2 Nefi 6–10

Seraq’i reheb’ li kok’al li seraq’ chirix junaq kristiaan kit’ane’ sa’ junaq li jul jwal cham ut ink’a’ kiru chi elk chaq. Jun li winq xnume’ aran ut kirisi chaq li kristiaan sa’ li jul. Naru nakayiib’ jun xjalam-uuch li seraq’ chiru li pizarron malaj naru nakak’utb’esi rik’ineb’ li kok’al. Ch’olob’ naq li jul a’an chanchan li kamk ut naq li winq kitenq’an re li kristiaan jun chik a’an chanchan li Jesukristo, li kikolok reheb’ chixjunil li kristiaan chiru li kamk naq kixk’e qe li maatan re li wakliik chi yo’yo. Ye reheb’ li kok’al naq li kristiaan a’an kit’ane’ ajwi’ sa’ jun chik li jul. Sa’ li hoonal a’an, laj kolol re kixk’e jun li eeb’ li kiru chiroksinkil re elk chaq sa’ li jul. Ch’olob’ naq li jul a’an chanchan li maak ut naq li eeb’, a’an lix tojb’al rix li maak xb’aan li Jesukristo, li naru naqajal wi’ qak’a’uxl ut naqk’ul wi’ xkuyb’al li qamaak. Il ru 2 Nefi 9:22─23, ut wotz xnawom aach’ool chirix li Jesukristo ut lix tojb’al rix li maak kixb’aanu.

B’ichahomaq sa’ komonil jun li b’ich chirix lix rahom li Jesukristo, jo’ “Ninnaw naq raab’ilin” (B’ichleb’aal choq’ reheb’ li Kok’al, 42─43). Kanab’eb’ li kok’al chixyiib’ankileb’ sa’ jalam-uuch li k’a’ru neke’tenq’an reheb’ chixnawb’al naq raarookeb’ xb’aan li Kolonel.

Il ru 2 Nefi 9:49 choq’ reheb’ li kok’al ut tenq’aheb’ chixtawb’al ut chixtawb’al ru li k’a’ru kixye laj Jakob naq jwal nawulak chiru ut li ink’a’ nawulak chiru. Wotz resileb’ hoonal b’ar wi’ naq jun ch’ina al naxsik’ ru jun sut li k’a’ru us ut jun sut li ink’a’ us, ut kanab’eb’ li kok’al chi xaqliik naq li k’a’ru nasik’e’ ru naxk’e sahil ch’oolej ut chi chunlaak naq li k’a’ru nasik’e’ ru naxk’e rahil ch’oolej. K’a’ut naq xsik’b’al ru li us naxk’e sahil ch’oolejil? Jo’q’e aaweek’ahom xsahil aach’ool xb’aan naq xasik’ ru li k’a’ru us?

B’ichahomaq sa’ komonil jun li b’ich chirix li sahil ch’oolejil naxk’e li ab’ink chiruheb’ li taqlahom, jo’ “Naq yooko chi tenq’ank” (B’ichleb’aal choq’ reheb’ li Kok’al, 108), ut k’e xb’oqb’aleb’ li kok’al chi ab’ink chi us re naq te’xk’e reetal k’a’ru nak’ehok xsahil qach’ool. Kanab’eb’ li kok’al chixk’eeb’aleb’ xhoonal re xk’oxlankil naq a’aneb’ jun yuwa’b’ej malaj na’b’ej li neke’xpatz’ reheb’ lix komon li kok’al naq te’xb’aanu k’a’ruhaq. Kanab’eb’ lix komon li kok’al chixtzolb’al li ab’ink chi sa xch’ooleb’.

Kanab’eb’ li kok’al chi aatinak chirix junjunqeb’ lix yeechi’ihomeb’, jo’ li yeechi’ihom xe’xb’aanu rik’in junaq li ramiiweb’ malaj eb’ li sumwank xe’xb’aanu naq xe’kub’e xha’. K’a’ut naq wan naq ch’a’aj xb’aanunkil li k’a’ru naqayeechi’i? K’a’ut naq aajel ru naq taqab’aanu li k’a’ru naqayeechi’i? Il ru li ch’ol aatin a’in: “Li Qaawaʼ Dios tixtzʼaqobʼresi ru lix sumwank li kixkʼuubʼ choqʼ rehebʼ li ralal xkʼajol” (2 Nefi 6:12). Wotz jun eetalil re chan ru naq li Dios kixb’aanu li k’a’ru kixyeechi’i, us ta naq eb’ li osob’tesihom ink’a’ ke’k’ulman sa’ junpaat.

