ʻOku Liliu Fēfē ʻEku Moʻuí ʻe Heʻeku ʻIlo Kau ki he Palani ʻo e Fakamoʻuí?

Kuo ʻomi ʻe he Tamai Hēvaní ha palani te tau malava ai ʻo maʻu e ngaahi tāpuaki taʻengatá pea hoko ʻo hangē pē ko Iá. ʻOkú Ne finangalo ke ʻilo ʻe he kotoa ʻo ʻEne fānaú e palani ko iá, kuó Ne fakahā ai ia ki he kau palōfita ʻi he kuonga kotoa pē. ʻI hono ako ʻe he kau mēmipa ʻo e kōlomú pe kalasí e Tokāteline mo e Ngaahi Fuakava 76 he uike ní, ne nau ako ai e meʻa ne fakahā ʻe he ʻOtuá fekauʻaki mo ʻEne palani kia Siosefa Sāmita mo Sitenei Likitoní, kau ai e fatongia mahuʻinga ʻo e Fakamoʻuí ʻi he palani pea mo e nāunau te tau lava ʻo maʻu ʻi he moʻui ka hokó. Kapau te tau moʻui faivelenga, ʻe lava ke fakahaohaoaʻi kitautolu ʻo fakafou ʻi he Fakalelei ʻa Sīsū Kalaisí, maʻu ha fiefia kakato, pea nofo mo e ʻOtuá ʻo taʻengata.

Kuo tokoni fēfē hoʻo ʻilo fekauʻaki mo e palani ʻa e Tamai Hēvaní ke takiekina hoʻo vakai ki he moʻuí? Te ke lava fēfē ʻo tokoni ke ʻilo ʻe hoʻo kōlomú pe kalasí, ko ha tāpuaki hono maʻu ha ʻilo fekauʻaki mo e palani ʻo e fakamoʻuí? Ke teuteu ke faiakó, te ke lava ʻo lau e “Palani ʻo e Fakamoʻuí” ʻi he Tuʻu Maʻu ʻi he Tuí ([2004], 156–59) pe pōpoaki ʻa ʻEletā Tieta F. ʻUkitofa “Ko Hoʻo Fononga Maʻongoʻongá” (Liahona, Nōvema 2019, 86–90).

Ko e founga ʻe taha ke kamataʻi ai ha fealeaʻaki mo hoʻo kōlomú pe kalasí fekauʻaki mo e palani ʻo e fakamoʻuí, ko hono fakaafeʻi ha tokotaha ke ne hiki ʻi he palakipoé e ngaahi tefito ko ʻení, fakataha mo e ngaahi veesi mei he Tokāteline mo e Ngaahi Fuakava 76: Maama Fakalaumālié (veesi 22–27), Moʻui Fakamatelié (veesi 40–43), mo e Moʻui ʻi he hili ʻa e Maté (veesi 50–53, 59–62). ʻOange ki he kau mēmipa ʻo e kōlomú pe kalasí ha ngaahi miniti siʻi ke nau toe vakaiʻi e ngaahi veesi ko ʻení ke kumi e fatongia ʻo e Fakamoʻuí ʻi hono fakahoko e palani ʻa e Tamai Hēvaní. Kole ange ke nau hiki ʻi lalo he tefito takitaha e meʻa ne nau maʻú. ʻE lava ke tokoni e ʻekitivitī ʻi laló ke mahino lelei ange kiate kinautolu e founga ʻoku tāpuekina ai ʻe he palani ʻa e Tamai Hēvaní ʻenau moʻuí.

