“26 mayo–1 junio: “Jun mertoom xaqxo xch’ool, ut tiik, ut chaab’il xna’leb’”: Tzol’leb’ ut Sumwank 51–57,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)
“Tzol’leb’ ut Sumwank 51–57,” Kim, Taaqehin—Choq’ re li ochoch ut li iglees: 2025
Li xb’een tzol, xb’aan laj James Taylor Harwood
26 mayo–1 junio: “Jun mertoom xaqxo xch’ool, ut tiik, ut chaab’il xna’leb’”
Tzol’leb’ ut Sumwank 51–57
Choq’ reheb’ li komon sa’ li Iglees sa’ 1830, xch’utub’ankileb’ laj santil paab’anel ut xkab’lankil li tenamit Sion a’aneb’ musiq’ejil jo’ ajwi’ ruchich’och’il k’anjel, ut naab’al li ki’ajman ru xb’aanunkil: Ki’ajman naq taaloq’manq li ch’och’ b’ar wi’ te’ruuq chi wank laj santil paab’anel. Ki’ajman naq te’k’uub’amanq li tasal hu ut xkomoneb’ li puktesinb’il aatin. Ut ki’ajman naq taawanq jun k’ayib’aal re taawanq k’a’aq re ru na’ajman ru choq’ reheb’ li ani wankeb’ Sion. Sa’eb’ li k’utb’esinb’il na’leb’ neke’tawman sa’ Tzol’leb’ ut Sumwank 51–57, li Qaawa’ kireetaliheb’ ut kixk’ameb’ xb’e li kristiaan re naq te’xb’aanu li k’anjel a’an.
A’b’an us ta sa’ Sion neke’ajman ru li seeb’al choq’ reheb’ li k’anjel a’an, eb’ li k’utb’esinb’il na’leb’ a’an neke’xk’utb’esi naq li Qaawa’ naraj naq eb’ laj santil paab’anel te’wulaq chi k’ulub’ej sa’ musiq’ej re naq te’kab’a’iiq choq’ tenamit Sion—lix tenamit a’an. A’an nokoxb’oq li junjunq qe chi wank jo’ “mertoom xaqxo xch’ool, ut tiik, ut chaab’il xna’leb’,” ut naq tuulanaq li qamusiq’, “chi xaqxo chi kaw” sa’ li qateneb’ankil li kooxxaqab’ wi’ (chi’ilmanq Tzol’leb’ ut Sumwank 51:19; 52:15; 54:2). Wi nokoru chixb’aanunkil a’an—maak’a’ naxye chan ru li qaseeb’al—li Qaawa’ naru nokoroksi re xwaklesinkil Sion.
Li na’leb’ re tzolok sa’ li ochoch ut sa’ li iglees
Li Qaawa’ naraj naq xaqxooq inch’ool, tiikaqin, ut chaab’ilaq inna’leb’ jo’ mertoom.
Wi ta laa’at jun komon sa’ li Iglees sa’ 1831, maare katb’oqe’ raj chixyu’aminkil li chaq’rab’ re q’axtesink-ib’ rik’in xk’eeb’al li k’a’ru aawe re li Iglees rik’in li obiisp. Chirix a’an, naab’al sut a’an kixq’ajsi raj aawe li k’a’ru xak’e, ut wan naq b’ayaq chik xkomon. A’b’an moko aawe ta chik—a’an b’an laa mertoomil.
Jalan li nab’aanuman anajwan, a’b’an eb’ li na’leb’ toj aajeleb’ ru sa’ xk’anjel li Qaawa’. Naq yooqat chirilb’al li tasal 51, k’oxlan chirix li k’a’ru q’axtesinb’il aawe xb’aan li Dios. K’a’ru neke’xk’ut li aatin “mertoom” (raqal 19) ut “kixq’axtesi” (raqal 5) chirix li naraj li Dios naq taab’aanu?
