ຄຳນຳ

ປຶ້ມບົດຝຶກຫັດ EnglishConnect ໄດ້ຖືກອອກແບບມາເພື່ອໃຊ້ເປັນແຫລ່ງຂໍ້ມູນທີ່ຄຽງຄູ່ໄປກັບ ປຶ້ມຄູ່ມືນັກຮຽນ EnglishConnect 1 for Learners. ຈຸດປະສົງຂອງປຶ້ມບົດຝຶກຫັດນີ້ ແມ່ນເພື່ອຊ່ວຍພັດທະນາທັກສະພາສາອັງກິດຂອງທ່ານ ແລະ ເພີ່ມພູນສັດທາຂອງທ່ານ ຜ່ານທາງກິດຈະກຳ ແລະ ເລື່ອງລາວຕ່າງໆ. ມັນຍັງຈະຊ່ວຍທ່ານໃຫ້ຝຶກຄຳສັບ ແລະ ໂຄງສ້າງສຳລັບແຕ່ລະບົດຮຽນຂອງ EnglishConnect ໃນທັກສະທັງສີ່ດ້ານທັງໝົດ: ການຟັງ, ການເວົ້າ, ການອ່ານ, ແລະ ການຂຽນ. ບົດຮຽນແຕ່ລະບົດໃນປຶ້ມບົດຝຶກຫັດ ໄດ້ຖືກແບ່ງອອກເປັນພາກສ່ວນຕ່າງໆ ດັ່ງທີ່ລະບຸໄວ້ຂ້າງລຸ່ມ.

Conversation(s) (ການສົນທະນາ)

ບົດຮຽນແຕ່ລະບົດເລີ່ມຕົ້ນດ້ວຍໜຶ່ງບົດສົນທະນາ ຫລື ຫລາຍກວ່ານັ້ນ. ຈຸດປະສົງແມ່ນເພື່ອແນະນຳຄຳສັບ, ຫົວຂໍ້, ແລະ ໂຄງສ້າງໃນບົດຮຽນ ແລະ ເພື່ອສົ່ງເສີມຄວາມເຂົ້າໃຈໃນການຟັງ ແລະ ການອ່ານ. ແຕ່ລະພາກສ່ວນ “Conversation” ຈະເປັນໄປຕາມຮູບແບບດຽວກັນນີ້:

Listen. ຟັງບົດສົນທະນາທັງໝົດ.
Listen and repeat. ຟັງບົດສົນທະນາເທື່ອລະແຖວ, ແລະ ເວົ້າອອກສຽງຕາມສິ່ງທີ່ທ່ານໄດ້ຍິນ.
Write the missing word. ຂຽນຄຳທີ່ຫາຍໄປຈາກບົດສົນທະນາ. ເລືອກເອົາຄຳທີ່ມີໄວ້ໃຫ້ຢູ່ໃນຫ້ອງຕາຕະລາງ.
Read aloud. ອ່ານບົດສົນທະນາອອກສຽງເພື່ອຝຶກການເວົ້າ.
Answer the questions (ບໍ່ມີຢູ່ໃນທຸກໆບົດຮຽນ). ພາກສ່ວນນີ້ທົດສອບຄວາມເຂົ້າໃຈຂອງທ່ານກ່ຽວກັບບົດສົນທະນາ.

Activities 2–8 (ກິດຈະກຳ 2–8)

ຈຳນວນກິດຈະກຳຈະແຕກຕ່າງກັນໄປຕາມແຕ່ລະບົດຮຽນ. ກິດຈະກຳເຫລົ່ານີ້ແມ່ນລວມທັງ ຕາຕະລາງຫລັກໄວຍະກອນ, ການອ່ານ, ການຂຽນ, ການຟັງ, ແລະ ກິດຈະກຳການເວົ້າ; ແລະ ເລື່ອງລາວຕ່າງໆ. ເຮັດຕາມຄຳແນະນຳສຳລັບແຕ່ລະພາກສ່ວນຂອງກິດຈະກຳ. ສຳລັບກິດຈະກຳການຟັງ, ໃຫ້ອ້າງອີງເຖິງຕົວເລກກິດຈະກຳ ແລະ ຕົວອັກສອນທີ່ກົງກັບແຟມສຽງ—ຍົກຕົວຢ່າງ, “Activity 2B”. ສຳລັບກິດຈະກຳການເວົ້າ, ໃຫ້ຈື່ໄວ້ວ່າ ຕ້ອງເວົ້າອອກສຽງ. ທ່ານສາມາດກວດຄຳຕອບຂອງທ່ານໄດ້ໃນ “Answer Key” ໃນທ້າຍຂອງປຶ້ມນີ້.

