Alma 36–38

• Ang uban nga mga sakop sa imong klase tingali matingala ngano nga wala man gayud silay dramatiko nga kasinatian sa pagkakabig nga sama kang Alma. Tingali makatabang nila kon imong ipaambit kon unsa ang gitudlo ni Elder David A. Bednar: “Kasagaran ang pagkakabig padayon nga proseso ug dili usa lang ka hitabo nga moresulta gikan sa gamhanan o dramatikong kasinatian” (“Nakabig ngadto sa Ginoo,” Liahona, Nob. 2012, 108). Bisan kon ang uban nga mga butang kabahin sa pagkakabig ni Alma dili kasagaran, ang iyang kasinatian nagtudlo og mga baruganan nga kinahanglan natong tanan nga gamiton sa atong kaugalingong pagpadayon nga pagkakabig. Mahimo nimong dapiton ang mga sakop sa klase sa pagsiksik sa Alma 36 aron sa pagpangita niini nga mga baruganan ug ilista kini diha sa pisara. Unsa pa ang nakatabang nato aron mas makabig ngadto sa ebanghelyo ni Jesukristo?

• Si Alma migamit sa mga pulong “matawo sa Dios” aron sa paghulagway sa iyang pagkakabig. Aron sa pagtabang sa mga sakop sa klase nga makasabut niini nga konsepto, mahimo nimo silang dapiton sa pagbasa sa mosunod nga mga bersikulo sa indibidwal nga paagi o magpares, nga mangita kon unsa ang buot ipasabut sa matawo sa Dios: 1 John 4:7; Mosiah 5:7; 27:25–26; ug Alma 5:14; 22:15. Hangyoa ang mga sakop sa klase sa pagpaambit kon unsay ilang nakat-unan. Dayon mahimo silang mosiksik sa Alma 36, nga mangita sa mga tubag niini nga pangutana: Unsa ang bation ug buhaton sa katawhan kon sila natawo diha sa Dios? Aron matabangan ang mga sakop sa klase sa pagpamalandong giunsa nila pagkatawo diha sa Dios, mahimo nimong ipaambit ang pamahayag ni Presidente Ezra Taft Benson nga makita sa “Dugang nga mga Kapanguhaan.”

• Tingali ang pagtuon sa mga pulong ni Alma samtang siya mihatag sa sagrado nga mga talaan ngadto sa iyang anak nga lalaki nga si Helaman makatabang sa mga sakop sa klase nga makapaambit giunsa nila pagbati ang gahum sa mga kasulatan diha sa ilang mga kinabuhi. Awhaga sila sa pagribyu sa Alma 37 aron sa pagpangita sa mga mensahe nga gihatag ni Alma ngadto ni Helaman kabahin sa mga kasulatan (tan-awa ilabi na sa mga bersikulo 1–19 ug 43–47). Unsaon nato sa pagpakita nga ang mga kasulatan sagrado diha kanato? Unsaon nato, sama ni Alma, sa pagtudlo sa atong mga minahal sa kinabuhi sa “[pag-amping niining] tanan nga mga butang nga sagrado”? (Alma 37:2). Sa unsa nga paagi nga ang mga kasulatan “makapakita sa gahum sa [Dios]” ngadto kanato? (Alma 37:14).

• Usa ka paagi nga makat-on kabahin sa mga panalangin sa pagbaton sa mga kasulatan mao ang pagtuon kon unsa ang gisulti ni Alma diha sa Alma 37 kabahin sa mga sagradong talaan ug uban pang mga butang nga iyang gisalig ngadto ni Helaman. Mahimo ka nga maglista diha sa pisara sa mga sagradong butang: ang mga palid ni Nephi ug ang mga palid nga tumbaga (Alma 37:2–20), ang kawhaan ug upat ka mga palid ni Ether ug ang mga tighubad (Alma 37:21–37), ug ang Liahona (Alma 37:38–47). Ang mga sakop sa klase mahimong mobasa niini nga mga bersikulo aron makat-on kon unsa ang gitudlo ni Alma kabahin sa matag usa niini nga mga butang. Sa unsang mga paagi nga ang mga kasulatan mopatubo sa atong mga panumduman? (tan-awa sa Alma 37:8). Unsa ang atong makat-unan gikan sa mga pulong ni Alma kabahin sa mga panalangin sa pagbaton sa mga kasulatan sa atong mga kinabuhi karon?

