Helaman 13–16

• Ang Ginoo misugo ni Samuel ang Lamanite sa paghimo og usa ka butang nga mora og medyo lisud: sa pagsangyaw ngadto sa katawhan nga mipugos niya sa pagbiya sa ilang siyudad. Ang pagbasa sa Helaman 13:2–5 tingali makapahinumdom sa mga sakop sa klase sa lisud nga mga butang nga gisugo sa Ginoo nga ilang buhaton. Dapita sila sa pagpakigbahin sa ilang mga kasinatian. Giunsa man pagtabang sa Ginoo kanila? Pananglitan, basin ang mga sakop sa klase makapaambit og mga kasinatian sa dihang ang Ginoo miaghat kanila sa unsay Iyang gusto nga ilang isulti ngadto sa usa ka tawo (tan-awa sa bersikulo 4). Unsa ang mga panalangin nga nakita sa mga sakop sa klase sa dihang sila misunod sa direksyon sa Ginoo?

  

• Bisan kon ang mga pasidaan ni Samuel gipadangat ngadto sa tig-a og kasingkasing nga mga Nephite, ang Helaman 13 adunay pipila ka leksyon alang kanatong tanan. Aron matabangan ang mga sakop sa klase nga makakita og personal nga kahulugan diha sa iyang mga pulong, mahimo nimo silang dapiton sa pagsiksik sa Helaman 13 alang sa usa ka mensahe nga daw may kalabutan sa atong panahon. (Kon nanginahanglan sila og tabang, mahimo nimong isulat diha sa pisara ang mosunod nga mga bersikulo: 8, 21–22, 26–29, 31, ug 38.) Dayon mahimo nilang ipaambit kon unsa ang ilang nakit-an nga magkapares, diha sa gagmay nga grupo, o kauban sa tibuok klase. Unsa nga susama nga mga mensahe ang gihatag sa mga propeta nganha kanato karon?

• Ang latid karong semanaha diha sa Dali, Sunod Kanako—Alang sa mga Indibidwal ug mga Pamilya nagsugyot sa pagpangita sa mga timailhan nga gihatag sa Ginoo kanato “nga [kita] unta motuo sa iyang ngalan” (Helaman 14:12). Tingali ang mga sakop sa klase makapaambit kon unsa ang ilang nadiskubrehan samtang sila namalandong niini nga ideya. Siguroa nga mapasabut nga ang mga timailhan diha sa atong mga kinabuhi mahimong dili kaayo dramatiko ug mas personal kay sa mga timailhan nga gipanagna ni Samuel. Unsa ang ubang mga katuyoan alang sa mga timailhan ang gisugyot diha sa Helaman 14:28–30? Ang mga sakop sa klase mahimo usab nga mopaambit sa ubang mga butang nga gihimo sa Ginoo aron matabangan sila sa pagpalambo og hugot nga pagtuo diha Kaniya.

• Ang pagbasa kabahin sa giunsa pagkatuman sa mga panagna ni Samuel mahimong makapatukod og hugot nga pagtuo sa mga sakop sa klase diha ni Jesukristo ug sa Iyang misyon. Siguro ang mga sakop sa klase makagamit sa Helaman 14 aron magmugna og tsart nga maglista sa mga panagna ni Samuel sa pagkatawo ug kamatayon ni Kristo sa usa ka bahin ug ang mga pakisayran sa kasulatan sa pikas bahin diin kining mga panagna natuman. Pipila niini nga mga pakisayran tingali maglakip sa mga bersikulo gikan sa 3 Nephi 1:15–21 ug 3 Nephi 8:5–25. Nganong importante man alang kanato nga mahibalo kabahin niining mga panagna ug ang ilang katumanan?

• Ang mga sakop sa klase tingali nakabantay—diha sa Helaman 16 ug uban pang mga dapit diha sa mga kasulatan—nga ang pagkakita og mga timailhan ug mga katingalahan dili gyud kinahanglan nga maoy hinungdan nga ang usa ka tawo motuo ni Kristo. Dapita sila sa pagpaambit og ubang mga sanglitanan gikan sa mga kasulatan sa mga indibidwal kinsa nakakita og mga timailhan apan wala motuo. Sumala sa Helaman 16:13–23, nganong daghang katawhan sa panahon ni Samuel ang Lamanite ang wala motuo sa mga timailhan ug mga panagna? Giunsa ni Satanas pagkumbinser ang katawhan sa “pagsalig sa ilang kaugalingon nga kusog ug … kaalam” karon? (Helaman 16:15). Unsa ang atong makat-unan gikan niini nga sugilanon nga makatabang kanato nga makalikay sa susama nga mga sayop?