Practice Partner Instructions (ຄຳແນະນຳການຝຶກຊ້ອມກັບຄູ່)

ພາກສ່ວນນີ້ໄດ້ຖືກອອກແບບມາເພື່ອຊ່ວຍໃຫ້ທ່ານຝຶກເວົ້າພາສາອັງກິດໂດຍໃຊ້ສິ່ງທີ່ທ່ານໄດ້ຮຽນຢູ່ໃນບົດຮຽນ. ໂດຍທີ່ຝຶກຊ້ອມກັບຄູ່, ໃຫ້ທວນຄືນ “Vocabulary” ຢູ່ໃນທ້າຍຂອງປຶ້ມນີ້ ແລະ ເຮັດກິດຈະກຳໃນພາກສ່ວນນີ້. ໃຫ້ເວົ້າຫລາຍທີ່ສຸດເທົ່າທີ່ທ່ານຈະເຮັດໄດ້ ສຳລັບແຕ່ລະກິດຈະກຳ. ໃຊ້ເວລານີ້ເພື່ອຝຶກເວົ້າພາສາອັງກິດແທ້ໆ.

Expansion Activities (ກິດຈະກຳຂະຫຍາຍ)

ເລື່ອງລາວ ແລະ ກິດຈະກຳເຫລົ່ານີ້ໄດ້ຖືກອອກແບບມາເພື່ອຂະຫຍາຍຄວາມສາມາດຂອງທ່ານໃນການອ່ານ, ການຟັງ, ການເວົ້າ, ແລະ ການຂຽນພາສາອັງກິດ ແລະ ເພື່ອຊ່ວຍເພີ່ມພູນສັດທາຂອງທ່ານໃນພຣະເຢຊູຄຣິດ. ແຕ່ລະພາກສ່ວນຂອງ “Expansion Activities” ແມ່ນຖືກສ້າງຂຶ້ນຈາກເລື່ອງລາວທີ່ສ້າງແຮງບັນດານໃຈ. ສຳລັບພາກສ່ວນນີ້, ໃຫ້ເຮັດດັ່ງຕໍ່ໄປນີ້:

