Maciu 21–23; Marika 11; Luke 19–20; Joni 12

Vakaraitaka e dua nai yaloyalo kei Sakiusa ena Vu ni Lolo (ena ituvatuva oqo se na ChurchofJesusChrist.org). Vukei ira na gone me ra vakaraici Sakiusa ka cavuta na yacana. Cakava na ivukivuki eso me ra muria na gone ni o tukuna tiko na italanoa i Sakiusa kei Jisu—me vaka oqo, titeqe voli me ra raisivita e dua na ilala tamata se vakatotomuria voli me ra kabata e dua na vunikau. Vakamacalataka ni a raici Sakiusa na iVakabula ka kacivi koya ena yacana. Vakadinadinataka ni sa kilai ira yadua talega na gone na iVakabula kei na yacadra.

Kauta mai e dua na waqa ni taba lala ki na kalasi, se cakava e dua ena pepa. Sureti ira yadua na gone me ra veivukevuke ni taura tu na waqana e matadra ni ra kaya tiko na vo ni kalasi, “sa kilai [yaca ni gone] na Tamada Vakalomalagi kei Jisu Karisito.”

Lagata vata e dua na sere baleta na loloma ni Tamada Vakalomalagi, me vaka na “Au Luve ni Kalou” (iVolanisere ni Gonelalai, 2). Vukei ira na gone me ra vakarogoca na veika ena vukei ira me ra kila ni lomani ira na Tamada Vakalomalagi.

Vakaraitaka nai yaloyalo Sa Vakasavasavataka na Valetabu o Jisu (iVola ni iYaloyalo Vakosipeli, naba 51), ka tukuna na italanoa e volai tu ena Maciu 21:12–14. Vukei ira na gone me ra vakaraica na ilavo kei na manumanu ena i yaloyalo. Qai veivosakitaka se cava a vinakata kina na iVakabula me ra vagalala mai na valetabu na dauveisau ilavo kei ira na volitaki manumanu.

Vakaraitaka nai yaloyalo ni valetabu (me ivakaraitaki, raica na iVola ni iYaloyalo Vakosipeli, naba 117–19), ka kerei ira na gone me ra wasea na ivakarau ni lomadra ni ra raica e dua na valetabu. O rawa ni vakamacalataka ni valetabu e sa dua na vanua eda lako kina me da veiyalayalati kei na Kalou, vakasaqara na isau ni masu, ka volekakata tu na Kalou. Vukei ira na gone me ra vakatakila na veika eso era vakila mai vua na Yalo Tabu e tukuna tiko vei ira ni sa dua na vanua bibi na valetabu. Kerei ira na gone me ra vakaitovotaki ira me vaka ga era sa tiko ena loma ni valetabu. Me vakaoqo, sa rawa ni ra vosa ena vakasolokakana ka dabe ena vakarokoroko.

Lagata vata e dua na sere baleta na valetabu, me vaka na “Raica na Valetabu” (iVolanisere ni Gonelalai, 99), ka sureti ira na gone me ra lalawataka ni curuma na valetabu ena dua na siga.

Droinitaka e dua nai yaloyalo ni rua na gonetagane ena papa ni volavola, ka vakayagataka na droini ni o vakamuria tiko na vosa vakatautauvata ena Maciu 21:28–32. Na gonetagane cava a qai cakava e muri na ka dodonu? Kerei ira na gone me ra cavuta eso na ka era rawa ni cakava me ra talairawarawa kina e vale. Me ra droinitaka na kedra i yaloyalo ni ra cakava tiko e dua vei ira na ka oqori.

Sureti ira na gone me ra wasea na veika era a sotava ni ra talairawarawa ki na nodra itubutubu. Era a vakalougatataki vakacava ena nodra talairawarawa?

Wilika na Luke 19:1–10, ka cegu vakalailai ni oti e vica na tikina mo veivosakitaka na veika e vakatakila me baleti Sakiusa. Na cava a cakava o Sakiusa me rawa ni raici Jisu kina? Na cava a cakava o koya ni kerei koya o Jisu me kevu sobu mai na vunikau? Kerei ira na gone yadua me ra wasea e dua na vuna era na via raici Jisu kina. Kevaka e lako mai ki na noda koro levu o Jisu, na cava eda na cakava me da vakavakarau kina?

Sureti ira na gone me ra vakasamataka na tamata era kila ka, me vakai Sakiusa, na rairai vakasaqara voli na iVakabula. Tarogi ira na gone na cava era na rairai cakava me ra vukea kina e dua tale me vulica baleta na iVakabula.

Sureti ira na gone me ra wasea na veika era sotava ni ra vakila tu ni sa kilai ira ka lomani ira na Tamada Vakalomalagi kei Jisu Karisito.

Sureti ira na gone me ra wilika na Maciu 21:12–14. Vakaraitaka nai yaloyalo Sa Vakasavasavataka na Valetabu o Jisu (iVola ni Yaloyalo Vakosipeli, naba 51), ka tarogi ira na tikina cava e vakaraitaki tu ena i yaloyalo.

Sureti ira na gone me ra wasea na veika era vakila ni ra curuma e dua na valetabu, sikova na lomanibai ni valetabu, se sarava nai yaloyalo ni valetabu. Na cava a vukei ira ni kila ni sa vanua tabu na valetabu? Sa rawa mo wasea vei ira na gone na vuna o taleitaka kina na valetabu. Cava na vuna e sa ka tabu kina vei iko?

Sureta e dua se levu na itabagone me ra lako mai ki na kalasi ka veivosakitaka na sala cava era sa vakavakarau tu kina ni curuma na valetabu. Kevaka era sa taleva oti na valetabu, kerei ira me ra veivosakitaka na ivakarau ni yalodra ena nodra tiko ekea.

Kotikotiva e dua na yaloyalo ni valetabu ki na veitiki ni ibulibuli eso, ka solia vei ira yadua na gone e dua na tikina. Kerei ira na gone me ra vola ena daku ni nodra tiki ni ibulibuli e dua na ka era rawa ni cakava me ra vakavakarau kina ni curuma na valetabu. Ni ra wasea na gone na nodra dui vakasama, semata na nona tikina ki na ibulibuli.

Ena papa ni volavola, vola na veika oqo: e rawa ni vukei au ena vakavakarau meu veiqaravi ena valetabu. Sureti ira na gone mera vakatura eso na sala me vakataucokotaki kina na yatuvosa oqo. Eso na vakasama e rawa ni oka kina na “Maroroi ni noqu veiyalayalati ni papitaiso” se “Na Yalo Tabu.”

Ni o wilika vata kei ira na gone na Maciu 23:25–28 navuca ni wasea na ivakamacala oqo ni dauveivakaisini mai na Bible Dictionary: “E dua ka vakalecalecava ni daulotu ni sega tu ni vakakina.” Cava na vuna e ca kina ni da dauveivakaisini?

Vakaraitaka vei ira na gone e dua na bilo ka savasava e taudaku ia e duka na lomana me vukea na vakamacalataki ni vakatautauvata ena Maciu 23:25. E rawa vakacava ni da vakadeitaka ni da sa savasava ka savavuka sara e loma?