Տանը և Եկեղեցում ուսուցումը բարելավելու գաղափարներ

Սուրբ գրությունները Աստծո խոսքն են, ուստի, խնդրեք Նրան օգնել, որ հասկանաք դրանք։

Բոլոր բաները վկայում են Քրիստոսի մասին (տես 2 Նեփի 11.4, Մովսես 6.63), այնպես որ կարող եք նշել կամ ներկել այն հատվածները, որոնք վկայում են Փրկչի մասին, խորացրեք ձեր սերը Նրա հանդեպ և ուսուցանեք, թե ինչպես հետևել Նրան։ Երբեմն Փրկչի և Նրա ավետարանի մասին ճշմարտությունները նշվում են ուղղակիորեն, իսկ երբեմն էլ դրանք ակնարկվում են օրինակի կամ պատմության միջոցով: Հարցրեք ինքներդ ձեզ. «Ի՞նչ հավերժական ճշմարտություններ են ուսուցանվում այս հատվածներում։ Այս ճշմարտություններն ի՞նչ են ուսուցանում ինձ Փրկչի մասին»:

Ուշադրություն դարձրեք ձեր մտքերին ու զգացմունքներին, նույնիսկ, եթե դրանք կապված չեն ձեր կարդացած նյութի հետ: Այդ տպավորությունները կարող են լինել հենց այն, ինչը ձեր Երկնային Հայրը կամենում է, որ դուք իմանաք:

Գոյություն ունեն տարբեր եղանակներ՝ գրանցելու ձեր տպավորությունները, որոնք գալիս են ուսումնասիրելիս: Օրինակ՝ դուք կարող եք պարզել, որ սուրբ գրությունների որոշ բառեր և արտահայտություններ տպավորություն են թողնում ձեզ վրա. դուք կարող եք նշել դրանք և ձեր մտքերը գրանցել որպես նշում ձեր սուրբ գրություններում: Կարող եք պահել օրագիր՝ ձեր ստացած հուշումները, զգացումները և տպավորությունները գրանցելու համար:

Անհատական ուսումնասիրության ժամանակ ստացած մտքերի քննարկումը լավ եղանակ է ուրիշներին ուսուցանելու, նաև կարդացածի վերաբերյալ ձեր անձնական հասկացողությունն ամրապնդելու համար: Կիսվեք ձեր սովորածով ընտանիքի անդամների և ընկերների հետ (անձամբ կամ թվային եղանակով) և հրավիրեք նրանց անել նույնը:

Մտածեք, թե պատմություններն ու ուսմունքները որքանով են առնչվում ձեր կյանքի հետ: Օրինակ` կարող եք հարցնել ինքներդ ձեզ. «Ի՞նչ փորձառություններ եմ ես ունեցել, որոնք նման են իմ կարդացածին»։

Երբ ուսումնասիրեք սուրբ գրությունները, ձեր մտքում հարցեր կառաջանան։ Այդ հարցերը կարող են առնչվել ձեր կարդացածին կամ ընդհանրապես ձեր կյանքին: Խորհեք այդ հարցերի շուրջ և փնտրեք պատասխաններ, երբ շարունակեք ուսումնասիրել սուրբ գրությունները:

Ձեր կարդացած հատվածների վերաբերյալ լրացուցիչ գաղափարներ ձեռք բերելու համար օգտագործեք ծանոթագրությունները, Թեմատիկ ուղեցույցը, Աստվածաշնչի բառարանը, Սուրբ գրքերի ուղեցույցը և այլ օժանդակ նյութեր:

Դուք կարող եք գտնել կարևոր գաղափարներ սուրբգրային հատվածների վերաբերյալ՝ հասկանալով դրանց համատեքստը՝ ներառյալ տվյալ պատմության հանգամանքները կամ միջավայրը: Օրինակ՝ իմանալով այն մարդկանց պատմությունն ու համոզմունքները, որոնց հետ խոսել է Աստված, ավելի լավ կհասկանաք Նրա խոսքերի իմաստը:

Կարդացեք, թե վերջին օրերի մարգարեներն ու առաքյալներն ինչ են ուսուցանել այն սկզբունքների մասին, որոնք դուք գտնում եք սուրբ գրություններում:

Սուրբ գրությունների ուսումնասիրությունը պետք է ոչ միայն ոգեշնչի մեզ, այլև առաջնորդի մեզ փոխել մեր ապրելակերպը: Լսեք, թե կարդալիս Հոգին ինչ է հուշում ձեզ անել, իսկ հետո գործեք ըստ այդ հուշումների:

Առաջարկվող օրհներգերն ու երեխաների երգերը կարելի է գտնել Եկ, հետևիր ինձ ծրագրում։ Օգտագործեք հոգևոր երաժշտություն՝ հրավիրելու Հոգին և խորացնելու ձեր հավատքն ու վկայությունը ավետարանի ճշմարտությունների մասին:

Ընտրեք սուրբ գրության որևէ հատված, որը կարևոր է ձեզ համար, ձեր ընտանիքի և դասարանի համար, նաև անգիր սովորեք՝ կրկնելով այն ամեն օր կամ որևէ հուշող խաղ խաղալով:

Գտեք առարկաներ, որոնք առնչվում են գլուխներին և հատվածներին, որոնք դուք կարդում եք: Մտածեք, թե յուրաքանչյուր առարկան ինչպես է առնչվում սուրբ գրությունների ուսմունքներին:

Կարդացեք մի քանի հատված, իսկ հետո նկարեք ինչ-որ բան, որն առնչվում է ձեր կարդացածի հետ: Կամ կարող եք նկար փնտրել Ավետարանի պատկերագրքում և Gospel Library հավելվածի մեկ այլ վայրում: Կարող եք նաև լուսանկարել, որը ցույց է տալիս այն, ինչ սովորել եք:

Պատմությունը կարդալուց հետո հրավիրեք ընտանիքի անդամներին կամ դասարանի անդամներին բեմադրել այն: Այնուհետև խոսեք այն մասին, թե պատմությունն ինչպես է առնչվում այն իրավիճակների հետ, որոնք դուք ունենում եք։

Եթե ունեք ընտանիքի անդամներ, ովքեր չեն ցանկանում մասնակցել սուրբ գրությունների ընտանեկան ուսումնասիրությանը, փնտրեք նրանց հետ շփվելու այլ ուղիներ: Օրինակ՝ կարող եք նրանց հետ զրուցելիս անմիջականորեն կիսվել հավերժական ճշմարտությամբ կամ կիսվել սուրբգրային կարևոր հատվածով այնպես, որ դա չլինի քարոզի կամ պարտադրանքի նման։ Պարտադիր չէ, որ սուրբ գրությունների ուսումնասիրությունը նույն կերպ լինի ամեն ընտանիքում։ Երեխաներից ոմանք ավելի լավ են արձագանքում սուրբ գրությունների անհատական ուսումնասիրությանը։ Աղոթեք և հետևեք Հոգու հուշումներին: