Mataupu Faavae ma Feagaiga 111–114

Valaaulia tamaiti e tusi mai mea e oo mai i le mafaufau pe a latou faalogo i le upu ‘oa. Faatusatusa mea o loo vaaia e le lalolagi o se ‘oa taua ma mea e faataua e le Alii (tagai Mataupu Faavae ma Feagaiga 111:2, 10-11), e pei o Ona tagata, poto ma le amiotonu, ma le faia o filifiliga lelei.

Fesoasoani i tamaiti e faamaea le itulau o gaoioiga o lenei vaiaso. O le a se mea tatou te aʻoaʻoina e uiga ia Iesu mai mea ua Ia faataua? E faʻapefea ona avea i tatou faapei o Ia?

Fesoasoani i tamaiti e mafaufau i tulaga e taua ai le uuina o lima o se tagata o le aiga, pei o le laasia o le auala poʻo le faʻamafanafana atu i se tasi. Atonu latou te fiafia e faatino nisi o faʻataʻitaʻiga na latou faʻasoa maia. Faitau le Mataupu Faavae ma Feagaiga 112:10. Aisea tatou te mananao ai i le Alii e “taitai [i tatou] i le lima”?

Tuu se fusi mata i se tasi o tamaiti, ma fai atu ia te ia e savali i le isi itu o le potu ma se isi tamaitiiti e taitai ia te ia i le lima. Faamatala e uiga i se mea na e oo i ai ina ua e lagona le taitaiina o oe e le Alii.

Ao e faasoa atu le “Mataupu 41: Faalavelave i Katelani” (Tala o le Mataupu Faavae ma Feagaiga, 158–60), fai atu i tamaiti e fai se siepi o le fatu i o latou lima pe a latou faalogo e uiga i se tasi o faia se mea saʻo. Fesoasoani ia i latou ia malamalama e finagalo le Alii ia tatou alolofa i tagata uma, e oo lava ia i latou atonu e faia ni filifiliga sese.

Tusi se foliga faanoanoa i luga o le laupapa, ma fesili atu i tamaiti pe mafai faapefea ona tatou faaalia le alofa mo isi o e le fiafia (tagai Mataupu Faavae ma Feagaiga 112:11). A o fefaasoaaʻi e tamaiti manatu, toe tusi le foliga faanoanoa ina ia avea ma foliga fiafia. Faasoa atu lau molimau e uiga i le mana lea e sau mai le alofa i isi. Usu faatasi se pese e faatatau i le alofa, e pei o le “Fetalai Mai Iesu e Alofa i Tagata Uma” (Tusipese a Tamaiti,39).

Fesili atu i tamaiti po o le a le uiga o le lotomaualalo. (E mafai ona latou faitau “Lotomaualalo” i le Faamaoni i le Faatuatua [itulau 86–87] pe a manaomia). Fesoasoani ia latou mafaufau i upu po o fuaitau e faatatau i le “lotomaulalo,” ma valaaulia i latou e faitau le Mataupu Faavae ma Feagaiga 112:10, sui se tasi o nei upu po o fuaitau mo le “faamaualalo” i le fuaiupu. Aisea e finagalo ai le Tama Faalelagi ia tatou lotomaualalo? Ina ia aoao atili, e mafai e tamaiti ona faitau mau faaopoopo o loo lisi atu i lalo “Lotomaualalo, Faamaualalo” i le Taiala i Tusitusiga Paia (scriptures.ChurchofJesusChrist.org).

Tusi upu o le Mataupu Faavae ma Feagaiga 112:10 i luga o le laupapa, ma fai atu i tamaiti e faitau leotele. Valaaulia se tamaitiiti e vase lalo o faamanuiaga mo i latou o e lotomaulalo o loo ta’ua i lenei fuaiupu. Ia uunaia tamaiti e faasoa atu i ni taimi na latou saili ai ma le lotomaualalo le fesoasoani a le Alii ma na taitaiina e Ia, e pei o le taimi na taliina ai a latou tatalo.

Valaaulia tamaiti e auauai e faitau mai le “Mataupu 41: Faalavelave i Katelani” (Tala o le Mataupu Faavae ma Feagaiga, 158–60). O ai na mafua ai ona leaga atili faafitauli i Katelani? O ai sa taumafai e faalelei atili? Valaaulia tamaiti e faitau le Mataupu Faavae ma Feagaiga 112:11 ma talanoa pe aisea e taua ai le alofa i tagata uma.

Aisea e taua ai le alofa i tagata e ese mai ia i tatou? Aisea atonu na tuuina mai ai e le Tama Faalelagi ia i tatou eseesega? E mafai faapefea ona tatou “tuu lo [tatou] alofa i mea uma,” e oo lava ia i latou e ese mai ia i tatou? Usu faatasi ma tamaiti se pese e faatatau i le alofa i isi, e pei o le “Ou te Savali ma Oe” (Tusipese a Tamaiti, 78--79).

Fesoasoani i tamaiti e mafaufau i faataitaiga o le taimi na alofa ai le Faaola ia i latou na agaleaga ia te Ia (mo se faataitaiga, tagai Luka 23:34).

Faasoa atu i tamaiti o le 1837, na liliuese ai nisi o Aposetolo e faasaga i le Perofeta o Iosefa Samita. Aisea e taua ai le mulimuli i le perofeta? (tagai fuaiupu 15). Fesoasoani i tamaiti e fai se lisi o mea na taʻu atu e le Alii ia Thomas B. Marsh, le Peresitene o le Korama a Aposetolo e Toasefululua, e fai (tagai Mataupu Faavae ma Feagaiga 112:12--15). Faaaoga le lisi e talanoaina ai pe mafai faapefea ona tatou liua atili ia Iesu Keriso.

Fesili atu i tamaiti po o le a so latou manatu o le a le uiga o le tautino atu ia iloa Iesu Keriso ae ia le iloa moni o Ia (tagai Mataupu Faavae ma Feagaiga 112:26). O le a le mea o aoao mai ai i tatou i le fuaiupu 14 e mafai ona tatou faia ia iloa atili o Ia? Fesoasoani i tamaiti ia malamalama i le uiga o le “ave [lo tatou] satauro” (Faaliliuga a Iosefa Samita, Mataio 16:25–26 [i le faaiuga o le Tusi Paia]) po o le fafaga i [Ana] mamoe.”