1 ma le 2 Timoteo; Tito; Filemoni

• O loo ola tagata o lau vasega i se vaitaimi ua aoaoina ai le tele o aoaoga faavae sese. Sa ola foi Timoteo ma Tito i se vaitaimi faapena, o lea atonu o le a aoga ai fautuaga a Paulo ia i laua i tagata o lau vasega. O nisi o fuaitau o loo i ai fautuaga a Paulo o loo maua i “Punaoa Faaopoopo.” E mafai ona e tofia tagata taitoatasi o le vasega e faitau se tasi o fuaitau nei ma faasoa mai se mea ua ia aoaoina e uiga i le taua o aoaoga faavae moni (tagai foi Alema 31:5).

• Atonu e le o iloa e tagata o lau vasega le mana o faataitaiga lelei o loo latou faia. Mafaufau e valaaulia i latou e talanoa e uiga i auala o loo avea ai tagata latou te iloa, e aofia ai tagata o le vasega, o ni faataitaiga o ni soo o Keriso. Atonu o le a aoga i le talanoaga pe a e lisia i luga o le laupapa ia upu o loo i le fuaiupu 12 o loo faamatala ai le ala e tatau ona avea ai i tatou ma se faataitaiga i le—upu, talanoaga (lea e mafai foi ona faauigaina o le amio po o amioga), alofa, loto, faatuatua, ma le le gaoia. E mafai ona talanoaina e tagata o le vasega auala e mafai ona avea ai i tatou ma faaaoao i e ua faatuatua i nei auala taitasi.

• I le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga, sa valaaulia ai tagata o lau vasega e vaavaai i le 2 Timoteo mo le fautuaga na tuuina atu e Paulo ia Timoteo e faamalosiau ai ia te ia i lana galuega. Fai atu i tagata o le vasega e faasoa atu soo se manatu na latou mauaina, pe atonu e mafai ona e tuu atu ia i latou ni nai minute e sue ma faasoa atu ai nisi o fautuaga a Paulo (mataupu 1 o loo i ai nisi o faataitaiga lelei). E mafai foi ona latou faasoa mai se aafiaga i se taimi sa fesoasoani ai le Atua ia i latou e faatoilalo o latou atugaluga ma tuu atu ia i latou “le agaga e … faamalosi ai, ma alofa ai, ma mafaufau tonu ai” (2 Timoteo 1:7).

• Ina ua uma ona lapataia Timoteo e uiga i “aso faigata” o le a oo mai, sa molimau atu Paulo e uiga i le mana ma le taua o tusitusiga paia (tagai 2 Timoteo 3:1, 14–17). Ina ia amata se talanoaga e uiga i le taua o tusitusiga paia i taimi faigata, e mafai ona e valaaulia tagata o le vasega e toe faamanatu le faamatalaina e Paulo o faigata i aso e gata ai o loo maua i le 2 Timoteo 3:1–7. E mafai ona latou sueina ma faasoa atu ni mau sa fesoasoani e puipuia ai i latou faasaga i faigata e pei o nei (o loo lisiina nisi o faataitaiga i le “Punaoa Faaopoopo”). Na faapefea e lo tatou suesueina o tusitusiga paia ona puipuia i tatou mai faalavelave o le lalolagi i aso nei?

• O le suesueina o fautuaga a Paulo e uiga i le mana o tusitusiga paia, e mafai ona avea o se avanoa mo tagata o le vasega e faamalosiau atu ai le tasi i le isi i a latou taumafaiga e suesue i le upu a le Atua. Atonu e mafai ona faitau e tagata o le vasega le 2 Timoteo 3:14–17 ma faailoa mai faamanuiaga ma puipuiga ia e maua mai i le suesueina o tusitusiga paia. E mafai ona latou faasoa atu ni aafiaga i taimi na faataunuuina ai nei faamanuiaga i o latou olaga ona o le latou suesue i tusitusiga paia. E mafai foi ona e tuu atu i tagata o le vasega ni nai minute e mafaufau loloto ai i mea e mafai ona latou faia ia maua ai ni aafiaga e sili atu ona anoa i tusitusiga paia, faaletagata lava ia ma o ni aiga.