• Ang mga pulong ni Samuel naglangkob og grabe nga mga pagpanton, apan ang Helaman 15:3 naghatag og talagsaong panglantaw kabahin sa pagpanton gikan sa Ginoo. Usa ka paagi sa pagtabang sa mga sakop sa klase nga masabtan kini nga panglantaw mao ang pagbasa og dungan niini nga bersikulo ug dapita sila sa sa pagpaambit og ebidensya nga ilang nakita kabahin sa gugma ug kalooy sa Dios diha sa mga panagna ug mga pasidaan ni Samuel. Sa unsang paagi nga ang pagpanton gikan sa Ginoo usa ka timailhan sa Iyang gugma?

• Aron matabangan ang mga sakop sa klase nga mas masabtan ang mensahe diha sa Helaman 15:3, mahimo ka nga mopaambit og tulo ka katuyoan sa balaanong pagpanton nga gitudlo ni Elder D. Todd Christofferson (tan-awa sa “Dugang nga mga Kapanguhaan”). Bahina ang klase ngadto sa tulo ka grupo, ug hangyoa ang matag grupo sa paghisgut og usa niini nga mga katuyoan (ang mga kasulatan ug video nga gisugyot diha sa “Dugang nga mga Kapanguhaan” mahimong makatabang). Dayon ang matag grupo mahimong mopaambit kauban sa klase og bisan unsa nga mga panglantaw gikan sa ilang panaghisgutan nga nakatabang nila nga mas masabtan nga ang Ginoo mopanton niadtong Iyang gihigugma.

• Diha sa Helaman 16, unsa ang atong nakat-unan gikan niadtong kinsa midawat sa mga pagtulun-an ni Samuel? Unsa ang atong nakat-unan gikan niadtong kinsa misalikway kaniya? Mahimong makadasig ang makadungog sa mga sakop sa klase nga mopaambit kon giunsa nila pagkadawat sa ilang pagpamatuod sa kamahinungdanon sa pagsunod sa buhi nga mga propeta. Tingali mopaambit usab sila kon unsaon nila sa paggamit ang Helaman 16 o ang mga pulong ni Elder Andersen diha sa “Dugang nga mga Kapanguhaan” aron sa pagpasabut ngadto sa usa ka tawo kon nganong mipili sila sa pagsunod sa propeta.

Si Elder D. Todd Christofferson mipaambit og tulo ka katuyoan sa balaanon nga pagpanton (tan-awa sa “Ako Nagabadlong ug Nagapanton sa Akong Gihigugma,” Liahona, Mayo 2011, 97–100):

1. “Aron sa pag-awhag kanato sa paghinulsol.” Tan-awa sa Ether 2:14–15; Doktrina ug mga Pakigsaad 1:27; 93:41–50; 105:6.

2. “Aron sa paglimpyo ug sa pagbalaan kanato.” Tan-awa sa Mosiah 23:21–22; Doktrina ug mga Pakigsaad 101:1–5; 136:31.

3. “Aron sa pagpasubay kanato og balik sa dalan sa kinabuhi ngadto sa unsay nahibaloan sa Dios nga mas maayo nga dalan.” Tan-awa ang sugilanon ni Presidente Hugh B. Brown ug ang currant bush diha sa pakigpulong ni Elder Christofferson (mga pahina 98–99);“The Will of God” (video, ChurchofJesusChrist.org).

Si Elder Neil L. Andersen nagtudlo:

“Ang propeta dili tigpataliwala ninyo ug sa Manluluwas. Hinoon, mobarug siya tupad ninyo ug motudlo sa dalan paingon sa Manluluwas. Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. Sama ni Pedro sa karaan, ang atong propeta namahayag, “[Siya] mao ang Kristo, ang Anak sa Dios nga buhi.”[Mateo 16:16; tan-awa usab sa Juan 6:69].

“Sa umaabut nga adlaw, nga magtan-aw og balik sa atong pagkamortal, magmaya kita nga nakalakaw kita dinhi sa yuta sa panahon sa usa ka buhi nga propeta. Nianang adlawa, ako nag-ampo nga kita makahimo sa pag-ingon:

“Kita naminaw kaniya. Kita mituo kaniya. Kita nagtuon sa iyang mga pulong uban sa pagpailub ug hugot nga pagtuo. Kita nag-ampo alang kaniya. Kita nagbarug uban kaniya. Kita mapaubsanon nga misunod kaniya. Kita nahigugma kaniya” (“Ang Propeta sa Dios,” Liahona, Mayo 2018, 27).