“5–11 mayo: “Li k’a’ru yeechi’inb’il … taatz’aqloq ru”: Tzol’leb’ ut Sumwank 45,” Kim, Taaqehin—Choq’ re li ochoch ut li iglees: Li Tzol’leb’ ut Sumwank 2025 (2025)
“Tzol’leb’ ut Sumwank 45,” Kim, Taaqehin—Choq’ re li ochoch ut li iglees: 2025
5–11 mayo: “Li k’a’ru yeechi’inb’il … taatz’aqloq ru”
Tzolʼlebʼ ut Sumwank 45
Li k’utb’esinb’il na’leb’ wan sa’ li tasal 45 kik’ulman, jo’ chanru naxye li na’leb’ sa’ xtiklajik, rik’in “[xsahileb’] sa’ xch’ool laj santil paab’anel.” Ut wan naab’al li k’a’ru nasaho’ wi’ li ch’oolej sa’ li tasal a’in. Arin, li Kolonel naxye lix chaab’il yeechi’ihom naq taatz’aamanq chiqix chiru li Yuwa’b’ej (che’ilmanq li raqal 3–5). Naxye naq lix sumwank li junelik nakana naxik chiru chixjunil li ruchich’och’, jo’ “jun aj k’amol esil … re xkawob’resinkil li b’e chiru” (raqal 9). Ut naxye profeetil aatin chirix li xkab’ xk’ulunik. Li Kolonel naxb’aanu chixjunil a’in sa’ ajwi’ li hoonal naq naxch’olob’ naq ch’a’ajeb’ ru li kutankil a’in (chi’ilmanq raqal 34), sa’ xk’ab’a’ li xiwxiw te’k’ulmanq rub’elaj li xkab’ xk’ulunik. A’b’an li xiwxiw a’an, li aak’ab’ a’an moko jwal kaw ta re ta tixchup xsaqenkil li oyb’enihom. “Xb’aan naq chi yaal ninye eere,” chan li Qaawa’, “naq laa’in … jun saqen li nalemtz’un sa’ q’ojyin” (raqal 7). Ka’ajwi’ xb’aan a’an naq tento taqak’ul li k’utb’esinb’il na’leb’ a’in—chaab’il na’leb’ ut q’usum li naraj xk’eeb’al a’an—rik’in sahil ch’oolejil.
Li na’leb’ re tzolok sa’ li ochoch ut sa’ li iglees
Li Jesukristo a’an aj Aatinanel chiwix chiru li Yuwa’b’ej.
Naq naqeek’a naq moko nim ta qawankil malaj naq ink’a’ k’ulub’ejo chiru li Dios, naru naqataw xk’ojob’ankil qach’ool sa’eb’ li raatin li Kolonel sa’ Tzol’leb’ ut Sumwank 45:1–5. Naq nakatzoleb’ li raqal a’in, k’oxlaheb’ li patz’om jo’eb’ a’in:
-
K’a’ru li aatin malaj ch’ol aatin sa’eb’ li raqal a’in nakaweek’a naq wankeb’ xyaalal choq’ aawe?
-
Jun aj aatinanel a’an jun kristiaan li natenq’an malaj na’aatinak chi saqen ru chirix junaq kristiaan malaj na’leb’. Jo’ neke’xye li raqal a’in, chan ru naq li Jesukristo naxb’aanu a’an choq’ aawe? K’a’ru nak’ehok re chixb’aanunkil a’an?
-
K’a’ru naxk’ut chawu li aatin naxye li Kolonel re li Yuwa’b’ej? (raqal 4–5).
Naru ajwi’ nakatzol li na’leb’ kixk’ut li Elder Dale G. Renlund chirix li Jesukristo, laj Aatinanel chiqix, sa’ “Sik’omaq ru anajwan” (Jolomil ch’utub’aj-ib’ re octubre 2018). Jo’ naxye li Elder Renlund, k’a’ru xjalanil li rajom li Kolonel chiru li rajom laj Lucifer?
Eb’ li raqal a’in naru nakatxtenq’a chixtawb’al ru lix k’anjel li Kolonel jo’ aj Aatinanel. Naq taatzoleb’, naru nakatz’iib’aheb’ ch’ol aatin malaj na’leb’ li naru taawotz rik’ineb’ laa was aawiitz’in: 2 Nefi 2:8–9; Mosiah 15:7–9; Moroni 7:27–28; Tzol’leb’ ut Sumwank 29:5; 62:1. K’a’ut naq wankeb’ xyaalal li ch’ol aatin a’an choq’ aawe?
Chi’ilmanq ajwi’ “Sachso ninkana,” Eb’ li B’ich, 118; Temas y preguntas, “Expiación de Jesucristo,” Biblioteca del Evangelio; “El Mediador” (video), Biblioteca del Evangelio.
The Mediator
Li evangelio a’an jun xaqxookil eetalil choq’ reheb’ li tenamit.
