Mosiah 4–6

• Ang ubang tawo adunay sayop nga ideya nga ang paghinulsol nagkinahanglan og gamay nga paningkamot; ang uban nagtuo nga nagkinahanglan kini og dako kaayo nga paningkamot. Aron matabangan ang mga sakop sa klase nga mas makasabut kon unsa ang gikinahanglan aron makadawat og kapasayloan sa mga sala, mahimo nimo silang dapiton sa pagsiksik sa mga pagtulun-an ni Haring Benjamin diha sa Mosiah 4:1–12, nga mangita sa mga kahimtang diin ang Langitnong Amahan mohatag og kapasayloan sa atong mga sala. Ang mga sakop sa klase mahimong molista diha sa pisara sa unsay ilang makit-an. Hangyoa sila sa paghunahuna og usa ka analohiya nga makatabang sa pagpasabut kon unsay ilang nakat-unan. Pananglitan, mahimo nilang itandi ang kapasayloan sa mga sala ngadto sa usa ka nakautang nga “napasaylo” o nakanselar ang utang. O mahimo nilang itandi nga mapabilin ang kapasayloan sa atong mga sala sa pag-atiman sa usa ka butang nga nagkinahanglan og kanunay nga pagmentinar, sama sa usa ka hardin o panimalay.

• Ikonsiderar ang pagpangutana sa mga sakop sa klase kon unsay ilang isulti sa usa ka tawo kinsa naghunahuna kon ang paghinulsol angayan ba nga paningkamutan. Unsaon man nila pagtabang ang usa ka tawo nga nawad-an sa kadasig ug mibati nga ang pagbuntog sa sala ug kahuyang imposible? Mahimo nimong tabangan ang mga sakop sa klase alang sa maong mga panag-istoryahanay pinaagi sa paghangyo kanila sa paggahin og pipila ka minuto sa pagsiksik sa mga pulong ni Haring Benjamin diha sa Mosiah 4:1–12 alang sa mga kamatuoran nga makatabang sa usa ka tawo sa usa niining mga sitwasyon. Ang mga sakop sa klase mahimo dayon nga mopaambit sa mga kamatuoran nga ilang nadiskubrihan ngadto sa usa ka tawo nga naglingkod sa duol.

• Unsaon nato sa pagkahibalo nga nakadawat kita og kapasayloan sa atong mga sala”? Gihulagway ni Haring Benjamin ang pipila ka resulta sa tinuod nga paghinulsol—dapita ang mga sakop sa imong klase sa pagpangita niini diha sa Mosiah 4:13–16. Mahimo usab nimo silang dapiton sa pagpamalandong sa ilang kaugalingong kinabuhi ug sa pagtimbang-timbang kon giunsa nila pagsunod ang mga pagtulun-an diha niining mga bersikulo. Unsa ang mga timailhan nga nakita sa mga sakop sa klase nga sila nakabig? Sa unsang paagi nga ang atong mga relasyon ngadto sa uban mausab samtang moduol kita kang Kristo pinaagi sa paghinulsol? Tingali ang mga sakop sa klase mahimong mopaambit kon sa unsang paagi nila kini nakita nga nahitabo sa ilang kinabuhi.

• Ang Mosiah 4:11–12 ug 14–16 mahimong makaaghat og panaghisgutan mahitungod sa unsay makapadasig sa matarung nga pagkaginikanan. Unsa ang gitudlo niining mga bersikulo kon unsaon aron mahimong mas maayo nga mga ginikanan?

• Kon mibati ka nga nadasig nga maghimo og panaghisgutan mahitungod sa mga pagtulun-an ni Haring Benjamin kabahin sa pag-atiman sa mga kabus ug timawa, mahimo nimong dapiton ang mga sakop sa klase nga magpuli-puli sa pagbasa sa mga bersikulo gikan sa Mosiah 4:16–27. Human mabasa ang matag bersikulo, ang tawo nga nagbasa mahimong mo-summarize diha sa iyang kaugalingong mga pulong kon unsay gitudlo ni Haring Benjamin. Ang mensahe ni Elder Jeffrey R. Holland nga “Dili Ba Kitang Tanan Makililimos?” (Liahona, Nob. 2014, 40–42) mahimong magamit aron idugang niining panaghisgutan. Unsaon nato pagsunod sa tambag ni Haring Benjamin nga dili “modagan nga labaw pa kay sa [atong] kusog”? (Mosiah 4:26–27). Sa unsang paagi nga ang sugo nga “mohatag sa [atong] kabtangan ngadto sa mga kabus” adunay kalabutan sa kapasayloan sa atong mga sala?