Learn the vocabulary. ຮຽນຄວາມໝາຍຂອງຄຳສັບ ແລະ ວະລີທີ່ມີໃຫ້ໃນພາກສ່ວນນີ້ ກ່ອນທີ່ທ່ານຈະອ່ານບົດເລື່ອງ. ນີ້ຈະຊ່ວຍໃຫ້ທ່ານກຽມພ້ອມທີ່ຈະອ່ານບົດເລື່ອງ ພ້ອມທັງຊ່ວຍໃຫ້ທ່ານເຂົ້າໃຈຄຳສັບ ແລະ ວະລີສຳຄັນໃນບົດເລື່ອງນັ້ນ.
Listen. ຟັງແຕ່ລະພາກສ່ວນຂອງບົດເລື່ອງ. ທ່ານສາມາດເຮັດໄດ້ຫລາຍເທື່ອຕາມທີ່ທ່ານຕ້ອງການ.
Read aloud. ອ່ານບົດເລື່ອງອອກສຽງເພື່ອຝຶກການອ່ານ ແລະ ການອອກສຽງ ແລະ ເພື່ອຊ່ວຍໃຫ້ທ່ານເຂົ້າໃຈບົດເລື່ອງ. ທ່ານອາດຢາກຟັງບົດເລື່ອງອີກຄັ້ງ ແລະ ອ່ານຕາມ.
Learn the vocabulary. ຄຳສັບນີ້ ແມ່ນເພື່ອຊ່ວຍໃຫ້ທ່ານເຂົ້າໃຈພຣະຄຳພີ ແລະ ຄຳອ້າງອີງທີ່ມາກັບບົດເລື່ອງນັ້ນ. ຮຽນຄວາມໝາຍຂອງຄຳສັບ ແລະ ວະລີທີ່ມີໃຫ້ ກ່ອນທີ່ທ່ານຈະສຶກສາພຣະຄຳພີ ແລະ ຄຳອ້າງອີງດັ່ງກ່າວ.
Read aloud. ເພື່ອທີ່ຈະຝຶກຊ້ອມການອ່ານ ແລະ ການອອກສຽງ, ໃຫ້ແນ່ໃຈວ່າ ທ່ານໄດ້ອ່ານຂໍ້ພຣະຄຳພີ ແລະ ຄຳອ້າງອີງອອກສຽງຫລາຍເທື່ອແລ້ວ.
Ponder. ຄຳຖາມເຫລົ່ານີ້ໄດ້ຖືກອອກແບບມາເພື່ອຊ່ວຍໃຫ້ທ່ານຄິດກ່ຽວກັບຫລັກທຳທີ່ຖືກສິດສອນໃນບົດເລື່ອງນັ້ນ. ໃຊ້ເວລາເພື່ອໄຕ່ຕອງມັນ. ທ່ານອາດຢາກຂຽນຄຳຕອບຂອງທ່ານສຳລັບຄຳຖາມຂໍ້ນັ້ນ ຫລື ສຳລັບຄຳຖາມຫລາຍໆຂໍ້ລົງໄວ້.
Write. ສຳລັບພາກສ່ວນນີ້ ທ່ານຈະເຮັດກິດຈະກຳການຂຽນ ທີ່ຖືກອອກແບບມາເພື່ອຊ່ວຍທ່ານໃນການນຳໃຊ້ຫລັກທຳຂອງບົດເລື່ອງນັ້ນ.
Speak. ສຳລັບພາກສ່ວນນີ້ ທ່ານຈະເຮັດກິດຈະກຳການເວົ້າ ທີ່ຖືກອອກແບບມາເພື່ອຊ່ວຍໃຫ້ທ່ານອະທິບາຍເລື່ອງລາວທີ່ທ່ານໄດ້ອ່ານ ແລະ ຫລັກທຳທີ່ທ່ານໄດ້ຮຽນຮູ້. ກິດຈະກຳດັ່ງກ່າວແມ່ນລວມທັງ ການເລົ່າເລື່ອງຄືນ, ການເລົ່າປະສົບການສ່ວນຕົວທີ່ກ່ຽວຂ້ອງ, ຫລື ການແບ່ງປັນຂໍ້ມູນທີ່ໃຫ້ຄວາມຮູ້ ແລະ ເປົ້າໝາຍທີ່ກ່ຽວຂ້ອງໃຫ້ກັບຄົນອື່ນໆ.

ຂໍ້ສຳຄັນຕໍ່ຄຳແນະນຳໃນປຶ້ມບົດຝຶກຫັດນີ້

ຕາຕະລາງດັ່ງຕໍ່ໄປນີ້ສະແດງໃຫ້ເຫັນເຖິງຄຳແນະນຳທີ່ຖືກໃຊ້ໂດຍທົ່ວໄປໃນປຶ້ມບົດຝຶກຫັດນີ້. ເຄື່ອງໝາຍໄອຄອນ ຊີ້ບອກເຖິງທັກສະທີ່ຈະຖືກໃຊ້ໃນກິດຈະກຳຕ່າງໆ. ໃຫ້ເບິ່ງຄຳແປສຳລັບຄຳແນະນຳຖ້າຫາກທ່ານບໍ່ເຂົ້າໃຈມັນເປັນພາສາອັງກິດ.

Listening

ການຟັງ

Listen.	ຟັງ.
Listen and repeat.	ຟັງ ແລະ ເວົ້າຕາມ.
Listen to the question / example.	ຟັງຄຳຖາມ / ຕົວຢ່າງ.
Listen and read.	ຟັງ ແລະ ອ່ານ.
Listen, and then answer the question.	ຟັງ, ແລະ ແລ້ວຕອບຄຳຖາມ.
You may listen more than once.	ທ່ານສາມາດຟັງໄດ້ຫລາຍກວ່າໜຶ່ງເທື່ອ.

