“Leksiyon 52—Doktrina ug mga Pakigsaad 38:15–27, 34–42: Paghiusa,” Manwal sa Magtutudlo sa Seminary sa Doktrina ug mga Pakigsaad, (2025)
“Doktrina ug mga Pakigsaad 38:15–27, 34–42,” Manwal sa Magtutudlo sa Seminary sa Doktrina ug mga Pakigsaad
Leksiyon 52: Doktrina ug mga Pakigsaad 37–40
Doktrina ug mga Pakigsaad 38:15–27, 34–42
Paghiusa
Ang Ginoo mihatag sa Iyang mga Santos og mga instruksiyon samtang nangandam sila sa paghimo og dagkong mga sakripisyo aron magpundok ngadto sa Ohio. Sa Iyang pagpadayag ngadto sa mga Santos, ang Manluluwas mipadayag sa Iyang kinaiya ug midapit sa Iyang katawhan sa pagpuyo sama Kaniya. Kini nga leksiyon makatabang sa mga estudyante nga mahimong mas sama sa Manluluwas pinaagi sa paghatag og bili sa uban ug tinguhaon ang panaghiusa.
Pagpangandam sa estudyante: Dapita ang mga estudyante sa paghunahuna mahitungod sa mga grupo diin sila naapil ug sa pagpangutana sa usa ka tawo niana nga grupo kon unsay paminaw nila nga gikinahanglan alang sa panaghiusa. Mahimong makig-istorya ang mga estudyante sa usa ka sakop sa pamilya, lider sa korum o klase, magtutudlo, o coach.
Mga Posibleng Kalihokan sa Pagkat-on
Gusto sa Ginoo nga kita mahimong mahisama Kaniya
Mahimo nimong sugdan ang leksiyon pinaagi sa pagdapit sa matag estudyante sa pagsulat og lima sa ilang mga interes. Dayon bahina ang klase ngadto sa gagmay nga mga grupo. Dapita sila nga ipakigbahin ang ilang mga interes ug ilista ang bisan unsa nga komon kanila. Pagkahuman, hangyoa sila sa paghisgot kon ngano nga usahay lisod alang sa mga tawo nga adunay nagkalainlaing mga interes nga magkahiusa ug kon nganong ang panaghiusa importante alang sa mga disipulo ni Kristo.
Dapita ang mga estudyante nga pamalandongan ang mosunod nga mga pangutana:
-
Unsaon nako paghunahuna ug paglihok ngadto niadtong kinsa lahi kanako?
-
Sa unsang paagi nga ang akong mga hunahuna ug mga aksiyon mahimong hinungdan sa pagkabahin-bahin o pagdala og panaghiusa?
Dasiga ang mga estudyante nga magtinguha og inspirasyon pinaagi sa Espiritu Santo aron matabangan sa pag-ila sa mga paagi nga sila makasunod sa mga ehemplo ni Jesukristo diha sa paagi sa ilang pagtratar sa uban.
Niadtong Disyembre 1830, si Joseph Smith nagtrabaho sa dinasig nga rebisyon sa Biblia ug nakadawat sa unsay karon nga Moises 6–7 diha sa Perlas nga Labing Bililhon. Kini nga mga kapitulo naghatag og asoy sa usa ka propeta nga ginganlan og Enoch ug sa iyang katawhan. Tungod sa ilang pagkamatarong ug panaghiusa, ang Ginoo mitawag niini nga mga katawhan og Zion.
Diha sa Doktrina ug mga Pakigsaad 38, ang Manluluwas misugo sa mga Santos sa pagpundok ngadto sa Ohio. Siya mitudlo kanila mahitungod sa Iyang kinaiya ug mihatag og gibug-aton sa mga baroganan sa pagtukod sa Zion. Ang pagkamasulundon niini nga mga baroganan makatabang sa mga Santos sa pag-andam sa ilang mga kaugalingon sa pagdawat sa balaod sa Manluluwas ug mahatagan sa Iyang gahom (tan-awa sa Doktrina ug mga Pakigsaad 38:32).
