Mêyi a Dipinguluja

Muanjelu Moloni wakaleja bitata bia ngolo kudi Joseph Smith, Oliver Cowdery, David Whitmer, ne Martin Harris mu ditu pabuipi ne nzubu wa Whitmer mu Fayette, New York. Baledi ba Joseph bavua bakumbula dîku bena Whitmer mu tshikondu atshi. Lucy Mack Smith, mamuenda wa Joseph, wakumvuija tshivua dimanya dia tshishima atshi tshikala pa bajadiki:

“Tshivua diba isatu anyi inayi. Mrs. Whitmer ne Mr. Smith ne mema tuvua basomba mu tshibambalu tshia dilala. Mvua musomba ku luseke lua bulalu. Pakabuela Joseph, wakadiupuila ku luseka luanyi. Tatu! Mamu!’ muakambaye. ‘Kanuena bamanya mundi mua kuikala musankishibua. Mukalenga muenza bua bitata bilejibua kudi bantu basatu ku luseka luanyi, badi bamona pabu muanjelu ne nebikala ne bua kujadika bua bulelela bua tshimvua muamba. Bua bamanya nkayabu ne tshivua ngendakana bua kudinga bantu to. Ne ndi ne nguvuilu wa mu sulakana ku bujitu bukola, buvua bumpita bua kutentemuna. Kadi nebikala mua kuambula tshitupa mpindieu, ne tshidi tshisankisha anyima wanyi bualu ntshiakuikala nkayanyi mu buloba nansha. Pashisha Martin Harris kubuelaye. Uvua mumueneka mutuishibua ne disanka dipita. Pashisha wakajadika bua tshivuaye mumona ne mumvua, bu muvua bakuabu kabidi benza, Oliver ne David. Bujadiki buabu budi menamena bua momumua ne budi mu Mukanda wa Molomo. …

“Martin Harris uvua nkayenda mumueneka kayi mukumbana bua kufila ngumvuilu wenda mu mêyi. Wakamba ne, ‘mpindieu ngakamona muanjelu wa mu Diûlu udi bushuwa mujadika bua bulelela bua bionsu bimvua mumvua pa bidi bitangila muandiku, ne mesu anyi akamumona. Ngakamona kabidi bitata ne ngakabilenga ne bianza bianyi ne ndi mua kujadika bia momumua kudi buloba bujima. Kadi ndi mupeta buanyi bujadiki budi miaku kayiyi mua kuamba, nansha muakulu kauyi mua kumvuija, ne ndi mbenesha Nzambi mu bushuwa bua anyima wanyi ne bualu mungenza mema, menamema, mujadiki wa bunena bua mudimu wenda ne tuipatshila tuenda bua buimpa [bua] bana ba bantu.’ Oliver ne David bakadisanga kabidi nenda mu kanemu mu kutumbisha Nzambi bua buimpa ne lusa bienda. Tuakalukila kuetu [ku Palmyra, New York,] dituku diakalonda ne musangelu, mu disanka ne kasumbu ka bantu.”

Lucy Mack Smith uvua kabidi popu pavua Bajadiki Muanda Mukulu bapingana ku dimanya diabu:

“Panyima pa Bajadiki aba bapingana ku nzubu, muanjelu wakamuenekela kabidi Joseph; diba adi Joseph wakafila bitata mu bianza bienda. Dilolo adi tuakenza tshisangilu, mu tshiotshi bajadiki bonsu bakafila bujadiki pa bintu bidi biamba kulu eku; ne bonsu ba ku dîku dietu, nansha Don Carlos [Smith], uvua muikala ne bidimu 14, wakajadika bua bulelela bua tshipungu tshia matuku a ndekelu—tshivua tshibanjijibua.”

Mu dikumbaja ku Bajadiki Basatu ne Bajadiki Muanda Mukulu, Mary Whitmer, mamuenda wa David Whitmer, uvua kabidi mubeneshibua bua kuikala mujadiki wa bitata bia ngolo. Muanjelu Moloni wakamulejabi mu tshivulukilu tshia dimanya dia milambu yakenzaye pavua Joseph, Emma, ne Oliver basomba ku nzubu kuenda. “Uvua ne lulamatu ne munanukidi mu mudimu weba mukola,” ki muvua Moloni mumuambila. “Nanku bidi bikumbana ne upeta bujadiki bua ne ditabuija dieba dikankamana.”