Alma 43–52

• Sa ilang indibidwal ug pamilya nga pagtuon karong semanaha, ang mga sakop sa klase siguro nakapamalandong o nakarekord na sa ilang mga hunahuna kabahin sa giunsa sa mga Nephite nga malampuson nga napanalipdan ang ilang mga kaugalingon batok sa mga Lamanite ug giunsa sa mga Lamanite pag-atake ang mga Nephite. Kon ang mga sakop sa klase nakahimo na niini sa balay, dapita sila sa pagpaambit unsa ang ilang nakit-an. O mahimo nimong hatagan ang mga sakop sa klase og higayon sa pagpangita niini nga mga panabut atol sa klase nga maggamit sa mga kasulatan sama sa makit-an diha sa latid karong semanaha diha sa Dali, Sunod Kanako—Alang sa mga Indibidwal ug mga Pamilya. Samtang ang mga sakop sa klase mopaambit kon unsa ang ilang nakit-an, awhaga sila sa paghisgut kon unsaon nato sa pagsunod sa ehemplo sa mga Nephite sa pagpanalipud sa ilang mga kaugalingon batok sa dautan ug unsaon nato sa pag-ila ang espirituhanon nga mga pag-atake ni Satanas kanato.

• Unsaon nimo sa pagtabang ang mga sakop sa klase nga mosunod sa ehemplo ni Moroni nga maisugong mipanalipud sa ilang pagtuo diha sa gipahiuli nga ebanghelyo ni Jesukristo? Ang mga sakop sa klase mahimong mobasa sa Alma 46:11–22 ug tinuon unsa ang gihimo ni Moroni ug unsa ang iyang gitudlo nga nakadasig sa iyang katawhan nga mahimong mas matinud-anon. Mahimo nimong isulat kini nga mga butang diha sa pisara ubos sa ulohan nga Ehemplo ni Moroni. Dayon mahimo nimong hangyuon ang mga sakop sa klase sa pagpamalandong sa mga gibuhat ni Moroni ug mosugyot unsa ang atong mahimo karon aron panalipdan ang atong mga gituohan. Mahimo nimong isulat ang ilang mga panabut ubos sa ulohan nga Maisugong Nagpanalipud sa Ebanghelyo Karon. Unsa nga mga kamatuoran ug mga hiyas ang gitudlo kanato sa atong propeta bag-ohay lang nga kinahanglan natong itudlo ug panalipdan?

• Unsaon nimo sa pagtabang ang mga sakop sa klase nga masunod ang unsay gibuhat ni Moroni sa bandila sa kalingkawasan ngadto sa ilang kaugalingong mga kinabuhi? Dapita sila sa pagbasa sa Alma 46:11–22 ug tinuon ang mga kamatuoran nga gitudlo ug giawhag ni Moroni sa iyang katawhan nga suportahan. Unsa nga mga kamatuoran ug mga hiyas ang gihatagan og gibug-aton sa atong mga lider sa atong panahon? (Tingali imong iribyu ang pipila niini diha sa Alang sa Kalig-on sa Kabatan-onan, “Ang Pamilya: Usa ka Pamahayag sa Kalibutan,” o mga mensahe sa bag-ohay nga kinatibuk-ang komperensya.) Unsa nga mga pagsulay ang anaa nato sa pagpanalipud sa atong mga gituohan diha sa kalibutan karon? Unsa ang atong makat-unan gikan sa ehemplo ni Moroni? Hatagi ang mga sakop sa klase sa kahigayunan nga mohimo og ilang kaugalingon nga bandila sa kalingkawasan nga makapahinumdom nila sa pagpuyo nga maisugon ug manalipud sa ilang mga gituohan.

  

• Ang imong klase mahimong makabenepisyo gikan sa pagtuon sa Alma 47, nga nagpakita kon sa unsang paagi nga ang pagpanglipot ni Amalickiah may pagkamay-ong sa unsay gibuhat ni Satanas aron sa paglingla kanato. Mahimo kang magsugod pinaagi sa paghangyo og usa nga mo-summarize sa saysay nga makita diha sa Alma 47. Aron sa pagdugang og interes, mahimo ka nga modapit og duha ka sakop sa klase sa paghunahuna nga sila si Amalickiah ug Lehonti ug isaysay ang sugilanon. Unsa ang gibuhat ni Amalickiah nga makapahinumdom nato sa mga butang nga gibuhat ni Satanas aron sa pagtintal ug paglingla kanato? Awhaga ang mga sakop sa klase sa pagtan-aw sa piho nga mga bersikulo samtang sila maghisgut niini nga pangutana. Ang kinutlo diha sa “Dugang nga mga Kapanguhaan” naglangkob og laing maayo nga sanglitanan kon unsaon kita sa paglingla ni Satanas. Unsa nga tambag ang atong mahatag sa usag usa nga makatabang nato nga makabantay kon giunsa kita pagtintal ni Satanas karon? Unsa ang atong mahimo sa pagpanalipud sa atong mga kaugalingon?

