« សំឡេងនៃការស្ដារឡើងវិញ ៖ ក្រុមជំរំស៊ីយ៉ូន » ៖ ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្ដីសញ្ញា ឆ្នាំ ២០២៥ ( ឆ្នាំ ២០២៥ )
« ក្រុមជំរំស៊ីយ៉ូន » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
សំឡេងនៃការស្តារឡើងវិញ
ក្រុមជំរំស៊ីយ៉ូន
ពីព្រោះក្រុមជំរំស៊ីយ៉ូនមិនបាននាំពួកបរិសុទ្ធទៅកាន់ដែនដីរបស់ពួកគេនៅស្រុកចាកសុនវិញនោះ មនុស្សជាច្រើនមានអារម្មណ៍ថាការខិតខំរបស់ពួកគេបានបរាជ័យ ។ ប៉ុន្តែទោះជាយ៉ាងណា អ្នកចូលរួមក្នុងក្រុមជំរំស៊ីយ៉ូនជាច្រើនបានក្រឡេកមើលទៅបទពិសោធន៍របស់ពួកគេ ហើយបានឃើញអំពីរបៀបដែលព្រះអម្ចាស់បានបំពេញគោលបំណងខ្ពស់ជាងមួយនៅក្នុងជីវិតរបស់ពួកគេ និងនៅក្នុងនគររបស់ទ្រង់ ។ នេះគឺជាទីបន្ទាល់មួយចំនួនរបស់ពួកគេ ។
យ៉ូសែប ស្ម៊ីធ
បន្ទាប់ពីរយៈពេល ៤០ ឆ្នាំនៃក្រុមជំរំស៊ីយ៉ូន យ៉ូសែប យ៉ង់ ដែលជាសមាជិកនៃក្រុមជំរំបានរាយការណ៍ថា យ៉ូសែប ស្ម៊ីធ បានមានប្រសាសន៍ដូចតទៅនេះ ៖
« បងប្អូនប្រុសអើយ មានបងប្អូនមួយចំនួនបានខឹងនឹងរូបខ្ញុំ ដោយសារបងប្អូនពុំបានធ្វើចម្បាំងនៅក្នុងរដ្ឋមិសសួរី ប៉ុន្តែខ្ញុំសូមប្រាប់បងប្អូនថា ព្រះពុំចង់ឲ្យបងប្អូនធ្វើចម្បាំងឡើយ ។ ទ្រង់ពុំអាចស្ថាបនានគរទ្រង់ឡើងដោយមានតែបុរសដប់ពីរនាក់ ដើម្បីបើកទ្វារនៃដំណឹងល្អដល់ជាតិសាសន៍ទាំងអស់នៅលើផែនដី និងពួកចិតសិបនាក់ទៀត ដែលស្ថិតក្រោមការដឹកនាំរបស់ពួកគេ ដើម្បីបន្តកិច្ចការបានឡើយ លើកលែងតែទ្រង់ចម្រាញ់ពួកគេចេញមកពីក្រុមបុរសដែលបានថ្វាយជីវិតខ្លួន និងដែលបានលះបង់យ៉ាងធំធេងដូចដែលអ័ប្រាហាំបានធ្វើប៉ុណ្ណោះ ។
« ឥឡូវនេះព្រះអម្ចាស់បានរកឃើញពួកដប់ពីរនាក់ និងពួកចិតសិបនាក់របស់ទ្រង់ហើយ ព្រមទាំងបានហៅកូរ៉ុមនៃពួកចិតសិបនាក់ផ្សេងទៀត ជាអ្នកដែលបានធ្វើពលិកម្ម ហើយចំពោះអស់អ្នកដែលមិនបានធ្វើពលិកម្ម និងថ្វាយដង្វាយរបស់ពួកគេនាពេលឥឡូវនេះទេ នឹងធ្វើឡើងនៅពេលក្រោយ » ។
ព្រិកហាំ យ៉ង់
« នៅពេលយើងធ្វើដំណើរទៅដល់រដ្ឋមិសសួរី ព្រះអម្ចាស់បានមានព្រះបន្ទូលទៅកាន់អ្នកបម្រើទ្រង់គឺយ៉ូសែប ថា ‹ យើងទទួលយកការថ្វាយរបស់ឯង › ហើយយើងមានអភ័យឯកសិទ្ធដើម្បីត្រឡប់ទៅផ្ទះវិញជាថ្មី ។ ពេលខ្ញុំត្រឡប់ទៅវិញមិត្តភក្ដិរបស់ខ្ញុំជាច្រើនបានសួរថា តើមានប្រយោជន៍អ្វីក្នុងការហៅមនុស្សឲ្យចាកចេញពីការងារ ដើម្បីឡើងទៅរដ្ឋមិសសួរី រួចហើយត្រឡប់មកវិញ ដោយគ្មានបានសម្រេចអ្វីទាំងអស់នោះ ។ ពួកគេបានសួរថា ‹ តើនរណាទទួលបានផលប្រយោជន៍នោះ ? ‹ ប្រសិនបើព្រះអម្ចាស់បានបង្គាប់ឲ្យសម្រេចការណ៍នោះ តើទ្រង់មិនទតមើលការណ៏នោះទេឬ ? ›… ខ្ញុំបានប្រាប់បងប្អូនប្រុសទាំងនោះថា ខ្ញុំបានទទួលរង្វាន់យ៉ាងអស្ចារ្យ—រង្វាន់អស្ចារ្យពីស្ថានសួគ៌—មែនហើយខ្ញុំត្រូវបានបំពេញដោយចំណេះដឹងដ៏លើសលប់ ដែលខ្ញុំបានទទួលអំឡុងពេលដែលខ្ញុំបានធ្វើដំណើរជាមួយនឹងព្យាការី » ។
