Galuega 6-9

• O a ni upumoni na aoao mai e tagata o le vasega mai le faitauina o le tala ia Setefano i le vaiaso lenei? Mafaufau e valaaulia tagata o le vasega e suesue i aoaoga a Setefano i le Galuega 7:37–53, e vaavaai ai pe na faapefea ona pei taitai Iutaia o tagata Isaraelu anamua o e na teenaina perofeta. Atonu e te taulai atu i le faamatalaga a Setefano e uiga i nei taitai o loo i le Galuega 7:51. E faapefea ona fesoasoani le 2 Nifae 28:3–6; 33:1–2; Mosaea 2:36–37; Alema 10:5–6; ma le Alema 34:37–38 i tagata o le vasega ia malamalama i lenei faamatalaga? Aisea atonu tatou te “tetee ai i le Agaga Paia”? O le a se mea e mafai ona tatou faia ia iloa lelei ai ma mulimuli ai i uunaiga a le Agaga Paia?

• O le suesue i le tala ia Simona e mafai ona fesoasoani i tagata o le vasega e iloilo ai mafuaaga ua latou ola ai i le talalelei. Ina ia suesue o se vasega i le tala lenei, e mafai ona e tusia fesili i luga o le laupapa O ai Simona? O le a le mea sa manao i ai o ia? ma le Na faapefea ona ia taumafai e maua? Totofi tagata taitoatasi o le vasega e faitau le Galuega 8:9–24, ma vaavaai mo tali i nei fesili. O le a se mea e mafai ona tatou aoao mai le aafiaga o Simona?

• Ina ia fesoasoani i tagata o lau vasega ia malamalama i le uiga o le ia “tonu [o latou loto] i luma o le Atua” (Galuega 8:21), e mafai ona e valaaulia i latou e suesue i le Mataupu Faavae ma Feagaiga 121:41–46, ma sue ia upu po o fasifuaiupu o loo faamatala ai le mea e tatau ona pei ai o tatou loto, a o tatou taumafai e auauna i le Atua ma maua Ana meaalofa. E mafai ona faatusatusa e tagata o le vasega nei malamalamaaga loloto i le tala ia Simona o loo maua i le Galuega 8:9–24. O a upumoni sa lei malamalama i ai Simona i lea taimi? E mafai faapefea ona fai o tatou loto ia “tonu i luma o le Atua”?

• Pe sa faatusatusa e tagata o lau vasega ia Setefano ma Filipo ia Simona i le taimi o a latou suesuega patino, e pei ona fautuaina ai i le otootoga o le vaiaso lenei o loo i le Sau Mulimuli Mai ia te A’u—Mo Tagata Taitoatasi ma Aiga? Afai o lea, o le a se mea na latou aoaoina? Atonu e te valaauliaina i latou e sue i nei mataupu se faamaoniga e faapea, sa tonu loto o isi tagata—o tagata e pei o Filipo ma le tagata Aitiope (Galuega 8:26–40) ma Saulo (Galuega 9:1–22).

• Ina ia fesoasoani i tagata o le vasega ia malamalama i auala e mafai ona latou taitai atu ai isi ia Iesu Keriso (tagai Galuega 8:31), atonu e te valaaulia ni tagata se toalua o le vasega e saofafai faafesagai ma faitau le talanoaga a Filipo ma le tagata mai Aitiope o loo i le Galuega 8:26–39. E mafai e se tagata lona tolu o le vasega ona faitau vaega e le o le talanoaga. O le a se mea ua tatou aoao mai i le faataitaiga a Filipo e uiga i le aoao atu o le talalelei i isi?

• Ina ia suesue i faataitaiga i aso nei o le tala i le Galuega 8:26–39, e mafai e tagata o le vasega ona faasoa mai ni aafiaga na latou maua i le faasoaina atu o le talalelei pe faatatau i le auai mai i le Ekalesia. Sa faapefea ona fesoasoani le Agaga Paia ia i tatou? Na faapefea ona galue se tasi e fai ma o latou taiala? Valaaulia tagata o le vasega e manatunatu loloto po o ai e mafai ona latou taitaiina mai i le talalelei.

