Doktrina at mga Tipan 58–59

Umasa ang mga Banal na sa panahon ng kanilang buhay, magiging Sion ang Jackson County, isang lugar kung saan maaaring magtipon ang lahat ng mga Banal. Gayunman, ang panahon nila sa Jackson County ay puno ng kapighatian. Sa loob ng ilang taon, napilitan silang umalis at “maghintay [na]ng maikling panahon para sa ikatutubos ng Sion” (Doktrina at mga Tipan 105:9).

Ano ang natutuhan mo tungkol sa kapighatian o mga hamon mula sa mga salita ng Panginoon sa Doktrina at mga Tipan 58:1–5? Sa palagay mo, bakit may ilang pagpapalang dumarating lamang pagkatapos ng kapighatian? Anong mga pagpapala ang natanggap mo pagkatapos ng kapighatian?

Ano ang natutuhan mo mula sa Doktrina at mga Tipan 59:23 na nagdudulot sa iyo ng pag-asa?

Bilang bahagi ng iyong pag-aaral ng mga talatang ito, maaari mong ilista ang ilan sa mga bagay na “sabik kang [gawin].” “Ma[bu]buting bagay” ba ang lahat ng iyon? Pagnilayan kung ano ang magagawa mo para “isakatuparan ang maraming kabutihan”—at isiping magtakda ng mga mithiin na gawin ito.

Bakit nais ng Panginoon na gawin natin ang “maraming bagay sa [ating] sariling kalooban”? Ano ang magiging resulta kung ikaw ay “[pinilit] sa lahat ng bagay”? Ano ang idinaragdag ng 2 Nephi 2:27 sa pagkaunawa mo sa alituntuning ito?

Tingnan din sa Dale G. Renlund, “Piliin Ninyo sa Araw na Ito,” Liahona, Nob. 2018, 104–6.

Ang pangako ng Panginoon sa Doktrina at mga Tipan 58:42 na lubos na patawarin ang mga nagsisisi ay nagbibigay-inspirasyon, bagama’t nag-aanyaya rin ito ng ilang tanong: Ano ang ibig sabihin ng magsisi? Paano ko malalaman kung nakapagsisi na ako? Sa kabutihang-palad, nagpatuloy ang Panginoon, “Sa pamamagitan nito inyong malalaman…” (talata 43).

Narito ang ilang karagdagang tanong ng mga tao kung minsan tungkol sa pagsisisi. Ano ang itinuturo sa iyo ng Espiritu habang pinag-aaralan mo ang iminungkahing resources na ibinigay sa ibaba?

Paano nakakatulong ang pagtatapat ng aking mga kasalanan sa pagsisisi ko? Tingnan sa Mga Awit 32:1–5; Mga Kawikaan 28:13; Mosias 27:34–37; Alma 39:12–13.

Sinisikap kong talikuran ang aking mga kasalanan, pero patuloy akong nagkakamali. May bisa pa rin ba ang aking pagsisisi? Tingnan sa Bradley R. Wilcox, “Ang Pagiging Karapat-dapat ay Hindi Pagiging Walang Kamalian,” Liahona, Nob. 2021, 61–67; “Daily Restoration” (video), Gospel Library.

5:27

Paano ko matitiyak na napatawad na ako ng Tagapagligtas? Tingnan sa Tad R. Callister, “Ang Pagbabayad-sala ni Jesucristo,” Liahona, Mayo 2019, 85–87, lalo na sa bahaging pinamagatang “2. Kasalanan.”

Makakakita ka ng iba pang mga kabatiran sa “Mga Tanong at mga Sagot” tungkol sa pagsisisi sa Para sa Lakas ng mga Kabataan: Isang Gabay sa Pagpili (mga pahina 8–9).

Tingnan din sa Mga Paksa at Tanong, “Pagsisisi,” Gospel Library.

Si Polly Knight at ang asawa niyang si Joseph Knight Sr. ay ilan sa mga unang naniwala sa calling ni Joseph Smith bilang propeta. Mahalaga ang naitulong nina Polly at Joseph sa Propeta sa gawain ng pagsasalin ng Aklat ni Mormon. Nilisan ng pamilya Knight ang Colesville, New York, para makasama sa mga Banal na nasa Ohio at kalaunan ay inutusan silang lumipat sa Jackson County, Missouri. Nang maglakbay sila, nagsimulang humina ang katawan ni Polly, pero determinado siyang makita ang Sion bago siya pumanaw. Ilang araw pa lamang siya sa Missouri nang pumanaw siya (tingnan sa Mga Banal, 1:145–47, 151–53). Natanggap ang Doktrina at mga Tipan 59 sa araw ng kanyang pagpanaw, at maaaring partikular na patungkol ang mga talata 1 at 2 sa kanya.

