Alema 36–38

E toaitiiti o le a i ai ni aafiaga e matautia e pei o le liuaina o Alema. Ae o loo i ai mataupu faavae i lona aafiaga e mafai e i tatou uma ona aoao mai ai ma faaaoga, aua o tagata uma lava e ao ona “fanauina i la le Atua” (Alema 36:23). A o e faitauina le Alema 36, vaavaai mo mataupu faavae e mafai ona e faaaogaina. Mo se faataitaiga, o le a se lagona o se tagata ua fanauina i la le Atua e uiga i le agasala? e uiga ia Iesu Keriso? E mafai foi ona e vaavaai mo suiga atonu e te faamoemoe e vaaia i talitonuga ma amioga a se tagata ua fanau i la le Atua.

Tagai foi Mosaea 5:7; 27:25–26; Alema 5:14; 22:15; Helamana 3:35; “Conversion,” Gospel Topics, topics.ChurchofJesusChrist.org.

Atonu e te matauina i le mataupu lenei le ta’ua faafia o le tala a Alema o lona liuaina. E mafua ona o le Alema 36 o se faataitaiga maoae o se ituaiga o fatuga solo faaEperu e ta’ua o le taimasi [chiasmus], lea e tuuina mai ai upu po o manatu i se faasologa faapitoa, e taitai atu ai i se manatu totonugalemu, ona toe ta’ua ai lea i le faasologa faafeagai. I le Alema 36, o le manatu o loo i le fuaiupu e 3 o loo toe ta’ua i le fuaiupu e 27, o le manatu o loo i le fuaiupu e 5 o loo toe ta’ua i le fuaiupu e 26, ma faapena ai lava. O le manatu tutotonu o le savali aupito taua lea o le sitaili faataimasi. Vaai pe mafai ona e maua le manatu tutotonu i fuaiupu e 17–18. Maitau le ala na aafia ai Alema i le tau ane “o lona mafaufau i lenei manatu” ma suia ai lona olaga. Na faapefea ona aafia ai oe i lenei upumoni? O a isi manatu na toe ta’ua e te maua i lenei fuaitau?

E faapefea ona musuia oe i lenei tala o le salamo ma le faamagaloga, ina ia e mulimuli i le faataitaiga a Alema ma liliu atu i le Faaola?

Mo nisi faamatalaga e uiga i le taimasi, tagai i le Tusi a Mamona Tusi Lesona a le Tagata Aoga (tusi lesona a le Ofisa o Aoga a le Ekalesia [2009], 232–33).

Pe ua e mafaufau ea i le o se matuai vavega ma se faamanuiaga le i ai o tusitusiga paia i aso nei? Ua “tuuina mai nei mea e le Atua ia [i tatou], o ni mea ua paia” (Alema 37:14). A o e faitau i le Alema 37, vaavaai mo faamanuiaga e oo mai mai le i ai o tusitusiga paia. Na faapefea ona e mauaina nei faamanuiaga? E mafai faapefea ona e faaaogaina tusitusiga paia e fesoasoani “e faaali atu ai le mana o le [Atua] i tupulaga i le lumanai”? (Alema 37:18).

I le Alema 37:38–47, o loo faatusa ai e Alema “le afioga a Keriso” i le Liahona. A o e mafaufau loloto i lenei faatusatusaga, ia manatunatu i auala na e maua ai le vavega ma le mana o aoaoga a Keriso “i lea aso ma lea aso” (Alema 37:40).

Tagai foi D. Todd Christofferson, “O Le Faamanuiaga o Tusitusiga Paia,,” Ensign po o le Liahona, Me 2010, 32–35.

O nisi taimi tatou te lagona ai ua tetele tele ma faigata o tatou faafitauli e faapea ona tatau ai ona tetele ma faigata foi o latou fofo. Ae ua anoanoai taimi, ua filifili ai le Alii e faaaoga “mea laiti ma faatauvaa” (Alema 37:6) ia ausia ai Lana galuega ma faamanuia ai olaga o Lana fanau. A o e faitau i le Alema 37:6–7, mafaufau loloto ma tusifaamaumau auala ua e vaaia ai le aoga o lenei mataupu faavae i lou olaga. O a nisi o mea laiti ma faatauvaa o loo faaaoga e le Alii e faamanuia ai oe ma ausia ai Lana galuega?

Tagai foi Alema 37:41–46; Dallin H. Oaks, “Mea Laiti ma Faatauvaa,” Ensign po o le Liahona, Me 2018, 89–92.

E ui lava sa tulaga ese le aafiaga o Alema, o lona liua ua faaalia ai nisi o mataupu faavae e faatatau ia i tatou uma lava. Valaaulia tagata taitoatasi o le aiga e filifili se fuaiupu mai le Alema 36:5–26 o aoao mai e uiga i le “fanauina i la le Atua.” O le a se mea ua tatou aoao mai i nei fuaiupu? Atonu e mafai e tagata o le aiga ona faasoa atu ni auala na latou faaaogaina ai mataupu faavae na faamatalaina e Alema.

E faapefea ona tatou faaaogaina nei fuaiupu e fesoasoani ai i se tagata ia iloa o le salamo o se aafiaga fiafia ae le o se mea e fā’atu ai? E mafai faapefea e le salamo ona musuia i tatou ia faasoa atu le talalelei i isi?

O a nisi o “mea laiti ma faatauvaa” (Alema 37:6) e mafai ona aumaia ai ni mea tetele i o tatou olaga? O a ni auala ua pei ai le afioga a Keriso o le Liahona? E mafai faapefea ona tatou fesoasoani i le tasi ma le isi ia su’esu’e ma le filiga faateleina ia tusitusiga paia?

Aisea e poto ai le aoao e tausi poloaiga “i lo [tatou] talavou”?

O iloa e lou aiga le mea e ta’u o se faagutu? Atonu e mafai ona e faaali atu ia i latou se ata [o se faagutu], ma talanoa e uiga i le ala e faaaoga ai e limataitaiina ai le meaola. O le a le uiga o le “pulea [o o tatou] tuinanau uma”? E faapefea e le puleaina o o tatou tuinanau ona fesoasoani ia tatou “faatumulia i le alofa”?