“22–28 junio. Alma 17–22: “Laa’in texink’e choq’ k’anjeleb’aal,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“22–28 junio. Alma 17–22,” Kim, Taaqehin—Choq’ reheb’ li komon ut li junkab’al: 2020
Laj Ammon ut li rey aj Lamoni, xbʼaan laj Scott M. Snow
22–28 junio
Alma 17–22
“Laa’in texink’e choq’ k’anjeleb’aal”
Naq nakawil ru Alma 17–22, tz’iib’a li musiq’anb’il na’leb’ neke’chal aawik’in ut b’aanuheb’. Xb’aanunkil chi jo’kan tixk’ut chiru li Qaawa’ naq wanq aach’ool chixk’ulb’al xkomon chik li k’utb’esinb’il na’leb’.
Xtz‘iib‘ankil li nakak‘oxla
K’oxlaheb’ li jar paay chi na’leb’ tixye raj junaq chirix k’a’ut naq ink’a’ naxwotz li evangelio: “Moko tz’aqal ta innawom” malaj “Ink’a’ ninnaw ma taawulaq ta raj chiru” malaj “Maare te’po’q xch’ool wik’in.” Maare xak’e reetal naq wan naq xak’oxla chi jo’kan. Kiwan jun chik ajom reheb’ laj Nefita chirix k’a’ut naq ink’a’ ke’xwotz li evangelio rik’ineb’ laj Lamanita: eb’ a’an “jun li tenamit xulo’jenaqeb’ ut kawujenaqeb’ ut josq’eb’; jun tenamit li neke’saho’ xch’ool rik’in xkamsinkileb’ laj Nefita” (Alma 17:14; chi’ilmanq ajwi’ Alma 26:23–25). A’b’anan, eb’ li ralal laj Mosiah ke’wan jun li rajomeb’ nim wi’chik chiru a’an chirix k’a’ut naq ke’reek’a naq tento te’xwotz li evangelio rik’ineb’ laj Lamanita: “Ke’raj raj naq taach’olob’amanq li kolb’a-ib’ chiru li junjunq li yo’ob’tesinb’il, xb’aan naq ink’a’ ke’ru chixkuyb’al naq taa’oso’q raam ani junaq chi winq” (Mosiah 28:3). Li rahok li kixwaklesi xch’ool laj Ammon ut eb’ li ras riitz’in naru ajwi’ tixwaklesi aach’ool laa’at chixwotzb’al li evangelio rik’in laa junkab’al, laa wamiiw, ut xkomoneb’ chik—jo’kaneb’ ajwi’ li ani chanchan naq ink’a’ te’xk’ulub’a.
Li na’leb’ re xtzolb’aleb’ li loq’laj hu aajunes
Naq ninkawob’resi lin paab’aal laa’in, naru tinwotz li evangelio chi chaab’il wi’chik.
Ma xak’ul jun sutaq jun najteril amiiw, ut xaweek’a li kireek’a laj Alma—q’axal numtajenaq xsahil xch’ool naq toj kaweb’ sa’ li paab’aal? (chi’ilmanq Alma 17:1–2). K’a’ru nakatzol rik’ineb’ li ralal laj Mosiah chirix chan ru xch’olaninkil laa paab’aal chirix li evangelio re naq k’eek’ooq aach’ool chixpaab’ankil chi kaw? Naq nakak’oxla lix musiq’ejil kawilaleb’ li ralal laj Mosiah, k’a’ru eek’asinb’ilat chixb’aanunkil?
Chan ru naq lix kawresinkileb’ rib’ li ralal laj Mosiah sa’ musiq’ej kitenq’ank re lix k’anjeleb’ sa’ xyanqeb’ laj Lamanita? Maare naru taawoksi li hoonal a’in re xtz’ilb’al rix lix yalb’al aaq’e laa’at re xk’utb’al li evangelio “rik’in wankilal, ut chi k’eeb’il aawankil xb’aan li Dios” (Alma 17:3).
