Na Cava Na iBalebale Nida dua na Tisaipeli i Jisu Karisito?

Wase e 11 ni Cakacaka e volai tiko ena imatai ni gauna “era a vakatokai na tisaipeli mera lotu Vakarisito” (tikina e 26). Sa dua na ka dokai ka itavi tabu mo kilai ni o dua na tisaipeli i Karisito ka mo kacivi ena Yacana. Me vaka e tukuna o Peresitedi M. Russell Ballard: “Eda kila beka na noda kalougata ena noda taura vei keda na yaca ni Luvena Daulomani e Duabau ga na Kalou? Eda kila beka na kena bibi oqori? Na yaca duadua ga ni iVakabula sai koya na yaca duadua ga e rukui lomalagi e rawa kina vua na tamata me vakabulai” (“Na Bibi ni Dua na Yaca,” Liaona, Nove. 2011, 79).

Na cava na kenai balebale vei iko mo Vakarisito—e dua na tisaipeli i Jisu Karisito? Na cava na kena ibalebale vei ira na lewe ni nomu kalasi se kuoramu? Na veivakauqeti cava e yaco ni o taura na Yacana vei iko? O na rairai vakasamataka talega na veigauna o vakauqeti kina mai na ivakaraitaki ni dua ka a tisaipeli dina i Karisito.

Nio vakavakarau mo veivakavulici, me ikuri ni wiliki ni Cakacaka 10–15, navuca mo wilika e dua se sivia na itukutuku ni koniferedi raraba e kune ena “iVurevure Veitokoni.”

Me vukei ira na lewe ni nomu kalasi se kuoramu mera kila vinaka na kena ibalebale meda dua na tisaipeli i Jisu Karisito, sa rawa mo sureti ira mera vakacavara na iyatuvosa oqo: “E dua na tisaipeli i Jisu Karisito sai koya e dua ka …” E rawa ni ra railesuva na Cakacaka 11:19–26, ka vaqara na veivakararamataki ena tikina e 21, 23–24, 26 me baleta na nodra vakaraitaka na lewe ni Lotu oqo ni ra tisaipeli. E vakauqeta vakacava na noda vakanananu kei na itovo na noda dau muri Jisu Karisito? Na vei itaviqaravi vakaoqo e rawa ni vakuria na veivosaki oqo.

• E rawa ni veivuke me veivosakitaki se na cava e dua na tisaipeli i Jisu Karisito (raica na itukutuku nei Elder Robert D. Hales ena “iVurevure Veitokoni”). Sa rawa mo kerei ira na itabagone mera wasea eso na ivakavuvuli i Jisu Karisito e vakauqeti ira kei na ka era sa vulica mai na Nona ivakaraitaki. Sa rawa mera vakasaqara na ivolanikalou ena “iVurevure Veitokoni,” se so tale era kila, me baleta na vakasama eso. Sa rawa mera vola ena vava ni volavola na veika era sa vulica me baleta na iVakabula mai na veimalanivosa. Sa rawa ni ra qai veivosakitaka na sala eso e rawa nira muria kina ena yalodina na ivakavuvuli kei na ivakaraitaki era tuvai tu ena vava ni volavola.

• Kerei ira na lewe ni kalasi se kuoramu mera vakasamataka na kena ibalebale meda vaKarisito. Sa rawa mera cakava e dua na lisi ni ivakarau ni bula era na namaka mera kunea ena nona bula e dua e muri Jisu Karisito (raica, me kena ivakaraitaki, na Joni 13:34–35). Sa rawa mo wasei ira na itabagone kina rua na ilawalawa ka kerea na ilawalawa yadua mera wilika e dua vei ira na itukutuku oqo ka vaqara na ikuri ni itovonibula era na vakuria ki na nodra lisi: Elder Terence M. Vinson, “Tisaipeli Dina ni iVakabula” (Liaona, Nov. 2019, 9–11) and Elder Massimo De Feo, “Loloma Savasava: Sa Keda iVakatakilakila Dina na Tisaipeli i Jisu Karisito” (Liaona, May 2018, 81–83). Sureti ira na itabagone mera vakasamataka vakatitobu e dua na ka ena lisi era vinakata mera vakavinakataka cake.

• Sa rawa mo tarogi ira na lewe ni kalasi se kuoramu ena ibalebale ni nodra kacivi ena yaca i Jisu Karisito. E rawa beka nira wasea na veika era sotava ena gauna a kila kina e dua nira lewe Ni Lotu i Jisu Karisito ni Yalododonu Edaidai. Na cava nai tovo ni yaloda me baleta na kilai nida daumuri Jisu Karisito ka lewe ni Nona Lotu? Sa rawa mera vakadikeva talega na itabagone e vica na ivolanikalou se dua vei ira na itukutuku ena “iVurevure Veitokoni,” ka vakasaqara na veivakararamataki e vakauqeti ira mera bula kilikili kaya na yaca i Jisu Karisito, era taura vei ira E vakayaco-ka vakacava kina digidigi eda vakayacora na noda kacivi ena yaca i Jisu Karisito?

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

• Maciu 5:38–47; 6:19–21; 7:1–5; 25:31–40; Luke 10:25–37; Joni 13:34–35; 14:15 (na ivakavuvuli i Jisu Karisito)

• Maciu 4:1–11; Marika 6:35–44; Luke 4:16–19; 22:39–42; 23:33–34; Cakacaka 10:38 (ivakaraitaki i Jisu Karisito)

• Jeremaia 15:16; Mosaia 5:7–15; Alama 46:12–15; 3 Nifai 27:3–8 (Noda taura vei keda na yaca ni iVakabula)

• Lisa L. Harkness, “Rokova na Yacana,” Liaona, Nove. 2019, 60–62

• Paul B. Pieper, “Mera Taura na Tamata Kecega na Yaca sa Solia na Tamana,” Liaona, Nove. 2018, 43–45

• O Elder Robert D.Hales e vakavulica: Na cava na ibalebale mo dua na tisaipeli ni noda Turaga o Jisu Karisito? Na tisaipeli sa i koya e dua sa papitaiso ka sa lomana me taura vua na yaca ni iVakabula ka muri Koya. Ena sasagataka o tisaipeli me sa vakataki Koya ena nona maroroya na Nona ivakaro ena bula oqo, me vaka ga e dua e vuli cakacaka me laki vakataki nona qasenivuli.

  “E vuqa na tamata era rogoca na vosa tisaipeli ka nanuma ni kena ibalebale ga na ‘dauvakamumuri.’ Ia na bula vakatisaipeli dina sai koya na ivakarau ni bula. Oqo e tukuna tiko ni sega walega ni vuli se vakayacora e dua na lisi ni ivakarau ni tamata yadua. Era bula tiko na tisaipeli me rawa ni solega na itovo i Karisito na nodra gacagaca ni bula, me dua na isulu vakayalo.” (“Yaco Mo Tisaipeli ni Noda Turaga o Jisu Karisito,” Liaona, Me 2017, 46).