1 Nephi 16–22

• Mahimo ba nga ikaw, o usa ka tawo sa imong klase, maghunahuna og butang nga gamay nga mahimong magamit sa pagpahinabo og butang nga mahinungdanon? (tan-awa sa 1 Nephi 16:29). Mahimo nimong dapiton ang mga sakop sa klase sa paghisgot kon unsay ilang nakat-unan mahitungod niining baruganan human magbasa niining mga kasulatan sa tinagsa-tagsa o diha sa mga grupo: 1 Nephi 16:25–31; Alma 37:3–8; ug Doktrina ug mga Pakigsaad 64:33; 123:12–17. Giunsa paggamit sa Dios ang gagmay nga mga paagi sa pagtuman sa mahinungdanon nga mga butang diha sa atong kinabuhi?

• Ang imong klase mahimong makabenepisyo tungod sa paghisgot kon giunsa paggiya sa Langitnong Amahan sa atong mga agianan. Sa pagsugod, mahimo nimong hangyuon ang mga sakop sa klase sa paghisgot sa mga baruganan nga nakapasalir sa Liahona (tan-awa sa 1 Nephi 16:10–16, 23–31; 18:10–13, 20–22; tan-awa usab sa Alma 37:38–47). Sa unsang paagi nga kining mga baruganan makonsiderar nga “gagmay nga mga paagi”? Ang mga sakop sa klase mahimong maglista og mga butang diha sa pisara nga gihatag sa Dios aron sa paggiya kanato (tan-awa sa “Dugang nga mga Kapanguhaan” alang sa mga ideya). Unsa nga ginagmayng mga aksyon ang atong mahimo aron makadawat sa giya sa Dios?

• Ang mga sakop sa imong klase mahimong nag-atubang og mga buluhaton ug mga hagit nga morag imposible. Unsaon man nimo paggamit ang kasinatian ni Nephi uban sa kaugalingon niyang morag imposible nga mga buluhaton—pagpakaon sa iyang pamilya diha sa kamingawan ug paghimo og usa ka barko—aron sa pagtabang kanila? Tingali ang mga sakop sa klase mahimong mobasa sa 1 Nephi 16:18–32; 17:7–16; ug 18:1–4, nga mangita sa mga baruganan nga makatabang kanila kon mag-atubang sila og mahagiton nga kalisdanan (pananglitan, ang 1 Nephi 16:24–26 nagtudlo nga ang pag-ampo ug pagpaubos makatugot kanato nga makadawat og inspirasyon ug direksyon gikan sa Dios). Mahimo nimong sugdan pinaagi sa paghatag kanila og ehemplo bahin sa usa ka baruganan nga imong nakita niining mga bersikulo. Samtang mopaambit sila sa unsay ilang nakit-an, mahimo usab silang mopaambit og personal nga mga kasinatian.

• Ang mga kasinatian ni Lehi ug sa iyang pamilya didto sa kamingawan nagpakita sa gahum sa hugot nga pagtuo ug sa mga sangputanan sa pagkawalay pagtuo. Aron matabangan ang mga sakop sa klase nga madiskubrihan kining mga kamatuoran, mahimo nimong isulat kining mga pangutana diha sa pisara: Giunsa ni Nephi paglihok ang iyang hugot nga pagtuo? Sa unsang paagi siya napanalanginan isip resulta? Unsa ang mga sangputanan sa pagkawalay pagtuo nila ni Laman ug Lemuel? Dapita ang mga sakop sa klase isip usa ka grupo sa pagsiksik sa mga tubag niining mga pangutana diha sa 1 Nephi 16:18–32 o 17:7–22 ug ipaambit kon unsay ilang makit-an.

• Aron matabangan ang mga sakop sa klase nga makakat-on kon unsaon sa pagpahisama sa mga kasulatan ngadto sa ilang kaugalingon, mahimo nilang basahon ang mga ehemplo kon giunsa kini paghimo ni Nephi. Pananglitan, diha sa 1 Nephi 4:1–3 ug 17:23–32, 41–45, unsa nga mga baruganan ang gitudlo ni Nephi pinaagi sa pagpahisama sa mga kasulatan ngadto sa sitwasyon sa iyang pamilya? Ang istorya ni Elder Robert D. Hales diha sa “Dugang nga mga Kapanguhaan” nagpakita kon sa unsang paagi nga ang pagpahisama sa mga kasulatan sa atong kaugalingon makapanalangin kanato. Ikonsiderar ang pagdapit sa mga sakop sa klase sa pagtino sa mga hagit nga giatubang nila o sa mga sakop sa ilang pamilya ug dayon mangita og mga istorya sa kasulatan nga makahatag kanila og mga ideya ug tabang alang niadtong mga sitwasyon. Sumala sa 1 Nephi 19:22–24, sa unsang paagi nga ang pagpahisama sa mga kasulatan sa atong kaugalingon makapanalangin kanato?

