NaYavu ni Vakabauta kei na Ai Vakaro Raraba 1 kei na 2

Vakasamataka na iwalewale oqo mo vulica kina na Yavu ni Vakabauta: Me baleta na yavu yadua ni vakabauta, cakava e dua na “lesoni lailai” me vakamacalataka na veika o vakabauta. Na nomu lesoni lalai e rawa ni oka kina e dua na ivolanikalou veisemati, iyaloyalo, serenilotu se nodra sere na lalai, se na veika e sotavi yadua me baleta na bulataki ni dua na dina e vakavulica na yavu ni vakabauta.

Na duidui cava e kauta mai na dina oqo ena noda veimaliwai vata kei na noda iTubutubu Vakalomalagi kei Jisu Karisito? E vakavinakataka vakacava na nomu vulica na kosipeli na Yavu ni Vakabauta se vukei iko mo wasea na kosipeli vei ira na tani?

Raica talega na iDusidusi ki na iVolanikalou, “Yavu ni Vakabauta,” Valenivola Vakosipeli; L. Tom Perry, “Na iVunau kei na iVakavuvuli Era Tu ena Yavu ni Vakabauta,” Liaona, Nove. 2013, 46–48;“Wase 38: Na iVola nei Wentwort,,” ena Nodra iVakavuvuli na Peresitedi ni Lotu: Josefa Simici (2011), 435–47.

“Keimami vakabauta ni na levu tale na veika cecere ka bibi ena qai vakatakila mai [na Kalou] me baleta tikoga na Matanitu ni Kalou” (Yavu ni Vakabauta 1:9). Ni vakasamataki tiko na ivakavuvuli oqo, railesuva na Na iVakaro Raraba 1 kei na 2, ka vakasaqara na vosa kei na malanivosa e vaqaqacotaka na nomu vakabauta ena tomani tiko ni vakatakila. Era sa vakayaco-ka vakacava ki na nomu bula na ivakatakila oqo? Era vukea vakacava me toso na cakacaka ni matanitu ni Tamada Vakalomalagi?

Na ivakadinadina cava o sa raica ni liutaki tiko na Lotu nikua “ena veivakauqeti ni Kalou” Sa Cecere? (Na iVakaro Raraba 1). E rawa beka nio railesuva e dua se sivia na itukutuku ni koniferedi raraba se qai oti tokaga oqo, ka vakaraica na sala e dusimaka tiko kina na Turaga na Nona Lotu—kei na nomu bula. Na itukutuku wale tikoga oqo mai vua na Peresitedi ni Lotu e rawa ni dua na vanua vinaka mo tekivu kina.

Na cava o rawa ni cakava kevaka o iko se dua o lomana e dredre me kila vinaka se ciqoma na veika e vakavulica na Turaga mai vei ira na Nona parofita? Na cava na vuna o vakavinavinakataka kina na parofita?

Raica talega na Emosi 3:7; 2 Nephi 28:30; Allen D. Haynie, “E Dua na Parofita Bula ni Veisiga e Muri,” Liaona, Me 2023, 25–28; Ulutaga kei na Taro, “Parofita,” Valenivola Vakosipeli; “Turaga Keitou Vuabale,” Sere ni Lotu, naba 10.

Ena “Veitikina Digitaki mai na Tolu na Vosa i Peresitedi Wilford Woodruff me baleta na iBole” (ena icavacava ni Ai Vakaro Raraba 1), na cava eso na vuna e solia na parofita me muduka kina na Turaga na vakayacori ni vakamau vakalevu? Na cava e vakavulica vei iko oqo me baleta na cakacaka ni Kalou?

Me baleta na ikuri ni vakamacala ena itukutuku makawa ni Ai Vakaro Raraba 1, raica na Saints, 2:602–15; “The Messenger and the Manifesto,” ena Revelations in Context, 323–31; Ulutaga kei na Taro, “Plural Marriage and Families in Early Utah,” Valenivola Vakosipeli.

