Na’leb’ re xchaab’ilob’resinkil li tzolok sa’ li ochoch ut sa’ li iglees

Eb’ li loq’laj hu, a’aneb’ raatin li Dios; chi jo’kan, patz’ chiru a’an naq tatxtenq’a chixtawb’aleb’ ru.

Chixjunil li k’a’aq re ru wan naxch’olob’ xyaalal li Kristo (chi’ilmanq 2 Nefi 11:4; Moises 6:63), jo’kan naq naru taatz’iib’aheb’ malaj taajuch’eb’ li raqal li neke’xch’olob’ xyaalal li Kolonel, li neke’xnimob’resi laa rahom choq’ re a’an, ut li neke’xk’ut chan ru xtaaqenkil. Wan naq eb’ li na’leb’ chirix li Kolonel ut lix evangelio wankeb’ yal chi yeeb’il, malaj wankeb’ chi k’utb’il sa’ junaq eetalil malaj junaq seraq’. Patz’ aawib’, “K’a’ru li junelikil na’leb’ neke’k’utman sa’eb’ li raqal a’in?” K’a’ru neke’xk’ut li na’leb’ a’in chiwu chirix li Kolonel?

K’e reetal li yookat chixk’oxlankil ut chireek’ankil, us ta maare jalan rik’in li aatin li yookat chirilb’al. Naru naq li k’a’ru nakak’ul a’an ajwi’ li taaraj laa Choxahil Yuwa’ naq taatzol.

K’iila paay chan ru naq naru nakatz’iib’a resil li na’leb’ nakak’ul naq yookat chi tzolok. Maare taataweb’ junjunq aatin malaj ch’ol aatin sa’ li loq’laj hu li neke’xtoch’ aach’ool; naru nakajuch’eb’ malaj nakatz’iib’aheb’ jo’ jun ch’ina esil sa’ laa loq’laj hu. Naru ajwi’ nakatz’iib’a sa’ jalan chik li hu li k’a’ru nakak’oxla, nakaweek’a, ut li na’leb’ nakak’ul.

Li aatinak chirix li na’leb’ xatzol naq xattzolok aajunes nak’anjelak re xtzolb’aleb’ laa komon, ut naxkawob’resi laa nawom chirix li k’a’ru xawil. Wotz li yookat chixtzolb’al rik’in laa junkab’al ut eb’ laa wamiiw (sa’ kristiaanil malaj sa’ internet), ut b’oqeb’ chixb’aanunkil ajwi’ a’an.

K’oxla chan ru naq li k’a’ru yeeb’il resil malaj k’utb’il nak’anjelak sa’ laa yu’am. Naru nakapatz’ aawib’, “K’a’ru innumsihon li juntaq’eet rik’in li yookin chirilb’al?”

Naq nakatzoleb’ li loq’laj hu, naru nachal li patz’om sa’ laa k’a’uxl. Maare taawanq li patz’om chirix li k’a’ru yookat chirilb’al, malaj chirix li k’a’ru yoo chi k’ulmank sa’ laa yu’am. K’oxlaheb’ li patz’om a’in, ut sik’ lix sumenkileb’ naq yookat chixtzolb’aleb’ li loq’laj hu.

Re xtawb’al xkomon chik li na’leb’ chirixeb’ li raqal li nakawil, naru taawoksiheb’ li aatin toj rub’el li junjunq chi perel, li K’utul Raqal reheb’ li Loq’laj Hu, ut xkomoneb’ chik li k’anjeleb’aal.

Naru taataw li chaab’il na’leb’ chirix jun raqal sa’eb’ li loq’laj hu wi taak’oxla k’a’ru yoo chi k’ulmank sa’ li raqal a’an malaj b’ar yoo chi k’ulmank. Xnawb’al b’ar ke’chal chaq ut k’a’ru ke’xpaab’ li kristiaan li ke’aatinaak xb’aan li Dios naru tatxtenq’a chixtawb’al ru k’a’ru xyaalalil li raatin.

Il ru li k’a’ru neke’xk’ut li profeet ut li apostol re roso’jikeb’ li kutan chirixeb’ li raqal chi na’leb’ nakataw sa’eb’ li loq’laj hu.

Li xtzolb’aleb’ li loq’laj hu ink’a’ ka’ajwi’ nokoxmusiq’a—tento ajwi’ naq tooreek’asi chixjalb’al chan ru nokowan. Ab’i k’a’ru naxye li Musiq’ej naq yooqat chi tzolok, ut chirix a’an k’e aach’ool chixb’aanunkil li k’a’ru naxye.

Eb’ li b’ich ut eb’ li b’ich reheb’ li kok’al naru neke’oksiman neke’tawman sa’ Kim, Taaqehin. Oksiheb’ li loq’laj b’ich re xb’oqb’al li Musiq’ej ut re xnimob’resinkil laa paab’aal ut lix nawom aach’ool chirixeb’ lix yaalil li evangelio.

Sik’ ru jun raqal sa’eb’ li loq’laj hu li wan xyaalal choq’ aawe, choq’ re laa junkab’al malaj eb’ li komon, ut tzol sa’ aak’a’uxl rik’in xyeeb’al wulaj wulaj, malaj rik’in xb’aanunkil jun b’atz’unk re tzolok.

Taweb’ k’a’aq re ru li neke’xk’am rib’ rik’in li ch’ol ut raqal yookat chirilb’al. K’e reetal chan ru naq li junjunq chi k’a’aq re ru naxk’am rib’ rik’in lix k’utumeb’ li loq’laj hu.

Il junjunq reheb’ li raqal ut chirix a’an yiib’ xjalam-uuch junaq k’a’aq re ru li naxk’am rib’ rik’in li na’leb’ xawil. Naru ajwi’ nakasik’ junaq jalam-uuch sa’ li Hu reheb’ li Jalam-uuch re li Evangelio malaj sa’ li Biblioteca del Evangelio. Naru ajwi’ nakawisi junaq jalam-uuch li tixk’utb’esi li na’leb’ xawil.

Chirix rilb’al jun seraq’, naru taab’oqeb’ laa junkab’al malaj eb’ li komon chixk’utb’esinkil. Chirix a’an, naru teeye chan ru naq li seraq’ naxk’utb’esi li k’a’ru yookeb’ chixk’ulb’al.

Wi wankeb’ komon sa’ laa junkab’al li ink’a’ neke’raj xtzolb’aleb’ li loq’laj hu rik’in li junkab’al, sik’ k’a’ruhaq chik naru taab’aanu re wotzok rik’ineb’. Ma naru taawotz junaq na’leb’ naq yal yooqex chi aatinak, malaj taawotz junaq raqal li wan xyaalal li ink’a’ taak’utunq naq maare yookat chi ch’iilank? Naru naq jalan jalanq chan ru natzolman li loq’laj hu sa’ li junjunq chi junkab’al. Wankeb’ li kok’al li nawulak chiruheb’ xtzolb’aleb’ li loq’laj hu rik’in ka’ajwi’ jun chik li kristiaan. Chatwanq chi tijok ut chixtaaqenkil lix hasb’ li Musiq’ej.