Alma 17–22

• Ang mga sakop sa klase siguro kadaghan na nakadungog sa kaimportante sa yano nga mga gawi sa ebanghelyo. Ang Alma 17:1–4 makatabang nga ilang makita ang gamhanang epekto niining mga gawi diha sa atong kinabuhi. Mahimo nimong hangyuon ang katunga sa klase sa pagsiksik niini nga mga bersikulo kon unsay gibuhat sa mga anak ni Mosiah ug ang laing katunga sa pagsiksik alang sa mga resulta sa unsay ilang gibuhat. Unsa man ang mga resulta sa pagbuhat niini nga mga butang sa atong kinabuhi?

• Alang sa mas lawom nga panaghisgutan bahin sa pipila ka gawi nga nakapalig-on sa mga anak ni Mosiah, mahimo nimong isulat diha sa pisara ang Pagsiksik sa mga Kasulatan, Pag-ampo, ug Pagpuasa. Dayon ang mga sakop sa klase mahimong mosiksik sa mga kasulatan nga nagtudlo mahitungod sa mga panalangin nga nagagikan sa pagtuon sa kasulatan, pag-ampo, ug pagpuasa (ang Giya ngadto sa mga Kasulatan mahimong makatabang). Mahimo nilang isulat diha sa pisara kon unsay ilang makit-an ug ipaambit sa usag usa ang mga ideya kon unsaon pagpalambo ang ilang pagtuon sa kasulatan, pag-ampo, ug pagpuasa sa paagi nga mas makapaduol kanila ngadto sa Dios.

• Dunay daghang paagi sa pagpaambit sa ebanghelyo, ug tanan niini mas epektibo kon ang gugma maoy mag-aghat. Tingali ang mga sakop sa klase mahimong motino sa mga bersikulo diha sa Alma 17–18 nga nagpakita kon sa unsang paagi nga si Ammon naaghat pinaagi sa gugma sa pagpaambit sa ebanghelyo. Unsa ang ubang mga kamatuoran mahitungod sa pagpaambit sa ebanghelyo ang atong makat-unan gikan sa iyang ehemplo? Ang mga sakop sa klase mahimong mopaambit og mga kasinatian diin ang sinsero nga gugma nakapahumok sa kasingkasing sa usa ka tawo ug nakatugot kaniya nga mahimong mas madawaton sa mensahe sa ebanghelyo. Ang pamahayag ni Presidente Dallin H. Oaks diha sa “Dugang nga mga Kapanguhaan” mahimong makatabang usab sa mga miyembro aron masabtan ang kaimportante sa pagsiguro nga ang atong mga paningkamot nakabase sa gugma.

• Sa dihang naangkon na ni Ammon ug Aaron ang pagsalig ni Haring Lamoni ug sa iyang amahan, nakahimo sila sa pagtabang kanila aron masabtan ang mahinungdanong mga kamatuoran sa ebanghelyo. Tingali mahimong makatabang kon ang mga sakop sa klase naghimo og lista sa mga kamatuoran nga gitudlo ni Ammon kang Lamoni (tan-awa sa Alma 18:24–39) ug gitandi kini sa lista sa mga kamatuoran nga gitudlo ni Aaron sa amahan ni Lamoni (tan-awa sa Alma 22:1–16). Ang katunga sa klase mahimong magtrabaho sa usa ka lista samtang ang laing katunga magtrabaho sa laing lista. Ngano kaha nga ang pagsabut niining mga kamatuoran miresulta nga si Lamoni ug ang iyang amahan mituo ug misalig sa Langitnong Amahan ug sa Iyang Anak, nga si Jesukristo?

• Ang mga istorya bahin ni Aaron ug ni Ammon nga nagtudlo kang Haring Lamoni ug sa iyang amahan naghatag og dakong oportunidad sa paghisgot sa epektibong pagtudlo ug pagkat-on sa ebanghelyo. Unsa nga mga baruganan sa pagtudlo ang namatikdan sa mga sakop sa klase? tan-awa, pananglitan, sa Alma 18:24–28 ug Alma 22:7–13). Unsa nga mga baruganan sa pagkat-on ang ilang nakit-an diha sa mga ehemplo ni Haring Lamoni ug sa iyang amahan? (tan-awa, pananglitan, sa Alma 18:25–31; 22:17–18).

• Aron makakat-on kon sa unsang paagi nga ang doktrina sa ebanghelyo makaimpluwensya sa atong kinabuhi, ang mga sakop sa klase mahimong mosiksik sa Alma 18:40–41; 20:1–15; ug Alma 22:15–18, 25–27 aron mahibaloan kon unsay gibati ug gibuhat ni Haring Lamoni ug sa iyang amahan human nila masabti ang mga kamatuoran sa ebanghelyo ug nakabig. Sa unsang paagi nga kining mga kamatuoran makatabang kanato nga moduol kang Kristo? Unsay atong buhaton aron sa pagtabang sa atong kaugalingon ug sa atong mga minahal sa kinabuhi nga makasabut ug motuman niining mga kamatuoran?

