Panangusar iti Umaykayo, Sumurot Kaniak—Para iti Pagtaengan ken Simbaan

Ti Umaykayo, Sumurot Kaniak ket para iti asino man nga agtarigagay nga agsursuro manipud kadagiti nasantuan a kasuratan—kas indibidual, wenno sangapamiliaan, ken kadagiti klase iti Simbaan. No saan a masansan ti panagadalmo iti nasantuan a kasuratan iti napalabas, makatulong kenka a mangirugi daytoy a resource. No addaankan iti nasayaat a kadawyan iti panagadal iti nasantuan a kasuratan, makatulong kenka daytoy a resource a maaddaan iti ad-adu pay a napapateg a padas.

Ti nasayaat a lugar a pakasursuruan iti ebanghelio ket ti pagtaengan. Mabalin a suportarannaka dagiti mannursurom iti simbaan, ken makagun-odka iti pammaregta manipud kadagiti dadduma pay a miembro ti ward. Ngem tapno agbiagkayo iti naespirituan, kasapulanyo ken ti pamiliayo ti inaldaw a taraon manipud “ti nasayaat a balikas ti Dios” (Moroni 6:4; kitaen met iti Russell M. Nelson, “Opening Remarks,” Liahona, Nob. 2018, 6–8).

Usarem daytoy a resource iti ania man a wagas a makatulong kenka. Dagiti balabala ti mangitampok iti sumagmamano a kinapudno a masarakan iti Daan a Tulag. Mangisingasingda pay kadagiti kapanunotan ken aktibidad a tumulong kenka a mangadal kadagiti nasantuan a kasuratan kas indibidual, kadua dagiti miembro ti pamilia, wenno kadua ti gagayyem. Bayat ti panagadalmo, surotem ti panangiwanwan ti Espiritu tapno makasarakka kadagiti agnanayon a kinapudno nga addaan kaipapanan kenka. Sapulem dagiti mensahe ti Dios para kenka, ken surotem dagiti parikna a maawatmo.

Ti Umaykayo, Sumurot kaniak—Para iti Pagtaengan ken Simbaan ket kurikulum para kadagiti klase ti Domingo iti Primary, dagiti agtutubo ken adult Sunday School, klase dagiti Young Women ken dagiti miting ti korum ti Aaronic Priesthood. No mangisuroka iti aniaman kadagitoy a kasasaad, maparegtaka nga usarem dagiti balabala iti daytoy a resource para iti personal a panagadalmo ken bayat ti panagsaganam a mangisuro. Rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo. Sapulem dagiti agnanayon a kinapudno a mangtulong kenka nga agbalin nga ad-adda a kas iti Nailangitan nga Ama ken ni Jesucristo. TiUmaykayo, Sumurot Kaniak ti makatulong kadakayo a mangilasin iti sumagmamano kadagitoy a kinapudno ken maawatan ti konteksto dagiti nasantuan a kasuratan.

Laglagipen a ti panagsursuro iti ebanghelio, iti kasayaatan a kasasaadna, ket naisentro iti pagtaengan ken suportado ti Simbaan. Iti sabali a pannao, kangrunaan a pagrebbengam ti mangsuporta kadagiti tao a sursuruam iti panangikagumaanda nga agsursuro ken agbiag iti ebanghelio iti pagtaengan. Dika madanagan maipapan iti naidumduma a linaon a mangipaay para kadakuada iti klase. Ikkam ida kadagiti gundaway a mangibinglay kadagiti padas, kapanunotan, ken saludsodda maipapan kadagiti binatog iti nasantuan a kasuratan a nabasada iti pagtaengan. Awisem ida a mangibinglay kadagiti agnanayon a kinapudno a nasarakanda. Napatpateg daytoy ngem ti panangsakup iti masinunuo a kaadu ti material.

Maysa a kangrunaan a rason nga agtitipontayo kadagiti klase ti Sunday School ket mangsuporta ken mangparegta iti tunggal maysa bayat ti panangikagumaantayo a mangsurot ken ni Jesucristo. Ti simple a wagas tapno maaramid daytoy ket ti panagdamag iti saludsod a kas iti “Ania ti insuro kenka ti Espiritu Santo iti daytoy a lawas bayat ti panagadalmo kadagiti nasantuan a kasuratan?” Dagiti sungbat iti daytoy a saludsod ket mabalin a mangiturong kadagiti napapateg a panaglilinnawag a mangbangon iti pammati ken ni Jesucristo ken iti ebangheliona.

Kalpasanna mabalinmo ti mangyawis iti panaglilinnawag a naibatay kadagiti singasing iti Umaykayo, Sumurot Kaniak. Kas pagarigan, mabalin nga isingasing ti maysa a kapanunotan iti panagadal ti panagsukisok iti Isaias 53, ken panagsapul kadagiti balikas a mangiladawan iti mision ti Mangisalakan. Mabalinmo nga awisen dagiti miembro ti klase a mangiburay kadagiti ania man a kapanunotan wenno rikna a pinaregta dagitoy a balikas para kadakuada. Wenno mabalinyo a bubosen ti sumagmamano nga oras iti panagsapul kadagitoy a balikas kas maysa a klase.