វិលហ្វូឌ វូឌដ្រុព្វ
« ខ្ញុំបាននៅក្នុងក្រុមជំរំស៊ីយ៉ូនជាមួយនឹងព្យាការីនៃព្រះ ។ ខ្ញុំបានឃើញទំនាក់ទំនងរបស់លោកជាមួយនឹងព្រះ ។ ខ្ញុំបានឃើញព្រះចេស្តានៃព្រះជាមួយនឹងលោក ។ ខ្ញុំមើលឃើញថា លោកគឺជាព្យាការី ។ អ្វីដែលបានបើកសម្តែងដល់លោកដោយព្រះចេស្តានៃព្រះចំពោះបេសកកម្ម នោះគឺមានតម្លៃយ៉ាងអស្ចារ្យចំពោះខ្ញុំ និងចំពោះអស់អ្នកដែលបានទទួលការណែនាំពីលោក » ។
« នៅពេលសមាជិកក្រុមជំរំស៊ីយ៉ូនត្រូវបានហៅ យើងភាគច្រើនមិនដែលបានជួបមុខគ្នាទេ យើងជាមនុស្សចម្លែកចំពោះគ្នា ហើយមនុស្សភាគច្រើនមិនធ្លាប់ឃើញព្យាការីទេ ។ យើងបានរាយប៉ាយដូចគ្រាប់ពោតរែងជ្រុះតាមប្រហោងកន្ដ្រងទៅគ្រប់ជាតិសាសន៍ ។ យើងជាយុវជនវ័យក្មេង ហើយយើងត្រូវបានហៅនៅក្នុងជំនាន់មុនឲ្យចេញទៅ ហើយសង្រ្គោះក្រុងស៊ីយ៉ូន ហើយអ្វីដែលយើងត្រូវធ្វើនោះគឺធ្វើដោយសេចក្ដីជំនឿ ។ យើងមកពីរដ្ឋផ្សេងៗមកជួបជុំគ្នានៅទីក្រុងខឺតឡង់ ហើយឡើងទៅដើម្បីសង្គ្រោះស៊ីយ៉ូននៅក្នុងការបំពេញបទបញ្ញត្តិរបស់ព្រះមកកាន់ពួកយើង ។ ព្រះទទួលយកកិច្ចការរបស់យើង ដូចជាទ្រង់បានទទួលយកកិច្ចការលោកអ័ប្រាហាំដែរ ។ យើងសម្រេចបានកិច្ចការដ៏អស្ចារ្យមួយ ទោះបីជាពួកអ្នកក្បត់សាសនា និងពួកអ្នកមិនជឿ តែងសួរសំណួរនេះជាច្រើនដងថា ‹ តើអ្នកបានធ្វើអ្វីខ្លះ ? › យើងទទួលបានបទពិសោធន៍ដែលនឹងមិនអាចរកបាន [ នៅ ] កន្លែងផ្សេងៗទៀតឡើយ ។ យើងមានឯកសិទ្ធិឃើញមុខព្យាការី និងធ្វើដំណើរអស់រាប់ពាន់គីឡូជាមួយលោក ហើយមើលឃើញកិច្ចការនៃព្រះវិញ្ញាណរបស់ព្រះនៅគង់ជាមួយនឹងលោក ព្រមទាំងវិវរណៈនៃព្រះយេស៊ូវគ្រីស្ទប្រទានមកដល់លោក និងការបំពេញនូវវិវរណៈទាំងនោះ ។ ហើយលោកបានប្រមូលផ្តុំពួកអែលឌើរជាងពីររយនាក់មកពីគ្រប់ជាតិសាសន៍នៅជំនាន់មុននោះ ហើយបញ្ជូនយើងទៅផ្សាយក្នុងពិភពលោក ដើម្បីផ្សព្វផ្សាយដំណឹងល្អនៃព្រះយេស៊ូវគ្រីស្ទ ។ បើខ្ញុំមិនបានចូលរួមក្នុងក្រុមជំរំស៊ីយ៉ូនទេ នោះខ្ញុំនឹងមិននៅទីនេះនៅថ្ងៃនេះទេ [ នៅក្នុង ទីក្រុងសលត៍ លេក កំពុងបម្រើក្នុងកូរ៉ុមនៃពួកសាវកដប់ពីរនាក់ ] ។… តាមរយៈការទៅទីនោះ យើងឈានចូលក្នុងចម្ការទំពាំងបាយជូរ ដើម្បីផ្សាយដំណឹងល្អ ហើយព្រះអម្ចាស់បានទទួលយកកិច្ចការរបស់យើងហើយ ។ ហើយនៅក្នុងកិច្ចការ និងការបៀតបៀនទាំងឡាយរបស់យើង ដែលធ្វើឲ្យជីវិតយើងជួបគ្រោះថ្នាក់ ប៉ុន្តែយើងត្រូវធ្វើការនោះ ហើយត្រូវរស់នៅដោយសេចក្ដីជំនឿ » ។
« បទពិសោធន៍ដែល [ យើង ] ទទួលបានក្នុងការធ្វើដំណើរក្នុងក្រុមជំរំស៊ីយ៉ូន គឺមានតម្លៃជាងមាសទៅទៀត » ។