“6--12 Me. Luka 12--17; Ioane 11; ‘Ia Tatou Olioli ia; aua ua Ou Maua La’u Mamoe na Leiloa’” Sau, Mulimuli Mai ia te Au---Mo le Aoga Sa: Feagaiga Fou 2019 (2019)

“6--12 Me. Luka 12--17; Ioane 11,” Sau, Mulimuli Mai ia te Au---Mo le Aoga Sa: 2019

O Le Atalii Faamaumau Oa, saunia e Liz Lemon Swindle

6--12 Me

Luka 12–17; Ioane 11

“Ia Tatou Olioli ia; aua ua Ou Maua La’u Mamoe na Leiloa”

Amata lau tapenapenaga i le suesue ma le agaga tatalo o le Luka 12–17 ma le Ioane 11. O le a le “mamoe leiloa” o lau vasega ua e mafaufau i ai? Faaaoga le Sau, Mulimuli Mai ia te Au---Mo Tagata Taitoatasi ma Aiga ma le otootoga lenei ao e sailia le taitaiga a le Alii pe faapefea ona e taulimaina manaoga o lau vasega i le mea sili, tusa lava pe le o o mai i le vsega.

Tusifaamaumau Ou Lagona Uunai

Valaaulia le Fefaasoaai

O le faaaogaina o se vaega taua o le aoaoina, o le mea lea ia valaaulia tagata o le vasega e faasoa mai pe na faapefea ona latou filifili e ola i se mea sa latou aoaoina mai tusitusiga paia i lenei vaiaso.

Aoao atu Aoaoga Faavae

Luka 14:15–24

E leai lava se ‘alofaga faapea e lava e teena ai le talalelei.

Ina ia fesoasoani i tagata o le vasega e suesue le faataoto i le talisuaga tele, e mafai ona e valaaulia i latou i se pati faafoliga o le a e talimalo ai. Tuu atu latou te faasoa maia ni mafuaaga latou te o mai ai pe e le o mai ai foi. Faitau faatasi le Luka 14:15–24 ma talanoaina ia alofaga na faia e tagata o i le faataoto ina ua valaaulia i latou i se tausamaaga sa faatusa i faamanuiaga o le talalelei. O a ‘alofaga o faia e tagata nei ua le talia ai valaaulia a le Faaola ia maua faamanuiaga a le Tama Faalelagi? Atonu e mafai e tagata o le vasega ona faasoa mai faamanuiaga sa latou maua ina ua latou faia osigataulaga e tatau ai ina ia ola i ni mataupu faavae patino o le talalelei.

Luka 15

E mafai ona tatou sailia i latou ua leiloloa ma olioli faatasi ma le Tama pe a toe foi mai.

E mafai faapefea ona musuia i latou e te aoaoina ina ia sailia tagata ua “leiloloa” ona ua latou le maua faamanuiaga ole talalelei ma valaaulia i latou e toe foi mai? E mafai ona e valaaulia tagata o le vasega e mafaufau mo sina taimi e uiga i “mamoe ua leiloloa” latou te iloa ona faitau lea o le Luka 15:1--7 a o mafaufau i lena tagata. O le a le mea ua musuia i latou e fai ina ia aapa atu ai i lena tagata ma le naunautai ma le alofa? O le tala na faamatala e Peresitene Thomas S. Monson i le “Punaoa Faaopoopo” po o le lauga a Elder Mervyn B. Arnold “I Le Laveai: E Mafai Ona Tatou Faia” (Ensign po o le Liahona, Me 2016, 53–55) e mafai ona fesoasoani i lenei talanoaga.
Mata e fesoasoani mo tagata o le vasega le malamalama i auala e mafai ai ona leiloa se tagata? Mafaufau e totofi ni vaega o le vasega se faataoto o faataoto e tolu i le Luka 15 e suesue. O a auala ua fautuaina e nei faataoto tatou te taumafai sue ai i latou ua leiloloa? O a upu i le Luka 15 ua faaalia mai ai lagona o le Tama Faalelagi mo i latou o e ua leiloloa? O le usuina faatasi o le “Pele i le Leoleo Mamoe,” Viiga, nu. 135, e mafai ona avea o se faaopoopoga anoa i le aoaoina atu o nei faataoto.
E mafai ona aoga i tagata o lau vasega le taulai atu i upu ma taga a le atalii matua i le faataoto i le atalii faamaumauoa. Atonu e mafai ona latou tusia se isi faaiuga i le faataoto lea e ese ai le uiga faaalia ole atalii matua i lona uso. O le a se mea o aoao mai iai tatou i le fautuaga a le tama i le faataoto, e uiga i o tatou lagona mo i latou o e leiloloa ma i latou e toe foi mai i le talalelei? (Tagai foi i le saunoaga a Elder Jeffrey R. Holland i le “Punaoa Faaopoopo.”) Pe e mafai foi ona e fai i le vasega e mafaufau faapea o i latou o le tama i le faataoto lea. O le a se fautuaga faaopoopo latou te tuuina atu i le atalii matua e fesoasoani ai ia fiafia i le agaigai i luma po o le manuia o isi?

Ioane 11:1–46

O Iesu Keriso o le Toetu ma le Ola.

A o latou faitau i lenei vaiaso i le faatuina mai o Lasalo, pe i ai se tasi o le vasega na mauaina se mea na faamalosia ai lo latou faatuatua o Iesu Keriso o le Alo o le Atua ma le Mesia na folafolaina mai? Valaaulia i latou e faasoa mai mea na latou maua. O a isi poto masani ua fausia ai lo latou faatuatua ia Iesu Keriso? Atonu e te manao e ta’u atu o le taimi o lenei vavega, e lei toetu mai Lasalo ae na toe faafoi mai ile olaga nei.

