo ak leddik eo nejum̧, dik, ļam waan, men ko ekkā am̧ kōm̧m̧ani ippān doon iiō ko emaron̄ jipan̄ er pojak n̄an kōjeraam̧m̧an in eaibojooj.

• Riit ippān doon “Baam̧le Eo: Juōn Naan in Kean̄ n̄an Laļ in” (Gospel Library). Ta eo naan in kean̄ in ej katakin kōn mōņōņō eo an baam̧le im kōn m̧are eo em̧m̧an. Ippān ajri eo nejum̧, kāālet juon katak elaajrak ilo kean̄ in n̄an ekkatak. Kwomaron̄ lale eoon ko rej ekkeijel ilo pedped in katak eo ilo Unin Tōl n̄an Jeje ko Rekwōjarjar. Kwomaron̄ kōm̧m̧ani kōttōpar ko n̄an bōke katak eo eļapļo̧k ilo baam̧le eo am̧. Ilo am̧ jerbal e kōttōpar eo am̧, kōnono ippān doon kōn kijejeto eo an mour kōn katak ilo mour eo an baam̧le eo.

• Ippān ajri eo nejim, riiti ennaan eo an Būreejtōn Dieter F. Uchtdorf “In Praise of Those Who Save” (Liahona, May 2016, 77–80). N̄e kwonaaj tōpar jekjōn eo etan “A Society of Disposables,” kwomaron̄ lale ta ko m̧weo m̧ōm̧ maron̄ joļo̧ki im ta ko rejjab. Kōnono kake elmen an oktak am̧ lale juon men eo kwoj kōņaan bwe en to an pād. Ta eo men in ej kwaļok kōn elmen ad aikuj lale m̧are im jem̧jera eo an baam̧le ko. Bar ta ko jet jej ekkatak jān ennaan eo an Būreejtōn Uchtdorf kōn elmen an Rilo̧mo̧o̧r eo maron̄ jipan̄ kōj kalōk m̧are im baam̧le ko rekajoor?

• M̧ool n̄an ajri eo nejum̧ kōn men ko kwe im eo pāleem rej katak kake n̄an kōm̧m̧an bwe Kraist en unjen ilo m̧are indeeo im wāween ko kwoj kajjieon̄ in em̧m̧anļo̧k ie. Eļan̄n̄e komiro eo pāleem kar liāp ilo tampeļ, kwaļo̧k n̄an ajri eo nejum̧ waanjon̄ak ilo wāween am̧ kajjieon̄ n̄an kōjparok bujen ko am̧ ippān Irooj. Jiron̄ ajri eo nejum̧ elmen am̧ kajjieon̄ kōm̧m̧an bwe Jemedwōj Ilan̄ im Jisōs Kraist ren unjen jemjerā eo am̧ im wāween Aer jipan̄ eok (bar lale Ulisses Soares, “Juon Wōt Ippān Irooj,” Liaona, Nob. 2022, 42–45).

• Eļan̄n̄e kāālet ko an baam̧le rej aikuj kōm̧m̧an, kōm̧m̧ani ko̧o̧ņjel im kōnono ko an baam̧le. Kōm̧m̧an bwe aolep naan ko an ro uwaan baam̧le eo ren ron̄ im kaorōke. Kōjerbale kōnono kein āinwōt juon iien em̧m̧an n̄an kalōk bwebwenato ko rem̧m̧an im jouj ilo jem̧jerā ko an baam̧le, men̄e aolep rej jab loe men ko ilo juon wōt wāween. (lale M. Russell Ballard, “Ko̧o̧njeļ ko an Baam̧le,” Liaona, Māe 2016, 63–65.)

• Eļan̄n̄e ewōr ejjab errā ak pok ilo baam̧le, kwaļo̧k kilen kijenmej im tūriam̧o. Jipan̄ ajri eo nejum̧ kilen kabōjrak pok ilo wāween ko Āinwōt Kraist me emaron̄ jipan̄ er pojak n̄an juon m̧are eo elem̧ōņōņō. Riit ippān doon Katak im Bujen Ko 121: 41-42, im kōnono wāween an pedped in katak ko ilo eoon kein maron̄ jerbali n̄an m̧are.