E Vuni Rarama Vakacava ni Noqu Bula o Jisu Karisito?

A dolava o Joni na Apositolo na nona Kosipeli ena nona vakatauvatani Jisu Karisito kina dua na rarama ka “cilava na butobuto” (Joni 1:5). O ira na lewe ni nomu kalasi se kuoramu era tubu cake tiko ena dua na gauna ni butobuto vakayalo. Ia e gauna tale ga me vakarautaka kina na iVakabula “rarama e veivakurabuitaki” me vukei ira mera raica vakamatata ka kunea na nodra sala (1 Pita 2:9).

Nio wilika na Joni 1 ena macawa oqo, vakasamataka vakatitobu na vuna sa rui bibi me vuni rarama kina na nomu bula na iVakabula (raica talega na Josefa Simici iVakadewa, Joni 1:1–34 [ai kuri ki na i Vola tabu]). Ena vakalougatataki ira vakacava o vakavulica na Nona rarama? E rawa vakacava mo vakauqeti ira mera lako ena Nona rarama? Me vukei iko mo vakasamataka vakatitobu na veitaro oqo, vulica na Vunau kei na Veiyalayalati 88:5–13, 67; 93:2–9 kei na itukutuku nei Sisita Sharon Eubank “Karisito: Na Rarama sa Cilava na Butobuto” (Liaona, Me 2019, 73–76).

E dau veivuke sara vakalevu me tekivu na nomuni veivosaki me soli na gauna kina kalasi se kuoramu na madigi mera veitalanoataka na veika era sa vulica tiko mai na nodra vulica na ivolanikalou. Me ivakaraitaki, ena macawa oqo e rawa nio kerei ira me ra wasea e dua na vosa se malanivosa mai na Joni 1:1–17 e vakavulica vei ira e dua na ka me baleta na iVakabula. Me ra veivosakitaka na vuna era digitaka kina na nodra vosa se malanivosa kei na ka e vakavulica vei ira me baleti Jisu Karisito. Wasea vei ira na sala e rarama kina o Jisu Karisito ena nomu bula. Na itaviqaravi era ena rawa ni vukei iko mo tomana na nomu veivosaki.

• Me vukei ira o vakavulica mera vakavinavinakataka na rarama ni iVakabula, ena rawa beka ni wasea e dua na lewe ni kalasi se kuoramu na cava e vakila ni tu ena butobuto. E tiko e dua na italanoa ka rawa ni veivuke ena itekivu ni itukutuku nei Elder Timothy J. Dyches “Na Rarama sa Salavata Ga kei na Rarama” (Liaona, Me 2021, 112–15). Na cava era dau rerevaka kina na tamata ena so na gauna na butobuto? Na cava eda gadreva kina na rarama? Na cava e vakatokai kina o Jisu Karisito me Rarama kei Vuravura? Sa rawa mo kerei ira na itabagone mera vulica na itukutuku nei Elder Dyches vakatekivu ena “Meu vakatura mada de sai koya beka oqo na gauna mo tarogi iko kina.” Sa rawa nira vakasaqara na veika e rawa nida cakava me vakataucokotaki kina na rarama ni iVakabula kina noda bula.

• Na ivolanikalou era volai tu ena “iVurevure Veitokoni” e rawa ni vukea na nomu kalasi se kuoramu me kila vakavinaka cake na rarama e solia o Jisu Karisito. E rawa nio wilika ka veivosakitaka vakalasi e vica na imatai ni iwase ni ivolanikalou. Qai vola ena papa E rawa vakacava nida kauta mai na rarama ni iVakabula kina noda bula? ka sureti ira na itabagone mera vola na isaunitaro era kunea ena ikarua ni iwase ni ivolanikalou. Sa rawa mo veisataki ira na itabagone ka kerei ira me ra veiwaseitaka na sala e vuni rarama kina o Jisu Karisito ena nodra bula.

• E kaya o Sisita Sharon Eubank, “E dua na gagadre bibi e tiko vei keda me rawa ni da tubu kina sai koya me da sema tikoga ki na noda ivurevure ni rarama—o Jisu Karisito” (“Karisito: Na Rarama Sa Cilava na Butobuto,” 73). Rawa nio vakaraitaka qo ena dua na lesoni ivakaraitaki—ena nomu vakaraitaka e dua na cinalivaliva se iyaya livaliva veikauyaki ka veivosakitaka na vuna e bibi kina na ivurevure ni kena kaukauwa. Mera qai railesuva na lewe ni kalasi se kuoramu na itukutuku nei Sister Eubank, ka vakasaqara na sala eso e tovolea kina o Setani me “muduka laivi na [noda] ivurevure ni kaukauwa.” Eda na maroroya vakacava e dua na isema kaukauwa vei Jisu Karisito? Na ivakasala cava eda kunea ena itukutuku nei Sister Eubank?

• Na serenilotu me vaka na “Noqu Rarama na Turaga” kei na “Liutaki Au” (Serenilotu, naba 45, 50) e vakadinadinataka ni noda rarama o Jisu Karisito. Vakasamataka moni lagata vata oqo (se so tale o kila) ka raica vata na vosa se malanivosa e vakavulica vei keda na sala e vaka kina e dua na rarama o Jisu Karisito. Era kauta mai vakacava na tani na rarama ni iVakabula kina noda bula? E rawa vakacava nida wasea na Nona rarama vei ira tale eso?

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

• Same 27:1; Aisea 60:19–20; Joni 8:12; 3 Nifai 18:16, 24 (Na iVakabula e dua na rarama)

• Vosa Vakaibalebale 4:18–19; 1 Joni 2:8–11; Vunau kei na Veiyalayalati 50:23–24; 93:26–28; 138:20–24 (Na sala eda kauta mai kina na rarama ni iVakabula ki na noda bula)

• “Na Kanukanu ni Rarama: Na Rarama iKarisito” (vidio), ChurchofJesusChrist.org