Naru tinwanq jo’ k’anjeleb’aal sa’ ruq’ li Dios re xk’amb’al li kolb’a-ib’ rik’ineb’ li ralal xk’ajol a’an.
Li Awa’b’ej Thomas S. Monson kixye, “Laa’in junelik nawaj naq li Qaawa’ tixnaw naq wi wan li k’anjel naraj naq taab’aanumanq, laj Tom Monson taab’aanunq re li k’anjel a’an choq’ re (“On the Lord’s Errand: The Life of Thomas S. Monson,” video, ChurchofJesusChrist.org). Naq nakawil ru Alma 17:6–12, sik’ li k’a’ru ke’xb’aanu li ralal laj Mosiah re naru ke’ru chi wank choq’ k’anjeleb’aal sa’ ruq’ li Dios. Chan ru naru tatwanq choq’ k’anjeleb’aal sa’ ruq’ li Dios re rosob’tesinkileb’ laa was aawiitz’in? K’a’ru nakatzol rik’in li ke’xb’aanu a’an li naxk’e xkawilal aach’ool re xb’aanunkil li naraj li Qaawa’ naq taab’aanu?
Chi’ilmanq ajwi’ Dallin H. Oaks, “Xwotzb’al li evangelio li k’ojob’anb’il wi’chik,” Jolomil ch’utub’aj-ib’ re octubre 2016.
Naru tintenq’aheb’ li was wiitz’in chixkawresinkileb’ rib’ re te’xk’ul li evangelio.
Laj Lamoni a’an laj jolominel re “jun li tenamit xulo’jenaqeb’ ut kawujenaqeb’ ut josq’eb’ ” (Alma 17:14), a’b’anan a’an kinumta sa’ xb’een lix na’leb’eb’ lix xe’toonil li wanjenaq chiru k’iila chihab’ ut kixk’ulub’a lix evangelio li Jesukristo. Naq nakawil ru li esil chirix laj Ammon ut laj Lamoni, k’e reetal li k’a’ru kixb’aanu laj Ammon li maare kitenq’ank re laj Lamoni chixk’ulb’al chik li raatin. Wi neke’chal li na’leb’ sa’ laa k’a’uxl chirix li naru taab’aanu re xwotzb’al li evangelio rik’in anihaq chik, tz’iib’aheb’ li na’leb’ a’an.
Naru ajwi’ taak’anjelaq aawe reetalinkil ut xtz’iib’ankil li yaalil na’leb’ kixk’ut laj Ammon chiru laj Lamoni (chi’ilmanq Alma 18:24–39) jo’ ajwi’ eb’ li yaalil na’leb’ kixk’ut laj Aaron chiru lix yuwa’ laj Lamoni (chi’ilmanq Alma 22:1–16). K’a’ru neke’xye li raqal a’in chirixeb’ li yaalil na’leb’ naru taawotz rik’in anihaq chik re xtenq’ankil chixsik’b’al jun xnawom xch’ool chirix li evangelio?
Li xMinerva K. Teichert (1888–1976), Laj Ammon naxkoleb’ rix lix qetomk li rey, 1935–1945, óleo en masonite, 35 x 48 pulgadas. Museo de Arte, Universidad de Brigham Young
Naru naq najt taawulaq lix nawom inch’ool laa’in.
Us ta wankeb’ naab’al li chaq’al ru numsihom li neke’k’ulman sa’eb’ li esil chirix li jalok-ch’oolej sa’eb’ li loq’laj hu, sa’ xch’oolileb’ li esil a’an naqataweb’ li kristiaan li ke’wan xkawilaleb’ xch’ool re aatinak ut xwotzb’al lix nawomeb’ xch’ool rik’in li ras riitz’ineb’. Re xtzolb’aleb’ li numishom sa’ Alma 18–22, naru tatsik’oq re xtawb’al chixjunil li kik’ulman xb’aan naq jun li kristiaan kixch’olob’ lix nawom xch’ool. Maare naru taatz’iib’a li k’a’ru nakataw sa’ jun kaaxukuut jo’ a’in:
|
Laj Ammon kixwotz li evangelio rik’in , li kixwotz li evangelio rik’in , ut xb’aan a’an . |
Li ruq’ li Qaawa’ ye’b’il we laa’in naq ninjal ink’a’uxl.