• Atol sa ilang personal nga pagtuon sa Alma 19–22, ang mga sakop sa klase mahimong nakapamalandong sa hilabihan nga epekto nga mahimo sa pagpamatuod sa usa ka tawo ngadto sa uban. Awhaga sila sa pagpaambit kon unsay ilang nakat-unan. Unsay gisugyot sa mga istorya diha sa Alma 19–22 mahitungod sa atong personal nga mga paningkamot sa pagpaambit sa ebanghelyo? Ang istorya ni Presidente Gordon B. Hinckley diha sa “Dugang nga mga Kapanguhaan” makatabang sa paghatag og gibug-aton niini nga punto.

• Unsa ang ubang maayo nga mga analohiya nga imong mapaambit aron sa paghulagway kon unsay mahitabo kon mopaambit kita sa atong mga pagpamatuod ngadto sa uban? Posible nga mga ehemplo mao ang gamayng bato nga makahimo og mga aliki [ripple] sa lawa o libadura [yeast] nga nagtabang sa pagpatubo sa minasa [dough]. Human maribyu ang pipila ka ehemplo sa mga tawo nga nagpaambit sa ilang mga pagpamatuod diha sa Alma 19–22, ang mga sakop sa klase mahimong mopaambit kon sa unsang paagi sila naapektuhan sa mga pagpamatuod sa uban.

Si Presidente Dallin H. Oaks mipaambit og usa ka bililhong leksyon nga iyang nakat-unan gikan sa usa niya ka kasinatian isip usa ka batan-on:

“Na-assign ko nga mobisita sa usa ka dili kaayo aktibo nga miyembro, usa ka malampuson nga propesyonal nga pila ka tuig nga magulang nako. Nahinumdom sa akong mga aksyon, nakaamgo ko nga gamay ra kaayo ko og mahigugmaong pagpakabana alang sa tawo nga akong gibisitahan. Milihok ko tungod kay katungdanan man, uban sa tinguha nga maka-report og 100 porsyento sa akong home teaching. Usa ka gabii, hapit na ang katapusan sa bulan, nanawag ko aron mangutana kon mahimo ba nga ang akong kauban ug ako nga moadto ug mobisita kaniya. Ang iyang mapantunon nga tubag nagtudlo kanako og usa ka dili makalimtan nga leksyon.

“‘Dili, dili ko gustong moanhi mo karong gabhiona,’ miingon siya. ‘Gikapoy ko. Nagsul-ob na ko og pangkatulog. Nagbasa ko, ug dili ko andam nga mabalda aron lang maka-report mo og 100 porsyento sa inyong home teaching karong bulana.’ Kanang tubaga nagpabilin gihapon og sakit ngari nako tungod kay nasayud ko nga nakabantay siya sa akong hinakog nga tinguha.

“Nanghinaut ko nga walay tawo nga atong duolon uban sa usa ka pagdapit nga maminaw sa mensahe sa gipahiuli nga ebanghelyo nga mobati nga milihok kita tungod sa bisan unsa nga rason kay sa usa ka tinuod nga gugma alang kanila ug usa ka dili hinakog nga tinguha nga mopaambit og butang nga kita nasayud nga bililhon” (“Sharing the Gospel,” Ensign, Nob. 2001, 8).

Si Presidente Gordon B. Hinckley misaysay og istorya diin ang usa ka misyonaryo mireport ngadto sa iyang mission president atol sa pagtapos sa iyang serbisyo. Ang misyonaryo miingon:

“Walay bisan unsa nga resulta gikan sa akong trabaho. Nag-usik-usik ra ko sa akong panahon ug sa kwarta sa akong amahan. Usa kini ka pag-usik-usik sa panahon. … Usa ra ka tawo ang akong nabunyagan atol sa duha ka tuig nga dinhi ko. Kana mao ang dose anyos nga batang lalaki didto sa layong dapit sa Tennessee.”

Nakadesisyon ang mission president nga subayon ang dagan sa kinabuhi sa batang lalaki nga nabunyagan niining misyonaryo. Midako siya, naminyo, ug mibalhin ngadto sa Idaho. Ang iyang mga anak nagmisyon, ug ang ilang mga anak nagmisyon. Mibiyahe ang mission president ngadto sa Idaho ug gipangutana ang mga sakop niana nga pamilya mahitungod sa ilang mga misyon. Sa kaulahian miingon siya, “Akong nadiskubrihan nga, isip resulta sa bunyag nianang gamayng bata didto sa layong dapit sa Tennessee pinaagi sa usa ka misyonaryo kinsa naghunahuna nga napakyas siya, sobra sa 1,100 ka tawo ang mipasakop sa Simbahan” (Teachings of Gordon B. Hinckley [1997], 360–61).