« ថ្ងៃទី ២៩ ខែ កញ្ញា–ថ្ងៃទី ៥ ខែ តុលា ៖ ‹ ដំណាក់នេះជាដំណាក់របស់ទ្រង់ គឺជាទីបរិសុទ្ធភាពរបស់ទ្រង់ › ៖ គោលលទ្ធិ និងសេចក្តីសញ្ញា ១០៩–១១០ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« គោលលទ្ធិ និងសេចក្តីសញ្ញា ១០៩–១១០ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
A Glorious Light—Kirtland Temple [ ពន្លឺដ៏ត្រចះត្រចង់—ព្រះវិហារបរិសុទ្ធខឺតឡង់ ] ដោយ ហ្គ្រិន អេស ហបគីនសុន
ថ្ងៃទី ២៩ ខែ កញ្ញា–ថ្ងៃទី ៥ ខែ តុលា ៖ « ដំណាក់នេះជាដំណាក់របស់ទ្រង់ គឺជាទីបរិសុទ្ធភាពរបស់ទ្រង់ »
គោលលទ្ធិ និងសេចក្តីសញ្ញា ១០៩–១១០
ទ្វារព្រះវិហារបរិសុទ្ធខឺតឡង់បើកនៅម៉ោងប្រាំបីព្រឹក នាថ្ងៃទី ២៧ ខែ មីនា ឆ្នាំ ១៨៣៦ ។ ប៉ុន្តែពួកបរិសុទ្ធ ដែលរំពឹងចូលរួមនៅក្នុងពិធីឧទិ្ទសឆ្លងចាប់ផ្តើមតម្រង់ជួរចាប់តាំងពីមុនម៉ោងប្រាំពីរព្រឹកព្រលឹមម្ល៉េះ ។ ទីតាំងមិនអាចដាក់មនុស្សទាំងអស់ ហើយបន្ទាប់មកវគ្គទីពីរគឺក៏ចាំបាច់ត្រូវបង្កើតឡើងដើម្បីឲ្យមនុស្សគ្រប់គ្នាបានចូលរួម ។ មិនត្រឹមតែអ្នកដែលមានជីវិតរស់ អន្ទះសាចង់ចូលរួមនៅទីនោះប៉ុណ្ណោះទេ ។ មានមនុស្សជាច្រើននាក់បានធ្វើជាសាក្សីថា ពួកគេបានឃើញពួកទេវតានៅខាងក្នុង និងសូម្បីតែនៅលើដំបូលព្រះវិហារបរិសុទ្ធអំឡុងពេល និងក្រោយពេលការឧទិ្ទសឆ្លងផងដែរ ។ វាពិតហាក់បីដូចជា « ពលស្ថានសួគ៌ » បានចុះមកដើម្បី « ច្រៀង ហើយ [ និង ] ស្រែកទ្រហោ » ជាមួយពួកបរិសុទ្ធដែរ ( « ព្រះវិញ្ញាណនៃព្រះ » ទំនុកតម្កើង ល.រ ២ ) ។
ហេតុអ្វីបានជាមានក្តីរំភើបយ៉ាងខ្លាំង—ទាំងសងខាងនៃវាំងនន ? ជាច្រើនសតវត្សក្រោយមក មានដំណាក់របស់ព្រះអម្ចាស់ម្តងទៀតនៅលើផែនដី ។ ព្រះអម្ចាស់បំពេញសេចក្តីសន្យារបស់ទ្រង់ដើម្បីប្រទានដល់ពួកបរិសុទ្ធរបស់ទ្រង់នូវ « ព្រះចេស្ដាពីស្ថានលើ » ( គោលលទ្ធិ និងសេចក្ដីសញ្ញា ៣៨:៣២ ) ។ ហើយការណ៍នេះ ទ្រង់បានប្រកាសតែជា « ការចាប់ផ្ដើមនូវព្រះពរ » ប៉ុណ្ណោះ ( គោលលទ្ធិ និងសេចក្តីសញ្ញា ១១០:១០ ) ។ សម័យកាលដែលយើងរស់នៅបច្ចុប្បន្ន—ជាមួយនឹងការពន្លឿនកិច្ចការព្រះវិហារបរិសុទ្ធ និងពិធីបរិសុទ្ធទាំងឡាយអាចធ្វើឲ្យទាំងអ្នកនៅរស់ និងអ្នកស្លាប់រាប់លាននាក់—មាននូវការចាប់ផ្តើមមួយនៅក្រុងខឺតឡង់នៅពេលដែល « ស្បៃគ្របដណ្តប់ផែនដី [ ចាប់ ] ផ្តើមរសាត់ទៅ » ( « ព្រះវិញ្ញាណនៃព្រះ » ) ។