*ສາມາດເຂົ້າເຖິງແຟມສຽງສຳລັບປຶ້ມນີ້ໄດ້ໃນຫ້ອງສະໝຸດພຣະກິດຕິຄຸນ ຫລື ທີ່ englishconnect.org/audio.

Speaking

ການເວົ້າ

Repeat.	ເວົ້າຕາມ.
Answer aloud.	ຕອບອອກສຽງ.
Introduce __________.	ແນະນຳ __________.
Retell the story.	ເລົ່າເລື່ອງຄືນ.
Tell the story / scripture to _________.	ເລົ່າເລື່ອງ/ຂໍ້ພຣະຄຳພີໃຫ້ _________.
Practice saying the questions aloud.	ຝຶກເວົ້າຄຳຖາມອອກສຽງ.
Say __________.	ເວົ້າ __________.
Practice saying __________.	ຝຶກເວົ້າ __________.

Reading

ການອ່ານ

Read aloud.	ອ່ານອອກສຽງ.
Read aloud, then listen.	ອ່ານອອກສຽງ, ແລ້ວຟັງ.
Read the question.	ອ່ານຄຳຖາມ.
Study the chart.	ສຶກສາຕາຕະລາງ.
Choose the correct response.	ເລືອກຄຳຕອບທີ່ຖືກຕ້ອງ.
Choose all that are correct.	ເລືອກຄຳຕອບທັງໝົດທີ່ຖືກຕ້ອງ.
Say Answer the questions.	ເວົ້າ Answer the questions.
Number the pictures.	ຈັດລຽງຮູບ.
Learn the vocabulary.	ຮຽນຄຳສັບ.
Read the scriptures aloud.	ອ່ານພຣະຄຳພີອອກສຽງ.
Ponder.	ໄຕ່ຕອງ.

Writing

ການຂຽນ

Write the missing / correct word.	ຂຽນຄຳທີ່ຫາຍໄປ / ຄຳທີ່ຖືກຕ້ອງ.
Rewrite the complete sentence.	ຂຽນປະໂຫຍກທີ່ສົມບູນຄືນອີກ.
Write what you hear.	ຂຽນຕາມສິ່ງທີ່ທ່ານໄດ້ຍິນ.
Fill in the blanks / missing words.	ຕື່ມໃສ່ບ່ອນວ່າງ / ຄຳທີ່ຫາຍໄປ.
Write an / the answer (in a complete sentence).	ຂຽນຄຳຕອບ (ເປັນປະໂຫຍກທີ່ສົມບູນ).
Finish the sentence.	ຂຽນໃຫ້ຈົບປະໂຫຍກ.
Be creative.	ມີຄວາມຄິດສ້າງສັນ.

ການຮຽນພາສາໃໝ່ເປັນຂະບວນການທີ່ຕ້ອງໃຊ້ເວລາ, ຄວາມອົດທົນ, ແລະ ຕໍ່ເນື່ອງ. ພຣະເຈົ້າສາມາດຊ່ວຍໃຫ້ທ່ານບັນລຸເປົ້າໝາຍຂອງທ່ານໄດ້. ອະທິຖານຂໍຄວາມຊ່ວຍເຫລືອ. ສຳເລັດກິດຈະກຳຕ່າງໆໃນປຶ້ມບົດຝຶກຫັດນີ້ດ້ວຍຄວາມພາກພຽນ. ນຳໃຊ້ໃນສິ່ງທີ່ທ່ານຮຽນຮູ້. ເມື່ອທ່ານກະທຳດ້ວຍສັດທາ ເພື່ອສະແຫວງຫາຄວາມຊ່ວຍເຫລືອຈາກພຣະເຈົ້າ ແລະ ເຮັດໃຫ້ດີທີ່ສຸດ, ຄວາມສາມາດຂອງທ່ານໃນການເວົ້າ, ຟັງ, ອ່ານ, ແລະ ຂຽນພາສາອັງກິດ ກໍຈະດີຂຶ້ນ.

ຂໍໃຫ້ທ່ານໂຊກດີໃນເສັ້ນທາງການຮຽນພາສາອັງກິດຂອງທ່ານ!