Dikudimuna Moyo Didi Kipatshila Ketu

Kipatshila ka dilonga ne dilongesha dionsu dia lumu luimpa kadi ka kulepesha dondu wa dikudimuna moyo dietu ne kutuambuluisha bua kuikala menamena bu Yezu Kilisto. Bua kabingila aka, patudi tulonga lumu luimpa, katuena tukeba amu ngumu mipia-mipia; tudi basua kulua bu “tshifukibua tshipia-tshipia” (2 Kolinto 5:17). Etshi tshidi tshiumvuija kueyemena kudi Tatu wa mu Diûlu ne Yezu Kilisto bua batuambuluisha bua kushintulula mioyo yetu, muenenu yetu, bienzedi bietu, ne ngikadilu ya ndondu yetu.

Kadi mushindu wa dilonga lumu luimpa udi ukankamika ditabuja dietu ne ulombola ku bishima bia dikudimuna moyo kawena ufika musangu umua to. Bidi bidinana tô ne pambelu pa kalasa mu mutshima ne mu dîku bia muntu. Bidi bilomba didienzeja dia momumua ne dia ku dituku dionsu bua kumvua ne kuteka mu tshienzedi lumu luimpa. Dikudimuna moyo dilelela didi dilomba buenzeji bua Nyuma wa Tshijila.

Nyuma wa Tshijila udi utuludika ku bulelela ne udi utuala bujadiki bua bulelela ebu (tangila Yone 16:13). Udi utokesha meji etu, ukolesha ngumvuilu yetu, utuambuluisha bua kupeta dibuluila kupitshila ku ngumvuilu yetu kudi Nzambi, mushimi wa bulelela bonsu. Nyuma wa Tshijila udi ukezula mitshima yetu. Udi utusaka ku dijinga dia diteka bulelela mu tshienzedi, ne udi utunungena mishindu ya kutshienza. Bulelela, “Nyuma Muimpe mene … nea[tu]yishe malu onso” (Yone 14:26).

Bua tubingila etu, mu didienzeja dietu dia kusomba, kulonga, ne kulongesha lumu luimpa, tudi mua kukeba ne mushinga onsu bulunda bua Nyuma. Kipatshila aka kadi mua kulombola masungula etu ne kuludika ngenyi ne bienzedi bietu. Tudi mua kukeba bionsu bidi bibikila buenzeji bua Nyuma ne kubenga bionsu bidi bilombola buenzeji ebu kua tshianana—bualu tudi bamanya ne tuetu basua kuikala bakumbana kumpala kua Nyuma wa Tshijila, tudi mua kuikala kabidi bakumbana bua kusomba ku mêsu kua Tatu wa mu Diûlu ne Muanenda Yezu Kilisto.