Au na Vakaraitaka Vakacava na Loloma Uasivi vei Ira era tu wavoliti au?

Ni oti na nona vakatavulica o Jisu vua “e dua na vu-ni-vunau” na bibi ni ivunau levu e rua—lomana na Kalou ka lomana na wekada—a taroga na vu-ni-vunau, “Ko cei na kai noqu?” (raica na Luke 10:25–29; Maciu 22:35–40). Me kena isau, a wasea na iVakabula e dua na italanoa vakaibalebale baleta e dua na kai Samaria ka solia na nona bula me qarava e dua na tagane Jiu mavoa, a kauti koya kina dua na bure ni vulagi me qaravi, ka sauma na isau ni nona bula. E sega ni vakanamata na kai Samaria kina kedrau duidui o koya kei na tamata oya, ka vakatokai me meca mai vei ira na kai nona, se vakalewai koya se vaqara i ulubale me kakua kina ni veivuke. A qarava na turaga ka vakaleqai tu, dina ga ni tu nona leqa kei na solibula, ka vakaraitaka kina na nona lomana na tamata oya kei na Kalou. Nio vakasamataka vakatitobu na ivakavuvuli ni iVakabula ena Luke 10:25–37, vakasamataka na ibalebale dina ni “lomana … na wekamu me vaka ko sa lomani iko” (tikina e 27).

O na vukei ira vakacava o vakavulica mera kila ni gauna era qaravi ira kina era tu wavoliti ira, era sa vakaraitaka tiko na nodra lomana na Kalou? Na cava e rawa ni vakauqeti ira mera lomani ira ka qaravi ira na tani? Nio vakavakarau, sa rawa mo railesuva na itukutuku nei Peresitedi Russell M. Nelson “Na iKarua ni iVakaro Cecere” (Liaona, Nove. 2019, 96–100).

Me tekivutaki e dua na veivosaki me baleta na vakaraitaki ni loloma cecere vei ira era tu wavoliti keda, e rawa nio kerei ira na lewe ni kalasi se kuoramu mera wasea na veika era vulica me baleta na lomani ira na tani mai na italanoa vakaibalebale ni kai Samaria dauloloma, e tiko ena Luke 10:25–37. Na cava eda vulica me baleta na nodrau veiwekani na imatai kei na ikarua ni ivunau cecere ena Luke 10:27 kei na itukutuku nei Peresitedi Dallin H. Oaks ena “iVurevure Veitokoni”? Na vakasama eso oqo e rawa ni vukei iko mo tomana e dua na veivosaki me baleta na vakaraitaki ni loloma levu cake vei ira era tu wavoliti keda.

• Sa noda ivakaraitaki cecere o Jisu Karisito ena noda vakaraitaka na loloma vua na Kalou ena noda qaravi ira na tani, ka me vakauqeti na lewe ni kalasi se kuoramu ena nodra vulica na Nona ivakaraitaki. Sureta na tamata yadua me vakananuma na bula vakayago i Jisu Karisito ka digitaka e dua na ka e sotavi mai na Nona bula e vakaraitaka na Nona loloma cecere vei ira tale eso. Kerei ira yadua na tamata mera digitaka ka wasea na veika era sotava vata kei na vuna e vakaibalebale kina vei ira. Sureti ira o vakavulica mera vakasamataka e dua na sala era na vinakata mera muria kina na ivakaraitaki ni loloma ni iVakabula. Sa rawa talega mera wasea na nodra nanuma baleta e dua era kila ka muria tiko na ivakaraitaki oqo.

• Wasea ka veivosakitaka kei ira na lewe ni kalasi se kuoramu na itukutuku nei Peresitedi Russell M. Nelson ka kune ena “iVurevure Veitokoni.” Sa rawa mo sureta na lewe ni kalasi se kuoramu mera railesuva e dua se sivia na itukutuku ni koniferedi raraba e cavuti ena ituvatuva oqo, ka vaqara na ivakavuvuli e rawa ni dusimaki keda ena noda sasaga meda lomani ira na tani. E rawa nira vakanamata kina veika oqo: ivakaraitaki ni sala eda rawa ni veiqaravi kina mai na “Na iKarua ni iVakaro Cecere” mai vei Peresitedi Nelson; wase e I, II, kei na VI ena itukutuku nei Peresitedi Oaks “Veilomani ka Bulavata ena Maliwa ni Duidui”; kei na italanoa me baleta na rapete kei na ivakasala vei ira na itabagone mai na “Semati Na Lomada” mai vei Elder Gary E. Stevenson. Sa rawa talega moni wilika vata na Mosaia 2:17 kei na Moronai 7:45–48. Ena rawa ni veivuke me volai na ivakavuvuli era veivosakitaka na itabagone ena vava ni volavola. Sa rawa mera qai veivosakitaka vata na kalasi se kuoramu na sala eso e rawa nira vakayagataka vakavinaka cake kina na ivakavuvuli oqo kina nodra veimaliwai kei ira na lewe ni matavuvale, vata kei ira na itokani, kei na loma ni nodra itikotiko, ena gauna mada ga e vaka me dau dredre ni lomani na tamata.

• Na nodra sasaga na lewe ni kalasi se kuoramu ena cakacaka ni veivakabulai kei na bula vakacerecerei ena vakaibalebale vakalevu ka rekitaki nira vakauqeti ena loloma. Me vukei ira me ra raica na ivakarau e veivakauqeti kina na loloma kina veitiki yadua ni cakacaka ni veivakabulai kei na bula vakacerecerei, (raica na iVoladusidusi Raraba, 1.2) ka vola na va na tikina ena papa. Qai kerei ira na itabagone mera veivosakitaka na sala e rawa ni veisautaka kina na ivakarau ni nodra vakaitavi ena veitikina yadua na uto e sinai ena loloma vei ira na tani. Ena tiko beka na veika era sa sotava oti mai na nodra dui bula se na nodra bula tale eso ka rawa nira wasea.

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

• Dallin H. Oaks, “Veilomani ka Bulavata ena Maliwa ni Duidui,” Liaona, Nove. 2014, 25–28

• Gary E. Stevenson, “Semati Na Lomada,” Liaona, Me 2021, 19–23

• “A Good Samaritan,” “The Greatest Commandment” (videos), ChurchofJesusChrist.org

• E vakavulica o Peresitedi Dallin H. Oaks: “Ia na noda maqusa me muria [na] ikarua ni vunau oqo e sega ni dodonu me vakavuna noda guilecava na imatai, meda lomana na Kalou ena lomada, yaloda, kei na noda nanuma kecega. … Sa dodonu meda saga meda muria na ivunau levu ruarua. Me caka vakakina eda sa muria na sala matailalai ni lawa kei na loloma—ena muri ni vunau kei na lakovi ni salatu ni veiyalayalati, nira lomani tu na wekada ena ilakolako. Eda sa gadreva ena ilakolako oqo na veivakauqeti tabu ena ka me tutaki kei na ka me saqati kei na sala meda loloma ka vakarorogo kina ena veidokai ka veivakavulici ena kena iwalewale. Sa vakabibitaki ena noda ilakolako meda kakua ni vakatanitaka na ivunau eso ia meda vakaraitaka tu na ivakarau taucoko ni kilaka kei na loloma” (“Rua Na iVunau Levu,” Liaona, Nove. 2019, 73–75).

• E vakatavulica o Peresitedi Russell M. Nelson: “Yalododonu Edaidai … segata vakaidina mo bulataka na imatai kei na ikarua ni ivunau levu. Nida lomana na Kalou ena yaloda taucoko, ena vagolea o Koya na yaloda kina nodra tiko vinaka na tani me totoka, ka dodonu tikoga. … Na nodra vukei eso—ena sasaga ni lomada dina mera karoni vakalevu na tamata se sivia cake mai na noda karoni keda—sa noda reki. Vakabibi, meu kuria, ena gauna veicalati ka dau kauti keda tani mai na noda tiko vakacegu. Bulataki ni ikarua ni ivunau cecere sa idola meda yaco me tisaipeli dina i Jisu Karisito” (“Na iKarua ni iVakaro Cecere,” Liaona, Nove. 2019, 97, 100).