សូមមើលផងដែរ Saints, ១:២៣២–៤១; « A House for Our God » នៅក្នុង Revelations in Context ទំព័រ ១៦៩–១៧២ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ
ព្រះអម្ចាស់ប្រទានពរជ័យដ៏សន្ធឹកសន្ធាប់ដល់ខ្ញុំ តាមរយៈសេចក្ដីសញ្ញាក្នុងព្រះវិហារបរិសុទ្ធ ។
ព្រះវិហារបរិសុទ្ធខឺតឡង់មានភាពខុសប្លែកគ្នាពីព្រះវិហារបរិសុទ្ធដែលយើងស្គាល់នាសព្វថ្ងៃនេះ ។ ឧទាហរណ៍ គ្មានអាសនា និងគ្មានអាងជ្រមុជទឹកទេ ។ ប៉ុន្តែពរជ័យដែលបានពិពណ៌នានៅក្នុង កណ្ឌទី ១០៩ ការអធិស្ឋានឧទ្ទិសឆ្លងព្រះវិហារបរិសុទ្ធខឺតឡង់ ក៏មាននៅក្នុងដំណាក់របស់ព្រះអម្ចាស់នាសព្វថ្ងៃនេះផងដែរ ។ សូមពិនិត្យមើលខគម្ពីរខាងក្រោមនេះ ដើម្បីស្វែងរកពរជ័យមួយចំនួនទាំងនេះ ហើយជញ្ជឹងគិតពីរបៀបដែលពរជ័យទាំងនេះអាចជួយពង្រឹងទំនាក់ទំនងរបស់បងប្អូនជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ។
ខទី ៥, ១២–១៣ ( សូមមើលផងដែរ គោលលទ្ធិ និងសេចក្តីសញ្ញា ១១០:៦–៨ ) នៅក្នុងដំណាក់របស់ព្រះអម្ចាស់ ទ្រង់អាចបើកសម្តែងអង្គទ្រង់មកកាន់ខ្ញុំ ហើយយើងអាចទទួលអារម្មណ៍ពីព្រះចេស្តារបស់ទ្រង់ ។
ពរជ័យផ្សេងៗទៀត ៖
ប្រសិនបើបងប្អូនបានទៅដំណាក់របស់ព្រះអម្ចាស់ សូមគិតអំពីរបៀបដែលការសន្យាទាំងនេះត្រូវបានបំពេញនៅក្នុងជីវិតរបស់បងប្អូន ។
ទំនុកតម្កើង « ព្រះវិញ្ញាណនៃព្រះ » ( ទំនុកតម្កើង ល.រ ២ ) ត្រូវបាននិពន្ធឡើងសម្រាប់ការឧទ្ទិសឆ្លងព្រះវិហារបរិសុទ្ធខឺតឡង់—ហើយវាត្រូវបានគេយកមកច្រៀងនៅគ្រប់ពេល ដែលមានការឧទ្ទិសឆ្លងព្រះវិហារបរិសុទ្ធចាប់តាំងពីពេលនោះមក ។ សូមពិចារណាការច្រៀង ឬស្តាប់បទនេះជាផ្នែកនៃការសិក្សា និងការថ្វាយបង្គំរបស់បងប្អូន ។ តើពរជ័យអ្វីខ្លះនៃព្រះវិហារបរិសុទ្ធ ដែលបងប្អូនរកឃើញដែលបានពិពណ៌នានៅក្នុងទំនុកតម្កើងនេះ ?
