Katak im Bujen Ko 124

Ilo jekjōn 124, Irooj ekar nōbar Hyrum Smith im George Miller kōn aer m̧ool. N̄an jipan̄ ro uwaan kūlaaj eo kam̧wūlaļļo̧k aer ekkatak kōn m̧wil in, kwomaron̄ kajjitōk ippāer n̄an riiti Katak im Bujen Ko 124:15, 20 im kejakļo̧kjeņ kōn ta eo rej ekkatak kōn m̧ool jān eoon kein. Bar ta jej ekkatak jān eoon ko kar kōllaajraki ium̧win “m̧ool” ilo Unin Tōl eo n̄an Jeje Ko Rekwōjarjar (scriptures.ChurchofJesusChrist.org) ak jān ennaan eo an Elder Richard J. Maynes “Bōk Lōke eo an Irooj im Baam̧le eo Am̧”? (Ensign ak Liaona, Nob. 2017, 75–77). Bōlen ro uwaan kūlaaj eo remaron̄ kwaļo̧k waanjon̄ak ko kōn armej ro rejeļā kajjier me ewōr ippāer m̧ool. Etke m̧ool ej juon m̧wil eaorōk?

Ro uwaan kūlaaj eo am̧ remaron̄ ekkatak juon men jān kōmeļeļe eo an Irooj kōn M̧weo Im̧ōn Nauvoo me emaron̄ jipan̄ er ilo ikitōltōl ko aer ippān armej ro me rejjab Armej ro Rekwojarjar ilo Raan Ko Āliktata ak ro ejako aer niknik ilo bōk koņaer ilo Kabun̄ in. Kwomaron̄ jin̄aik juon em̧ ioon boot eo im kajjitōk ippān ro uwaan kūlaaj eo n̄an kappukot ilo Katak im Bujen Ko 124:22–24, 60–61 naan ko me Irooj ekar kōjerbali n̄an kōmeļeļeik jibadbad eo an M̧weo Im̧ōn Nauvoo. Innām remaron̄ je naan ko itōrerein m̧weo. Ekōjkan an naan kein barāinwōt iookļo̧k Kabun̄ eo an Jisōs Kraist? Ta eo jemaron̄ kōm̧m̧ane n̄an ejaake ejja m̧antin karuwainene in ilo ward eo ad im im̧ōko im̧ōd?

Bōlen ro uwaan kūlaaj eo remaron̄ pijaikļo̧k aer mour ilo Nauvoo ilo 1841 eo im jerbal ilo Nauvoo Tampeļ eo n̄e juon m̧ōttaer ej kajjitōk, “Etke jej wōnm̧anļo̧k wōt im kalōk tampeļ kein?” Ta eo jenaaj ba n̄an in m̧ōttad? Ro uwaan kūlaaj eo remaron̄ kappukot ļōmņak ko ilo Katak im Bujen Ko 124:28–30, 37–42, 55. Eļan̄n̄e jet ro uwaan kūlaaj eo rejjab kanooj jeļā kōn kain̄i ko kar kōnono kaki ilo eoon kein, ļōmņak in kōmeļeļeik jibadbad ko an kōjeraam̧m̧an ko an kain̄i kein. Lale temples.ChurchofJesusChrist.org n̄an unin tōl kōn ta eo ekkar n̄an ekkōnono kaki itulikin tampeļ eo im kōn pija ko an tampeļ ko kwomaron̄ kwaļo̧ki ilo kūlaaj eo.

Kar kakien Armej ro Rekwojarjar n̄an kalōk juon tampeļ ilo Jackson County bōtaab “kar pinej er jān rikōjdāt ro aer” (Katak im Bujen Ko 124:51). Ilo eoon 49–55, ijo Irooj ekar uwaake jekjek in, emaron̄ wōr juon kam̧ool n̄an armej ro me rekōņaan pokake kien ko an Anij bōtaab kar bōbrae er jān kōm̧m̧ane āindein kōnke kōn baam̧le eo aer ak jekjek ko jet. Kwomaron̄ riiti eoon kein ippān ro uwaan kūlaaj eo im kajjitōk ippāer n̄an ļōmņak kōn jekjek ko me armej remaron̄ in jab maron̄ kakūrm̧ool ikdeleel jim̧we ko aer kōn jekjek ko rejjab maron̄ kōjbwebweiki. Ta kapilōk eo jej loe ilo eoon kein me emaron̄ jipan̄ juon eo epād ilo kain jekjek rōt in? Ta eo eoon kein rej katakin kōj kōn pokake?

Ro uwaan kūlaaj eo am̧ renaaj ke jeraam̧m̧an jān juon iien ekkōnono kōn petriak ro im kōjeraam̧m̧an in petriak ko? Kwomaron̄ jino ilo am̧ kajjitōk ippān ro uwaan kūlaaj eo n̄an riiti Katak im Bujen Ko 124:91–92, kappukot ta eo Hyrum Smith ekar kūr n̄an kōm̧m̧ane. Innām kwomaron̄ je ioon boot eo Ta im Etke im kajjitōk ippān ro uwaan kūlaaj eo n̄an riiti “Patriarchal Blessings” (True to the Faith, 111–13) n̄an kappukot ta in kōjeraam̧m̧an an petriak im etke raorōk. Ekōjkan an juon armej maron̄ m̧aanjāppopo n̄an bōk juon kōjeraam̧m̧an an petriak? Ļōmņak in kajjitōk ippān jejjo armej me rekar bōk aer kōjeraam̧m̧an an petriak n̄an kwaļo̧k etke rej kam̧m̧oolol kaki. (Kakeememej er n̄an jab kwaļo̧k jabdewōt men ko me n̄an er wōt make ak ko rekwojarjar jān kōjeraam̧m̧an ko aer.) Ekōjkan ad maron̄ kwaļo̧k bwe jej kaorōke kōjeraam̧m̧an an petriak eo?