សេចក្តីផ្ដើម

សៀវភៅលំហាត់ EnglishConnect គឺត្រូវបានតាក់តែងឡើងដើម្បីប្រើជាធនធានគូនឹង EnglishConnect ១ សម្រាប់អ្នករៀន ។ គោលបំណងនៃសៀវភៅលំហាត់នេះ គឺដើម្បីជួយអ្នកឲ្យអភិវឌ្ឍជំនាញភាសាអង់គ្លេសរបស់អ្នក និងដើម្បីបង្កើនសេចក្ដីជំនឿរបស់អ្នកតាមរយៈសកម្មភាព និងដំណើររឿងនានា ។ សៀវភៅនេះក៏នឹងជួយអ្នកឲ្យអនុវត្តវាក្យសព្ទ និងទម្រង់នានាសម្រាប់មេរៀននីមួយៗរបស់ EnglishConnect នៅក្នុងផ្នែកជំនាញទាំងបួនដែលមាន ៖ ការស្ដាប់ ការនិយាយ ការអាន និងការសរសេរ ។ មេរៀននីមួយៗនៅក្នុងសៀវភៅលំហាត់នេះ ត្រូវបានបែងចែកទៅជាវគ្គទាំងឡាយដូចខាងក្រោមនេះ ។

Conversation(s) ( ការសន្ទនា )

មេរៀននីមួយៗចាប់ផ្ដើមជាមួយនឹងការសន្ទនាមួយ ឬច្រើនជាងនោះ ។ គោលបំណងគឺដើម្បីណែនាំវាក្យសព្ទ ប្រធានបទ និងទម្រង់នានានៅក្នុងមេរៀន និងដើម្បីជំរុញការយល់ដឹងពីការស្ដាប់ និងការអាន ។ វគ្គ « Conversation » នីមួយៗធ្វើតាមលំនាំដូចគ្នានេះ ៖

Listen. សូមស្ដាប់ការសន្ទនាទាំងស្រុង ។
Listen and repeat. សូមស្ដាប់ការសន្ទនាមួយបន្ទាត់ម្ដងៗ ហើយនិយាយតាមឲ្យឮៗនូវអ្វីដែលអ្នកឮ ។
Write the missing word. សូមសរសេរពាក្យទាំងឡាយដែលបាត់ពីការសន្ទនា ។ សូមជ្រើសរើសចេញពីពាក្យដែលបានផ្ដល់ឲ្យក្នុងប្រអប់ ។
Read aloud. សូមអានការសន្ទនាឲ្យឮៗដើម្បីអនុវត្តការនិយាយ ។
Answer the questions ( មិនមានបញ្ចូលនៅក្នុងគ្រប់មេរៀនទេ ) ។ ផ្នែកនេះពិនិត្យមើលលើការយល់ដឹងរបស់អ្នកអំពីការសន្ទនា ។

Activities 2–8 ( សកម្មភាព ២–៨ )

ចំនួនសកម្មភាពមានខុសៗគ្នាពីមេរៀនមួយទៅមេរៀនមួយទៀត ។ សកម្មភាពទាំងនេះរួមមានតារាងវេយ្យករណ៍ សកម្មភាពនៃការអាន ការសរសេរ ការស្ដាប់ និងការនិយាយ ហើយនឹងដំណើររឿងនានា ។ សូមធ្វើតាមការណែនាំសម្រាប់ផ្នែកនីមួយៗនៃសកម្មភាព ។ សម្រាប់សកម្មភាពការស្ដាប់ សូមយោងទៅលើលេខសកម្មភាព និងអក្សរដែលត្រូវគ្នា នៅក្នុងការថតជាសំឡេង—ឧទាហរណ៍ « Activity 2B » ។ សម្រាប់សកម្មភាពការនិយាយ សូមកុំភ្លេចនិយាយឲ្យឮៗ ។ អ្នកអាចពិនិត្យមើលចម្លើយរបស់អ្នកនៅក្នុង « Answer Key » នៅខាងក្រោយនៃសៀវភៅនេះ ។

Practice Partner Instructions( ការណែនាំសម្រាប់អនុវត្តជាមួយដៃគូ )

វគ្គនេះត្រូវបានចងក្រងឡើងដើម្បីជួយអ្នកឲ្យអនុវត្តការនិយាយភាសាអង់គ្លេស ដោយប្រើប្រាស់នូវអ្វីដែលអ្នកបានរៀននៅក្នុងមេរៀននេះ ។ ដោយធ្វើការជាមួយនឹងដៃគូម្នាក់ សូមរំឭក « Vocabulary » នៅខាងក្រោយនៃសៀវភៅនេះ ហើយធ្វើសកម្មភាពទាំងឡាយនៅក្នុងវគ្គនេះ ។ សូមនិយាយឲ្យបានច្រើនតាមដែលអ្នកអាចធ្វើបានសម្រាប់សកម្មភាពនីមួយៗ ។ សូមប្រើពេលវេលានេះដើម្បីខិតខំអនុវត្តការនិយាយភាសាអង់គ្លេស ។

