Seminare
Lesona 7—Iosefa Samita—Talafaasolopito 1:1–26: “Ole Atu i le Atua”

“Lesona 7—Iosefa Samita—Talafaasolopito 1:1–26: ‘Ole Atu i le Atua’” Tusi Lesona a le Faiaoga Seminare o le Mataupu Faavae ma Feagaiga (2025)

“Iosefa Samita—Talafaasolopito 1:1–26,” Tusi Lesona a le Faiaoga Seminare o le Mataupu Faavae ma Feagaiga

Lesona 7: Iosefa Samita— Talafaasolopito 1:1-26

Iosefa Samita—Talafaasolopito 1:1–14

“Ole Atu i le Atua”

Iosefa Samita talavou o loo suesue i tusitusiga paia

A o laitiiti, sa mana’o Iosefa Samita e mulimuli ia Iesu Keriso ma saili ia iloa po o le fea lotu e sa’o ma po o fea foi e tatau ona ia auai. Peitai, e tele lotu sa aoaoina ni mea eseese, ma sa faigata i le taulealea o Iosefa ona iloatino le upumoni. O lenei lesona e mafai ona fesoasoani i tamaiti aoga e mulimuli ai i faataitaiga a Iosefa Samita i a latou taumafaiga e aoao le upumoni mai le Atua.

Gaoioiga E Ono Mafai Ona Aoao Ai

O se taimi o le lē mautonu

I le lesona lenei, o le a suesue ai e tamaiti a’oga le Iosefa Samita—Talafaasolopito 1:1–14 ma se taula’iga i faatinoga a Iosefa Samita ao saili o ia ia iloa po o le fea ekalesia e auai. I le lesona lenei, “Iosefa Samita—Talafaasolopito 1:15–20,” o le a suesue ai e tamaiti aoga ni aafiaga o Iosefa i le Togavao Paia. E faalagolago i taimi avanoa i le vasega, e mafai ona e tuufaatasia nei lesona e lua.

Valaaulia tamaiti aoga e faasoa mai ni faataitaiga o taimi na latou maua ai ni faamatalaga feteenai. Mo se faataitaiga, atonu na latou vaai i lipoti ma manatu eseese e uiga i se autu i luga o upega o fesoota’iga po o talafou.

  • Aisea e faigata ai i nisi taimi ona iloa faamatalaga faatuatuaina?

  • E mafai faapefea e na lava luitau ona faafaigata ai mo se tasi ona maua le upumoni e uiga ia Iesu Keriso ma Lana aoaoga faavae?

A o aoao tamaiti aoga e uiga i aafiaga o Iosefa Samita, valaaulia i latou e mafaufau pe mafai faapefea e lana faataitaiga ona fesoasoani ia i latou i a latou lava sailiga mo le upumoni.

I lona laitiiti, sa popole ai Iosefa Samita mo le manuia o lona agaga. I totonu o le nuu, ma e oo lava i totonu o le aiga o Samita, sa i ai ni manatu eseese po o le fea le ekalesia sa i ai upumoni e alagatatau mo le faaolataga.

Mafaufau e vaevae fuaiupu nei i tamaiti aoga ina ia mafai ona vave maua e le vasega ia lu’itau a Iosefa i le faailoaina o le upumoni.

Faitau le Iosefa Samita—Talafaasolopito 1:5–10, ma vaavaai pe aisea na faigata ai ia Iosefa ona iloa le upumoni a le Atua i tapuaiga eseese.

  • E faapefea ona e vaaia fenumia’i faapena e uiga i tapuaiga i le lalolagi i aso nei?

  • Aisea e te manatu ai e taua lo tatou saili ia iloa le upumoni mai le Atua nai lo le taliaina o mea uma ua aoaoina mai?

Ina ia fesoasoani i tamaiti a’oga ia fesoota’i le faataitaiga a Iosefa i o latou olaga, mafaufau e kopi le siata lenei i luga o le laupapa ma faatumu faatasi o se vasega i le lesona atoa.

Tusi le siata lenei i lau api talaaga o suesuega, ma faaigoa ia vaega kuata e pei ona e vaai i ai i lalo:

Fesili na i ai ia Iosefa mo le Atua

O a’u fesili mo le Atua

O mea na faia e Iosefa

O mea o le a ou faia

Toe tepa i tua i mea na e faitau ai i le Iosefa Samita—Talafaasolopito 1:8, 10. Tusi fesili ma faatinoga a Iosefa i le kuata talafeagai.

Atonu e faailoa mai e tamaiti aoga mai le fuaiupu 10 o fesili a Iosefa o le “O le a le mea e tatau ona fai?” ma le “O ai o nei [ekalesia] uma e sa’o?” Atonu latou te matauina i le fuaiupu 8 o faatinoga a Iosefa e aofia ai le manatunatu ma auai i sauniga lotu eseese.

E ono fesoasoani le faasino atu o tagata aoga i le parakalafa 3 i le vaega o le Mauaina o le Malamalama Faaleagaga o le Pepa Autu o le Atamai i Aoaoga Faavae (2023) a o outou talanoaina le fesili lenei.

  • Aisea e te manatu ai o le a fiafia le Tama Faalelagi ona sa fesili atu Iosefa i nei fesili?

