Meu na Vorata Vakacava na iYaloyalo Vakasisila?

Era sa na rairai vulica na lewe ni kuoramu se kalasi na Vunau kei na Veiyalayalati 63 ena macawa oqo ka wilika na ivakaro ni Turaga vei ira na Yalododonu taumada me baleta na rerevaki ni garogaro ca—na ivakaro esa solia tu vakavica vata (raica na Vunau kei na Veiyalayalati 63:13–16; Maciu 5:27–28; 3 Nifai 12:27–30). Ni sa baleti ira na tamata ni veitaba gauna na veivakaro oqo, era sa baleta vakabibi sara na noda gauna, ni sa dua tu na matetaka levu na iyaloyalo vakasisila. Na ka rerevaki kei na icolacola cava so e semati ki na iyaloyalo vakasisila era na rairai sotava tu na lewe ni nomu kuoramu se kalasi? Na ivakavuvuli ni kosipeli kei na ivakarau ni tataqomaki cava so e rawa ni vukei ira ni vakasavasavataka na nodra vakasama kei na ivalavala?

Ni ko vakarau tu mo veivakavulici, navuca ni railesuva na “Veivakamarautaki kei na iTukutuku Raraba” kei na “Tiko Savasava” ena Me iSakisaki ni iTabagone ([2011], 11–13, 35–37) kei na Me Vakaiukuukutaki na Nomudou Vakanananu ena iValavala Savasava (ivolalailai, 2006).

Me tekivutaki e dua na veivosaki me baleta na iyaloyalo vakasisila, o na via sureta na lewe ni kuoramu se kalasi mera wilika na Vunau kei na Veiyalayalati 63:13–16 ka veivosakitaka na vakasama eso mai na veitikina oqo e vukei ira ni kila deivaki na vuna esa rui rerevaki kina na iyaloyalo vakasisila. Me vukei ira na nomu lewe ni kuoramu se kalasi ni kila vakamatata na sala mera vorata kina na iyaloyalo vakasisila, vakayagataka e dua se so tale na itaviqaravi oqo. Ena itini ni nomu veivosaki, o na rairai vakauqeti mo veivosakitaka na sala e rawa ni vukei ira kina na rawai tu ena iyaloyalo vakasisila na bisopi (raica na Me iSakisaki ni iTabagone, 12, 37).

• Ena rairai tiko na nodra vakatataro na lewe ni nomu kuoramu se kalasi me baleta na vorati ni yaloyalo vakasisila. Me vukea nodra raica na isau ni taro, o na via vola na veitaro oqo ena papa: Na cava na iyaloyalo vakasisila? Cava na vuna e rerevaki kina? E rawa vakacava ni da gole tani mai na veitemaki ni yaloyalo vakasisila? Me vukea na lewe ni kuoramu se kalasi ni raica na isaunitaro ki na matai ni rua na taro, kerea mera railesuva na “iYaloyalo Vakasisila” ena Tudei ena Vakabauta (tabana e 117–18) kei na “Veivakamarautaki kei na iTukutuku Raraba” kei na “Tiko Savasava” ena Me iSakisaki ni iTabagone (tabana e 11–13, 35–37). Me vukei ira ni raica na isaunitaro ki nai katolu ni taro, kerea mera railesuva Nai Vakatekivu 39:1–12; Roma 12:21; 2 Timoci 2:22; Alama 39:3–9; Moronai 10:30; Vunau kei na Veiyalayalati 27:15–18; 121:45–46. Sureti ira me ra wasea na isaunitaro era sa raica.

• Me vukea nodra dikeva na nomu kuoramu se kalasi na sala eso me vorati kina na iyaloyalo vakasisila, o na vinakata mera railesuva na itukutuku i Elder Jeffrey R. Holland “Sega na Tikina ki na Meca ni Yaloqu” (Liaona, Me 2010, 44–46) kei na itukutuku i Sisita Linda S. Reeves “Taqomaki mai na iYaloyalo Vakasisila—Ai Tikotiko Yavutaki va-Karisito” (Liaona, Me 2014, 15–17). Sa rawa ni ra raitayaloyalotaka ni ra sa veivosaki tiko kei na luvedra tagane se yalewa ni veisiga ni mataka ena vuna esa rui veivakarusai kina na iyaloyalo vakasisila kei na sala me levei kina. Na itukutuku cava era na wasea mai na itukutuku ni koniferedi era a railesuva? Sureta mera veisasa ka wasea na isaunitaro era sa kunea. Kerea talega mera vola na ka era na cakava me levei kina na iyaloyalo vakasisila.

• Sureti ira o vakavulica ni wilika na 1 Korinica 10:13 kei na Alama 13:28. Tarogi ira se cava na nodra nanuma ena kena semati na ivolanikalou oqo ki na noda bolebole eso ena vorati ni yaloyalo vakasisila nikua. O rawa talega ni kerea mera raitayaloyalotaka ni tiko e dua na nodra itokani ka sotavi dredre voli ena iyaloyalo vakasisila ka sa vinakata tu me veivutuni. Na cava era raica e rawa ni vukea na nodra itokani ena ivolanikalou ena ruku ni “iVurevure Veitokoni Eso” kei na tabana e 1–4 ni ivolalailai Let Virtue Garnish Thy Thoughts? Na cava e rawa ni vukea na nodra itokani me kila deivaki ni sa rawa ni vukei koya na bisopi (raica na Me iSakisaki ni iTabagone, 12, 37).

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

• Aisea 1:18; Mosaia 4:2; Vunau kei na Veiyalayalati 58:42–43 (Sa rawa ni da vosoti kevaka eda veivutuni)

• 1 Nifai 17:3; Mosaia 24:14–15; Alama 26:12 (Na Kalou ena vakaukauwataki keda ena noda sasaga ni muria na ivunau)

• Na wase “Individuals” ni AddressingPornography.ChurchofJesusChrist.org

• “Watch Your Step,” “To Look Upon,” “Chastity: What Are the Limits?” “Pornography Addiction: Is There Hope?” “Redeeming the Dead Redeemed Me” (vidio), ChurchofJesusChrist.org