Pasiuna

Ang matag leksiyon magsugod sa usa o mas daghan pa nga mga panag-istoryahanay. Ang katuyoan mao ang pagpaila sa bokabularyo, hilisgotan, ug mga estruktura diha sa leksiyon ug sa pagdasig sa pagpaminaw ug pagsabot sa gibasa. Ang matag “Conversation” nga seksiyon nagsunod sa sama niini nga sundanan:

1. Listen. Paminaw sa tibuok nga panag-istoryahanay.

2. Listen and repeat. Paminaw sa matag linya sa panag-istoryahanay, ug balika sa pagsulti og kusog kon unsa ang imong nadungog.

3. Write the missing word. Isulat ang mga pulong nga nawala gikan sa panag-istoryahanay. Pagpili gikan sa mga pulong nga naa diha sulod sa kahon.

4. Read aloud. Basaha og kusog ang panag-istoryahanay sa pagpraktis sa pagsulti.

5. Answer the questions (wala giapil sa matag leksiyon). Kini nga bahin mosukod sa imong panabot sa panag-istoryahanay.

Ang gidaghanon sa mga kalihokan magkalain-lain sa matag leksiyon. Kini nga mga kalihokan naglakip sa mga tsart sa grammar; pagbasa, pagsulat, pagpaminaw, ug pagsulti nga mga kalihokan; ug mga sugilanon. Sunda ang mga instruksiyon sa matag bahin sa usa ka kalihokan. Alang sa mga kalihokan sa pagpaminaw, tan-awa ngadto sa tukma nga numero ug letra sa kalihokan diha sa girekord alang sa pagpaminaw [audio recording]—sama pananglit sa “Activity 2B.” Alang sa mga kalihokan sa pagsulti, hinumdomi ang pagsulti og kusog. Mahimo nimong tan-awon kon sakto ba ang imong mga tubag diha sa “Answer Key” sa likod niini nga libro.

Kini nga seksiyon gidisenyo aron matabangan ka sa pagpraktis sa pagsulti og Iningles gamit ang unsay imong nakat-onan diha sa leksiyon. Buhaton kauban ang kapares, irebyo ang “Vocabulary” diha sa luyo niini nga basahon ug himoa ang mga kalihokan niini nga seksiyon. Pag-istorya og daghan kutob sa imong mahimo alang sa matag kalihokan. Gamita kini nga higayon sa paglihok gayod sa pagsulti og Iningles.

Kini nga mga sugilanon ug mga kalihokan gidisenyo aron sa pagpalambo sa imong mga abilidad sa pagbasa, pagpaminaw, pagsulti, ug pagsulat sa Iningles ug sa pagtabang nga madugangan ang imong pagtuo kang Jesukristo. Ang matag “Expansion Activities” nga seksiyon gibase sa usa ka makadasig nga sugilanon. Alang niini nga seksiyon, buhata ang mosunod:

1. Learn the vocabulary. Pagkat-on sa kahulogan sa bokabularyo nga mga pulong ug mga hugpong sa mga pulong nga gihatag niini nga seksiyon sa dili pa nimo basahon ang sugilanon. Makatabang ni nimo nga maandam sa pagbasa sa sugilanon ingon man makatabang nimo nga makasabot sa importante nga mga pulong ug mga hugpong sa mga pulong diha sa sugilanon.

2. Listen. Paminaw sa matag seksiyon sa sugilanon. Mahimo nimo kining buhaton bisan kapila kon gikinahanglan nimo.

3. Read aloud. Basaha ang sugilanon og kusog sa pagpraktis sa pagbasa ug paglitok ug aron matabangan ka nga makasabot sa sugilanon. Tingali ganahan ka nga maminaw og usab sa sugilanon ug modungan sa pagbasa.

4. Learn the vocabulary. Kini nga bokabularyo gituyo aron makatabang nimo sa pagsabot sa mga kasulatan ug mga kinutlo nga kauban sa sugilanon. Pagkat-on sa kahulogan sa bokabularyo nga mga pulong ug mga hugpong sa mga pulong nga ihatag sa dili pa nimo tun-an ang mga kasulatan ug mga kinutlo.

5. Read aloud. Sa pagpraktis sa pagbasa ug paglitok, seguroha nga basahon nimo og kusog ang mga kasulatan og mga kinutlo sa makadaghang higayon.

6. Ponder. Kini nga mga pangutana gidisenyo aron matabangan ka nga maghunahuna kabahin sa baroganan nga gitudlo diha sa sugilanon. Paggahin og panahon sa pagpamalandong niini. Tingali ganahan ka nga isulat ang imong tubag sa pangutana o mga pangutana.

7. Write. Alang niini nga seksiyon mohimo ka og kalihokan sa pagsulat nga gidisenyo aron matabangan ka nga magamit ang baroganan sa sugilanon.

8. Speak. Alang niini nga seksiyon mohimo ka og kalihokan sa pagsulti nga gidisenyo aron matabangan ka sa pagsaysay sa sugilanon nga imong nabasa ug sa baroganan nga imong nakat-onan. Ang mao nga mga kalihokan naglakip sa pag-istorya og usab sa sugilanon, pag-istorya og personal nga kasinatian nga kapareha sa imong nabasa, o pagpaambit og mga panabot ug may kalabotan nga mga tumong sa uban.

Ang mosunod nga talaan nagpakita sa mga instruksiyon nga kasagaran gigamit niini nga workbook. Ang mga icon nagtino sa mga kahanas nga gamiton sa mga kalihokan. Tan-awa ang hubad alang sa mga instruksiyon kon dili ka makasabot niini sa Iningles.