• Usahay morag mas sayon unta kon gihatagan kita sa Ginoo og usa ka detalyado nga lista sa matag posible nga sala. Hinoon, kita Iyang gisultihan, “Magbantay sa inyong mga kaugalingon … ug magpadayon diha sa hugot nga pagtuo sa unsay inyong nadungog mahitungod sa pag-anhi sa atong Ginoo” (Mosiah 4:30). Aron matabangan ang imong klase sa paghisgot niini nga baruganan, mahimo nimo silang pangutan-on og sama niini: Sa unsang paagi nga ang atong mga hunahuna, mga pulong, ug mga buhat makaapekto sa atong kaugalingon ug sa uban? Unsay gipasabut sa “magpadayon diha sa hugot nga pagtuo”? Unsa nga tambag ang atong mapaambit sa usag usa aron makatabang kanato nga “magbantay” sa atong kaugalingon?

• Sa pagsugod og panaghisgutan mahitungod sa dili ikatandi nga kausaban nga madala sa ebanghelyo ni Jesukristo sa atong kinabuhi, mahimo nimong dapiton ang mga sakop sa klase sa pagpaambit sa pipila ka rason nganong usahay lisud nga makahimo og malungtarong mga kausaban sa atong kinabuhi. Dapita dayon sila sa pagbasa sa Mosiah 5:1–5, nga mangita sa “dako nga kausaban” nga nasinati sa katawhan ni Haring Benjamin. Unsa nga mga kamatuoran mahitungod sa kausaban sa kasingkasing ang atong makat-unan gikan sa ilang kasinatian? Ikonsiderar ang paghangyo sa pipila ka sakop sa klase nga mopaambit kon giunsa sa Espiritu Santo pagtabang kanila aron mausab ang ilang kasingkasing. Mahimo usab silang motan-aw og usa sa mga video nga gisugyot diha sa “Dugang nga mga Kapanguhaan.”

  

• Human maghisgot sa mga kamatuoran diha sa Mosiah 5:1–7, ang pipila ka sakop sa klase mahimong maghunahuna kon nganong ang kausaban sa ilang kasingkasing morag dili man ingon ka talagsaon o ka dali sama sa nasinati sa katawhan ni Haring Benjamin. Ang pamahayag gikan ni Elder D. Todd Christofferson diha sa “Dugang nga mga Kapanguhaan” motubag niini nga pangutana. Unsa ang atong makat-unan gikan ni Elder Christofferson mahitungod sa pagkakabig?

• Ang Mosiah 5:5–15 makatabang sa mga sakop sa klase nga masabtan ang mga panalangin nga ilang madawat kon mohimo ug motuman sila sa mga pakigsaad ngadto sa Dios. Mahimo nimo silang dapiton sa pagribyu niining mga bersikulo nga maghunahuna sa mga pakigsaad sa bunyag ug sa ordinansa sa sakrament ug ipaambit kon unsay ilang makat-unan. (Tan-awa usab sa D&P 20:77, 79.)

Si Elder D. Todd Christofferson namulong bahin sa dako nga kausaban sa kasingkasing nga gihulagway diha sa mga kasulatan:

“Tingali makapangutana kamo, Ngano nga kining dako nga kausaban dili dayon mahitabo kanako? Kinahanglang hinumduman ninyo ang talagsaong mga ehemplo sa mga katawhan ni Haring Benjamin, ni Alma ug ang uban sa kasulatan ingon lamang niana—talagsaon ug dili kasagaran. Alang sa kadaghanan kanato, ang mga kausaban, mas hinay-hinay ug mahitabo sa kadugayan. Ang pagkatawo pag-usab, dili sama sa atong pisikal nga pagkatawo, mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal.

“Sa samang higayon kinahanglan nga dili kita mangatarungan sa atong kaugalingon sa dili tininuod nga paningkamot. Kinahanglang dili kita makontento nga ipabilin ang pipila ka kinaiya sa pagbuhat og dautan. Kinahanglan takus kitang moambit sa sakrament matag semana ug magpadayon sa pagtawag sa Balaan nga Espiritu sa pagkuha sa hingpit sa katapusang mga timailhan sa pagkadili putli nga ania kanato. Ako mopamatuod nga samtang kamo mopadayon diha sa dalan sa espirituhanon nga pagkatawo pag-usab, ang maulaon nga grasya ni Jesukristo mokuha sa inyong mga sala ug sa lama niadto nga mga sala diha ninyo, ang mga tintasyon mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan” (“Natawo Pag-usab,” Liahona, Mayo 2008, 78).