O Le Faaaogaina o le Sau, Mulimuli Mai ia te Au—Mo le Aoga Sa

4:55

O le aiga e tatau ona avea ma nofoaga autu o le aoaoina o le talalelei. E moni lenei mea mo oe ma i latou e te faiaoga ai. A o e tapenapena e aoao atu, amata i le i ai o ou lava poto masani i tusitusiga paia. O lau tapenaga aupito taua lava o le a tupu a o e sailia musumusuga a le Agaga Paia.

Sau, Mulimuli Mai ia te Au---Mo Tagata Taitoatasi ma Aiga o se vaega taua foi o lau tapenaga. O le a fesoasoani ia te oe e maua ai se malamalama loloto atu o mataupu faavae e maua i tusitusiga paia. O le a mafai foi e oe ona musuia ma valaaulia tagata o le vasega e faaaoga le Sau, Mulimuli Mai ia te Au---Mo Tagata Taitoatasi ma Aiga e faalautele ai a latou suesuega faaletagata lava ia ma faaleaiga (mo se fesoasoani e faia lea mea, tagai “Manatu mo le Faamalosiauina o Suesuega a le Tagata Lava Ia ma Faaleaiga” i le punaoa lenei). A o e faia, manatua e nofouta i tagata o le vasega atonu o tulaga o o latou aiga e le lagolagoina ai suesuega faaleaiga o tusitusiga paia.

I le taimi o au tapenapenaga, o le a oo mai mafaufauga ma lagona uunai ia te oe e uiga i tagata e te faiaoga ai, pe faapefea ona faamanuiaina o latou olaga i mataupu faavae o i mau, ma pe mafai faapefea ona musuia i latou e sue na mataupu faavae a o latou suesueina tusitusiga paia e i latou lava.

A o faia lau fuafuaga e aoao atu ai, e mafai ona e maua ni musumusuga faaopoopo i le vailiiliina o otootoga o i lenei punaoa. Aua e te mafaufau i nei manatu faapea o ni faatonuga o lea sitepu ma lea sitepu, ae o ni fautuaga e amoti ai ou lava musumusuga. Ua e silafia tagata o lau vasega, ma e silafia foi i latou e le Alii. O le a Ia musuia oe i auala sili e fesoasoani ai i tagata o le vasega e atinae i luga o aoaoga faaletalalelei o loo latou faia i o latou fale.

E tele isi au punaoa o loo maua a o e tapenapena, e aofia ai manatu o i le Sau, Mulimuli Mai ia te Au---Mo Tagata Taitoatasi ma Aiga ma mekasini a le Ekalesia. Mo nisi faamatalaga e uiga i nei punaoa ma isi, tagai “Punaoa Faaopoopo”

• O le aiga o le nofoaga sili lea mo le aoaoina o le talalelei. I le avea ai ma faiaoga, ua ia te oe se tiutetauave taua e lagolago ai, faamalosiau, ma atinae i luga o aoaoga faaletalalelei i le aiga.

• O le a loloto atu le liua o tagata o le vasega i le talalelei a Iesu Keriso pe a latou malamalama ma faaaoga aoaoga faavae moni. Fautuaina i latou e faatino lagona uunai latou te maua mai le Agaga Paia.

• O le aoao atu e le na o le lauga atu, ae e sili atu foi i le na ona faatautaia o se talanoaga. O se vaega o lau matafaioi o le faamalosiauina lea o le auai e faatino lea e faamalamalamaina ai ma e faavae i luga o tusitusiga paia

• E finagalo le Tama Faalelagi ia e manuia o se faiaoga. Ua Ia saunia le mau punaoa e fesoaosani ai ia e manuia, e aofia ai ma fonotaga faaleaufono a faiaoga. I nei fonotaga e mafai ai e oe ona fefautuaai ma isi faiaoga e uiga i soo se luitau atonu e feagai ma oe. E mafai foi ona e talanoaina ma faata’ita’i ia mataupu faavae o le aoao atu e faapei o Keriso.

• E sili ona aoaoina e tagata pe a latou maua avanoa e aoao atu ai. E i ai taimi, mafaufau e faataga tagata o le vasega, e aofia ai ma le autalavou e aoao atu se vaega o le lesona. Ia faavae lenei faaiuga i luga o manaoga ma tomai o tagata o le vasega. Afai e te valaauliaina se tagata o le vasega e faiaoga, faaalu se taimi e fesoasoani ai ia te ia e vave saunia ai e ala i le faaaogaina o manatu o loo maua i lenei punaoa ma i le Sau, Mulimuli Mai ia te Au---Mo Tagata Taitoatasi ma Aiga. Manatua i le avea ai ma faiaoga ua valaauina, ua ia te oe le tiutetauave mo mea e aoao atu i le vasega.

• O lenei punaoa ua aofia ai otootoga mo vaiaso taitasi o le tausaga sei vagana ai Aso Sa e lua e fai ai konafesi aoao. O Aso Sa e le faia ai le Aoga Sa, ona o konafesi a le siteki po o isi mafuaaga, e mafai e aiga ona faaauau le faitauina o le Feagaiga Fou i le fale e tusa ai ma le faasologa ua otooto atu. Ina ia tausisia e lau vasega le faasologa, e mafai ona e filifili e faamisi se lesona pe tuufaatasi ni lesona se lua. Ina ia aloese mai le fenumiai, e ono mananao peresitene o le Aoga Sa e vave fautuaina ia faiaoga o le Aoga Sa e uiga i nei fetuunaiga.