E Rawa Vakacava Niu Bula va-Karisito Cake ena Noqu Qaravi Ira na Tani?

Ni vakaroti ira na Yalododonu na Turaga mera soqoni vata e Kirtland, Ohio, era a biuta na nodra itikotiko e vuqa na tamata ka toso ki kea. Ia na toso oqo e sega walega ni baleta na mai tiko ena dua na vanua vou—esa baleta talega na vakavoutaki ni bula. Era sa na rairai vulica na lewe ni kuoramu se kalasi na Vunau kei na Veiyalayalati 41–44 ena macawa oqo ka vulica baleta na nodra toso na Yalododonu ki Kirtland kei na lawa sa vakatakila na Turaga vei ira ekea. Ena veika tale eso, a namaka na Turaga mera na duavata na Yalododonu ni ra veilomani ka veiqaravi vakai ira (raica na Vunau kei na Veiyalayalati 42:30–31, 38–39, 45; 44: 6). Na cava soti o sotava o rawa ni wasea ena vukea sara na nomu kuoramu se kalasi me vakila na bibi ni veiqaravi va-Karisito.

Me vukea na nomu vakavakarau ni vakavulica na veiqaravi va-Karisito, sa rawa ni o railesuva na “Veiqaravi” ena Me iSakisaki ni iTabagone ([2011], 32–33) kei na itukutuku i Peresitedi Russell M. Nelson “Na iKarua ni Vunau Levu” (Liaona, Nove 2019, 96–100).

Me tekivutaki e dua na veivosaki ena veiqaravi va-Karisito, o na via vola ena papa na “Bula vata ena veilomani” (Vunau kei na Veiyalayalati 42: 45). Sureta na nomu kuoramu se kalasi mera wilika na Vunau kei na Veiyalayalati 42:30–31, 38–39, 45; 44: 6 ka vola na sala eso a vinakati ira kina na Yalododonu na Turaga mera veiqaraqaravi vakai ira. Na madigi cava so e tiko vei keda, ena loma ni noda itikotiko kei na kena tautuba, me qaravi ira ka gagadre tu vakayago, ena vakasama, se vakayalo? Digidigi mai na vakasama eso e ra me vakauqeta na nomu kuoramu se kalasi mera soli veiqaravi va-Karisito vei ira na tani.

• Me vukea na lewe ni kuoramu se kalasi me vuli mai na ivakaraitaki ni veiqaravi ni iVakabula, sa rawa ni o lesia na tamata yadua me wilika e dua na malanivosa ni ivolanikalou me baleta na nona qarava tiko e dua na iVakabula (raica na “iVurevure Veitokoni Eso). Sa rawa ni umana na tamata yadua na malanivosa ni ivolanikalou ka vakamacalataka na ka e vakayacora na iVakabula me qaravi ira na tani. Na cava era vakavulica na ivakaraitaki oqo me baleta na ibalebale ni veiqaravi vaka a vakayacora na iVakabula? Na cava na duidui ni veiqaravi ena ivakarau ni iVakabula kei na sala tale eso ni veiqaravi? Sa rawa nira wasea na lewe ni kuoramu se kalasi na veika era sotava ni ra a tovolea mera veiqaravi vakataka na iVakabula se gauna era a qaravi kina vakaoqo mai vei ira na tani.

• Ena via veivuke me railesuva na nomu kuoramu se kalasi na ka sa vakavulica na iVakabula kei ira na Nona parofita me baleta na veiqaravi. Oqo e vica na malanivosa ni ivolanikalou era rawa ni wilika vata: Maciu 25:31–46; Luke 10:25–37; Joni 13:34–35; Jemesa 1:27; Mosaia 2:17; 18:8–10. Vakauqeti ira me ra vola na ka era vulica ena nodra qaravi na tani ka wasea na vakasama kei na ka sa sotavi eso e semati ki na ka era sa vulica. Sa rawa ni ra qai tuva na sala eso mera veiqaravi va-Karisito kina. (Sa rawa ni ra tauri vakasama ena saravi ni dua se sivia na vidio ena “iVurevure Veitokoni Eso” se na sikovi ni JustServe.org.)

• Me vukea na lewe ni kuoramu se kalasi ena nodra sasaga ni veiqaravi vei ira na tani, navuca ni railesuva vata na itukutuku i Persitedi Bonnie H. Cordon “Vakataka Tu e dua na iVakatawa ni Sipi” (Liaona, Nove. 2018, 74–76). O rawa ni tekivu ena vakaraitaki ni so na yaloyalo ni nona veiqaravi na iVakabula (a vakaraitaka o Peresitedi Cordon eso ena gauna ni nons vosa). Na cava era vakavulica na yaloyalo oqo ena ivakarau eda rawa ni veiqaravi kina ena sala va-Karisito eso? Qai navuca ni sureta na lewe ni kuoramu se kalasi mera wilika vakaveisa e dua vei ira na wase ni tukutuku ka wasea na ka era sa vulica ena sala meda veiqaravi kina vaka na iVakabula. Era rawa talega ni wasea na ka era sa vulica tiko ena veiqaravi va-Karisito ni ra veiqaravi vei ira na tani.

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na nodra dui veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

• Maciu 14:13–21; Joni 9:1–11; 13:4–5, 12–17; 1 Nifai 11:31; 3 Nifai 17:5–9 (iVakaraitaki eso i Jisu Karisito ni qaravi ira tiko na tani)

• Joy D. Jones, “Me Baleti Koya,” Liaona, Nove. 2018, 50–52

• “If We Forget Ourselves,” “Teachings of Thomas S. Monson: Rescuing Those in Need,” “Youth in Action,” “Opportunities to Do Good” (vidio), ChurchofJesusChrist.org