“14–20 diciembre. Moroni 10: “Chalqex rik’in li Kristo, ut chitz’aqloq eere eeru rik’in,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“14–20 diciembre. Moroni 10,” Kim, Taaqehin—Choq’ reheb’ li komon ut li junkab’al: 2020
Re taaruuq teenaw, xb’aan laj Gary L. Kapp
14–20 diciembre
Moroni 10
“Chalqex rik’in li Kristo, ut chitz’aqloq eere eeru rik’in”
Naq nakachoy rilb’al ru lix Hu laj Mormon, k’oxla xsik’b’al chi ak’il jun xch’olob’ahom li Santil Musiq’ej naq tz’aqal yaal. Naq nakab’aanu a’an, tz’iib’aheb’ li musiq’anb’il na’leb’ nakak’ul.
Xtz’iib’ankil li nakak’oxla
Lix Hu laj Mormon natikla rik’in lix yeechi’ihom laj Nefi naq a’an tixk’ut chiqu naq “ebʼ lix qʼunil uxtaan li Qaawaʼ wankebʼ saʼ xbʼeenebʼ chixjunilebʼ li kixsikʼ ru, saʼ xkʼabʼaʼ lix paabʼaalebʼ ” (1 Nefi 1:20). Li hu naraqe’ rik’in li raatin laj Moroni naq kixkawresi rib’ re “xk’eeb’al chaq xtz’apb’aleb’ ” li tz’iib’anb’il esil ut naq kixk’e qe li b’oqom a’in: “chijultikoʼq eere chanru ruxtaanal chaq li Qaawaʼ ” (Moroni 10:2–3). Us ta ka’ajwi’ naqak’oxlaheb’ li q’unil uxtaan tz’iib’anb’ileb’ resil sa’ lix Hu laj Mormon, toj wan naab’al li taqak’oxla wi’. K’a’ruheb’ li q’unil uxtaan neke’chal sa’ aak’a’uxl? Maare tatk’oxlaq chirix chan ru ruxtaanal li Dios naq kixk’am xb’e lix junkab’al laj Lehi chiru li yamyookil ch’och’ ut chiru li nimla palaw, eb’ li q’unil uxtaan kixk’ut chiru laj Enos naq kitz’okaak li raam re te’kuye’q lix maak, malaj chan ru kiruxtaana laj Alma, jun aj xik’ ilonel re li Iglees li kijala choq’ jun aj kolol rix li Iglees maak’a’ xxiw. Malaj maare tatk’oxlaq chirix li uxtaan kixk’ut li Kolonel chiruheb’ li tenamit chirix xwaklijik chi yo’yo naq kixk’irtesiheb’ li yaj wankeb’ sa’ xyanqeb’ ut kirosob’tesiheb’ lix kok’al. Ut li nim wi’chik xwankil choq’ aawe, a’an naq chixjunil a’in naru tixjultika aawe “chanru ruxtaanal li Qaawa’ ” choq’ aawe, xb’aan naq jun reheb’ li tz’aqal rajom lix Hu laj Mormon, a’an xk’eeb’al qab’oqb’al chiqajunqal re taqak’ul li ruxtaan li Dios—jun b’oqom li natawman sa’ roso’jik li raatin laj Moroni, “Chalqex rik’in li Kristo, ut chitz’aqloq eere eeru rik’in” (Moroni 10:32).
Li na’leb’ re xtzolb’aleb’ li loq’laj hu aajunes
Naru tinnaw li yaal rik’in xwankil li Santil Musiq’ej.