Sa’ li najter kutan, jun xaqxookil eetalil a’an jun eetalil li nak’amman sa’ li pleet re xch’utub’ankileb’ ut xjunajinkileb’ li ch’uut aj pleet. Jun xaqxookil eetalil naru ajwi’ nak’anjelak jo’ jun b’isleb’ naru chi b’ise’k wi’ k’a’ruhaq chik. Naq nakawil Tzol’leb’ ut Sumwank 45:9–10, k’oxla chan ru naq eb’ laa sumwank rik’in li Qaawa’ wankeb’ jo’ xaqxookil eetalil chawu.
Li Jesukristo taak’ulunq wi’chik sa’ loq’alil.
Li xkab’ xk’ulunik li Qaawa’ nayeeman naq a’an “nim” ut “xuwajel” (Malakias 4:5). Sa’ Tzol’leb’ ut Sumwank 45, eb’ li na’leb’ a’in neke’xk’am rib’. Sa’ li k’utb’esinb’il na’leb’ a’in wankeb’ tijom ut yeechi’ihom li neke’k’ehok oyb’enihom chirix lix k’ulunik li Qaawa’. Naq taatzoleb’ li raqal 11–75, k’oxla chan ru taakawresi aawib’ choq’ re li xkab’ xk’ulunik li Qaawa’ rik’in paab’aal chirix li Kristo sa’ xna’aj li xuwak. Tz’iib’a li k’a’ru taataw sa’ jun kaaxukuut jo’ a’in:
|
Profeetil aatin malaj yeechi’ihom |
Li k’a’ru naru ninb’aanu laa’in |
|---|---|
Profeetil aatin malaj yeechi’ihom Jun saqen (li evangelio) taachalq rik’ineb’ li neke’reek’a naq wankeb’ sa’ aak’ab’ (raqal 28) | Li k’a’ru naru ninb’aanu laa’in Xk’ulb’al li saqen—ut xwotzb’al (raqal 29) |
Profeetil aatin malaj yeechi’ihom | Li k’a’ru naru ninb’aanu laa’in |
Profeetil aatin malaj yeechi’ihom | Li k’a’ru naru ninb’aanu laa’in |
Profeetil aatin malaj yeechi’ihom | Li k’a’ru naru ninb’aanu laa’in |
Sa’ li video “Los corazones de los hombres estan desfalleciendo” (Biblioteca del Evangelio), k’a’ru li na’leb’ kixk’e li Awa’b’ej Russell M. Nelson re qatenq’ankil chixnumsinkileb’ li xiwxiw rik’in tuqtuukilal?
Men's Hearts Shall Fail Them
Tzolʼlebʼ ut Sumwank 45:31–32, 56–57
Naru “ninxaqli sa’eb’ li na’ajej sant” ut ink’a’ tin’eek’asiiq.
K’a’ru nakatzol sa’ Tzol’leb’ ut Sumwank 45:31–32, 56–57 chirix xkawresinkil aawib’ choq’ re lix k’ulunik li Qaawa’? B’ar wankeb’ laa “santil na’aj”? K’a’ru naraj naxye naq “ink’a’ too’eek’asiiq”? K’a’ru naru nakab’aanu re naq santaqat wi’chik chi us?
K’e reetal naq li Qaawa’ ki’aatinak chirix li jaljookil ru aatin chirixeb’ li lajeeb’ chi tuq’ixq, b’ar wi’ kixjuntaq’eeta li aseeyt rik’in li yaal ut li Santil Musiq’ej. Naru nakawil li jaljookil ru aatin sa’ Mateo 25:1–13 rik’in li na’leb’ a’an sa’ laa k’a’uxl. K’a’ chik chi na’leb’ nakataw?
Chi’ilmanq ajwiʼ David A. Bednar, “Wi nekenaw wu laa’in,” Jolomil ch’utub’aj-ib’ re octubre 2016.
Li jaljookil ru aatin chirixeb’ li lajeeb’ chi tuq’ixq, xb’aan laj Dan Burr
Tzolʼlebʼ ut Sumwank 45:11–15, 66–71
Li Sion a’an jun kolb’a-ib’ na’ajej choq’ reheb’ lix santil paab’anel li Dios.
Eb’ laj santil paab’anel sa’ xkutankil laj Jose Smith k’eek’ookeb’ chaq xch’ool chixk’ojob’ankil Sion, li Ak’ Jerusalen (chi’ilmanq Eter 13:2–9; Moises 7:18, 62–64). K’a’ru nakatzol chirix Sion—li najter tenamit sa’ xkutankil laj Enok jo’ ajwi’ li tenamit re roso’jikeb’ li kutan—sa’ Tzol’leb’ ut Sumwank 45:11–15, 66–71? Sa’eb’ li kutan a’in, li taql re xk’ojob’ankil Sion naraj naxye xk’ojob’ankil li rawa’b’ejihom li Dios a’ yaal b’ar wanko. K’a’ru naru nakab’aanu re tenq’ank chixk’ojob’ankil Sion sa’ li na’ajej wankat wi’?
Li na’leb’ re xtzolb’aleb’ li kok’al
Li Jesukristo a’an aj Aatinanel chiwix chiru li Yuwa’b’ej.
