Mosiah 11–17

• Bisan kon dili malagmit nga ang mga sakop sa imong klase pagahulgaon nga patyon tungod sa ilang mga pagpamatuod, mahimo silang mag-atubang og pagsupak tungod sa ilang mga gituohan. Tingali mahimo silang makakita og mga panghitabo o mga tudling diha sa Mosiah 11–13 ug 17 nga makahatag kanila og dugang nga kaisug nga mobarug alang sa kamatuoran. Unsay nakahatag og kaisug nila ni Abinadi ug Alma aron mahimong walay kahadlok? Unsaon nato aron mahimong lig-on ug makanunayon sa pagpanalipod sa kamatuoran? Ang mga kinutlo diha sa “Dugang nga mga Kapanguhaan” mahimong makahatag og pipila ka ideya.

• Aron matabangan ang imong klase nga makakat-on gikan sa ubang mga ehemplo sa maisugong pagpanalipod sa kamatuoran, mahimo nimong isulat ang Mga Tawo Kinsa Mibarug alang sa Kamatuoran diha sa pisara. Mahimo nimong sugdan pinaagi sa paghisgot kang Abinadi, nga magdapit sa mga sakop sa klase sa pagpaambit og pipila ka butang nga nakapadasig kanila mahitungod ni Abinadi samtang magbasa sila mahitungod kaniya karong semanaha. Dayon mahimo nilang hisgutan ang laing mga lalaki ug mga babaye—gikan sa mga kasulatan, sa ilang mga pamilya, o personal nga mga kasinatian—kinsa ilang gibati nga mga ehemplo sa pagbarug alang sa kamatuoran. Unsay atong bation nga madasig nga buhaton tungod niining mga ehemplo?

• Samtang nagtuon sila sa Mosiah 12:19–37 karong semanaha, ang mga sakop sa klase mahimong adunay mga ideya kon unsay gipasabut sa paggamit sa atong kasingkasing aron sa pagsabut sa pulong sa Dios. Ikonsiderar ang paghangyo sa pipila kanila nga mopaambit sa ilang mga hunahuna. O siguro mahimo nimong gamiton ang ubang oras sa klase nga dungan nga mosiksik niining mga bersikulo ug hisgutan unsay gisugyot niini kon unsaon paghimo sa pagtuon sa ebanghelyo nga mas makahuluganon. Pananglitan, nganong importante ang pagsabut sa balaod sa Dios ug ang “paghupot niini”? (Mosiah 12:29).

• Unsay makat-unan sa mga sakop sa imong klase pinaagi sa pagtandi sa mga kinaiya ug mga binuhatan sa mga pari ni Noah ngadto sa pamaagi nga kinahanglan natong himoon sa atong pagtuon sa ebanghelyo? Dapita sila sa pagbasa sa Mosiah 12:19–37, nga mangita sa mga pagsaway nga gipadangat ni Abinadi mahitungod sa mga pari ni Noah. Unsa kaha ang masulti ni Abinadi mahitungod sa atong pagtuon sa ebanghelyo karon? Hangyoa ang mga sakop sa klase sa pagpaambit sa ilang gibuhat nga nakatabang kanila sa paggamit sa ilang kasingkasing aron sa pagsabut ug pagdugang og mas dakong kahulugan sa ilang pagkat-on sa ebanghelyo.

  

• Aron makumbinser ang maduhaduhaon nga mga naminaw mahitungod sa pag-anhi sa Mesiyas, gikutlo ni Abinadi ang usa ka makapatandog nga panagna gikan ni Isaias (tan-awa sa Mosiah 14). Adunay pipila ka paagi nga ang mga sakop sa klase mahimong moribyu niining kapitulo. Mahimo silang mobasa og pipila ka bersikulo sa usa ka higayon ug hisgutan kini, o mahimo nimong bahinon ang klase ngadto sa ginagmay nga mga grupo nga maghisgot mahitungod sa makahuluganong mga bersikulo, lakip na ang mga footnote, sa pagdiskubre og dugang nga mga ideya. Awhaga sila sa pagpaambit kon unsay ilang nakat-unan mahitungod sa Manluluwas gikan niining kapitulo.