Li yeechi’ihom sa’ Moroni 10:3–7 ak xjal lix yu’ameb’ k’iila millon li kristiaan chiru li ruchich’och’. Chan ru xjal laa yu’am laa’at? Maak’a’ naxye ma nakasik’ xtawb’al malaj xkawob’resinkil lix nawom aach’ool chirix lix Hu laj Mormon, lix b’oqom laj Moroni wan choq’ aawe. Naq nakawil ru Moroni 10:3–7, k’oxla rilb’al ru chi timil timil jo’ maajun wa aab’aanuhom chi rub’elaj. Tatruuq chixtz’ilb’al rix li junjunq ch’ol aatin, chixpatz’b’al aawib’ li na’leb’ jo’eb’ a’in: K’a’ru naraj naxye a’in? Chan ru naru tinchaab’iloq sa’ xb’aanunkil a’in? K’a’ru innumsihom laa’in li wan rilom rik’in a’in? Chan ru naq li Santil Musiq’ej xk’ut chiwu naq yaal lix Hu laj Mormon?
K’oxlan ajwi’ chirix anihaq naraj ru rab’inkil lix nawom aach’ool chirix lix Hu laj Mormon. Chan ru taatenq’a li kristiaan a’an chixsik’b’al lix nawom xch’ool xjunes rib’?
“Meetzʼeqtaana xyaalalebʼ li maatan naxkʼe li Dios.”
K’iila paay chan ru naq junaq taaruuq “tixtz’eqtaana xyaalaleb’ li maatan naxk’e li Dios” (Moroni 10:8). Wankeb’ li neke’xye naq moko yaaleb’ ta li maatan a’in. Wankeb’ chik li maare te’xye naq maak’a’ rik’ineb’ li musiq’ejil maatan a’b’an neke’xk’e reetal naq wankeb’ rik’in jalaneb’ chik. Ut wankeb’ chik li neke’xtz’eqtaana xyaalal lix maataneb’ rik’in naq ink’a’ neke’roksiheb’ chi moko neke’xchaab’ilob’resiheb’.
Naq nakawil ru Moroni 10:8–25, sik’eb’ li yaalil na’leb’ li te’tenq’anq aawe chixtawb’aleb’ laa musiq’ejil maatan ut chiroksinkileb’ rik’in xnimal li wankilal re aawosob’tesinkil laa’at ut rosob’tesinkileb’ laa komon. Sik’ aamusiq’anb’il na’leb’ chirixeb’ li maatan k’eeb’ileb’ aawe xb’aan li Dios malaj eb’ li maatan naraj a’an naq taasik’. K’a’ut naq aajel ru naq “taajultikoʼq aawe naq li junjunq chi chaabʼil maatan nachal chaq rikʼin li Kristo”? (Moroni 10:18).
K’oxlan ajwi’ chirix li na’leb’ kixk’e li Elder John C. Pingree: “Jo’kan b’i, chan raj ru taqanaw k’a’ruheb’ li qamaatan? Naru toosik’oq sa’ li rosob’tesihom li yuwa’b’ejil aj k’anjel wan qe, naru toopatz’oq reheb’ li neke’xnaw qu chi us, ut qajunes qib’ naru taqatz’il rix k’a’ruheb’ li qaseeb’al ut li nawulak chiqu xb’aanunkil. Ut nim xwankil chiruheb’ a’an, naru toopatz’oq re li Dios (chi’ilmanq Santiago 1:5; Tzol’leb’ ut Sumwank 112:10). A’an naxnaw k’a’ruheb’ li qamaatan xb’aan naq kixk’eheb’ qe” (“Wan jun ink’anjel choq’ aawe,” Jolomil ch’utub’aj-ib’ re octubre 2017).
Chi’ilmanq, “Maatan naxk’e li Musiq’ej (eb’ li),” K’utul Raqal reheb’ li Loq’laj Hu.
Naru taatz’aqloq we wu xb’aan li ruxtaan li Jesukristo.
