“Lesona 92—Mataupu Faavae ma Feagaiga 82:8–24: ‘O A’u, o le Alii, e Noatia A’u Pe a Outou Faia Mea Ou te Fai Atu Ai,’” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 82:8–24,” Tusi Lesona a le Faiaoga Seminare o le Mataupu Faavae ma Feagaiga
Lesona 92: Mataupu Faavae ma Feagaiga 81–83
Mataupu Faavae ma Feagaiga 82:8–24
“O A’u, o le Alii, e Noatia A’u Pe a Outou Faia Mea Ou te Fai Atu Ai”
Sa valaaulia e le Faaola ia sui auai o le Kamupani Tuufaatasi e noatia i latou lava e ala i feagaiga e pulea mataupu o Lana Ekalesia. Na Ia tuuina atu ia i latou poloaiga ma folafola atu e faamanuia i latou pe a latou usiusitai. Pe a tatou osifeagaiga e usitai i poloaiga a Iesu Keriso, ua Ia folafola mai e faamanuia i tatou. O lenei lesona e mafai ona fesoasoani i tagata aoga ia malamalama pe faapefea ona tausia feagaiga tatou te osia ma le Tama Faalelagi ma Iesu Keriso.
Gaoioiga E Ono Mafai Ona Aoao Ai
Noatia i le Alii
O lenei lesona faatino e mafai ona fesoasoani i tagata aoga e faamalolosia ai o latou sootaga ma le Tama Faalelagi ma Iesu Keriso. Faaali atu i tagata aoga ni maneta se lua. E mafai e se tagata aoga ona faataitai pe faapefea ona felata’i faatasi maneta, o le a latou tosina atu pe tetee le tasi i le isi. Fai i tagata aoga e mafaufau faapea o se tasi o maneta e faatusa ia Iesu Keriso ma le isi e faatusa ia i latou.
-
O le a se mea e mafai ona tatou aoao e uiga i le tatou sootaga ma le Tama Faalelagi ma Iesu Keriso mai nei fuaitau?
Valaaulia tagata aoga e mafaufau i o latou sootaga ma le Tama Faalelagi ma Iesu Keriso. A o suesueina e tagata aoga le Mataupu Faavae ma Feagaiga 82, fautuaina i latou e saili faaaliga faaletagata lava ia e uiga i le ala e mafai ai ona latou faamalosia lo latou sootaga ma le Tama Faalelagi ma Iesu Keriso.
“O A’u, o le Alii, e noatia a’u pe a outou faia mea Ou te fai atu ai”
I le Mataupu Faavae ma Feagaiga 82, na toe ta’u mai ai e le Alii faatonuga na tuuina mai i se faaaliga na muamua atu (tagai Mataupu Faavae ma Feagaiga 78). O faatonuga o le faatuina lea o le Kamupani Tuufaatasi e pulea ai mataupu faaletino a le Ekalesia ma fausia ai Siona.
O leMataupu Faavae ma Feagaiga 82:10 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala iloga ina ia faigofie ona latou mauaina.
Faitau le Mataupu Faavae ma Feagaiga 82:8–10, ma vaavaai mo mea na aoao mai e le Alii e uiga i Ana poloaiga.
-
O le a le mafuaaga a le Faaola mo le tuuina mai o poloaiga ia i tatou?
-
O a mea ua folafola mai e le Faaola pe a tatou tausia Ana poloaiga?
Valaaulia tagata aoga e toe faailoa mai se upumoni mai nei fuaiupu ma i a latou lava upu. E mafai foi ona latou tusia i a latou api talaaga po o luga o le laupapa. Atonu e faailoa mai e tagata aoga ni upumoni e talitutusa ma lenei: Pe a tatou usiusitai i poloaiga a le Alii, ua Ia folafola mai e faamanuia i tatou.
O a mea o loo aoao mai e nei fuaiupu ia te oe e faatatau i uiga o le Tama Faalelagi ma Lona Alo o Iesu Keriso?
