“Eb’ li xyaab’ kuxej re li k’ojob’ank wi’chik: Li Komonil re Tenq’ank,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)

“Li Komonil re Tenq’ank,” Kim, Taaqehin—Choq’ re li ochoch ut li iglees: 2025

Eb’ li xyaab’ kuxej re li k’ojob’ank wi’chik

Li Komonil re Tenq’ank

Sa’ 1842, chirix naq k’uub’anb’il chaq li Komonil re Tenq’ank sa’ Nauvoo, Illinois, li profeet aj Jose Smith kixye, “Li Iglees maji’ k’uub’anb’il chi tz’aqal toj reetal naq k’uub’anb’ileb’ li ixq chi jo’ka’in.” Jo’kan ajwi’, jun tzolok chirix lix k’ojob’ankil wi’chik lix Iglees li Qaawa’ ut lix tijonelil moko tz’aqal ta toj reetal naq na’ux li tzolok chirix li Komonil re Tenq’ank, a’an ajwi’ “xk’ojob’ankil wi’chik jun najteril na’leb’” chirixeb’ li ixq li wankeb’ jo’ xtzolom li Jesukristo.

Nim xk’anjel li xEliza R. Snow sa’ li k’ojob’ank a’an. Ki’oken sa’ lix k’uub’ankil li Komonil re Tenq’ank, ut jo’ aj tz’iib’, kixtz’iib’a resil li yoo chi k’ulmank sa’eb’ lix ch’utam. A’an kiril rik’in tz’aqal xnaq’ ru naq li Komonil re Tenq’ank kik’uub’aman “a’ yaal chan ru xtusulal li tijonelil.” Arin wan li raatin a’an, li kixtz’iib’a naq yoo chi k’anjelak jo’ xkab’ li Jolomil Awa’b’ej re li Komonil re Tenq’ank, re xtenq’ankileb’ li rech ixqilal chixtawb’al ru li santil k’anjel k’eeb’il reheb’ lix rab’in li Dios re li sumwank.

Re xtawb’al xkomon chik li na’leb’ chirix lix k’uub’ankil li Komonil re Tenq’ank, chi’ilmanq Hijas en Mi reino: La Historia y la Obra de la Sociedad de Socorro (2017), 1–25.

li xEmma Smith naxb’eresi jun ch’utam re li Komonil re Tenq’ank

Li xEliza R. Snow

“Us ta re li kutan a’in lix k’ab’a’ [li Komonil re Tenq’ank], li ch’uut, a’an re najter q’e kutan. Kiyehe’ qe xb’aan laj Jose Smith naq li ch’uut a’in kiwan ajwi’ sa’ li najter iglees, li naru nak’eeman reetal sa’ junjunqeb’ li tz’iib’ahom sa’ li Ak’ Chaq’rab’ b’ar wi’ oksinb’il li aatin “Qana’ sik’b’il ru” [chi’ilmanq 2 Jwan 1:1; Tzol’leb’ ut Sumwank 25:3].

“Li ch’uut a’in maak’a’aq raj chi maak’a’ li tijonelil, xb’aan naq naxk’ul chixjunil lix wankilal ut lix k’anjel rik’in li tijonelil. Naq ki’isiman li tijonelil sa’ li ruchich’och’, li ch’uut a’in jo’ ajwi’ chixjunileb’ chik lix cha’al lix tz’aqal iglees li Jesukristo ke’oso’. …

“Rik’in naq xin’oken sa’ lix k’uub’lajik li Komonil re Tenq’ank reheb’ li ixq sa’ Nauvoo,” … ut rik’in naq naab’al innawom chirix li ch’uut a’an, maare naru tinye junjunq li na’leb’ li tixtenq’aheb’ lix rab’in Sion chi okenk sa’ li ch’uut a’in, li nujenaq rik’in li ak’ teneb’ahom. Wi wankeb’ li rab’inb’ej ut li na’b’ej sa’ Israel li neke’reek’a naq ramb’ileb’ ru sa’ li wankeb’ wi’, te’xtaw anajwan xna’aj li jar paay chi wankilal ut chi seeb’al li k’eeb’il reheb’, re xb’aanunkil li us. …

K’ayib’aal kaqi xan aran Nauvoo, Illinois — Li Komonil re Tenq’ank kik’uub’aman sa’ li xkab’ xk’ojaril li k’ayib’aal re kaqi xan.

“Wi wan xpatz’om yalaq ani, K’a’ru aj-e li Komonil re Tenq’ank reheb’ li ixq? Tinsume raj naq—xb’aanunkil li us— a’an roksinkil chixjunil li qaseeb’al chixb’aanunkil li us, ink’a’ ka’ajwi’ re xch’oolaninkileb’ li neb’a’, re b’an ajwi’ xk’olb’aleb’ li aamej. Q’axal wi’chik li naru taab’aanumanq rik’in li k’anjelak sa’ junajil chiru li k’anjelak sa’ junesal. …

“Sa’ xch’oolankileb’ li neb’a’, wan xkomon chik li teneb’anb’il sa’ xb’een li Komonil re Tenq’ank reheb’ li ixq chiru yal xk’eeb’al li taak’anjelaq reheb’ sa’ tib’elej. Aajel ajwi’ ru rilb’al li neb’a’il re k’a’uxlej ut xyajel li ch’oolej; ut k’iila sut jun chaab’il aatin—xk’eeb’al b’ayaq li na’leb’, malaj xk’eeb’al li uq’ej rik’in chaab’ilal, tixk’e chi uxmank naab’al chik li chaab’ilal, ut k’a’jo’ wi’chik naq k’ulub’anb’ilaq, chiru jun b’oox chi oor. …

“Naq neke’ch’utub’aak chaq laj santil paab’anel aj najtil tenamit, chi maa’ani neke’xnaw ru, naru te’jalb’ehiiq xb’aaneb’ laj b’alaq’; jo’kan naq li Komonil re Tenq’ank tento tixseeb’a rib’ chirilb’aleb’, ut chiroksinkileb’ sa’ li komonil li taachaab’ilob’resinq ut taasantob’resinq, ut sa’ xb’een chixjunil, tixkawob’resiheb’ sa’ li paab’aal chirix li evangelio, ut chi jo’kan, taak’anjelaq re xkolb’aleb’ naab’al.

“Taa’ajmanq ru k’iila tasal hu re xch’olob’ankileb’ li teneb’aak, li osob’tesiik, ut li k’anjel re li Komonil re Tenq’ank. … B’aanuhomaq li k’anjel (chi b’eresinb’ilex xb’aan lee obiisp) sa’ xyaalal, chi k’eek’o eech’ool, sa’ junajil, ut rik’in tijok, ut li Dios texrosob’tesi chi elk chi uub’ej.”