Lix tijom laj Moroni naq “toochalq rik’in li Kristo” ink’a’ ka’ajwi’ na’aatinak chirix tzolok chirix a’an malaj xk’oxlankil a’an chi kok’ aj xsa’ malaj xyalb’al qaqe’ chixpaab’ankileb’ lix taqlahom, us ta jwal aajeleb’ ru li k’a’aq re ru a’in. A’an ajwi’ jun b’oqom re chalk rik’in li Kristo—naq too’ok jo’ chanru a’an. Naq nakawil ru Moroni 10:30–33, k’e reetaleb’ li ch’ol aatin nakate’xtenq’a chixtawb’al ru k’a’ru naraj naxye chalk rik’in li Kristo chi tz’aqal, jo’eb’ a’in: “chechapaq eerib’ chiru li junjunq chi chaab’il maatan,” “chetz’eqtaana choq’ eere chixjunil li moko us ta,” ut, “chitz’aqloq eere eeru rik’in” (tiqb’il xkawil li aatin).
Chan ru naru na’uxman a’in? Sik’eb’ lix sumenkil li patz’om a’an sa’ Moroni 10:30–33. K’a’ru yoo chixyeeb’al aawe li Musiq’ej naq tento taab’aanu re naq k’a’jo’ wi’chik “tatchalq rik’in li Kristo, ut taatz’aqloq aawe aawu rik’in’ ”?
Chi’ilmanq Omni 1:26; “Tz’aqal re ru,” K’utul Raqal reheb’ li Loq’laj Hu.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Moroni 10
Ilomaq ru li ch’ol a’in sa’ komonil, ut sik’omaqeb’ li junjunq sut naq laj Moroni naroksi li aatin elajink. Tz’iib’aheb’ chi tustu malaj eetaliheb’ li na’leb’ yoo chirelajinkil qe laj Moroni naq taqab’aanu. K’a’ru naru taqab’aanu re xtaaqenkileb’ li relajihom?
Moroni 10:3
K’a’ru xqatzol chirix li ruxtaan li Qaawa’ naq xqil ru lix Hu laj Mormon chiru li chihab’ a’in? Chan ru naq li Qaawa’ xruxtaana qu jo’ junkab’al?
Moroni 10:3–5
Chirix rilb’aleb’ ru li raqal a’in, maare taapatz’ reheb’ li komon sa’ li junkab’al naq te’xwotz chan ru xe’xnaw naq yaal lix Hu laj Mormon. K’oxlahomaq xb’ichankil jun b’ich sa’ komonil chirix xsik’b’al li yaal, jo’ “Tintzol, tink’oxlaq, tintijoq” (B’ichleb’aal choq’ reheb’ li Kok’al, 66). Taaruuq ajwi’ taakanab’eb’ li komon sa’ li junkab’al chixtz’iib’ankil xnawom xch’ooleb’ sa’ jun diario re li junkab’al.
Moroni 10:8–18
Li Ralankil a’an jun chaab’il hoonal re xk’oxlankil xk’ulb’aleb’ maatan. Maare eb’ li komon sa’ li junkab’al taaruuq te’xkawresiheb’ maatan choq’ re li junjunq li neke’reetaliheb’ “li maatan naxk’e li Dios” li yeeb’ileb’ resil sa’ Moroni 10:9–16. Eb’ li maatan a’in naru ajwi’ te’wanq choq’ reetalil jalan chik li chaab’il maatan li neke’chal rik’in li Kristo re li junjunq komon sa’ li junkab’al.
Moroni 10:27–29, 34
Eb’ li komon sa’ li junkab’al te’ruuq chixwotzb’al k’a’ru te’raj xyeeb’al re laj Moroni naq “te’xk’ul a’an chiru lix sahil raqlebʼaal aatin li xnimal ru Jehova.”
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
Sik’ li Jesukristo. Li rajom lix Hu laj Mormon—ut chixjunileb’ li loq’laj hu—a’an xch’olob’ankil xyaalal li Jesukristo. K’a’ru nakatzol chirix li Jesukristo sa’ Moroni 10? K’a’ru eek’asinb’ilat chixb’aanunkil re chalk rik’in li Jesukristo?
Laj Moroni naxmuqeb’ li perel ch’iich’, xb’aan laj Jon McNaughton