Ua Tagi Iesu, saunia e James Tissot
O se auala e suesue ai le Ioane 11:1--46 o le fai lea i le vasega e feauauai e faitau ia fuaiupu ma valaaulia i latou e taofi pe a latou maua faamaoniga o le faatuatua ia Iesu Keriso. Fai i ai e talanoaina mea na latou maua. E mafai faapefea e tofotofoga ma vaivaiga ona faamalolosia lo tatou faatuatua ia te Ia?
O se tasi auala e faitau ai lenei tala o le tofi o ni nai tagata o le vasega e mafaufau i manatu o tagata o loo aofia ai---e pei o le Faaola, o Aposetolo, Mareta, Maria ma Lasalo. O le a se mea e mafai ona tatou aoaoina mai ia i latou taitoatasi? O le a se mea e mafai ona tatou aoao e uiga i le Faaola mai le Ioane 11:33--35? Aisea e taua ai le iloa o nei mea e uiga ia te Ia?

Fautuaina le Aoaoina i le Aiga

Ina ia fautuaina le vasega e faitau le Mataio 19–20; Mareko 10; ma le Luka 18, e mafai ona e faia se fesili e pei o le “O a ni ou lagona pe afai na e faigaluega i le aso atoa ae tutusa oulua totogi ma se tasi sa na o le tasi le itula na faigaluega ai?” Ta’u i ai e i ai se faataoto i le faitauga o le vaiaso lea o loo fautuaina mai ai le ala e ono le afaina ai lea mea.

Punaoa Faaopoopo

Luka 12–17; Ioane 11

“Ua e maua au.”

Na faasoa mai e Peresitene Thomas S. Monson lona aafiaga lea a o avea o se epikopo: “Sa ou matauina i le taeao o se tasi Aso Sa ia Lisati, o se tasi o a matou ositaulaga e seasea ona sau, a o lea foi e le o i ai i le sauniga a le au perisitua. Na ou tuua le korama e vaai e le fautua ae ou alu i le fale o Lisati. Na fai mai lona tina o loo faigaluega o ia i se faletaavale i le siakiina o taavale. Na ou alu atu i le fale enisinia e sue Lisati ma ou tilotilo solo ae ou te lei maua o ia. Na faafuasei ona ou maua se musumusuga ou te tilotilo i lalo o le lua suauua sa i le isi itu o le fale. Ma i le pogisa sa ou iloa atu ai ni mata susulu se lua. Na ou lagona atu Lisati o faimai, “Ua e maua au, Epikopo! O le a ou alu atu.’ A o ma talanoa, sa ou ta’u atu lo matou misia ma manaomia o ia. Na ou maua mai lana tautinoga e auai i ana fonotaga. … [Mulimuli ane], na fai mai Lisati o le mea na suia ai lona olaga o le taimi na maua ai o ia e lona epikopo o lafi i se pu suauua ma sa fesoasoani ia te ia e toe toaga mai” (“Sugar Beets ma le Taua o se Agaga,” Liahona, Iulai 2009, 6–7).

Aoao mai isi faamaumauoa.

Na faia e Elder Jeffrey R. Holland lenei matauga e uiga i le uso matua o le atalii faamaumauoa.

“O lenei atalii e le o ita tele o ia ona ua foi mai le isi a ua ita ona o loo fiafia i ai ona matua. O le lagonaina o le le talisapaiaina ma atonu faapea ma sina inoino, o lenei atalii usiusitai—ma e faapitoa lava lona usiusitai—ua galo mo sina taimi aua e lei oo lava o ia i se tulaga o le taugaeleelea po o le faanoanoa, o le fefe po o le inoino ia te ia lava. Ua galo ia te ia mo sina taimi o tamai povi uma lava o loo i ai i le faatoaga o ana ia faapea ma ofu talaloa uma o loo teuina i le fale ma mama uma o i le pusatoso. Ua galo ia te ia mo sina taimi o le faamaoni o le a tauia pea.

“Leai, o le tagata na toetoe a i ai mea uma ma o le tagata na galue malosi, i se auala manaia ina ia maua ai, sa le’i maua ia te ia le mea e tasi lea e mafai ai ona avea o ia ma se tagata atoatoa o le Alii na ia taulatalata atu i ai. E lei oo o ia i le alofa ma le alofa mutimutivale, o le lautele o le alofa moni o se vaaiga mamao, e iloa ai, o lenei toe foi mai e le o se faasagatau mai. O lona uso. A o augani atu lona tama ia te ia e vaai, o le sa oti a ua toe ola mai. O le sa leiloa a ua maua” (“O Le Isi Atalii Faamaimau Oa,” Liahona, Iulai 2002, 63).

Faaleleia o Lo Tatou Aoao Atu

Aapa atu i le tasi. E faapei o le leoleo mamoe i le faataoto a le Faaola (tagai Luka 15:4) “e mafai ona e aapa atu ia i latou o e ua misi mai lau vasega. O ou avanoa e aoao ma siitia tagata o le vasega ma fesoasoani ia i latou e o mai ia Keriso e faalautele atu i fafo atu o le potu aoga ma talaatu o i latou o e auai i au lesona masani” (Aoao Atu i le Ala a le Faaola, 8).