Expansion Activities ( សកម្មភាពដើម្បីជួយពង្រីកសមត្ថភាព )

ដំណើររឿង និងសកម្មភាពទាំងនេះត្រូវបានចងក្រងឡើងដើម្បីជួយពង្រីកសមត្ថភាពរបស់អ្នកក្នុងការអាន ស្ដាប់ និយាយ និងសរសេរជាភាសាអង់គ្លេស ហើយដើម្បីជួយបង្កើនសេចក្ដីជំនឿរបស់អ្នកទៅលើព្រះយេស៊ូវគ្រីស្ទ ។ វគ្គ « Expansion Activities » នីមួយៗ ត្រូវបានបង្កើតឡើងដោយផ្អែកលើដំណើររឿងដ៏បំផុសគំនិតមួយ ។ សម្រាប់វគ្គនេះ សូមធ្វើដូចខាងក្រោម ៖

Learn the vocabulary. សូមរៀនអត្ថន័យនៃពាក្យវាក្យសព្ទ និងឃ្លាទាំងឡាយដែលបានផ្ដល់ឲ្យនៅក្នុងវគ្គនេះមុនពេលអ្នកអានដំណើររឿង ។ ការធ្វើដូច្នេះនឹងជួយអ្នកឲ្យរៀបចំដើម្បីអានដំណើររឿង ក៏ដូចជាជួយអ្នកឲ្យយល់ពីពាក្យ និងឃ្លាគន្លឹះនានានៅក្នុងដំណើររឿងនេះ ។
Listen. សូមស្ដាប់វគ្គនីមួយៗនៃដំណើររឿងនេះ ។ អ្នកអាចនឹងធ្វើដូច្នេះច្រើនដងតាមដែលអ្នកត្រូវការ ។
Read aloud. សូមអានដំណើររឿងនេះឲ្យឮៗ ដើម្បីអនុវត្តការអាន និងការបញ្ចេញសំឡេង និងដើម្បីជួយអ្នកឲ្យយល់ពីដំណើររឿង ។ អ្នកអាចនឹងចង់ស្ដាប់ដំណើររឿងនេះម្ដងទៀត ហើយអានតាម ។
Learn the vocabulary. វាក្យសព្ទនេះគឺដើម្បីជួយអ្នកឲ្យយល់ពីបទគម្ពីរ និងការដកស្រង់ដែលអមជាមួយនឹងដំណើររឿងនេះ ។ សូមរៀនអត្ថន័យនៃពាក្យវាក្យសព្ទ និងឃ្លាទាំងឡាយដែលបានផ្ដល់ឲ្យ មុនពេលអ្នកសិក្សាបទគម្ពីរ និងការដកស្រង់នានា ។
Read aloud. ដើម្បីអនុវត្តការអាន និងការបញ្ចេញសំឡេង សូមប្រាកដថាបានអានបទគម្ពីរ និងការដកស្រង់ទាំងឡាយឲ្យឮៗជាច្រើនដងសិន ។
Ponder. សំណួរទាំងនេះត្រូវបានចងក្រងឡើងដើម្បីជួយអ្នកឲ្យគិតអំពីគោលការណ៍ដែលកំពុងបង្រៀននៅក្នុងដំណើររឿង ។ សូមចំណាយពេលដើម្បីពិចារណាសំណួរទាំងនោះ ។ អ្នកអាចនឹងចង់សរសេរចម្លើយរបស់អ្នកចំពោះសំណួរមួយ ឬសំណួរទាំងឡាយ ។
Write. សម្រាប់វគ្គនេះ អ្នកនឹងធ្វើសកម្មភាពការសរសេរមួយ ដែលបានរៀបចំឡើងដើម្បីជួយអ្នកឲ្យអនុវត្តគោលការណ៍នៃដំណើររឿងនេះ ។
Speak. សម្រាប់វគ្គនេះ អ្នកនឹងធ្វើសកម្មភាពការនិយាយមួយ ដែលបានរៀបចំឡើងដើម្បីជួយអ្នកឲ្យអធិប្បាយពីដំណើររឿងដែលអ្នកបានអាន និងគោលការណ៍ដែលអ្នកបានរៀន ។ សកម្មភាពទាំងនេះរួមមានការប្រាប់ពីដំណើររឿងឡើងវិញ ការប្រាប់ពីបទពិសោធន៍ដែលទាក់ទងនឹងរឿងផ្ទាល់ខ្លួន ឬការចែកចាយការយល់ដឹង និងគោលដៅដែលទាក់ទងនានាជាមួយនឹងមនុស្សដទៃទៀត ។