• Ang usa ka panaghisgut kabahin sa mga hiyas ni Moroni mahimong makadasig sa mga sakop sa klase nga maningkamot sa pagsunod sa iyang ehemplo. Mahimo ka nga magsugod pinaagi sa pagpakita og hulagway ni Moroni, sama sa usa diha sa latid niini nga semana sa Dali, Sunod Kanako—Alang sa mga Indibidwal ug mga Pamilya. Dayon dapita ang mga sakop sa klase sa pagtuon sa Alma 44:3–4 ug 48:7–13 ug isulat diha sa pisara ang mga pulong ug hugpong sa mga pulong nga naghulagway ni Moroni. Mahimo dayon mo nga magbasa og dungan sa Alma 48:17 ug hisgutan kon sa unsang paagi nga ang mga hiyas ni Moroni, sama sa nakalista sa pisara, nakapahimo niya nga mabuntog ang impluwensya ni Satanas ug mahimong sama ni Jesukristo. Sa unsang paagi nga kita mas mahimong sama kang Moroni?

• Ang mga sakop sa imong klase mahimong makabenepisyo gikan sa pagpaminaw sa usag usa nga moistorya kabahin sa kon unsaon nila pagpanalipud ang ilang kaugalingon ug ang ilang mga pamilya batok sa mga pagpanglingla ug mga pagpanintal ni Satanas. Aron sa pagdasig sa maong panaghisgutan, mahimo mo nga magbasa og dungan sa Alma 48:7–9; 49:1–9; ug 50:1–6. Samtang maghunahuna kita sa panginahanglan alang sa espirituhanong mga pagpanalipud batok sa sala, unsa ang atong makat-unan gikan sa mga paningkamot sa mga Nephite sa pagpanalipud sa ilang mga kaugalingon? Unsaon nato sa pagtukod og espirituhanong mga panalipud aron maprotektahan ang atong mga kaugalingon ug ang atong mga pamilya batok sa sala ug mga impluwensya sa dautan? Awhaga ang mga sakop sa klase sa pagpaambit og mga ideya nga misalir kanila. Nganong importante man nga “[dili] mohunong sa paghimo og mga pagpangandam”? (Alma 50:1).

Aron sa pagtudlo nga ang “bug-at nga sala mosulod sa atong mga kinabuhi sa pagnunot nato sa unang ginagmay nga mga pagtintal,” si Presidente Spencer W. Kimball mipaambit niini nga pabula:

“[Usa] ka kamilyo ug iyang agalon …nagbiyahe tabok sa balason nga disyerto sa dihang miabut ang usa ka unos. Ang biyahero dali nga nakapahimutang sa iyang tolda ug misulod, dayon nanirado aron sa pagpanalipud sa iyang kaugalingon sa makasamad nga nagtuyok nga mga balas sa naghaguros nga unos. Dayag na lang nga ang kamilyo nabiyaan sa gawas, ug samtang ang mapintas nga hangin mihapak sa balas diha sa iyang kalawasan ug sa iyang mga mata ug ilong nabati niya nga dili na maagwanta mao nga sa katapusan nagpakiluoy siya nga pasudlon sa tolda.

“‘Husto ra kanako kini nga lawak,’miingon ang biyahero.

“‘Apan mahimo ba nga ang akong ilong lang aron makaginhawa ako nga walay balas?’ mihangyo ang kamilyo.

“‘O sige, tingali mahimo nimo kana,’ mitubag ang biyahero, ug gibuksan niya ang tabon ug gamay kaayo ug ang taas nga ilong sa kamilyo gipasulod. Unsa ka komportable karon ang kamilyo! Apan wala madugay ang kamilyo gilaayan sa nagpamaak nga balas diha sa iyang mga mata ug mga dunggan … :

“‘Ang gipadpad sa hangin nga balas sama og makapangos sa akong ulo. Mahimo bang ang ulo lang nako ang ipasulod?’

“Ang biyahero nangatarungan pag-usab nga dili makadaut kaniya ang pag-uyon, kay ang ulo sa kamilyo mahimong makaokupar sa luna sa ibabaw sa tolda nga wala niya gamita. Mao nga gipasulod sa kamilyo ang iyang ulo ug ang mananap natagbaw na usab—apan kadiyot ra.

“‘Atubangang bahin lang sa akong lawas,’ nagpakilooy siya, ug misugot na usab ang biyahero ug dayon ang atubangan nga abaga ug mga tuhod sa kamilyo nasulod na sa tolda. Sa katapusan, sa mao gihapon nga paagi sa paghangyo ug pagtugot, ang lawas sa kamilyo, ang iyang bukobuko ug ang tanan diha na sa tolda. Apan karon ingon og huot na kaayo alang sa duha, ug gipatiran sa kamilyo ang biyahero paggawas ug ngadto sa hangin ug unos” (Pagtulun-an sa mga Presidente sa Simbahan: Spencer W. Kimball [2006], 135–6).