O le mulimuli i faataitaiga a Iosefa Samita

A o tatou saili ia iloa le mea moni, e mafai ona fesoasoani le mulimuli i lenei valaaulia mai ia Peresitene Russell M. Nelson:

Peresitene Russell M. Nelson

Ua faatulagaina e Iosefa Samita se mamanu mo i tatou i le foiaina o a tatou fesili. …

I se tulaga faapena, o le a se mea e tatala mai e lau sailiga mo oe? O le a le poto e le o ia te oe? O le a se mea e te lagona ua manaomia vave ona iloa pe malamalama i ai? Mulimuli i le faataitaiga a le Perofeta o Iosefa. (Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95)

O se tasi o upumoni e mafai ona tatou aoao mai ia Peresitene Nelson o le e mafai ona tatou mulimuli i le faataitaiga a Iosefa Samita ia aoao le upumoni a le Atua mo i tatou lava. Toe manatu i fesili na fai mai e Peresitene Nelson. E faapefea ona e tali fesili na mo oe lava? Mafaufau loloto i ni au fesili o i ai ma tusi i le kuata o i ai le “O a’u fesili mo le Atua” i lau api talaaga mo suesuega.

Atonu na filifilia e tamaiti aoga se fesili e taulai atu i ai i le lesona ““Sailia o Faaaliga Patino mo A’u Fesili“ po o le “Galue i le Faatuatua e Saili Tali.” Atonu e fesoasoani le faamanatu o mea nei ia i latou.

  • O le fea o au fesili e te lagona le musuia e faamuamua i lenei taimi i lou olaga? Aisea?

A o faaauau pea ona e suesue i le Iosefa Samita—Talafaasolopito i le gasologa o le lesona, ia faaauau pea ona faatumu le siata i lau api talaaga mo suesuega. Vaavaai mo ni auala e mafai ona e mulimuli ai i le faataitaiga a Iosefa e sue ai tali i au lava fesili. I le kuata o le “O le a le mea o le a ou faia”, tusi i lalo lagona e te maua e faatino ai.

A uma ona faitau e tamaiti aoga le fuaitau lenei, valaaulia i latou e faaauau le faatumuina o le kuata “O le mea na faia e Iosefa” i luga o le laupapa.

Faitau le Iosefa Samita—Talafaasolopito 1:11–14, ma vaavaai mo faatinoga faaopoopo na faia e Iosefa e aoao ai le moni o le Atua. Mafaufau e tusi mea e te maua i le kuata “O le mea na faia e Iosefa”.

Ina ia vaai i fesili ma faatinoga faaopoopo na faia e Iosefa e saili ai tali mai le Atua, e mafai ona e matamata i le vitio “O Le Toefuataiga,” o loo maua i le ChurchofJesusChrist.org, mai le faailo taimi 1:15 i le 15:34.

19:14

Afai e te filifili e matamata i le vitio “O Le Toefuataiga”, mafaufau e taofi i taimi uma e faailoa mai ai e tamaiti a’oga se fesili fou na i ai ia Iosefa po o se faatinoga na ia faia. Fai atu i se tamaitiiti aoga e faaopopo atu na mea i kuata i luga o le laupapa.

O faataitaiga nei o faatinoga e ono matauina e tamaiti a’oga na faia e Iosefa i le vitio: fai atu fesili i ona matua, faia o talanoaga ma failauga, faaalu se taimi e mafaufau loloto ai i mea sa ia aoaoina, faitauina o vaega eseese mai le Tusi Paia, ma le le fiu gofie pe a le vave ona oo mai tali.

  • E ui lava ina sa lei iloa e Iosefa po o le fea o lotu e auai, o le a le mea na ia iloa e uiga i le Atua? (Tagai i le parakalafa 2–3 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae [2023].)

  • Aisea e te manatu ai ua naunau tele le Atua e fesoasoani ia i tatou ia iloa le upumoni? (Tagai i le Iosefa Samita—Talafaasolopito 1:11.)

  • O le fea o faatinoga a Iosefa na e faata’ita’ia i lou olaga? O le a le mea e te manao e faataitai?

Manatua le valaaulia na tuuina mai e Peresitene Nelson e “mulimuli i le faataitaiga a le Perofeta o Iosefa.” Saili le fesoasoani mai le Tama Faalelagi a o e mafaufau loloto i mea e mafai ona e faia e mulimuli ai i le faataitaiga a Iosefa i lau sailiga mo le upumoni.

Afai e manaomia, e mafai ona e faasoa atu ni auala e mafai ai e tamaiti aoga ona mulimuli i faataitaiga a Iosefa Samita, e pei o nei:

  • Saili se mau e aogā ia te oe. Fai se fuafuaga e toe manatunatu ai pea lava pea. E mafai ona e faia se pepa lautele ma tuu i se mea o le a e vaai ai i le fuaitau i le aso atoa. Pe atonu foi e te taumafai e manatuaina ma taulotoina mai lou mafaufau i aso uma mo se vaiaso.

  • Filima’oti e tatalo ma le leo i le Atua i se nofoaga lilo. Fatu se otootoga o mea e te manao e aofia i lau tatalo.

I le kuata o i ai le “O le mea o le a ou faia” i totonu o lau api talaaga mo suesuega, tusi ai se auala se tasi pe lua o le a e mulimuli ai i le faataitaiga a Iosefa Samita. Ia aofia ai auiliiliga patino o auala o le a e faatinoina ai nei faatinoga a o e saili ia tali mai le Atua. Atonu e te manao e faasoa atu lau fuafuaga i se uo faatuatuaina po o se sui o le aiga. E taua le manatua e oo lava i fuafuaga sili ona lelei e ono umi se taimi e aumaia ai faai’uga manaomia. Toe foi i lau api talaaga mo suesuega ma le Iosefa Samita—Talafaasolopito mai lea taimi i lea taimi e iloilo ai po o a mai au faatinoga.

Tuu atu i tamaiti aoga e faasoa mai molimau o faatinoga faamaoni ia e mafai ona taitai atu ai i faaaliga ma tali i fesili faaleagaga. Molimau atu a o tatou mulimuli i le faataitaiga a Iosefa Samita, o le a fesoasoani mai le Atua ia tatou iloa le mea moni mo i tatou lava.