Li Awa’b’ej Spencer W. Kimball kixch’olob’: “Sa’ li Iglees, jun mertoomil a’an jun loq’laj musiq’ejil malaj ruchich’och’il teneb’ahom li tento taaq’axtesimanq wi’ resil. Xb’aan naq chixjunil li k’a’aq re ru re li Qaawa’, laa’o mertoomo sa’ xb’een li qatib’el, li qak’a’uxl, li qajunkab’al, ut li k’a’ru wan qe. (Chi’ilmanq Tzol’leb’ ut Sumwank 104:11–15). Jun tiik aj mertoom a’an li naxk’anjela chi tiik li taqlank, narileb’ lix komoneb’, ut narileb’ li neb’a’ ut li wan rajom ru” (chi’ilmanq “Los Servicios de Bienestar: El Evangelio en acción,” Liahona, febrero 1978, 111).
Chi’ilmanq ajwi’ “La ley de consagracion” (video), Biblioteca del Evangelio.
The Law of Consecration
Tzol’leb’ ut Sumwank 52:9–11, 22–27
Naru ninb’oqeb’ li was wiitz’in chi chalk rik’in li Kristo yalaq ta b’ar ninxik.
Naq li Qaawa’ kixtaqlaheb’ naab’al laj jolominel sa’ li Iglees aran Missouri, kixye reheb’ naq te’roksi li hoonal sa’ lix b’eenikeb’ re “te’jultikanq aatin chire li b’e” (raqal 25–27). Chan ru naru nakawotz li evangelio “chire li b’e,” malaj sa’ xhoonalil li k’a’ru nakab’aanu sa’ laa yu’am?
Li Qaawa’ nikinixtenq’a chixnajtob’resinkil wib’ chiru li b’alaq’.
Rik’in naq naab’aleb’ neke’xye naq yookeb’ chixk’ulb’al musiq’ejil k’utb’esihom, eb’ laj santil paab’anel sa’ xtiklajik li Iglees ke’wan xk’a’uxl naq te’b’alaq’iiq. K’a’ru li q’usum kixk’e li Qaawa’ reheb’ sa’ Tzol’leb’ ut Sumwank 52:14? K’a’ru li kixsik’ ru xb’aanunkil? (che’ilmanq li raqal 14–19).
Jun k’ojob’anb’il na’leb’ a’an jun na’leb’ nak’iilasutiman chi kok’ aj xsa’ ut chi ch’olch’o. Junjunq reetalil, a’an li ajlank chi ka’kab’ malaj naq na’el chaq li saq’e eq’la ut naq namuqun sa’ xraqik li kutan. Ma wan xkomoneb’ chik li naru nakak’oxla? Naq taatzol Tzol’leb’ ut Sumwank 52:14–19, k’e reetal b’ar wan lix k’uub’anb’il na’leb’ li Qaawa’ re najtob’resink-ib’ chiru li b’alaq’. Maare us raj xk’eeb’al reetal naq li “tuulan xmusiq’” a’an jun eek’ahom re tuulanil ut jalb’a-k’a’uxlej; “tuulan” naraj naxye kuyuk ut ramok-ib’; ut “nawaklesin” naraj naxye k’utuk, chaab’ilob’resink, ut kab’lank. K’a’ut naq lix k’ojob’anb’il na’leb’ li Qaawa’ na’aatinak chirix li seeb’al a’an, jo’ ajwi’ li ab’ink chiru? Chan ru nakawoksi li na’leb’ a’in re xnajtob’resinkil aawib’ chiru li b’alaq’?
Xch’olob’ankileb’ li aatin ch’a’aj. Sa’ li aplicacion Biblioteca del Evangelio, naru nakapitz’ xb’een junaq li aatin ut chirix a’an taasik’ ru b’ar wi’ naxye “Definir.” A’an tatxk’am sa’ lix ch’olob’ankil li aatin a’an. Yal xb’aanunkil a’an naq taataweb’ aatin li ink’a’ nakanaweb’ ru—malaj aatin li nakanaw ru a’b’an nakawaj xtawb’al xkomon aana’leb’ chirix.