Ina ia fesoasoani i tagata aoga ia iloa le taimi na latou vaai ai i le faataunuuga o lenei upumoni, atonu e te manao e fai se gaoioiga e pei o lea:
Vaevae le vasega i ni vaega toalaiti. Fai atu i vaega taitasi e sue faataitaiga o le Faaola o loo faamanuiaina tagata mo le usitaia o Ana poloaiga. E mafai e tagata aoga ona lisi ni faataitaiga mai tusitusiga paia, o latou lava olaga, po o olaga o tagata latou te iloa. A uma ua lava se taimi, e mafai ona e valaaulia vaega e feauauai i le fefaasoaai o faataitaiga. E mafai ona outou talanoaina mea e mafai ona tatou aoao mai nei faataitaiga e uiga i le naunau o le Faaola e tausia Ana folafolaga.
Fusia e ala i feagaiga
Atonu e te manao e fesoasoani i tagata aoga ia iloa pe mafai faapefea e le fuaiupu 1 ona aoao atu e uiga i la tatou sootaga faalefeagaiga ma le Tama Faalelagi ma Iesu Keriso. E ala i feagaiga, tatou te osia ai folafolaga ma le Tama Faalelagi ma Iesu Keriso, ma La te faia folafolaga ma i tatou.
-
O le a sou manatu o le a se mea o aoao mai e le fuaiupu 10 e uiga i feagaiga tatou te osia ma le Tama Faalelagi ma Iesu Keriso?
Faitau le saunoaga lenei a Peresitene Russell M. Nelson, ma vaavaai mo mea na ia aoaoina mai e uiga i feagaiga.
O le taimi lava tatou te osia ai se feagaiga ma le Atua, tatou te tuua loa ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. …
O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē vaivai ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le loto o le Atua. E i ai Ona faamoemoega maualuluga mo i tatou. (Russell M. Nelson, “O Le Feagaiga Faavavau,” Liahona, Oke. 2022, 5, 6).
-
O le a sou manatu i le mea e taua ona manatua mai lenei faamatalaga?
O le tausia o feagaiga e aumaia ai faamanuiaga
I le avea ai o se vaega o faatonuga a le Alii i taitai o le Kamupani Tuufaatasi, sa Ia fautuaina ai Iosefa Samita, Oliva Kaotui, Eteuati Paterika, ma isi ina ia “fusia faatasi i se sootaga ma se feagaiga” (Mataupu Faavae ma Feagaiga 82:11) e pulea ai mataupu faaletino a le Ekalesia. I le avea ai ma fanau o le feagaiga a le Atua, tatou te osifeagaiga foi e faia ni mea patino a o tatou mulimuli ia Iesu Keriso.
Mafaufau e vaevae le vasega i ni vaega se lua ma valaaulia vaega taitasi e tuufatasia se tasi o lisi lenei. E mafai ona tusi e tagata aoga a latou lisi i le laupapa.
Faitau le Mataupu Faavae ma Feagaiga 82:12–19 ma fai se lisi o mea na talosagaina e le Alii ia sui auai o le Kamupani Tuufaatasi e osifeagaiga e fai.
Faitau le Mosaea 18:8–10 ma le Mataupu Faavae ma Feagaiga 20:77 ma fai se lisi o mea ua poloaiina i tatou e le Alii e osifeagaiga e fai i le aso.
-
O le a se mea e tumatila ia te oe mai nei lisi?
-
E faapefea e nei matafaioi o feagaiga ona tutusa?
-
O le a sou manatu e mafai faapefea e le tausia o a tatou feagaiga ona fesoasoani ia i tatou ia avea faapei o le Faaola?
Faitau le Mataupu Faavae ma Feagaiga 82:24, ma vaavaai mo mea na folafola atu le Alii e fai mo i latou o e mulimuli ia te Ia.
Mafaufau e faaali atu maneta fesootai. Valaaulia tagata aoga e faasoa mai mea na latou aoaoina mai lenei lesona e uiga i la latou sootaga ma Iesu Keriso. E mafai foi ona e faasoa atu ou lagona e uiga i faamanuiaga ua e maua mai le osia ma le tausia o feagaiga ma le Tama Faalelagi ma Iesu Keriso.
Tauloto le atamai i aoaoga faavae
I le taimi o lenei lesona, atonu e te manao e fesoasoani i tagata aoga e tauloto le Mataupu Faavae ma Feagaiga 82:10 ma le fasifuaitau autu o le mau “O A’u, o le Alii, e noatia a’u pe a outou faia mea Ou te fai atu ai.” Ona mafai lea ona e toe faamanatuina i lesona i le lumanai. O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toefaamanatu o le Atamai i Aoaoga Faavae.”