Chan ru tinb’oqeb’ chixjunil chi chalk rik’in li Kristo?

Yal junjunq po chirix lix k’uub’lajik li Iglees sa’ li 6 xb’e li po abril, 1830, sa’ Fayette, Nueva York, li Qaawa’ ki’ok chixb’oqb’aleb’ li misioneer re te’xch’utub’ “li sik’b’ileb’ ru inb’aan chalen chaq sa’ xkaajachalil li ruchich’och’ ” (Tzol’leb’ ut Sumwank 33:6). Ak xniman xk’anjel jun ch’ina ch’uut chi komon toj reetal naq wankeb’ naab’al li misioneer li yookeb’ chixjultikankil li evangelio sa’ chixjunil li ruchich’och’. A’b’anan, ink’a’ neke’tz’aqon juneseb’ li misioneer sa’ xjultikankil li evangelio. Li Qaawa’ naraj naq chiqajunilo taqab’oqeb’ li ani wankeb’ chiqasutam chi chalk rik’in a’an.

Chan ru ak xattz’aqon laa’at sa’ xb’oqb’aleb’ li kristiaan chixtzolb’al lix evangelio li Kolonel? K’a’ru naru taab’aanu re xtenq’ankileb’ li saaj chixb’aanunkil lix teneb’ankil sa’ xk’amb’aleb’ li aamej rik’in li Jesukristo? Re xkawresinkil li tzolok, naru taawil “¿Cuál es mi objetivo como misionero?” sa’ Predicad Mi Evangelio ([2019] 1–16) ut li raatin li Elder Dieter F. Uchtdorf “Li misioneerik: xwotzb’al li wan sa’ laa ch’ool,” Jolomil ch’utub’aj-ib’ re abril 2019).

Sa’ Tzol’leb’ ut Sumwank 30–36 wan xk’ab’a’eb’ li ani ke’b’oqe’ sa’ mision sa’ xtiklajik li Iglees. Wiib’ oxib’ kutan ma tatk’utuq, naru taak’e reheb’ li junq saaj jun xk’ab’a’eb’ li kristiaan a’an (che’ilmanq xjolomileb’ li tasal 30–36) ut taapatz’ re li junq saaj naq tixtzol k’a’ru kixye li Qaawa’ re xtenq’ankil li kristiaan a’an chixwotzb’al li evangelio. Chan ru naru taqajuntaq’eeta li na’leb’ a’in qik’in? Xb’aanunkil a’in naru tixtenq’aheb’ li saaj re te’xb’oq jalaneb’ chi chalk rik’in li Kristo.

• Ma neke’xtaw ru li saaj k’a’ru naraj naxye chalk rik’in li Kristo? Naru taapatz’ reheb’ naq te’xwotz k’a’ru neke’xk’oxla. Wi na’ajman, naru taaye a’in reheb’: “Re chalk rik’in li Kristo, tento taawanq li qapaab’aal chirix a’an choq’ re li jalb’a-k’a’uxlej—a’an xb’aanunkil li na’ajman re xjayalinkil li qayu’am rik’in li na’leb’ naxk’ut a’an” (Predicad Mi Evangelio, 2). Eb’ li saaj naru ajwi’ te’rileb’ li raqal re loq’laj hu b’ar wi’ naxye li aatin chanchan “chalqex wik’in” malaj “chalk rik’in li Kristo” re te’xsume li patz’om a’in—naru te’ril Mateo 11:28–30; Omni 1:26; Moroni 10:32; Tzol’leb’ ut Sumwank 20:59. K’a’ut naq naqaj naq eb’ li kristiaan te’chalq rik’in li Kristo? K’a’ru naru taqab’aanu re xtenq’ankileb’? Eb’ li saaj naru te’xk’oxla ani neke’xnaw ru li te’xb’oq chi chalk rik’in li Kristo.

• Xtzolb’al k’a’ru xe’xb’aanu jalaneb’ chik li kristiaan re xwotzb’al li evangelio naru tixtenq’aheb’ li saaj. Naru taak’ut wiib’ oxib’ reheb’ li video sa’ “Xkomon chik li tenq’,” malaj taapatz’ reheb’ li saaj naq te’ril li raatin li Hermana Cristina B. Franco “Xtawb’al li sahil ch’oolejil sa’ xwotzb’al li evangelio” (Jolomil ch’utub’aj-ib’ re octubre 2019). K’a’ru naqatzol sa’ li raatin? Aatinanqex sa’ komonil chirix k’a’ru naru teeb’aanu re xb’oqb’aleb’ jalan chi chalk rik’in li Kristo.

• Sa’ aatinak chirix xwotzb’al li evangelio, li Elder Dieter F. Uchtdorf kixye naq “maare ink’a’ naqanaw chi us chan ru xb’aanunkil. Malaj ut maare nokoxutaanak” (“Li misioneerik: xwotzb’al li wan sa’ laa ch’ool,” Jolomil ch’utub’aj-ib’ re abril 2019). Wi ta a’an ajwi’ li neke’reek’a li saaj, maare li oob’ chi na’leb’ kixye li Elder Uchtdorf tixtenq’aheb’. Naru taapatz’ reheb’ naq te’ril li kixye li Elder Uchtdorf chirix jun reheb’ li na’leb’ a’an ut naq te’xwotz li k’a’ru xe’xtzol.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

• 1 Timoteo 4:12 (Chayal aaq’e chixk’amb’al xb’eheb’ laj paab’anel)

• Alma 17:2–4 (Eb’ li ralal laj Mosiah ke’xkawresi rib’ re te’xwotz li evangelio)

• Tzol’leb’ ut Sumwank 42:6–7 (Jultika li evangelio rik’in lix wankil li Musiq’ej)

• Russell M. Nelson ut li xWendy Nelson, “Juventud de Israel” (ch’utam choq’ reheb’ li saaj sa’ chixjunil li ruchich’och’, 3 junio, 2018), aatin sa’ li New Era ut li Ensign, HopeofIsrael.ChurchofJesusChrist.org

• “Invitar a todos a venir a Cristo: Compartir el Evangelio,” “Invitar a otros a venir y ver,” “Invitar a otros a venir a ayudar,” “Invitar a otros a venir y quedarse,” (eb’ li video), ChurchofJesusChrist.org