ការអធិស្ឋានគឺជាការប្រាស្រ័យទាក់ទងជាមួយនឹងព្រះវរបិតាសួគ៌ ។
កណ្ឌទី ១០៩ គឺជាការអធិស្ឋានឧទ្ទិសឆ្លងដែលបានប្រទានឲ្យ យ៉ូសែប ស្ម៊ីធតាមរយៈវិវរណៈ ( សូមមើល ក្បាលកណ្ឌ ) ។ តើយើងបានរៀនអ្វីខ្លះអំពីការអធិស្ឋានចេញមកពីកណ្ឌនេះ ? ឧទាហរណ៍ បងប្អូនអាចកត់ចំណាំនូវអ្វីដែលព្យាការីបានថ្លែងអំណរគុណ និងពរជ័យអ្វីដែលលោកបានទូលសុំ ។ តើលោកបានមានប្រសាសន៍អ្វីទៀតនៅក្នុងការអធិស្ឋាននេះ ? នៅពេលបងប្អូនសិក្សា បងប្អូនអាចនឹងវាយតម្លៃទំនាក់ទំនងផ្ទាល់ខ្លួនរបស់បងប្អូនជាមួយនឹងព្រះវរបិតាសួគ៌ ។ តើបងប្អូនរៀនអ្វីខ្លះអំពីទ្រង់ និងព្រះរាជបុត្រារបស់ទ្រង់ចេញពីការអធិស្ឋាននេះ ?
ប្រសិនបើបងប្អូនចង់អានការអធិស្ឋានឧទ្ទិសឆ្លងព្រះវិហារបរិសុទ្ធផ្សេងទៀត រួមទាំងព្រះវិហារបរិសុទ្ធដែលនៅជិតបងប្អូនបំផុត សូមចូលទៅកាន់ទំព័រព្រះវិហារបរិសុទ្ធនៅលើគេហទំព័រ temples.ChurchofJesusChrist.org ។
គោលលទ្ធិ និងសេចក្តីសញ្ញា ១១០:១–១០
ព្រះអម្ចាស់អាចបើកសម្តែងព្រះអង្គទ្រង់ដល់ខ្ញុំនៅក្នុងដំណាក់របស់ទ្រង់ ។
ដូចដែលបងប្អូនបានអានការពិពណ៌នារបស់ព្រះអង្គសង្គ្រោះនៅក្នុង គោលលទ្ធិ និងសេចក្តីសញ្ញា ១១០:១–១០ រួមទាំងក្បាលកណ្ឌនេះ សូមជញ្ជឹងគិតពីអ្វីដែលខគម្ពីរទាំងនេះផ្ដល់យោបល់អំពីទ្រង់ ។
តើព្រះយេស៊ូវគ្រីស្ទ បានបើកសម្តែងព្រះអង្គទ្រង់—ឬបង្ហាញព្រះអង្គទ្រង់ដល់បងប្អូន—នៅក្នុងដំណាក់របស់ទ្រង់ដោយរបៀបណា ? តើទ្រង់ជួយបងប្អូនដឹងដោយរបៀបណាថាទ្រង់ទទួលយកការពលិកម្មរបស់បងប្អូន ?