Eda sega ni kila na vuna a sega ni vakadonui kina na veitabaki kina matabete kei na cakacaka vakalotu ni valetabu vei ira na lewe ni Lotu kai Aferika ena dua na gauna. Ena gauna mada ga era sotava tiko kina na taro dredre me baleta na lawatu oya, e vuqa na Yalododonu Edaidai Yago Loaloa era a vakabauta tiko ga na Turaga (raica na Vosa Vakaibalebale 3:5) ka yalodina tikoga Vua ena nodra bula taucoko. Na vulici ni nodra vakabauta kei na veika era sotava e rawa ni veivakauqeti vei iko. Oqo e so na kedra itukutuku, e tiko ena history.ChurchofJesusChrist.org:

• “Jane Elizabeth Manning James”

• “In My Father’s House Are Many Mansions” (italanoa kei Green Flake)

• “You Have Come at Last” (italanoa kei Anthony Obinna)

• “Break the Soil of Bitterness” (italanoa kei Julia Mavimbela)

• “I Will Take It in Faith” (italanoa kei George Rickford)

• “Siga Yalataki mai Vakabalavu” (italanoa kei Joseph W. B. Johnson)

Nio wilika na Ai Vakaro Raraba 2, na cava o vulica me baleta na iwalewale ni Turaga ena kena dusimaki na lawatu ni Nona Lotu? Vakasamataka vakatitobu na sala o sa vulica kina mo vakararavi vua na Turaga ena gauna mada ga o sega ni kila vinaka kina.

Raica tale ga 2 Nifai 26:33; “Witnessing the Faithfulness,” ena Lewe ni Vakatakila, 332–41; Ulutaga kei na Taro, “Race and the Priesthood,” Valenivola ni Kosipeli; Ahmad Corbitt, “A Personal Essay on Race and the Priesthood,” tikina 1–4, history.ChurchofJesusChrist.org; BeOne.ChurchofJesusChrist.org.

• Raica na sere ni Lotu se nodra sere na Lalai me rawa ni vukei ira na gone mera kila vakavinaka e dua se sivia na Yavu ni Vakabauta. Ena rawa beka nira vukei iko mo digitaka na serenilotu kei na sere. Vukei ira na luvemu mera raica na sala e semati kina na sere kina Yavu ni Vakabauta.

• E rawa nidou cakacakavata o iko kei ira na nomu gone mera vola na taro eso e tu vei ira na tamata me baleta na kosipeli i Jisu Karisito se na Nona Lotu. Moni qai cakacaka vata ka sauma na veitaro oqori ena nomuni vakayagataka na Yavu ni Vakabauta. Evei tale eda rawa ni lakova ni tu na noda vakatataro me baleta na kosipeli?

• Me vukei ira nomu gone mera kila na ikaciwa ni yavu ni vakabauta, e rawa beka nio solia vei ira e dua na iwase ni ivolanikalou kei na dua na iyaloyalo ni parofita bula (se dua na ilavelave ni koniferedi se qai oti toka ga oqo ena Liaona). Kerei ira mera taura cake na ivolanikalou nio wilika na vosa “na veika sa vakatakila oti na Kalou” kei na iyaloyalo se na mekasini nio wilika na “veika sa vakatakilai mai ena gauna oqo” (Yavu ni Vakabauta 1:9). Na cava na vuna eda gadreva ruarua kina na parofita ni gauna eliu kei na gauna oqo?

• E rawa nira vulica na nomu gone na ivakarau e dusimaki keda kina na nodra vosa na parofita ena nodra muria na ivakaro me caka e dua na ka, me vaka na kakana se dua na ka ni vakatatalo. E rawa nio vakatauvatana oqo kina idusidusi e solia vei keda o Jisu Karisito mai vua na parofita. Na cava eso na ka sa vakavulica vei keda na Turaga mai vua na Nona parofita bula nikua?

• E rairai na raici ni sala e sema kina na ivolanikalou ni gauna oqo ki na ivakatakila ni gauna oqo e rawa ni vukei ira na luvemu mera kila na iVakaro Raraba. E rawa ni o kerei ira mera wilika na Cakacaka 10:34–35 kei na Jekope 2:27–30 ka sureti ira me ra vakadeitaka na ivolanikalou cava e semati kina Na iVakaro Raraba 1 (ka veimuataki yani kina icavacava ni vakamau vakalevu) ka semati ki na Na iVakaro Raraba 2 (ka kacivaki ni veitabaki ni matabete kei na cakacaka vakalotu ni valetabu sa vakarautaki tu vei ira na matatamata kece). Wasea na nomu ivakadinadina ni na vakaraitaka na Turaga na Nona lewa kivei ira na parofita ni gauna makawa kei na gauna oqo.