Basaha ang Doktrina ug mga Pakigsaad 38:24–27, mangita sa mga hiyas nga gusto ni Jesukristo nga atong palamboon.
Samtang basahon sa mga estudyante ang Doktrina ug mga Pakigsaad 38:24–27, mahimo nimong hisgotan ang gibalikbalik nga hugpong sa mga pulong diha sa mga bersikulo 24–25. Mahimo ka usab magdapit og pipila ka estudyante sa pagdrama-drama sa sambingay diha sa mga bersikulo 26–27.
-
Unsa sa imong hunahuna ang gipasabot sa pagtamod sa imong igsoon sama sa imong kaugalingon? (Tan-awa sa Mateo 22:36–39; Juan 13:34–35; Jacob 2:17–19.)
-
Unsa ang atong makat-onan mahitungod sa Manluluwas gikan sa sambingay sa mga bersikulo 26–27?
-
Unsa ang gitudlo kanato sa mga bersikulo 24–27 kon unsaon nato nga mahimong sama ni Jesukristo?
Tabangi ang mga estudyante nga makaila og baroganan nga susama niini: Mahimo kitang sama ni Jesukristo samtang atong hatagan og bili ang uban ug tinguhaon ang panaghiusa isip Iyang mga disipulo.
-
Sa unsang paagi si Jesukristo usa ka ehemplo sa paghatag og bili sa uban? Sa pagdasig sa panaghiusa?
Si Presidente Russell M. Nelson mitudlo bahin sa unsang paagi kita makahatag og bili sa uban ug maghiusa.
Sa kataposan, atong maamgohan nga ang pagkasabot lamang sa tinuod nga Pagkaamahan sa Dios ang magdala og hingpit nga pagdayeg sa tinuod nga panag-igsoonay sa mga kalalakin-an ug sa tinuod nga panag-igsoonay sa kababayen-an. Kana nga pagsabot modasig kanato uban ang maayo kaayong tinguha sa pagtukod og mga taytayan sa kooperasyon imbis mga paril sa segregasyon.
(Russell M. Nelson, “Remarks at Worldwide Priesthood Celebration,” [pakigpulong nga gihatag atol sa selebrasyon sa “Be One”, Hunyo 1, 2018], newsroom.https://folky.shop/study?lang=ceb)
-
Unsa nga mga pagkaparehas ang imong nakita tali sa mga pagtulun-an sa Ginoo diha sa Doktrina ug mga Pakigsaad 38:24-27 ug sa kang Presidente Nelson?
Ikonsiderar ang pagpasalida sa bidyo nga “One in Christ” (4:48), nga anaa sa ChurchofJesusChrist.org, aron matabangan ang mga estudyante nga makasabot kon sa unsang paagi ang Manluluwas nagtabang kanato nga magkahiusa.
Basaha ang Doktrina ug mga Pakigsaad 38:34–36, 39–42, mangita kon sa unsang paagi ang mga Santos nga nangandam sa pagpundok ngadto sa Ohio gidapit nga magkahiusa.
-
Unsa ang imong nakaplagan nga makatabang niadtong mobalhin sa Ohio sa paghatag og bili sa usag usa ug magkahiusa?
Pagsalikway sa mga kinaiya ug mga binuhatan sa pagpihig
Gamita ang mga pulong sa mga propeta sa paghatag og gibug-aton sa doktrina ug mga baroganan: Alang sa pagbansay niini, tan-awa ang pagbansay nga giulohan og, “Pagtudlo gikan sa mga kasulatan ug sa mga pulong sa mga propeta sa ulahing mga adlaw” diha sa Pagpalambo sa mga Kahanas sa Magtutudlo: Itudlo ang Doktrina. Ikonsiderar ang pagpraktis sa kahanas sa, “pag-andam og mga pagdapit nga makatabang sa mga estudyante sa pagkonektar sa mga kamatuoran nga makita diha sa mga kasulatan ngadto sa unsay gisulti sa buhing mga propeta” sama sa gihulagway sa mosunod nga pamahayag gikan ni Presidente Nelson.