នៅខាងក្នុងព្រះវិហារបរិសុទ្ធខឺតឡង់ ។
គោលលទ្ធិ និងសេចក្តីសញ្ញា ១១០:១០–១៦
ព្រះអង្គសង្គ្រោះដឹកនាំកិច្ចការរបស់ទ្រង់តាមរយៈកូនសោបព្វជិតភាព ។
នៅពីមុន ម៉ូសេ អេលីយ៉ាស និងអេលីយ៉ា បានបង្ហាញកាយនៅក្នុងព្រះវិហារបរិសុទ្ធដើម្បីស្តា កូនសោនៃបព្វជិតភាព ឡើងវិញបន្តិច នោះព្រះយេស៊ូវគ្រីស្ទបានមានព្រះបន្ទូលថា « នេះគឺជាការចាប់ផ្ដើមនូវព្រះពរដែលនឹងបានចាក់មកលើក្បាលនៃរាស្ត្ររបស់យើង » ( គោលលទ្ធិ និងសេចក្តីសញ្ញា ១១០:១០ ) ។ នៅពេលបងប្អូនអាន ខទី ១១–១៦ សូមគិតអំពីពរជ័យដែលព្រះអង្គសង្គ្រោះកំពុងចាក់ស្រោចមកលើបងប្អូន តាមរយៈកិច្ចការដែលបានដឹកនាំដោយកូនសោទាំងនេះ ។ ឧទាហរណ៍ ៖
-
ខទី ១១ ៖ ម៉ូសេ និងកូនសោនៃការប្រមូលសាសន៍អ៊ីស្រាអែល ( ឬកិច្ចការផ្សព្វផ្សាយសាសនា ) ។ តើព្រះអម្ចាស់បានប្រទានពរដល់បងប្អូន និងគ្រួសារបងប្អូនតាមរយៈកិច្ចខិតខំផ្សព្វផ្សាយសាសនានៃសាសនាចក្ររបស់ទ្រង់ដោយរបៀបណា ?
-
ខទី ១២ ៖ អេលីយ៉ាស និងកូនសោនៃដំណឹងល្អរបស់អ័ប្រាហាំ រួមទាំង សេចក្តីសញ្ញាអ័ប្រាហាំ ។ តើព្រះអម្ចាស់ប្រទានពរដល់បងប្អូន និង « តំណមនុស្សបន្ទាប់ពី [ បងប្អូន ] » ដោយសារតែសេចក្តីសញ្ញារបស់បងប្អូនដោយរបៀបណា ? ( សូមមើល រ័សុល អិម ណិលសុន « សេចក្ដីសញ្ញាដ៏នៅអស់កល្បអស់កាលជានិច្ច » លីអាហូណា ខែ តុលា ឆ្នាំ ២០២២ ទំព័រ ៤–១១ សេចក្តីណែនាំដល់បទគម្ពីរទាំងឡាយ « អេលីយ៉ាស » នៅលើបណ្ណាល័យដំណឹងល្អ ) ។
-
ខទី ១៣–១៦ ៖ អេលីយ៉ា និងអំណាចនៃការផ្សារភ្ជាប់ ដែលបានបើកសម្តែងតាមរយៈកិច្ចការព្រះវិហារបរិសុទ្ធ និងពង្សប្រវត្តិ ។ តើបងប្អូនគិតថា ហេតុអ្វីបានជាព្រះវរបិតាសួគ៌ចង់ឲ្យបងប្អូនភ្ជាប់ទំនាក់ទំនងជាមួយបុព្វការីជនរបស់បងប្អូនតាមរយៈពិធីបរិសុទ្ធក្នុងព្រះវិហារបរិសុទ្ធ ? ( សូមមើល ហ្គើរីត ដាប់បលយូ ហ្គង « រីករាយជារៀងរហូត » លីអាហូណា ខែ វិច្ឆិកា ឆ្នាំ ២០២២ ទំព័រ ៨៣–៨៦ ) ។
តើការភ្ជាប់ទំនាក់ទំនងអ្វីដែលបងប្អូនមើលឃើញរវាងកូនសោទាំងនេះ និងការទទួលខុសត្រូវរបស់យើងនៅក្នុងកិច្ចការនៃសេចក្តីសង្រ្គោះរបស់ព្រះ និងភាពតម្កើងឡើង ( ការរស់នៅតាមដំណឹងល្អ ការថែទាំដល់ជនទ័លក្រ ការអញ្ជើញមនុស្សទាំងអស់ឲ្យទទួលយកដំណឹងល្អ និងការរួបរួមក្រុមគ្រួសារសម្រាប់ភាពអស់កល្បជានិច្ច ) ?