Ano sa palagay mo ang ibig sabihin ng “puputungan … ng mga kautusan”? (talata 4). Isipin kung paano ka pinagpapala ng Panginoon habang sinisikap mong sundin ang bawat isa sa mga kautusan sa mga talata 5–19.

Matapos mangakong bibiyayaan ang mga Banal sa Sion “ng mga kautusang hindi kakaunti,” binigyang-diin ng Panginoon ang isang partikular na utos: ang utos na igalang ang Kanyang “banal na araw” (Doktrina at mga Tipan 59:4, 9). Habang pinag-aaralan mo ang Doktrina at mga Tipan 59:9–19, pagnilayan kung bakit napakahalaga ng paggalang sa Sabbath sa mga Banal na ito nang sikapin nilang itayo ang Sion. Bakit ito mahalaga sa iyo?

Maaari mo ring pagnilayan kung ginagamit mo ba ang araw ng Sabbath sa paraang nilayon ng Panginoon. Paano nakakatulong sa iyo ang pagpapanatiling banal ng araw ng Sabbath na manatiling “walang bahid-dungis mula sa sanlibutan”? (talata 9). Ano ang magagawa mo para maiukol ang iyong “mga pananalangin sa Kataas-taasan”? (talata 10).

Maaari mong mapansin na ginamit ng Panginoon ang mga salitang tulad ng “[may] kagalakan,” “maligaya,” at “masaya” para magturo tungkol sa araw ng Sabbath. Ano ang nagpapasaya sa iyo sa araw ng Sabbath? Paano mo ipaliliwanag sa isang tao kung bakit mo piniling igalang ang araw ng Panginoon?

Ano ang natutuhan mo mula sa himnong “Sagradong Himig ay Awitin” (Mga Himno, blg. 87) tungkol sa mga layunin at pagpapala ng Sabbath?

Tingnan din sa Genesis 2:2–3; Isaias 58:13–14; Russell M. Nelson, “Ang Sabbath ay Kaluguran,” Liahona, Mayo 2015, 129–32.

• Ang sama-samang pagbasa sa Doktrina at mga Tipan 58:26–28 ay maaaring magbigay sa iyo at sa iyong mga anak ng oportunidad na pag-usapan ang kapangyarihang ibinigay sa atin ng Ama sa Langit na piliing gumawa ng mabuti. Maaari ninyong sabihin sa isa’t isa ang iba’t ibang pagpiling nagawa ninyo at kung ano ang nangyari dahil doon. Baka gustong idrowing ng iyong mga anak ang kanilang karanasan.

• Maaari mong isulat ang pagpili sa isang panig ng papel at bunga sa kabilang panig nito at gamitin ang papel na ito para ilarawan na hindi mapaghihiwalay ang ating mga pagpili at ang mga bunga nito. Marahil ay maaaring maglista ng ilang pagpili ang iyong mga anak at pag-usapan nila ang mga bungang dulot ng mga ito. Pagkatapos ay maaari ninyong sama-samang basahin ang Doktrina at mga Tipan 58:27–28 at pag-usapan ang mga pagpili na “[isina]sakatuparan ang maraming kabutihan” o mabubuting bunga. Paano tayo “ginagantimpalaan” o pinagpapala ng Ama sa Langit kapag nagsisikap tayong gumawa ng mabuti? (talata 28).

• Isiping basahin ang mga talatang ito habang naglalakad-lakad o tumitingin-tingin kayo ng iyong mga anak sa mga larawan ng kalikasan, na napapansin ang mga bagay na “[nakalulugod] sa mata at … [nagpapasigla sa] puso” (talata 18). Maaari mo ring mapansin ang mga bagay na katulad nito sa isang awiting tulad ng “Ako ay Mahal ng Ama sa Langit” (Aklat ng mga Awit Pambata, 16–17). O maaari mong anyayahan ang iyong mga anak na magdrowing ng mga bagay na pinasasalamatan nila at ipakuwento sa kanila ang tungkol sa mga drowing nila. Paano natin maipapakita ang ating pasasalamat para sa mga bagay na ito?

• Ano ang magagawa natin sa araw ng Linggo para sambahin ang Panginoon at makasumpong ng kagalakan? Tulungan ang iyong mga anak na makahanap ng mga ideya sa Doktrina at mga Tipan 59:9–12 at sa pahina ng aktibidad sa linggong ito. Maaari din siguro silang makahanap ng mga larawan o bagay na kumakatawan sa mga bagay na ginagawa natin sa araw ng Sabbath (tulad ng mga larawan ng sakramento sa outline na ito). Paano nakakatulong sa atin ang mga bagay na ito na mas mapalapit sa Ama sa Langit at kay Jesucristo?