Si Presidente Russell M. Nelson mitudlo mahitungod sa kaimportante sa paagi sa atong pagtratar sa uban. Basaha ang pamahayag o tan-awa ang bidyo nga “Ipatigbabaw ang Dios Labaw sa Tanan” (18:51; tan-awa gikan sa time code 10:40 hangtod 13:01) sa https://folky.shop/study/general-conference/2020/10/46nelson?lang=ceb.
Ang matag usa kanato adunay balaanong potensiyal tungod kay ang matag usa anak sa Dios. Ang matag usa managsama diha sa Iyang panan-aw. Ang mga implikasyon niini nga kamatuoran lawom kaayo. Mga kaigsoonan, palihog paminaw og maayo sa unsay akong isulti. Ang Dios wala magmahal sa usa ka kaliwat nga labaw kay sa lain. Iyang doktrina mahitungod niini klaro Siya nagdapit sa tanan nga moduol ngadto Kaniya, “itom ug puti, ulipon ug gawasnon, lalaki ug babaye [2 Nephi 26:33].”
Akong iseguro kaninyo nga ang inyong kahimtang atubangan sa Dios dili tinoon pinaagi sa kolor sa inyong panit. Ang pagkanauyonan o wala mauyoni sa Dios mag-agad sa inyong debosyon ngadto sa Dios ug sa Iyang mga sugo ug dili sa kolor sa inyong panit.
Naguol ko nga ang atong Itom nga mga kaigsoonan sa tibuok kalibotan nag-antos sa mga kasakit sa diskriminasyon ug pagkamapihigon. Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon. Mohangyo ako kaninyo sa pag-awhag og respeto sa tanang anak sa Dios.
Ang pangutana alang sa matag usa kanato, bisan unsa pa ang kaliwatan, managsama. Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa inyong buhaton sa matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on? (Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94)
-
Unsa ang mipatigbabaw diha kaninyo gikan sa mga pagtulun-an ni Presidente Nelson?
-
Unsa ang pipila ka paagi nga atong mahimo aron mapugngan o mabiyaan ang mga kinaiya ug mga aksiyon sa pagpihig?
Samtang ang mga estudyante maghisgot sa ilang nakat-onan gikan sa kinutlo, magmabinantayon ni bisan kinsa sa imong mga estudyante nga mahimong nakasinati og pagpihig o rasismo sa bisan unsang matang. Hangyoa ang mga estudyante sa pagpakigbahin kon sa unsang paagi sila napanalanginan pinaagi sa pagpaningkamot sa paghatag og bili sa uban ug sa pagpakighiusa isip mga disipulo ni Kristo.
Dapita ang mga estudyante sa mainampoong pagsukod kon unsa sila ka maayo sa ilang gibuhat nga paghatag og bili sa uban ug pagtinguha og panaghiusa.
Mahimong gusto sa mga estudyante nga motubag sa mosunod nga mga pangutana diha sa ilang journal sa pagtuon.
Hunahunaa pag-ayo ang mosunod nga mga pangutana ug tubaga ang usa o daghan pa diha sa imong study journal:
-
Unsa ang imong buhaton aron mahatagan og bili ang tanang anak sa Dios ug makapakita og gugma ngadto kanila?
-
Unsa ang imong mahimo aron mapugngan o mabiyaan ang mga kinaiya ug mga aksiyon sa pagpihig?
-
Sa unsang paagi ang pagbuhat niini makatabang kanimo nga mahimong mas mahisama sa Manluluwas?
Hunahunaa ang pagpakigbahin sa imong mga pagbati mahitungod sa importansiya sa atong pagtratar sa uban ug ang mga panalangin sa pagkahiusa diha kang Kristo.