តើបងប្អូនមានបទពិសោធន៍អ្វីខ្លះពីកិច្ចការនៃសេចក្តីសង្គ្រោះ និងភាពតម្កើងឡើងរបស់ព្រះ ? តើបទពិសោធន៍ទាំងនេះបង្រៀនបងប្អូនអ្វីខ្លះអំពីព្រះអង្គសង្គ្រោះ សាសនាចក្រ និងកិច្ចការរបស់ទ្រង់ ?
សូមស្វែងរករបៀបជាច្រើនដើម្បីឲ្យអ្នកដទៃបានចូលរួម ។ ប្រសិនបើបងប្អូនកំពុងបង្រៀនអំពី គោលលទ្ធិ និងសេចក្តីសញ្ញា ១១០:១១–១៦ បងប្អូនអាចពិចារណាលើការចាត់តាំងអ្នកសិក្សាម្នាក់ៗឲ្យសិក្សាអំពី ម៉ូសេ អេលីយ៉ាស ឬ អេលីយ៉ា និងកូនសោដែលលោកបានស្ដារឡើងវិញ ។ បន្ទាប់មក អ្នកសិក្សាអាចចែកចាយគ្នាទៅវិញទៅមកនូវអ្វីដែលពួកគេបានរកឃើញ ។ មធ្យោបាយបែបនេះតម្រូវឲ្យមនុស្សគ្រប់គ្នាចូលរួមនៅក្នុងការរៀនសូត្រ និងការបង្រៀន ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ, ទំព័រ ២៤–២៧ ) ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
គោលលទ្ធិ និងសេចក្ដីសញ្ញា ១០៩:១២–១៣; ១១០:១–៧
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។
-
បងប្អូន និងកុមាររបស់បងប្អូនអាចនិយាយអំពីមូលហេតុដែលបងប្អូនស្រឡាញ់អំពីផ្ទះរបស់បងប្អូន ។ បន្ទាប់មក បងប្អូនអាចមើលរូបភាពព្រះវិហារបរិសុទ្ធខឺតឡង់ ហើយប្រើ គោលលទ្ធិ និងសេចក្ដីសញ្ញា ១០៩:១២–១៣; ១១០:១–៧ ដើម្បីប្រាប់ពួកគេពីរបៀបដែលព្រះវិហារបរិសុទ្ធនោះបានឧទ្ទិសឆ្លង ហើយក្លាយជាដំណាក់របស់ព្រះអម្ចាស់ ( សូមមើលផងដែរ « ជំពូកទី ៣៩ ៖ ព្រះវិហារបរិសុទ្ធខឺតឡង់ត្រូវបានឧទ្ទិសឆ្លង » នៅក្នុង ដំណើររឿងព្រះគម្ពីរគោលលទ្ធិ និងសេចក្ដីសញ្ញា ទំព័រ ១៥៤ ឬ វីដេអូដែលទាក់ទងនៅលើបណ្ណាល័យដំណឹងល្អ ) ។ សូមចែកចាយដល់គ្នាទៅវិញទៅមកនូវអ្វីដែលបងប្អូនស្រឡាញ់អំពីដំណាក់របស់ព្រះអម្ចាស់ ។
2:17Chapter 39: The Kirtland Temple Is Dedicated: January–March 1836
-
ប្រហែលជាបងប្អូន និងកុមាររបស់បងប្អូនអាចស្រមៃថាមានមិត្តម្នាក់កំពុងស្វែងរកផ្ទះរបស់បងប្អូន ។ តើយើងនឹងជួយមិត្តភក្តិរបស់យើងដោយរបៀបណាឲ្យស្គាល់ថា មួយណាជាគេហដ្ឋានរបស់យើង ? តើយើងដឹងយ៉ាងដូចម្ដេចថាព្រះវិហារបរិសុទ្ធជាដំណាក់របស់ព្រះអម្ចាស់ ? ( សូមមើល គោលលទ្ធិ និងសេចក្តីសញ្ញា ១០៩:១២–១៣ ) ។