B’ar wan junjunq reheb’ li b’alaq’ sa’eb’ li qakutankil? Chan ru naru naqanaw naq yooko chi b’alaq’iik?
Qayehaq, naru nakak’e reetal k’a’ru nawulak chawu sa’ li kaxmu, sa’ li son, ut sa’ internet rik’in xtenq’ li raqal “Chatb’eeq sa’ xsaqen li Dios” sa’ Choq’ re Xkawilaleb’ li Saaj: Jun tenq’ re xsik’b’al ru laa b’e, 16–21.
Chi’ilmanq ajwi’ Gary . Stevenson, “Minaab’alaq’i,” Jolomil ch’utub’aj-ib’ re octubre 2019; “Kʼam wan inbʼe,” Eb’ li B’ich, 55; Temas y Preguntas, “Buscar la verdad y evitar el engaño,” Biblioteca del Evangelio.
Naru ninsik’ li Qaawa’ naq nikinixrahob’tesi li k’a’ru neke’xb’aanu li was wiitz’in.
Ma xraho’ jun sutaq aach’ool xb’aan naq jun chik kristiaan ink’a’ xb’aanu li xye? A’an li ke’xk’ul laj santil paab’anel aj Colesville, Nueva York, li ke’royb’eni xk’ojob’ankileb’ rib’ sa’ xch’och’ laj Leman Copley, aran Ohio. Re xtzolb’al a’an, naru nakawil xjolomil li tasal 54 (chi’ilmanq ajwi’ Santos, 1:129–131; “Un ‘obispo de mi iglesia’,” sa’ Revelaciones en contexto, 83–84). Wi ta wankeb’ raj aawamiiw sa’ xyanqeb’ li komon aran Colesville, k’a’ raj ru na’leb’ li taataw sa’ li tasal 54 li taawotz raj rik’ineb’?
Lix ch’och’ laj Leman Copley
Us xaq reheb’ li saqeb’ ru xch’ool.
Sa’eb’ li raqal a’in, li Qaawa’ kiraatinaheb’ li b’ihom jo’ ajwi’ li neb’a’; maare us raj xk’eeb’al reetal chan ru naq jalan lix na’leb’ choq’ re li junjunq chi ch’uut. K’a’ru nakataw sa’eb’ li raqal a’in li wan xyaalalil sa’ laa yu’am laa’at?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Naru ninwan chi maak’a’ inb’alaq’.
-
Re xtenq’ankileb’ laa kok’al chixtzolb’al k’a’ru naraj naxye wank chi maak’a’ li b’alaq’, naru taawil Tzol’leb’ ut Sumwank 51:9 ut taawotz seraq’ chirixeb’ kok’al li neke’xsik’ ru wank chi maak’a’eb’ xb’alaq’. Naru nakawoksiheb’ jalam-uuch, malaj kok’ muñeek yiib’anb’ileb’ rik’in calcetin malaj rik’in hu re naq chaab’ilaqeb’ chi us li kok’ seraq’. Chan ru nokorosob’tesi li Qaawa’ naq naqayal qaq’e chi wank chi maak’a’ qab’alaq’?
-
Naru tatb’atz’unq rik’ineb’ laa kok’al. Chirix a’an, yehomaq chan raj ru naq jalan raj ki’el li b’atz’unk wi xeb’aanu raj rik’in b’alaq’. K’a’ut naq aajel ru naq “took’anjelaq chi maak’a’ qab’alaq’” chiqib’il qib’?
Tzol’leb’ ut Sumwank 52:10; 53:3; 55:1
Nink’ul li maatan re li Santil Musiq’ej rik’in li k’ehok uq’ej sa’ jolomej.