• Ang mga sakop ba sa imong klase nakasabut kon unsay gipasabut nga si Jesukristo “nakatagbaw sa mga gipangayo sa kaangayan”? (Mosiah 15:9). Aron matabangan sila nga makabaton og mas maayo nga panabut, mahimong sugdan ninyo pinaagi sa pagbasa og dungan sa “Kaangayan” ug “Maloloy-on, Kalooy” diha sa Giya ngadto sa mga Kasulatan. Tingali mahimong moboluntaryo ang usa ka tawo sa pagsulat og mubo nga kahulugan sa matag termino diha sa pisara. Dayon mahimo kamong magbasa og dungan sa Mosiah 15:1–9. Giunsa ni Jesukristo pagtagbaw ang mga gipangayo sa kaangayan? Sa unsang paagi Niya gipadangat ang Iyang kalooy ngari kanato? Ang mga video nga gisugyot diha sa “Dugang nga mga Kapanguhaan” naggamit og mga istorya ug mga analohiya sa paghulagway sa kalooy sa Manluluwas; ang pagtan-aw og usa niining mga video mahimong makatabang sa mga sakop sa klase sa paghunahuna og laing mga analohiya nga nagpakita kon giunsa ni Jesukristo pagtagbaw ang mga gipangayo sa kaangayan.

• Mahimo nimong tabangan ang mga sakop sa klase nga makasabut sa kaimportante nga ang mga sugo “mahisulat sa [atong] mga kasingkasing” pinaagi sa pagpangutana kanila kon unsa kaha ang gipasabut niining mga pulong. Dayon dapita sila sa pagtandi sa mga sugo nga gitudlo ni Abinadi diha sa Mosiah 12:33–37 ug 13:11–26 ngadto sa mga sala nga nahimo ni Haring Noah ug sa iyang katawhan (tan-awa sa Mosiah 11:1–7, 14–15). Sa unsang paagi nga ang mga sugo nga “mahisulat sa [atong] mga kasingkasing” lahi kay sa mahimong pamilyar lamang niini? (Mosiah 13:11). Unsaon nato sa pagkahibalo nga ang mga sugo nahisulat sa atong kasingkasing? Unsa nga mga ehemplo ang atong mapaambit?

Si Presidente Russell M. Nelson nagtudlo: “Ang tinuod nga mga disipulo ni Jesukristo andam nga magpabantang, motingog, ug magpalahi gikan sa mga tawo sa kalibutan. … Dili sayon o awtomatik nga mahimong ingon ka gamhanang mga disipulo. Kinahanglang lig-on kitang nakatutok sa Manluluwas ug sa Iyang ebanghelyo. Nagkinahanglan og grabeng paningkamot sa pangisip nga motan-aw Kaniya sa matag hunahuna. Apan kon atong buhaton, ang atong mga pagduha-duha ug kahadlok mahanaw” (“Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40).

Si Presidente Thomas S. Monson miingon: “Hinaut nga magmaisugon kita ug andam sa pagbarug sa unsay atong gituohan, ug kon kinahanglan kitang magbarug nga mag-inusara diha sa proseso, hinaut nga maisugon nato kanang buhaton, gilig-on sa kahibalo nga sa pagkatinuod wala kita mag-inusara kon magbarug uban sa atong Amahan sa Langit” (“Magmaisugon sa Pagbarug nga Mag-inusara,” Liahona, Nob. 2011, 67).

Si Presidente Gordon B. Hinckley nagtudlo: “Misulat si Pablo ngadto kang Timoteo: ‘Kay kita wala sa Dios hatagig espiritu sa katalaw; kondili sa espiritu sa gahum, ug sa gugma, ug pagpugong sa kaugalingon. Busa, ayaw ikaulaw ang pagpanghimatuod alang sa atong Ginoo’ (2 Tim. 1:7–8). Unta ang matag miyembro niini nga simbahan buot mobutang niadto nga mga pulong diin mahimo niya kining makita matag buntag inig sugod niya sa iyang adlaw. Makahatag kini kanato og kaisug nga mosulti, makahatag kini kanato sa hugot nga pagtuo aron mosulay, mas makapalig-on pa kini sa atong lig-on nga pagtuo diha sa Ginoong Jesukristo” (Mga Pagtulun-an sa mga Presidente sa Simbahan: Gordon B. Hinckley [2016], 394).