-
Wi nakawaj, tenq’aheb’ li kok’al chixtawb’al ru naq jun aj aatinanel a’an li natenq’an re jun chik kristiaan. Chirix a’an naru nakat-aatinak chirix jalaneb’ chik eetalil re li wank choq’ aj aatinanel li maare neke’xnaw ru a’an (jo’ xtenq’ankil junaq amiiw). Naq teeril Tzol’leb’ ut Sumwank 45:3–5, tenq’aheb’ laa kok’al chixk’eeb’al reetal ani laj Aatinanel chiqix ut chan ru naq nokoxtenq’a.
Naru “tinxaqliiq sa’eb’ li na’ajej sant.”
-
Us raj xk’eeb’al xjalam-uuch jun ochoch, jun li kapiiy, ut jun li santil ochoch sa’ li tzoleb’aal. Chirix a’an naru taak’e kok’ na’leb’ reheb’ laa kok’al chirixeb’ li na’ajej a’an ut taapatz’ reheb’ naq te’xaqliiq chixk’atq li jalam-uuch li yookat wi’ chi aatinak. Patz’ reheb’ naq te’kanaaq chi ch’anch’o naq yooqat chixyaab’asinkil li xb’een raqal sa’ Tzol’leb’ ut Sumwank 45:32. B’ar wankeb’ junjunq reheb’ li santil na’ajej naxk’e qe li Dios? Tenq’aheb’ laa kok’al chixtawb’al ru naq “xaqliik sa’eb’ li na’ajej sant ut … ink’a’ te’eek’asiiq” naraj naxye xsik’b’al ru li k’a’ru us sa’ chixjunil li hoonal, maak’a’ na’ajman re li yooq chi k’ulmank. K’a’ru naru taqab’aanu re naq li qochoch a’anaq jun na’ajej sant?
Lix evangelio li Jesukristo naxk’ut xtusulal li wank sa’ li ruchich’och’.
-
Wi nakawaj, naru nakach’olob’ naq junxil chaq, jun eetalil a’an jun bandera li nak’ame’ sa’ li pleetik. Nak’anjelak re naq eb’ laj pleet te’xnaw b’ar te’xch’utub’ rib’ ut k’a’ru te’xb’aanu. Ilomaq Tzol’leb’ ut Sumwank 45:9, ut yehomaq chan ru naq li evangelio naxk’ut xtusulal li wank. Maare taawulaq chiruheb’ laa kok’al xyoob’ankil junaq xtusulal li wank malaj eetalil, ut eb’ ajwi’ li jalam-uuch malaj aatin li tixch’olob’ li reek’ahomeb’ choq’ re li Kolonel.
Li evangelio chanchan chik jun xaqxookil eetalil, jun eetalil, malaj bandera.
Li Jesukristo taak’ulunq wi’chik.
-
Li sachok taak’ulmanq rub’elaj li xkab’ xk’ulunik li Qaawa’ naru naxk’eheb’ xxiw li kok’al. Xjayalinkileb’ a’an rik’in li Jesukristo naru naxtenq’aheb’ chi ilok chi uub’ej rik’in paab’aal. Naru nakapatz’ reheb’ k’a’ru neke’reek’a naq junaq chaab’il kristiaan nawulak chirula’aninkileb’, maare li mama’b’ej malaj junaq amiiw. Chan ru neke’xkawresi rib’ choq’ re li ula’anink a’an? Naru nakak’ut jun xjalam-uuch li Kolonel ut taawil Tzol’leb’ ut Sumwank 45:44–45. Wotzomaq cherib’il eerib’ k’a’ru nekereek’a chirix lix k’ulunik li Kolonel.
-
Re xtenq’ankileb’ laa kok’al chireek’ankil xsahileb’ xch’ool chirix lix k’ulunik li Kolonel, naru nakatz’iib’a chiruheb’ kok’ hu junjunq reheb’ li yeechi’ihom wankeb’ sa’ li tasal 45 (che’ilmanq, jo’ eetalil, li raqal 44–45, 51–52, 55, 58–59, 66–71). K’eheb’ li kok’ hu reheb’ laa kok’al ut patz’ reheb’ naq te’xtaqsi li ruq’ naq taayaab’asimanq li yeechi’ihom wan rik’ineb’. Aatinanqex chirixeb’ li yeechi’ihom a’an. Naru ajwi’ nekeb’icha jun li b’ich chirix li xkab’ xk’ulunik li Qaawa’, maare “Naq taak’ulunq li Kolonel” (B’ichleb’aal choq’ reheb’ li Kok’al, 46–47).
Tenq’aheb’ li kok’al chixk’eeb’al reetal li Musiq’ej. Naq yooqat chixtzolb’aleb’ laa kok’al, ye reheb’ jo’q’e nakaweek’a li Santil Musiq’ej. Ye chan ru nakak’e reetal naq wan li Musiq’ej. Qayehaq, maare sa’ xb’ichankil junaq li b’ich chirix li Kolonel nakaweek’a li tuqtuukilal malaj sahil ch’oolejil.
Re xtawb’al xkomon chik li na’leb’, chi’ilmanq li hu Amigos re li po a’in.