ព្រះអង្គសង្គ្រោះកំពុងប្រទានពរដល់ប្រជាជនរបស់ទ្រង់តាមរយៈកូនសោបព្វជិតភាព ។
-
បងប្អូនអាចប្រើ ទំព័រសកម្មភាព ប្រចាំសប្តាហ៍នេះ ឬ « ជំពូកទី ៤០ ៖ ការនិមិត្តនៅក្នុងព្រះវិហារបរិសុទ្ធខឺតឡង់ » ( នៅក្នុង ដំណើររឿងព្រះគម្ពីរគោលលទ្ធិ និងសេចក្តីសញ្ញា ទំព័រ ១៥៥–១៥៧ ឬវីដេអូដែលទាក់ទងនៅលើបណ្ណាល័យដំណឹងល្អ ) ដើម្បីប្រាប់កុមារពីតួអង្គសួគ៌ាដែលបានយាងមកព្រះវិហារបរិសុទ្ធនោះ ។ បងប្អូនក៏អាចប្រើរូបភាពនៅចុងបញ្ចប់នៃមេរៀននេះផងដែរ ។
1:17The Kirtland Temple
-
ដើម្បីរៀនអំពីសារៈសំខាន់នៃអ្វីដែលបានកើតឡើងនៅក្នុងព្រះវិហារបរិសុទ្ធ ខឺតឡង់ បងប្អូន និងកុមាររបស់បងប្អូនអាចនិយាយអំពីថាតើកូនសោនោះធ្វើអ្វីខ្លះ។ ប្រហែលជាកុមាររបស់បងប្អូនអាចប្តូរវេនគ្នាកាន់សោ ហើយសម្តែងចាក់បើកទ្វារដែលជាប់សោ ។ សូមជួយពួកគេស្វែងរកពាក្យ កូនសោ នៅក្នុង គោលលទ្ធិ និងសេចក្តីសញ្ញា ១១០:១១–១៦ ហើយនិយាយអំពីពរជ័យដែលកូនសោទាំងនេះនាំមក ។ បងប្អូនអាចពន្យល់ថាកូនសោបព្វជិតភាពគឺជាការអនុញ្ញាតមកពីព្រះដើម្បីដឹកនាំសាសនាចក្ររបស់ទ្រង់ ។ សូមចែកចាយការដឹងគុណរបស់បងប្អូនកាលដែលព្រះអម្ចាស់បានប្រទានកូនសោបព្វជិតភាពដល់យើង ។
គោលលទ្ធិ និងសេចក្តីសញ្ញា ១១០:១៥
ព្រះអង្គសង្រ្គោះចង់ឲ្យខ្ញុំបង្វែរដួងចិត្តខ្ញុំទៅរកបុព្វការីជនរបស់ខ្ញុំ ។
-
បន្ទាប់ពីអាន គោលលទ្ធិ និងសេចក្តីសញ្ញា ១១០:១៥ ជាមួយគ្នាហើយ សូមប្រាប់កុមាររបស់បងប្អូនអំពីបទពិសោធន៍ដែលបានជួយបង្វែរដួងចិត្តរបស់បងប្អូនទៅកាន់បុព្វការីជនរបស់បងប្អូន ។ បងប្អូនក៏អាចច្រៀងចម្រៀងមួយបទជាមួយគ្នា ដូចជាបទ ៖ « ខ្ញុំកំពុងធ្វើ—ពង្សប្រវត្តិ » ( សៀវភៅចម្រៀងកុមារ ទំព័រ ១០០ ) ។
-
តើអ្វីទៅដែលអាចជួយ « បង្វែរចិត្ត » កូនចៅរបស់បងប្អូនទៅរកបុព្វការីជនរបស់ពួកគេ ? អ្នកអាចស្វែងរកគំនិតរីករាយនៅក្នុងគេហទំព័រ FamilySearch.org/discovery ។ បងប្អូនអាចធ្វើការជាមួយគ្នាដើម្បីស្វែងរកបុព្វការីជនទាំងឡាយដែលត្រូវការពិធីបរិសុទ្ធក្នុងព្រះវិហារបរិសុទ្ធ ។ ហេតុអ្វីបានជាព្រះយេស៊ូវចង់ឲ្យយើងធ្វើកិច្ចការនេះ ?
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។