• Ae e te lei amatalia se talanoaga e uiga i le Tusi a Filemoni, atonu e te fai atu i se tagata o le vasega e faasoa mai nisi o faamatalaga e uiga ia Filemoni ma lana auauna o Onesemo (o loo i ai se faamatalaga puupuu i le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga). Ona vaevae lea o lau vasega i vaega e lua, ma tuu atu i vaega taitasi se tasi o fesili nei: O a ni vaega talitutusa ua e vaaia i le va o le mea sa manao Paulo e fai mo Onesemo ma le mea sa faia ma le lotomalie e le Faaola mo i tatou? E ui atonu sa faigata ia Filemoni ona faamagalo lana pologa o le sa sola ese, e mafai faapefea e le talalelei a Iesu Keriso ona faigofie atili ai le faamagalo atu? A uma ona faasoa mai e vaega mea na latou aoaoina, mafaufau e valaaulia tagata o le vasega e faasoa mai ni fuaitau o mau po o ni aafiaga sa fesoasoani ia i latou ia malamalama atili i le faamagalo atu. E mafai foi ona fesoasoani le savali a Elder Kevin R. Duncan o loo i le “Punaoa Faaopoopo” i lenei talanoaga.

• 1 Timoteo 1:1–7; 4:1–2, 6; 6:3–5, 20–21

• 2 Timoteo 3:13–17; 4:2–4

• Tito 1:7–9; 2:1, 7–8

Na aoao mai Elder Kevin R. Duncan:

“E leai se agaga o soifua o le a le avea, i se tasi taimi po o se isi, ma tagata ua aafia i faatinoga faatamala a se isi, amioga faatiga, po o se uiga o le agasala. O se tasi nei o mea tatou te tutusa uma ai.

“E faafetai ai, i le Atua, i Lona alofa ma le alofa mutimutivale i Lana fanau, ua saunia ai se ala e fesoasoani e faatonutonu ai i tatou mai nei aafiaga faigata o le olaga. Ua Ia saunia se alofaga mo i latou uma o e ua avea ma tagata ua aafia i faaletonu a isi. Ua Ia aoao i tatou e mafai ona tatou faamagalo atu! …

“I le tele o tausaga ua mavae, ao o’u lipeaina se pa, sa ulufia lo’u tamatamailima i se fasi laau. Sa ou faia sina taumafaiga e aveese ai le fasi laau ma faapea ua aveese, ae leai. Ao faagasolo pea le taimi, sa ufitia e le aano le fasi laau, ma patu ai lo’u lima. Sa faalavelave ma tiga i nisi taimi.

“I nai tausaga mulimuli ane sa ou fuafua loa e faia i ai se mea. Nao lou niniina lava i ai o se kulimi i le patu ma ufiufi i se kosi. Sa ou faia sooa lenei mea. E le mafai ona e iloaina le faateia o a’u i se tasi aso, ao ou aveesea le kosi, ua aluese le fasi laau mai lo’u lima.

“Na faavaivaia e le kulimi le pau ma mafai ai ona aluese lea mea na mafua ai le tiga mo le tele o tausaga. Na aluese loa le fasi laau, sa vave ona pe le lima, ma e oo mai i lenei aso, e leai ma se mea o iloa ai se manu’a.

“I se auala talitutusa lava, o se loto lē faamagalo e mafai ona natia ai se tiga e le manaomia. A tatou faaaogaina se ū’u faamalolo o le Togiola a le Faaola, o le a Ia faamaluluina o tatou loto ma fesoasoani ia tatou suia. E mafai ona Ia faamalolo se agaga ua manua (tagai Iakopo 2:8)” (“O Le U’u Faamalolo o le Faamagaloga,” Ensign po o le Liahona, Me 2016, 33).