“Lesona 108—Mataupu Faavae ma Feagaiga 93:19–53: Mauaina le Malamalama ma le Upumoni a le Faaola,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 93:19–53,” Tusi Lesona a le Faiaoga Seminare o le Mataupu Faavae ma Feagaiga
Lesona 108: Mataupu Faavae ma Feagaiga 93
Mataupu Faavae ma Feagaiga 93:19–53
Mauaina le Malamalama ma le Upumoni a le Faaola
I le faaaliga o loo tusia i le Mataupu Faavae ma Feagaiga 93, sa faamatala ai e le Faaola le ala e mafai ai ona tatou maua atili le malamalama ma le upumoni lea e sau mai ia te Ia. O lenei lesona e mafai ona fesoasoani i tagata aoga e fuafua ai ia maua atili le malamalama ma le upumoni a le Atua i o latou olaga.
Gaoioiga E Ono Mafai Ona Aoao Ai
Malamalama ma le pouliuli
Na faamatalaina e Elder Timothy J. Dyches o le Fitugafulu se aafiaga na latou oo i ai ma ona atalii ao o atu i totonu o se ana loloto.
E aunoa ma se lapataiga, sa faafuase’i ona pepe moli [i totonu o le ana]. A o faataupe ai i luga a’e o le ava ua foliga e leai se fola, sa ufitia i ma’ua i le pogisa ogaoga tele e oo lava i o ma lima i luga o maea i o ma luma sa le mafai ona iloa. Sa vave ona valaau mai se leo, “Tama, tama, o e iina?”
“O lea ou te iinei atalii, lea ou te iinei,” sa ou tali atu ai.
O le pepe faafuasei o moli sa mamanuina e faailoa mai ai a leai se eletise, o le pogisa o le ana e le mafuatiaina. Na manuia; aua na ma “lagonaina” le pouliuli. (Timothy J. Dyches, “O Le Malamalama e Pipii i le Malamalama,” Liahona, Me 2021, 113)
-
O a nisi o lagona e fesootai ai tagata ma le pogisa?
-
O a nisi o upu po o fasifuaitau o loo faamatala ai lagona o le malamalama?
Sa faamatala e Elder Dyches le tulaga na i ai mo ia ma ona atalii ina ua toe ki moli o le ana.
Ina ua toe ola mai moli, sa mou vave loa le pogisa, aua e tatau lava ona siilima le pogisa i taimi uma, e oo lava i sina malamalama e tau le iloa. Sa matou o mai ma o’u atalii ma se aafiaga o se pogisa matou te lei iloaina lava muamua, ma se talisapaia sili atu o le malamalama o le a le mafai lava ona faagaloina, ma le mautinoa e le tuulafoaiina lava i matou i le pogisa.
O la matou o ifo i lena ana e i se itu e talitutusa ai ma la tatou malaga i le olaga nei. (“O Le Malamalama e Pipii i le Malamalama,” 113)
-
O a ni mea talitutusa na e matauina i le va o lenei tala ma la tatou malaga i le olaga faitino?
Faitau le Mataupu Faavae ma Feagaiga 93:36, ma vaavaai mo upu e faamatala ai le mamalu o le Atua.
-
E mafai faapefea e le malamalama ma le upumoni lea e sau mai le Tama Faalelagi ma Iesu Keriso ona fesoasoani ia te oe i lau malaga i le olaga nei?
Valaaulia tagata aoga e mafaufau pe o le a le tele o le malamalama po o le faatosinaga a le Atua o loo latou lagonaina i o latou olaga i le taimi nei. E mafai foi ona e valaaulia i latou e mafaufau pe faapefea ona ese o latou olaga pe afai e tele atu se aafiaga a le Tama Faalelagi ma Iesu Keriso i ai.
Faamalamalama atu o le Mataupu Faavae ma Feagaiga 93, na aoao mai ai le Faaola e uiga i amioga e mafai ona faateleina pe faaitiitia ai lo tatou mauaina o le malamalama ma le upumoni lea e sau mai ia te Ia. A o suesue tagata aoga, uunaia i latou e vaavaai mo aoaoga e mafai ona fesoasoani ia i latou e maua atili ai le malamalama ma le upumoni a le Faaola i o latou olaga.
Ua aoao mai e Iesu Keriso i tatou i le ala e maua ai Lona malamalama
Mafaufau e faaali atu siata nei ma valaaulia tagata aoga e kopi ia latou api talaaga mo suesuega. E mafai ona latou faamae’a le gaoioiga suesue ma se paga po o se vaega toalaiti.
|
Faateleina le malamalama ma le upumoni |
Faaitiitia le malamalama ma le upumoni |
|---|---|
Faitau fuaiupu o loo lisi atu i le siata, ma vaavaai mo aoaoga a le Faaola o loo faamatala ai le ala e mafai ai ona tatou faateleina pe faaitiitia Lona malamalama ma le upumoni i o tatou olaga. Faamaumau au sailiiliga i koluma taitasi.