Sa’ xraqik li esil chirix lix jalajik xch’ool laj Lamoni, laj Mormon kixk’ut jun na’leb’ aajel ru chirix chan ru li Qaawa’. K’a’ru naxye Alma 19:36 aawe chirix chan ru xch’ool li Qaawa’? Jo’q’e aaweek’ahom li ruq’ li Qaawa’ chi ye’b’il aawe? Chan ru naru taatenq’aheb’ li ani raarookeb’ aab’aan chireek’ankil li ruxtaan a’an?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
Alma 17–19
Chan ru naq naru taak’e xyu’ameb’ li ch’ol a’in choq’ re laa junkab’al? Taaruuq teeb’aanu jun k’utb’esink sa’ komonil chirix li esilal naq laj Ammon kixkoleb’ rix li karneer malaj li esilal naq li xAbix kixch’utub’ li tenamit re te’ril lix wankil li Dios. Maare eb’ li komon sa’ li junkab’al naru te’xyiib’ xjalam-uuch li k’a’ru kik’ulman sa’ li esilal ut te’roksiheb’ li jalam-uuch re xseraq’inkil. K’a’ru tixb’aanu laa junkab’al re xtaaqenkil lix b’aanuhom laj Ammon ut li xAbix?
Alma 18:24–39
Maare eb’ li komon sa’ laa junkab’al naru te’ril ru Alma 18:24–39 sa’ komonil ut te’xk’e reetaleb’ li yaalil na’leb’ kixk’ut laj Ammon chiru laj Lamoni. K’a’ut naqak’oxla naq laj Ammon kixk’ut li yaalil na’leb’ a’in chiru laj Lamoni sa’ xtiklajik? K’a’ut naq aajel ru naq wan xnawom qach’ool chiriexb’ li yaalil na’leb’ a’in?
Alma 20:8–15
K’a’ru naru taqatzol rik’in chan ru naq laj Lamoni kixsume ru lix yuwa’? Chan ru naq naru taqataaqe lix b’aanuhom laj Lamoni sa’ wank chi xaqxo chirix li k’a’ru tiik? (Re xtaw’bal xkomon chik li na’leb’ chirix a’an, chi’ilmanq li video “Atrévete a lo correcto aunque solo estés ” sa’ ChurchofJesusChrist.org.)
Alma 22:15–18
Tz’il rix Alma 20:23 re rilb’al li kiwan xch’ool lix yuwa’ laj Lamoni chixkanab’ankil re xkolb’al lix yu’am. Chirix a’an, tz’il rix Alma 22:15 re rilb’al li kiwan xch’ool chixkanab’ankil re xk’ulb’al li sahil ch’oolejil re li evangelio. K’a’ru kiwan xch’ool chixkanab’ankil re xnawb’al ru li Dios? (chi’ilmanq li raqal 18). Maare eb’ li komon sa’ li junkab’al taaruuq te’xtz’iib’a jun k’uub’anb’il na’leb’ re xkanab’ankil k’a’ruhaq re xnawb’al ru li Dios chi mas wi’chik.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li tzolok aajunes
K’e reetaleb’ ut yu’amiheb’ li na’leb’. Us ta maare chanchan naq ink’a’ taak’anjelaq aawe chixjunileb’ li kok’ b’aanuhom sa’eb’ li esilal sa’eb’ li loq’laj hu, chi kok’ aj xsa’ te’k’anjelaq aawe li na’leb’ li neke’tawman sa’eb’ li esilal a’an. Naq nakawil ru resil laj Ammon ut laj Aaron, k’a’ruheb’ li na’leb’ chirix xwotzb’al li evangelio li nakataw?
Li rixaqil li rey aj Lamoni kixaqli ut kixnima ru li Jesus. At usilanb’il Jesus, xb’aan laj Walter Rane