-
Sa’ Tzol’leb’ ut Sumwank 51–57 na’aatinak naab’al sut chirix xk’ulb’al li Santil Musiq’ej rik’in li k’ehok uq’ej sa’ jolomej. Naru nakawoksi a’an re xtzolb’aleb’ li kok’al chirix li k’ojob’anb’il k’anjel a’an. Qayehaq, naru taawoksi junaq jalam-uuch b’ar wi’ jun ch’ina al yoo chi k’ojob’aak ut taach’olob’ k’a’ru yoo chi k’ulmank. Kanab’eb’ chixpoq’b’al xsa’ li ruq’eb’ rajlal sut naq te’rab’i li ch’ol aatin “rik’in xk’eeb’al li uq’ej” naq yooqat chirilb’al Tzol’leb’ ut Sumwank 52:10; 53:3; 55:1.
-
Naru ajwi’ nekeb’icha “Li Santil Musiq’ej” (B’ichleb’aal choq’ reheb’ li Kok’al, 56) malaj junaq chik b’ich chanchan a’an. Tenq’aheb’ laa kok’al chixtawb’aleb’ aatin ut ch’ol aatin sa’ li b’ich li neke’aatinak chirix li maatan re li Santil Musiq’ej.
Li Dios naxk’e jun k’utb’il eetalil li nikinixtenq’a re naq ink’a’ tinb’alaq’iiq.
-
Re k’utuk chirix lix k’ojob’anb’il na’leb’ li Qaawa’ re najtob’resink-ib’ chiru li b’alaq’, naru nakatikib’ rik’in xtenq’ankileb’ li kok’al chixtawb’aleb’ eetalil—sa’ li qasutam, chiru helhookil t’ikr malaj yal t’ikr wankeb’ xb’onol, malaj sa’ li qayu’am. Tenq’aheb’ chixtawb’al lix k’ojob’anb’il na’leb’ li Qaawa’ sa’ Tzol’leb’ ut Sumwank 52:14–15. K’e reetal naq te’xtaw ruheb’ li aatin li ink’a’ neke’xnaw ru sa’eb’ li raqal a’in. Chan ru taqoksi li k’ojob’anb’il na’leb’ a’in re xk’eeb’al reetal li yaal?
Junelik tento tinwoxloq’iheb’ lin sumwank.
-
Rik’in aawaatin, wotz rik’ineb’ laa kok’al li ke’xk’ul laj santil paab’anel li ke’wulak chi wank sa’ lix ch’och’ laj Leman Copley (chi’ilmanq lix tiklajik li tasal 54). Eb’ laa kok’al naru te’xk’oxla naq a’aneb’ komon neke’wulak aran Ohio. K’a’ raj ru xe’reek’a chirix naq laj Leman kixq’et li sumwank ki’ok wi’? K’a’ru naxk’ut chiqu li seraq’ a’in chirix roxloq’inkileb’ li qasumwank malaj qayeechi’ihom? Ilomaq Tzol’leb’ ut Sumwank 54:6 re xtawb’aleb’ li osob’tesihom neke’xk’ul li kristiaan li neke’roxloq’i xsumwank.
Naru nawoksiheb’ li osob’tesihom ak xk’ehom we li Dios re rosob’tesinkileb’ li was wiitz’in.
-
Re aatinak chirix li tasal 55, maare us raj naq taach’olob’ naq laj William W. Phelps a’an jun aj tz’iib’ sa’ periodico li kitzolok chirix li evangelio ut ki’ok sa’ li Iglees. Il Tzol’leb’ ut Sumwank 55:1–4 rik’ineb’ laa kok’al, ut tenq’aheb’ chixk’eeb’al reetal k’a’ru kiraj li Dios naq tixb’aanu laj William. Chan ru kixk’uub’ roksinkil lix seeb’al laj William? A’in naru nekexxk’am chixtz’ilb’al rix chan ru naq li Dios nokoxb’oq chiroksinkileb’ li qaseeb’al re rosob’tesinkileb’ li ralal xk’ajol.
Re xtawb’al xkomon chik li na’leb’, chi’ilmanq li hu Amigos re li po a’in.