• E mafai ona aoao e tagata o le vasega ia upumoni mamana e uiga i o latou lava liuaina e ala i le suesue i le aafiaga o Saulo, e aofia ai le upumoni e faapea, e mafai e tagata uma ona salamo ma suia pe afai latou te naunau i ai. Atonu e te fesili atu i tagata o le vasega e faatusatusa le aafiaga o Saulo i aafiaga a Alema (tagai Mosaea 17:1–4; 18; 26:15–21) ma Lamana ma Lemuelu (tagai 1 Nifae 3:28–31). O a ni uiga faaalia o Saulo ma Alema na fesoasoani ia i laua e salamo ma suia ai? O a ni uiga faaalia sa taofia ai Lamana ma Lemuelu mai le suia? O a ni faatosinaga sa i ai ia Saulo ma Alema ina ua liliu mai i laua? O a ni savali ua tatou maua mo o tatou lava olaga mai nei tala?

• Ina ia fesoasoani i tagata o le vasega e faatatau le aafiaga o Saulo ia i latou lava, atonu e te valaaulia ni nai tagata o le vasega e o mai saunia e faasoa atu ni mea ua latou aoaoina mai vaega taitasi o le saunoaga a Peresitene Dieter F. Uchtdorf “Faatalitali i le Auala i Tamaseko” (Ensign po o le Liahona, Me 2011, 70–77). E faapefea i nisi o taimi ona tatou faatalitali i o tatou lava auala i Tamaseko? E tusa ai ma le saunoaga a Peresitene Uchtdorf, o a ni mea e mafai ona fesoasoani ia tatou lagona lelei atu ai le siufofoga o le Atua? Atonu e te mafaufau foi e matamata le vitio “The Road to Damascus” (LDS.org). Ina ia musuia tagata o le vasega ia mulimuli i le faataitaiga a Saulo ma fesili atu i le Alii, “Se a le mea e te finagalo i ai ou te faia?” mafaufau e talanoa i le aafiaga a Peresitene Thomas S. Monson o loo maua i “Punaoa Faaopoopo.” Atonu e mafai e tagata o le vasega ona faasoa atu o latou aafiaga i le sailia ma le mulimuli i le finagalo o le Alii.

A o auai atu Peresitene Thomas S. Monson i se konafesi faalesiteki, sa talosaga atu le peresitene o le siteki ia te ia pe mafai ona asiasi atu i se teineitiiti e 10 tausaga le matua e igoa ia Christal Methvin, o le sa lata ina maliu i le kanesa. E 80 maila le mamao mai le mea sa fai ai le konafesi sa nonofo ai le aiga o le teineitiiti. Na faasoa mai e Peresitene Monson le tala lenei:

“Sa ou suesueina taimi faatulagaina o fonotaga. … Sa matuai leai lava ma se taimi avanoa. Ona oo mai lea o se isi fautuaga i lou mafaufau. Pe le mafai ona tatou manatua si teineitiiti i a tatou tatalo lautele i le konafesi? …

“… [I le faagasologa o se tasi o fonotaga] sa ou faavasegaina a’u faamatalaga tusitusia, e sauni ai e laa atu i le pulelaa, ae ou faalogoina loa se leo o tulei mai i lo’u agaga. Sa puupuu le savali, o upu masani lava: ‘Ina tuu mai ia o tamaiti e o mai ia te au, aua le vavao ia te i latou: aua e faapei o i latou nei o e o i le malo o le Atua.” (Mareko 10:14.) Sa oo ina nenefu a’u faamatalaga tusitusia. Sa liliu atu o‘u mafaufauga i se teineitiiti laitiiti o loo manaomia se faamanuiaga. Sa faia le faaiuga. Sa suia le faatulagaga o le fonotaga na atofaina. …

“… [I le maota o le au Methvin,] sa ou sioa ifo i se teineitiiti sa vaivai tele e nofo mai i luga—na toetoe a le mafai ona tautala. O lona ma’i ua le mafai ai nei ona pupula. Sa matua malosi le agaga o lea na ou faapau ifo ai i o’u tulivae, uu mai lona lima vaivai, ma faapea atu, ‘Christal, o lea ua ou iinei.’ Sa matala ona laugutu ma musumusu mai, ‘Brother Monson, na ou iloa lava o le a e sau’” (“The Faith of a Child,” Ensign, Nov. 1975, 20–22).

I ni tausaga mulimuli ane, sa faasoa atu ai e Peresitene Dieter F. Uchtdorf le tala lenei, ma valaaulia i tatou ia “taumafai ia avea i tatou ma e e mafai ona faalagolago mai i ai le Alii e faalogo i Ana musumusuga ma tali atu, e pei ona sa faia e Saulo i lona auala i Tamaseko, ‘Le Alii, se a le mea e te finagalo i ai ou te faia?’” (“Faatalitali i le Auala i Tamaseko,” Ensign po o le Liahona, Me 2011, 76).