K’e chi kutankil jun xjalam-uuch li Jesus chixk’atq xjalam-uuch jun ch’ina al. Il ru 2 Nefi 7:1 ut ch’olob’ naq xb’aan naq lix tenamit li Dios ke’xkanab’ xpaab’ankil lix evangelio, chanchan ta wi’ naq “ke’xjach rib’ ” rik’in a’an. Jilosi lix jalam-uuch li ch’ina al najt rik’in xjalam-uuch li Jesus re xk’utb’esinkil naq xb’aan naq ink’a’ naqoxloq’iheb’ li qasumwank, jo’ li sumwank re li kub’iha’, nokonajto’ rik’in li qaChoxahil Yuwa’ ut rik’in li Kolonel. (Re xjultikankil li sumwank re li kub’iha’, il sa’ Tzol’leb’ ut Sumwank 20:37). Chan ru naq rik’in lix tojb’al rix li maak xb’aan li Kolonel nokonach’ok rik’in a’an? Naq yooqex chi aatinak chirix a’an, kanab’eb’ li kok’al chixnach’ob’resinkileb’ wi’chik li jalam-uuch.

Kanab’eb’ li kok’al chatenq’ankil chixyiib’ankil xjalam-uuch jun li b’e chiru li pizarron, ut kanab’eb’ chixyiib’ankileb’ xjalam-uuch junjunqeb’ li ramleb’ malaj tichleb’ oq chiru li b’e. Ilomaq ru 2 Nefi 9:10 ut kanab’eb’ li kok’al chixk’eeb’aleb’ xk’ab’a’ li ramleb’ chiru li b’e rik’ineb’ aatin wankeb’ sa’ li raqal a’an li neke’xch’olob’ ruheb’ li ramleb’ naru neke’xram li qab’e re q’ajk rik’in li Dios. Chirix a’an aatinan chirix chan ru naq li Jesukristo kixq’axeb’ ru li ramleb’ a’an choq’ qe laa’o (chi’ilmanq 2 Nefi 9:21─23) ut, naq yooqat chixb’aanunkil a’an, kanab’eb’ li kok’al chixsach’b’aleb’ li ramleb’.

K’ut jun xjalam-uuch laj Adan ut xEva, jo’ Saliendo del Jardín de Edén (ChurchofJesusChrist.org). Ch’olob’ naq rik’in naq laj Adan ut xEva ke’xk’ux ru li che’ li kixye li Dios naq ink’a’ raj te’xk’ux sa’ li Awinq Eden, ke’xk’am chaq li maak ut li kamk sa’ li ruchich’och’. K’ut jun xjalam-uuch li Jesukristo. Re xtenq’ankileb’ li kok’al chixtawb’al ru chan ru naq li Jesus kixq’ax ru li maak ut li kamk, seraq’i li esil chirix li kristiaan kit’ane’ sa’ li jul, li natawman sa’ li xb’een na’leb’ re li k’utuk rub’el “Kok’al toj ka’ch’ineb’ xyu’am” re li tusleb’ aatin a’in. Chirix a’an kanab’eb’ li kok’al chixyiib’ankileb’ jalam-uuch wankeb’ rilom rik’in li esilal malaj chixk’utb’esinkil li esilal. Il ru 2 Nefi 9:21–23 ut wotz xnawom aach’ool chirix li Jesukristo ut lix tojb’al rix li maak kixb’aanu.

Tenq’aheb’ li junjunq chi kok’al chixtawb’al jun li b’ich chirix lix tojb’al rix li maak kixb’aanu li Kolonel, maare sa’ Eb’ li B’ich malaj li B’ichleb’aal choq’ reheb’ li Kok’al (lix tusulaleb’ li b’ich sa’eb’ li tasal hu a’in naru neke’oksiman). Kanab’eb’ li kok’al chixtawb’aleb’ ut chixwotzb’aleb’ ch’ol aatin re li b’ich li neke’xch’olob’ li k’a’ru kixb’aanu li Jesus choq’ qe. Kanab’eb’ li kok’al chixwotzb’al li k’a’ru neke’xk’oxla ut li k’a’ru neke’reek’a chirix lix tojb’al rix li maak xb’aan li Kolonel, malaj, wotz lix nawom aach’ool laa’at.

Kanab’eb’ li kok’al chixyeeb’al aawe k’a’ruhaq chirix k’a’ru naab’al lix nawomeb’, jo’ jun li tasal hu malaj junaq numsib’aal hoonal. Kanab’ jun li ch’ina al chirilb’al ru 2 Nefi 9:20 ut ch’olob’ xyaalal naq li Dios “naxnaw chixjunil li k’a’aq re ru.” K’a’ut naq aajel ru naq taqataw ru naq li Dios naxnaw chixjunil li k’a’aq re ru?

Kanab’eb’ li kok’al chixk’oxlankil naq xe’rab’i jun li ramiiweb’ chixyeeb’al naq eb’ li taqlahom malaj li k’utum sa’ li Iglees yal maak’a’eb’ aj-e. K’a’ raj ru te’xye re li ramiiweb’? K’a’ut naq aajel ru naq taqakanab’ qib’ rub’el lix na’leb’ li Dios us ta ink’a’ naqataw ru chi tz’aqal re ru? Waklesiheb’ xch’ool li kok’al chixsik’b’al xtenq’ sa’ 2 Nefi 9:20, 28─29, ut 42─43 re xk’oxlankil ut xtz’ilb’al rixeb’ li patz’om a’an.