Stap Yusum Kam Folem Mi—Blong Hom mo Jos

Wan stamba tingting blong from wanem yumi kam tugeta long Sandei Skul klas i blong sapotem mo leftemap tingting blong wanwan long yumi taem yumi traehad blong save mo folem Jisas Kraes. Wan simpol wei blong mekem hemia i blong askem wan kwestin olsem “?Wanem nao Tabu Spirit i bin tijim long yu long wik ia taem yu bin stadi long ol skripja wetem Kam Folem Mi?” Ol ansa long kwestin ia i save lidim evriwan blong toktok raon long ol samting we oli gat mining we oli bildimap fet long Jisas Kraes mo gospel blong Hem.

Afta, yu save invaetem evriwan blong toktok raon long sam tingting we oli putum i stap long Kam Folem Mi. Eksampol, wan aedia blong stadi i save givim sam tingting blong go lukaotem Doktrin mo Ol Kavenan 19:15–20, blong stap lukaotem olsem wanem Sevya i tokbaot safaring blong Hem. Yu save askem ol memba blong klas blong serem wanem oli filim taem oli ridim wanem Hem i tokbaot mo tokbaot olsem wanem hemia i jenisim wei we oli tingting abaot Hem. O yu save yusum smoltaem blong stap stadi ol ves ia olsem wan klas.

Taem kworom blong ol Aronik Prishud mo Ol Yang Woman Klas oli mit long ol Sandei, i tru, stamba tingting blong olgeta bae i defren long wan Sandei Skul klas. Sam moa tingting blong stap helpem yumi wanwan blong lanem abaot gospel blong Jisas Kraes, hem i we ol grup ia oli mit blong kaonsel tugeta tu, abaot ol wei blong mekem i hapen wok blong sevem man mo fasin blong kam olsem God (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 1.2), olsem we presidensi blong klas o kworom blong olgeta i daerektem.

From risen ia, wan memba blong presidensi blong kworom o klas i mas stap lidim ol toktok raon long wanwan miting blong kworom o klas abaot ol wok blong olgeta. Eksampol, oli save kaonsel tugeta abaot ol wok we oli stap mekem blong laef folem gospel, givhan long ol pipol we oli gat nid, serem gospel o tekempat long wok blong tempol mo famli histri.

Afta long taem ia blong kaonsel tugeta, wan tija bae i lidim klas o kworom blong stap lanem gospel tugeta. Oli save asaenem ol lida blong adalt o ol memba blong klas o kworom blong oli save tij. Ol presidensi blong klas o kworom oli wok tugeta wetem ol lida blong adalt blong mekem ol asaenmen ia.

Ol pipol we oli asaenem olgeta blong tij, oli mas rere blong yusum sam tingting blong stap lanem samting insaed long aotlaen blong evri wik long Kam Folem Mi. Long wanwan aotlaen, pikja aekon ia i soem wan aktiviti we i stret blong ol yut mo we i go stret wetem wanem we oli stap lanem long seminari. Be, eni tingting we oli putum long aotlaen ia, oli save yusum olsem wan aktiviti blong stap lanem samting we i blong ol yut.

Blong kasem wan eksampol blong ajenda blong ol miting blong kworom mo klas, luk long apendiks D.

Fasin blong yu blong stap rere blong tijim Praemeri i stat taem yu stadi long ol skripja yuwan mo wetem famli blong yu. Taem yu mekem olsem, letem tingting blong yu i open long ol tingting mo filing long saed blong spirit mo ol niu tingting we oli kam tru long Tabu Spirit abaot ol pikinini insaed long Praemeri klas blong yu. Stap prea oltaem. Spirit i save givim insperesen long yu wetem ol aedia blong helpem olgeta blong lanem gospel blong Jisas Kraes.

Taem yu stap rere blong tij, yu save kasem moa insperesen taem yu stap lukluk tru long ol tijing aotlaen insaed long lesen buk ia. Wanwan aotlaen insaed long Kam Folem Mi—Blong Hom mo Jos i gat wan seksen we taetol, “Ol Aedia blong Stap Tijim Ol Pikinini.” Tingting long ol aedia ia olsem sam tingting nomo blong mekem yu luksave insperesen blong yu. Yu save ol pikinini insaed long Praemeri klas blong yu—mo bae yu kam blong save olgeta, iven moa gud taem yu stap mitim olgeta long klas. God i save olgeta tu; mo bae Hem i givim insperesen long yu blong yu save ol bes wei blong tijim mo blesem olgeta.

Ol pikinini long klas blong yu oli bin mekem sam long ol aktiviti long Kam Folem Mi wetem ol famli blong olgeta. Hemia i ORAET. Blong ripripitim samting, hem i gud. Tingting blong stap invaetem ol pikinini blong serem wetem wanwan long olgeta, wanem we oli bin lanem long hom. Mo tu, yu mas mekem plan blong ol wei blong ol pikinini oli tekempat, nomata sapos oli no stap lanem samting long hom. Ol pikinini oli lanem ol trutok blong gospel moa gud taem oli ripripitim tijing blong ol trutok ia tru long ol defdefren aktiviti. Sapos yu faenem se wan aktiviti blong lanem samting i wok gud long ol pikinini, tingting blong ripitim aktiviti ia, speseli sapos ol pikinini we yu stap tijim oli ol smol pikinini.

Long ol manis we oli gat faef Sandei, ol tija blong Praemeri oli save jusum blong putum wan o moa long ol aktiviti ia blong stap lanem samting, blong i tekem ples blong Kam Folem Mi aotlaen blong namba faef Sandei wetem wan o moa long ol aktiviti blong stap lanem samting insaed long “Apendiks B: Blong Praemeri—Stap Rere Ol Pikinini blong Yu blong Stap long Kavenan Rod blong God blong wan Laef Taem