  

• Aron matudlo ang kabahin sa kamahinungdanon sa “gagmay ug yano nga mga butang” diha sa gimbuhaton sa Dios, si Alma mihatag og duha ka sanglitanan: ang mga kasulatan ug ang Liahona (tan-awa sa Alma 37:6–7, 41–42; tan-awa usab sa 1 Nephi 17:41). Human nga maribyu kini nga mga sanglitanan, tingali ang mga sakop sa klase makapaambit og mga ehemplo gikan sa ilang kaugalingong mga kinabuhi sa gagmay ug yano nga mga butang diha sa gimbuhaton sa Dios. Tingali ganahan ka nga mokontak og usa o duha ka sakop sa klase sa sayo pa ug hangyoa sila sa pagdala og usa ka butang diha sa klase nga gamay ug nakahimo og dako kaayo nga mga butang sa ilang mga kinabuhi. Mahimo usab nimong ipaambit ang pamahayag gikan ni Presidente Dallin H. Oaks diha sa “Dugang nga mga Kapanguhaan.” Aron matabangan ang mga sakop sa klase nga ma-personal kini nga baruganan, mahimo ka nga mangutana og sama sa mosunod: Ngano man nga kita usahay mapakyas sa paghimo sa gagmay ug yano nga mga butang? Unsaon nato sa pagdasig ang atong mga kaugalingon ug atong mga pamilya sa pagbuntog niini nga kalagmitan?

• Ang pagkumparar sa pulong sa Dios ngadto sa Liahona makadasig sa mga sakop sa klase nga mas magkugi ug makanunayon kabahin sa pagbasa sa mga kasulatan. Aron sa paggiya og panaghisgutan kabahin niini, mahimo nimong dapiton ang mga sakop sa klase sa pagbasa sa Alma 37:38–47 nga magpares, mangita sa mga pagkasusama tali sa Liahona ug sa pulong sa Dios. Tingali imo silang hagiton sa pagpangita og pagkasusama diha sa matag bersikulo. Dayon mahimo nimong isulat ang matag numero sa bersikulo diha sa pisara og hangyoa ang mga sakop sa klase sa pagsulat og pagkasusama nga ilang nakita tupad sa mga numero. Unsa ang gisugyot niini nga pagkatandi mahitungod kon unsaon nato sa paghimo ang atong pagtuon sa kasulatan?

• Ang mga pulong ni Alma ngadto sa iyang anak nga lalaki nga si Shiblon naghatag og maayo nga ehemplo kon unsaon sa pagpalig-on ug pag-awhag niadtong atong mga gihigugma sa pagsunod sa ebanghelyo. Tingali ang mga sakop sa klase makabasa niini nga kapitulo ug tinuon kon giunsa pagpalig-on ni Alma si Shiblon. Ang Alma 38 mubo ra—basin gani makadesisyon ka sa pagbasa niini isip usa ka klase. Dayon ang mga sakop sa klase mahimong mopaambit og mga tudling nga ilang nakita nga makahuluganon o nga naghatag nila og mga ideya sa paglig-on sa ilang kaugalingong mga sakop sa pamilya ug mga higala.

Si Presidente Ezra Taft Benson mitudlo: “Kon kita nakasinati niining dakong kausaban, nga mahitabo lamang pinaagi sa hugot nga pagtuo diha ni Jesukristo ug pinaagi sa pagtabang sa Espiritu diha kanato, kini ingon og kita nahimong bag-o nga tawo. Sa ingon, ang kausaban gipakisama ngadto sa bag-ong pagkatawo. Liboan kaninyo ang nakasinati niini nga kausaban. Gibiyaan ninyo ang mga kinabuhi sa pagpakasala, usahay grabe ug makapalagot nga sala, ug pinaagi sa paggamit sa dugo ni Kristo diha sa inyong mga kinabuhi, nahimo kamong limpyo. Kamo wala nay hilig nga mobalik ngadto sa inyong karaang mga paagi. Kamo sa pagkatinuod usa ka bag-ong tawo. Kini mao ang unsay gipasabut nga kausaban sa kasingkasing” (“A Mighty Change of Heart,” Ensign, Okt. 1989, 4).

Si Presidente Dallin H. Oaks nagtudlo:

“Gipahinumduman ako sa gahum sa gagmay ug yanong mga butang sa unsay akong nakita samtang naglakaw ako usa ka buntag niana. … Ang baga ug lig-ong semento sa sidewalk [nang]liki. Resulta ba kini sa dako ug kusog nga pagtay-og gikan sa ilawom? Dili, ang hinungdan niini nga pagliki mao ang hinay, ginagmay nga pagtubo sa usa sa mga gamot nga migawas gikan sa duol nga kahoy. …

“Mao usab ang dakong epekto paglabay sa panahon sa gagmay ug yanong mga butang nga atong gitudlo diha sa mga kasulatan ug sa buhi nga mga propeta. Ikonsiderar ang pagtuon sa kasulatan nga gitudlo kanato nga iapil sa atong inadlaw-adlaw nga kinabuhi. O ikonsiderar ang personal nga mga pag-ampo ug ang pagluhod diha sa mga pag-ampo sa pamilya nga gihimo kanunay sa matinud-anong mga Santos sa Ulahing mga Adlaw. … Bisan og ang matag usa niini nga mga buhat ingon og gagmay ug yano, paglabay sa panahon moresulta kini sa gamhanang espirituhanong pagbayaw ug pagtubo. Kini mahitabo tungod kay ang matag usa niining gagmay ug yanong mga butang nagdapit sa pagpakig-uban sa Espiritu Santo, ang Tigpamatuod nga molamdag ug mogiya nato sa kamatuoran” (“Gagmay ug Yano nga mga Butang,” Liahona, Mayo 2018, 90).