• Ang paghisgot sa 1 Nephi 19:22–24 mahimong usa ka dakong oportunidad alang sa mga sakop sa klase sa pagpaambit kon sa unsang paagi nila “gipahisama ang mga kasulatan” sa ilang kaugalingon ug sa ilang mga pamilya, ingon man usab sa mga panalangin nga ilang nadawat tungod sa pagbuhat sa ingon. Ikonsiderar ang paglista sa mga ideya sa mga sakop sa klase diha sa pisara kon unsaon sa pagpahisama sa mga kasulatan ngadto sa ilang kaugalingon (alang sa pipila ka sugyot, tan-awa ang lista diha sa “Dugang nga mga Kapanguhaan”). Sa umaabut nga klase, mahimo nimong dapiton ang mga sakop sa klase nga ipaambit ang mga kasinatian sa dihang ilang gigamit ang mga ideya diha sa lista.

• Aron maawhag ang mga sakop sa klase nga mopaambit og makahuluganong mga pagtulun-an nga ilang nakita diha sa 1 Nephi 20–21, ikonsiderar ang pagsulat og mga ulohan sama niini diha sa pisara: Mga Anak ni Israel, Pamilya ni Lehi, ug Mga Tawo sa Atong Panahon. Hatagi sila og panahon nga maribyu ang 1 Nephi 20–21 ug malista ubos sa matag ulohan kon sa unsang paagi nga ang mga panagna ni Isaias magamit ngadto niining mga grupoha.

Si Elder David A. Bednar nagtudlo: “Ang Espiritu Santo molihok sa atong kinabuhi sama gayud sa gihimo sa Liahona alang kang Lehi ug sa iyang pamilya, sumala sa kahugot sa atong pagtuo ug kakugi ug pagtagad” (“Nga Kita Unta sa Kanunay Makabaton sa Iyang Espiritu uban Kanato,” Liahona, Mayo 2006, 31).

Sa Oktubre 2005 nga kinatibuk-ang komperensya, si Elder Lowell M. Snow sa Seventy miingon: “Kini mismong kinatibuk-ang komperensya mao ang moderno nga Liahona, usa ka panahon ug dapit aron makadawat og dinasig nga paggiya ug direksyon nga mopauswag kanato” (“Kompas sa Ginoo,” Liahona, Nob. 2005, 97).

Si Presidente Thomas S. Monson nagtudlo: “Ang mao gihapon nga Ginoo kinsa naghatag og Liahona para kang Lehi naghatag para kanimo ug kanako karon og talagsaon ug bililhong gasa nga naghatag og direksyon sa atong kinabuhi. … Ang gasa nga akong gipasabut mao ang inyong patriyarkal nga panalangin” (Thomas S. Monson, “Your Patriarchal Blessing: A Liahona of Light,” Ensign, Nob. 1986, 65).

Si Elder Robert D. Hales nagtudlo:

“Pipila ka tuig ang milabay nagtudlo ko sa among batan-ong anak nga lalaki bahin sa kinabuhi ug sa mga kasinatian sa igsoong lalaki ni Jared. Bisan tuod nga ang istorya nindot gyud kaayo, morag wala siya ganahi. Dayon nangutana ko kon unsay kahulugan sa istorya ngadto niya. Dako kaayo ang ikatabang kon mangutana ta sa atong mga anak og, ‘Unsay kahulugan niini nganha nimo?’ Miingon siya, ‘Abi nimo, kini walay kalainan sa unsay gibuhat ni Joseph Smith didto sa kakahoyan sa dihang nag-ampo siya ug nakadawat og tubag.’

“Miingon ko, ‘Kaedad ra nimo si Joseph. Paminaw nimo ang pag-ampo nga sama sa iyang pag-ampo makatabang ba nimo?’ Sa kalit lang, wala na kami maghisgot bahin sa karaang mga istorya didto sa layong dapit. Naghisgot na mi bahin sa among anak—bahin sa iyang kinabuhi, sa iyang mga panginahanglan, ug sa paagi nga ang pag-ampo makatabang niya.

“Isip mga ginikanan, kita dunay responsibilidad sa pagtabang sa atong mga anak nga ‘mopahisama sa mga kasulatan [gani, ang matag bahin sa ebanghelyo ni Jesukristo.] ngari kanato [ug ngadto sa atong mga anak], … alang [sa] kaayohan ug pagkat-on [sa atong mga pamilya]’” (“Inubanan sa Tanan nga Pagbati sa usa ka Malumo nga Ginikanan: Usa ka Mensahe sa Paglaum sa mga Pamilya,” Liahona, Mayo 2004, 90).

• Hunahunaa ang mga panghitabo o mga kahimtang sa atong panahon nga susama niadtong anaa sa mga kasulatan nga inyong gibasa.

• Pangita kon unsay nahibaloan, nakat-unan, o gibuhat sa mga tawo diha sa mga kasulatan nga makatabang kaninyo sa kasamtangang personal nga problema o pangutana.

• Hibaloi ang mga baruganan gikan nianang istorya nga makatabang kaninyo sa inyong kaugalingong mga kahimtang.