No agmiting dagiti korum ti Aaronic Priesthood ken klase ti Young Women kadagiti Domingo, medio naiduma ti panggepda iti maysa a klase ti Sunday School. Malaksid iti panagtitinnulongda a mangsursuro iti ebanghelio ni Jesucristo, agmimiting pay dagitoy a grupo tapno agiinnumanda maipapan iti panangipatungpal iti aramid ti pannakaisalakan ken pannakaitan-ok (kitaen iti Sapasap a Handbook, 1.2). Aramidenda daytoy nga addaan iti panangiturong dagiti panguluen ti klase ken korum.

Gapu iti daytoy a rason, nasken a mangrugi ti tunggal miting ti korum wenno klase iti maysa a miembro ti korum wenno panguluen ti klase a mangidaulo iti panaglilinnawag maipapan kadagiti panagregget a, kas pagarigan, agbiag iti ebanghelio, agserbi kadagiti tao nga agkasapulan, wenno makiraman iti aramid iti templo ken family history.

Kalpasan daytoy a gundaway para iti panagiinnuman, idauluan ti maysa nga instruktor ti klase wenno korum iti aggigiddan a panagsursuro iti ebanghelio. Mabalin a matudingan a mangisuro dagiti adult leader wenno miembro ti klase wenno korum. Ti panguluen ti klase wenno korum, iti pannakiuman kadagiti adult leader, ti mangaramid kadagitoy naidutok nga aramiden.

Nasken nga agsagana dagiti tao a nadutokan a mangisuro babaen ti panangusar kadagiti singasing iti panagsursuro iti linawas a balabala ti Umaykayo, Sumurot Kaniak. Iti tunggal balabala, ipakita daytoy nga icon ti maysa nga aktibidad a nangnangruna a mainaig kadagiti agtutubo. Nupay kasta, ania man kadagiti singasing iti balabala ket mabalin nga usaren a kas maysa nga aktibidad ti panagsursuro para kadagiti agtutubo.

Para iti maysa a pagarigan nga adyenda para kadagiti miting ti korum ken klase, kitaen iti apendiks D.

Mangrugi ti panagsaganam a mangisuro iti Primary bayat ti panagadalmo kadagiti nasantuan a kasuratan a bukodmo ken kaduam ti pamiliam. No aramidem, silulukatka kadagiti naespirituan nga impresion ken pannakaammo ken pannakaawat manipud iti Espiritu Santo maipapan kadagiti ubbing iti klasem iti Primary. Agbalinka a managkararag, ket maparegtanaka ti Espiritu kadagiti kapanunotan a tumulong kadakuada a mangsursuro iti ebanghelio ni Jesucristo.

Bayat ti panagsaganam a mangisuro, mabalin a magun-odmo ti nayon a pammaregta babaen ti panagsukisok kadagiti balabala iti panangisuro iti Umaykayo, Sumurot Kaniak—Para iti Pagtaengan ken Simbaan. Tunggal balabala iti daytoy a resource ket addaan iti maysa a benneg a napauluan iti “Dagiti Kapanunotan para iti Panangisuro kadagiti Ubbing.” Panunotem dagitoy a kapanunotan a kas singasing tapno mangpataud iti bukodmo nga inspirasion. Am-ammom dagiti ubbing iti klasem iti Primary—ken maam-ammomto ida a nasaysayaat pay bayat ti pannakipulapolmo kadakuada iti klase. Am-ammo met ida ti Apo, ken paregtaennakanto kadagiti kasayaatan a wagas a pangisuruam ken pangbendisionam kadakuada.

Posible a naaramiden dagiti ubbing iti klasem ti sumagmamano nga aktibidad iti Umaykayo, Sumurot Kaniak kadua dagiti pamiliada. OK dayta. Nasayaat ti panangulit. Ibilangmo ti panangawis kadagiti ubbing a mangibinglay iti tunggal maysa no ania ti nasursuroda iti pagtaengan—nupay rumbeng met nga iplanoyo dagiti wagas a makipaset dagiti ubbing uray no saanda nga agsursuro iti pagtaenganda. Nasamsamay ti panagsursuro dagiti ubbing iti kinapudno ti ebanghelio no maulit a maisuro dagitoy a kinapudno babaen iti nadumaduma nga aktibidad. No maammuam a nasamay ti maysa nga aktibidad iti panagsursuro para kadagiti ubbing, ibilangmo ti panangulit iti daytoy, nangnangruna no mangisursuroka kadagiti in-inaudi nga ubbing. Mabalin pay nga irebyum ti maysa nga aktibidad manipud iti kallabes nga adalen.

Kadagiti bulan nga addaan iti lima a Domingo, maallukoy dagiti mannursuro iti Primary a mangsukat iti naiskediul a balabala ti Umaykayo, Sumurot Kaniak iti maikalima a Domingo iti maysa wenno ad-adu pay kadagiti aktibidad iti panagsursuro iti “Apendiks B: Para iti Primary—Panangisagana kadagiti Ubbing iti Dana ti Katulagan ti Dios para iti Tungpal Biag.”