-
O a faamanuiaga o loo avanoa mo i latou o e sailia le malamalama ma le upumoni a le Faaola?
-
E faapefea ona e aoteleina mea e te maua mo koluma taitasi i lau siata o ni faamatalaga o le upumoni?
Atonu e faailoa mai e tagata aoga ia upumoni e pei o nei: Tatou te faateleina le malamalama ma le upumoni a le Faaola i o tatou olaga a o tatou tausia Ana poloaiga (fuaiupu 20, 28). O le lē usiusitai e mafai ona mafua ai ona tatou le maua le malamalama ma le upumoni a le Faaola mai o tatou olaga (fuaiupu 39).
-
O le a sou manatu e mafai faapefea e le tausia o poloaiga a le Faaola ona aafia ai lou tomai e iloatino ai le upumoni?
I se vaega o la outou talanoaga o le fesili talu ai, mafaufau e faaali atu pe tusi le ata lenei. Valaaulia tagata aoga e faasoa mai pe faapefea ona latou vaai i aoaoga mai le Mataupu Faavae ma Feagaiga 93 o loo i ai i totonu. Afai e manaomia, faamalamalama atu a o tatou usiusitai i poloaiga a le Atua, ua faamanuiaina i tatou i le tele o le malamalama o le Faaola i o tatou olaga, lea e faateleina ai lo tatou tomai e malamalama pe iloatino le upumoni. Pe a tatou le usitai i poloaiga, tatou te le maua le malamalama o le Faaola ma maua se tomai faaitiitia e malamalama ai pe iloatino ai le upumoni.
-
E mafai faapefea e le malamalama i aoaoga a le Faaola mai nei fuaiupu ona aafia ai filifiliga tatou te faia?
Faateleina o le malamalama ma le upumoni a le Faaola i o tatou olaga
-
O a nisi o mea patino na fesoasoani pe e mafai ona fesoasoani ia te oe e maua atili ai le malamalama o le Faaola i lou olaga?
E mafai e tagata aoga ona talanoaina le fesili talu ai ma se paga po o ni vaega toalaiti a o lei faasoaina atu a latou tali i le vasega. E mafai foi ona e mafaufau e faaaoga le saunoaga lenei a Elder Dieter F. Uchtdorf e fesoasoani ai i tagata aoga e mafaufau i manatu.
Na faasoa mai e Elder Dieter F.Uchtdorf o le Korama a Aposetolo e Toasefululua ia faataitaiga o auala e mafai ai ona tatou aafia i le malamalama o le Faaola.
O taimi uma e liliu atu ai o outou loto i le Atua i le tatalo faamaulalo, tou te mauaina Lona malamalama. O taimi uma tou te saili atu ai i Lana afioga ma Lona finagalo i totonu o tusitusiga paia, e faatuputeleina ai lava le susulu o le malamalama. O taimi uma tou te maitauina ai se tasi o mafatia ma faataulagaina ai lou lava toafimalie e aapa atu ai ma le alofa, o le a faalauteleina ma le malamalama ma maena. O taimi uma e te teenaina ai se faaosoosoga ae filifili le mama, o taimi uma e te saili pe tuuina atu le faamagaloga, o taimi uma e te molimau atu ai ma le lototele e uiga i le upumoni, e tuliesea e le malamalama le pouliuli ma tosina mai ai isi o loo saili foi i le malamalama ma le upumoni. (Dieter F. Uchtdorf, “O E Tauaveina le Malamalama Faalelagi,” Liahona, Nov. 2017, 79.)
Mafaufau e valaaulia ni nai tagata aoga naunau e faasoa mai pe na faapefea e manatu na latou talanoaina ona faia se eseesega i o latou lava olaga. I le avea ai o se vaega o lenei talanoaga, mafaufau e faaali atu le “Mauaina o Keriso i Taimi Faigata” (4:35), o loo maua i le ChurchofJesusChrist.org. E mafai ona e valaaulia tagata aoga e matau pe na faapefea e le toesea ma le faaopoopoga o le malamalama o le Faaola ona aafia ai le alii talavou i le vitiō.
Faaaoga aoaoga a le Faaola
Valaaulia tagata aoga e mafaufau ma le agaga tatalo pe mafai faapefea ona latou faateleina le malamalama ma le upumoni a le Faaola i o latou olaga a o latou taliina fesili nei i a latou api talaaga mo suesuega.
-
O le a se mea ua uunaia oe e amata ona fai e valaaulia atili ai le upumoni ma le malamalama o le Faaola i lou olaga? O le a se mea uunaia oe e tuu le faia?
-
O a ni mea faalavelave e te ono fetaiai a o e amata pe taofia nei faatinoga? E mafai faapefea ona e foia faafitauli e te faailoaina?
Ina ia faaiuina le lesona, mafaufau e faasoa atu ou lagona e uiga i le mana o le malamalama ma le upumoni a Keriso ua aumaia i lou olaga. Valaaulia tagata aoga e taumafai e faateleina le malamalama o le Faaola i o latou olaga e ala i mea na latou lagonaina le uunaiga e fai i le asō.