Au na Kunea Vakacava na iSau ni Noqu Vakatataro?

E sa matau tu me tiko na vakatataro. Eda vakananuma tu na noda veisiga ni mataka kei na vuravura e wavoliti keda. Sa tiko talega na noda vakatataro me baleta na Kalou kei na Nona ituvatuva vei keda. Ni o wilika na iVakaro Raraba 1 kei na 2 ena macawa oqo, siqema na ka era cakava na parofita kei na iapositolo mera kunea kina na isau ni nodra taro ([na] ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale sa rawa ni veivuke). Na itavi cava sa vakayacora na vaqarai ni isau ni vakatataro ena nomu vulica na kosipeli? Na cava o rawa ni cakava mo vakauqeti ira kina na lewe ni nomu kuoramu se kalasi mera vaqara na isau ni nodra taro va-kosipeli ena yalodina? Ni ko vakarau mo veivakatavulici, navuca ni railesuva na Vunau kei na Veiyalayalati 6:14–15; 9:7–9 kei na “Acquiring Spiritual Knowledge” ena Doctrinal Mastery Core Document ([2018], 3–5).

Ni ra vulica tu na lewe ni nomu kuoramu se kalasi na iVakaro Raraba 1 kei na 2 ena macawa oqo, era sa na raica beka na ivakavuvuli eso e semati ki na kena ciqomi na isau ni vakatataro me baleta na kosipeli. Solia vei ira e vica na miniti me ra railesuva na ivakaro ka wasea na ka era sa vulica me baleta na ciqomi ni ivakatakila. Na itaviqaravi eso oqo sa rawa ni vukei ira o vakavulica ni kila vakamatata cake na sala me qarai kina na isau ni nodra vakatataro ni kosipeli.

• Na ivolanikalou oqo e vakavulica na ivakavuvuli eso ni kena tarogi na taro kei na ciqomi ni kedra isau: Maciu 7:7; Vunau kei na Veiyalayalati 6:14–15; 9:7–9. Sa rawa ni wilika vata na nomu kuoramu se kalasi na veimalanivosa oqo ka vola ena papa na ivakavuvuli eso era sa raica. Cava na vuna e sega ni dau sauma vakataucoko se kusarawa kina na Tamada Vakalomalagi na noda vakatataro? E rawa vakacava ni da vakaraitaka tikoga na noda vakabauta ena waraki ni kena isau? (raica na Vunau kei na Veiyalayalati 19:23; 78:18). Navuca ni wasea e dua na ka sa sotavi e a tiko kina vei iko e dua na taro me baleta na kosipeli ka qai ciqoma na kena isau. Kerea na lewe ni kuoramu se kalasi mera wasea na veika e vakakina.

• E rawa li ni vakasamataka na lewe ni nomu kuoramu se kalasi na tamata ena ivolanikalou ka ra taroga na taro eso e muataki ki na ivakatakila? (Ke gadrevi, rawa ni o vagolei ira ki na ivolanikalou ena ruku ni “iVurevure Veitokoni Eso.”) Sa rawa ni wilika me baleti ira na tamata oqo na lewe ni kuoramu se kalasi ena ivolanikalou ka raica na taro cava soti era taroga, na sala era qara kina na kena isau, kei na isaunitaro era ciqoma. Na cava eda vulica mai na ivakaraitaki eso oqo? E rawa vakacava ni da tutaka na ka eda vulica ni da vaqara na isau ni noda vakatataro? Me tiki ni itaviqaravi oqo, sa rawa talega ni o vakaraitaka na “How Can I Live the Gospel Standards Better?” mai na “Face to Face with Elder and Sister Bednar” ([worldwide youth broadcast], May 12, 2015, FacetoFace.ChurchofJesusChrist.org).

• Na itukutuku i Elder W. Mark Bassett “Ena Noda Tubu Cake Vakayalo kei na Vuli” (Liaona, Nove. 2016, 52–54.) e vakarautaka na veivakatutu ena sala me qarai kina na isau ni taro vakayalo eso. Sa rawa ni wilika vata na nomu kuoramu se kalasi na va na parakaravu ni nona itukutuku vakatekivu ena “Me rawa ni kilai vakamatata na veika vuni ni Kalou.” Qai sureta na lewe ni kuoramu se kalasi mera wilika na 1 Nifai 2:16, 19–20; 10:17–19; 11:1 ka raica na ka e cakava o Nifai me qara kina na isau ni nona vakatataro. Sureta na lewe ni kuoramu se kalasi mera vakasamataka na ka era na cakava me muri kina na ivakaraitaki i Nifai ni tiko na nodra vakatataro me baleta na kosipeli.

• Na italanoa ena Marika 9:14–27 e rawa ni vukea na lewe ni kuoramu se kalasi ni ra sotavi dredre ena taro eso se vakatitiqa. Sureta vakailiu e dua na lewe ni nomu kuoramu se kalasi me vakavakarau mai ni wasea na italanoa. Qai vida tolu na ilawalawa ni nomu kuoramu se kalasi, ka lesia na ilawalawa yadua me vulica e dua vei ira na tolu na vakadidike i Elder Jeffrey R. Holland me baleta na italanoa ena nona vosa “Turaga, Au sa Vakabauta” (Liaona, Me 2013, 93 95). E rawa vakacava ni da tutaka na vakadidike i Elder Holland ni tiko na noda vakatataro se vakatitiqa kei dua tale eda kila me baleta na kosipeli?

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

• Inosi 1:1–8; Alama 5:43–47; 40:3–5; Ica 2:18–23; Vunau kei na Veiyalayalati 138:1–4, 11; Ai Tukutuku—Josefa Simici 1:10–18 (Na ivakaraitaki ni tamata ka qara tiko na isau ni nodra vakatataro)

• James B. Martino, “Vuki ki Vua ka na Basika Mai na iSaunitaro,” Liaona Nove. 2015, 58–60

• Gospel Topics, “Answering Gospel Questions,” topics.ChurchofJesusChrist.org