គន្លឹះចំពោះសេចក្ដីផ្ដើមនៅក្នុងសៀវភៅលំហាត់នេះ

តារាងខាងក្រោមនេះបង្ហាញពីការណែនាំទាំងឡាយ ដែលត្រូវបានប្រើប្រាស់ជាទូទៅនៅក្នុងសៀវភៅលំហាត់នេះ ។ រូបតំណាងទាំងនេះចង្អុលបង្ហាញពីជំនាញនានា ដែលនឹងត្រូវប្រើប្រាស់នៅក្នុងសកម្មភាពទាំងឡាយ ។ សូមមើលការបកប្រែសម្រាប់ការណែនាំទាំងឡាយ ប្រសិនបើអ្នកមិនយល់វាជាភាសាអង់គ្លេស ។

Listening

ការស្ដាប់

Listen.	ស្តាប់ ។
Listen and repeat.	សូមស្ដាប់ ហើយនិយាយតាម ។
Listen to the question / example.	សូមស្ដាប់សំណួរ / ឧទាហរណ៍ ។
Listen and read.	សូមស្ដាប់ ហើយអាន ។
Listen, and then answer the question.	សូមស្ដាប់ ហើយបន្ទាប់មកឆ្លើយសំណួរ ។
You may listen more than once.	អ្នកអាចស្ដាប់ច្រើនជាងម្តង ។

*សំឡេងសម្រាប់សៀវភៅនេះអាចរកបាននៅលើគេហទំព័រ englishconnect.org/audio។

Speaking

ការនិយាយ

Repeat.	សូមនិយាយសាឡើងវិញ ។
Answer aloud.	សូមឆ្លើយឲ្យឮៗ ។
Introduce __________.	សូមណែនាំខ្លួន _____ ។
Retell the story.	សូមប្រាប់ដំណើររឿងឡើងវិញ ។
Tell the story / scripture to _________.	សូមប្រាប់ដំណើររឿង / បទគម្ពីរទៅកាន់____ ។
Practice saying the questions aloud.	សូមអនុវត្តនិយាយសំណួរឲ្យឮៗ ។
Say __________.	សូមនិយាយ __________ ។
Practice saying __________.	សូមអនុវត្តនិយាយ _____ ។

Reading

ការអាន

Read aloud.	សូមអានឲ្យឮៗ ។
Read aloud, then listen.	សូមអានឲ្យឮៗ បន្ទាប់មកស្ដាប់ ។
Read the question.	សូមអានសំណួរ ។
Study the chart.	សូមសិក្សាតារាង ។
Choose the correct response.	សូមជ្រើសរើសការឆ្លើយតបដែលត្រឹមត្រូវ ។
Choose all that are correct.	សូមជ្រើសរើសទាំងអស់ដែលត្រឹមត្រូវ ។
Say Answer the questions.	សូមឆ្លើយសំណួរទាំងនេះ ។
Number the pictures.	សូមដាក់លេខលើរូបភាពទាំងនេះ ។
Learn the vocabulary.	សូមរៀនវាក្យសព្ទ ។
Read the scriptures aloud.	សូមអានបទគម្ពីរឲ្យឮៗ ។
Ponder.	ពិចារណា ។

Writing

ការសរសេរ

Write the missing / correct word.	សូមសរសេរពាក្យដែលបាត់ / ដែលត្រឹមត្រូវ ។
Rewrite the complete sentence.	សូមសរសេរប្រយោគពេញលេញឡើងវិញ ។
Write what you hear.	សូមសរសេរនូវអ្វីដែលអ្នកឮ ។
Fill in the blanks / missing words.	សូមបំពេញក្នុងចន្លោះ / ពាក្យដែលបាត់ ។
Write an / the answer (in a complete sentence).	សូមសរសេរចម្លើយមួយ / នេះ ( ជាប្រយោគពេញលេញ ) ។
Finish the sentence.	សូមបញ្ចប់ប្រយោគនេះ ។
Be creative.	ចូរមានភាពច្នៃប្រឌិត ។

ការរៀនភាសាថ្មីមួយគឺជាដំណើរការមួយ ដែលត្រូវការពេលវេលា ការអត់ធ្មត់ និងការជំនះស៊ូទ្រាំ ។ ព្រះអាចជួយអ្នកឲ្យសម្រេចគោលដៅនានារបស់អ្នកបាន ។ សូមអធិស្ឋានសុំជំនួយ ។ សូមបញ្ចប់សកម្មភាពទាំងឡាយនៅក្នុងសៀវភៅលំហាត់នេះដោយឧស្សាហ៍ព្យាយាម ។ សូមអនុវត្តនូវអ្វីដែលអ្នកកំពុងរៀន ។ នៅពេលដែលអ្នកអនុវត្តតាមសេចក្ដីជំនឿដើម្បីស្វែងរកជំនួយរបស់ព្រះ ហើយធ្វើឲ្យអស់ពីសមត្ថភាពរបស់អ្នក នោះសមត្ថភាពរបស់អ្នកក្នុងការនិយាយ ស្ដាប់ អាន និងសរសេរភាសាអង់គ្លេស នឹងរីកចម្រើនឡើង ។

សូមជូនពរក្នុងដំណើរនៃការសិក្សាភាសាអង់គ្លេសរបស់អ្នក !