• ʻE lava ke tokoni hono toe vakaiʻi ha niʻihi ʻo e ngaahi hingoa ʻo e palani ʻa e Tamai Hēvaní ke mahino ange ki he kau mēmipa ʻo e kōlomú pe kalasí e palaní. ʻE lava ke nau toe vakaiʻi e ngaahi veesi folofola ʻi he ʻuluaki poini ʻi lalo he “Ngaahi Maʻuʻanga Tokoni Poupoú” pea hiki ha lisi ʻo ha niʻihi ʻo e ngaahi hingoa ki he palani ʻa e ʻOtuá. Ko e hā ʻoku akoʻi atu ʻe he ngaahi hingoá ni fekauʻaki mo e palaní? Hangē ko ʻení, ʻoku ʻomi fēfē ʻe he palani ko ʻení ha fiefia kiate kitautolu, ʻi he taimí ni mo e taʻengatá? Ko e hā ʻoku akoʻi mai ʻe he ngaahi potufolofola ko ʻení fekauʻaki mo e fatongia ʻo e Fakamoʻuí ʻi he palaní? Te ke lava ʻo huluʻi e foʻi vitiō “ʻE Mole ʻa e Loto ʻo e Tangatá” (ChurchofJesusChrist.org) pea fakaafeʻi ʻa kinautolu ʻokú ke akoʻí ke nau talanoa fekauʻaki mo e ngaahi taimi ne nau ongoʻi houngaʻia ai he palani ʻa e Tamai Hēvaní.

• Te ke lava ʻo fakaafeʻi ʻa kinautolu ʻokú ke akoʻí ke nau aleaʻi e founga ʻe lava ke nau tali ai ha fehuʻi ʻa ha kaungāmeʻa fekauʻaki mo e palani ʻo e Fakamoʻuí: Ne tau omí mei fē? Ko e hā e ʻuhinga ʻoku tau ʻi heni aí? Te tau ʻalú ki fē hili ʻa e moʻuí ni? Fakaafeʻi kinautolu ke nau fakaʻaongaʻi e fakamatala ʻi he “Palani ʻo e Fakamoʻuí” ʻi he Tuʻu Maʻu ʻi he Tuí (peesi 156–59) pea mo e ngaahi fakamatala ʻi he “Ngaahi Maʻuʻanga Tokoni Poupoú” ke teuteu ha tali ki ha taha ʻo e ngaahi fehuʻí. Kuo fakamālohia fēfē kitautolu ʻe heʻetau ʻilo e ngaahi tali ki he ngaahi fehuʻi ko ʻení?

• ʻOku ako ʻe he kau mēmipa ʻo e kōlomú pe kalasí e ngaahi moʻoni ʻo e ongoongoleleí ʻo loloto ange ʻi he taimi ʻoku ʻoange ai ha ngaahi faingamālie ke nau akoʻí. Tomuʻa kole ange ki ha kau mēmipa ʻo e kōlomú pe kalasí ke haʻu mateuteu ke vahevahe ha fakamatala nounou ʻo e meʻa ʻoku nau ʻilo fekauʻaki mo ha tafaʻaki ʻo e palani ʻo e fakamoʻuí. ʻE lava ke nau fakaʻaongaʻi e ngaahi fakamatala fakanounou ʻi lalo ʻi he “Ko e Palani ʻo e Fakamoʻuí” ʻi he vahe 3 ʻo e Malangaʻaki ʻEku Ongoongoleleí ([2019], 53–67). Ko e hā hono faikehekehe ʻo e ʻilo mo e taʻe ʻilo fekauʻaki mo e palani ʻo e fakamoʻuí?

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

• 2 Nīfai 11:5; ʻAlamā 12:30; 34:9; 41:2; 42:8, 13–15; Mōsese 6:59–62 (Ngaahi hingoa ki he palani ʻa e Tamai Hēvaní)

• Tokāteline mo e Ngaahi Fuakava 38:1–3; 138:53–56; Mōsese 4:1–4; ʻĒpalahame 3:21–24 (Moʻui ʻi he maama fakalaumālié)

• 2 Nīfai 2:19–21, 25; ʻAlamā 5:15–16; 34:32; ʻĒpalahame 3:25–26 (Moʻui ʻi he maama fakamatelié)

• Sione 14:1–2; ʻAlamā 11:42–45; Tokāteline mo e Ngaahi Fuakava 76:39–43, 89–93 (Moʻui hili ʻa e maté)