Meu na Vakarautaki Au Vakacava ni Vakaitavi ena “Cakacaka Vakasakiti” ni Kalou?

Ena gauna era se qai rogoca taumada kina na Yalododonu e liu na itukutuku ni kosipeli vakalesui mai, e vuqa era via kila na cava era rawa ni cakava mera veivuke kina ena cakacaka. Na tamai Josefa Simici na Parofita, o Josefa Simici Levu, a dua vei ira ka taroga me kila na loma ni Kalou me baleti koya. Na isaunitaro ni Turaga, kune ena Vunau kei na Veiyalayalati 4., esa vakauqeti ira tu mai na itabatamata mera veiqaravi taucoko ena vu ni “yalodra, igu, vakasama kei na kaukauwa” (tikina e 2). Se o veiqaravi tiko vakadaukaulotu se veiqaravi tiko ena dua na veikacivi se itavi ena Lotu, na veika e lavaki ki na veiqaravi esa tautauvata: na gagadre ni qarava na Kalou salavata kei na vakabauta, inuinui, loloma uasivi kei na loloma (raica na Vunau kei na Veiyalayalati 4:2–6). E rawa vakacava ni o vukea na lewe ni kuoramu se kalasi ni vaqaqacotaka na nodra gagadre mera qarava na Turaga ka vakavakarau ki na madigi ni veisiga ni mataka mera veiqaravi?

Me vakarautaki iko ni liutaki ira na lewe ni kuoramu kei na kalasi ena vuli oqo, sa rawa ni o wilika ka vakasamataka vagumatua e dua se sivia na itukutuku e kune ena “iVurevure Veitokoni Eso.”

Era sa na rairai vakauqeti na lewe ni kuoramu se kalasi mera qarava vagumatua cake na Turaga ena wiliki ni Vunau kei na Veiyalayalati 3–5 ena macawa oqo. Me na vakauqeti ira ni wasea na nodra vakasama, sa rawa ni o sureti ira me ra raitayaloyalotaka ni ra sa kere curu tiko ki na dua na cakacaka. Na kilaka vakavuli cava soti era na biuta ena dua na resamei se tukuna ena dua na veivakatarogi ni cakacaka? Sa rawa ni ra railesuva na Vunau kei na Veiyalayalati 4 ka raica na kilaka eso e gadreva na Turaga vei ira ka vinakata mera vakaitavi ena Nona cakacaka. Digitaka e dua se sivia na itaviqaravi e ra me vukei ira o vakavulica ni navuca na ka era rawa ni cakava mera vakaitavi vakavinaka cake kina ena “cakacaka vakasakiti” ni Kalou (Vunau kei na Veiyalayalati 4:1).

• Me vukei ira o vakavulica ni vulica na sala era rawa ni vakaitavi kina ena vakusakusataki ni cakacaka ni veivakabulai, vola ena papa na ivakamacala oqo ni cakacaka ni veivakabulai: Sa sureta na Kalou na tamata kecega mera lako mai vei Karisito ka veivuke ena Nona cakacaka ena bulataki ni kosipeli i Jisu Karisito, nodra vukei na vakaleqai, nodra sureti na tamata kecega mera ciqoma na kosipeli, kei na vakaduavatataki ni matavuvale ki na veigauna tawamudu. Sureta na lewe ni kuoramu se kalasi mera veivosakitaka na sala ena vukei ira kina ni kitaka yadua na tiki ni cakacaka ni veivakabulai na itovo ni bula eso e tuvai koto ena Vunau kei na Veiyalayalati 4 . Wasei ira vakailawalawa na itabagone, ka me veivosakitaka na ilawalawa yadua na sala eso era rawa ni taracake kina na veitovo ni bula oqo. Na cava eda rawa ni cakava me dua na tiki bibi cake ni noda bula na cakacaka ni veivakabulai?

• Sureta na lewe ni kuoramu se kalasi mera railesuva e dua vei ira na itukutuku e kune ena “iVurevure Veitokoni Eso,” ena vakaraici ni dua na yatuvosa era rawa ni wasea ena sala me qaravi kina ena yalodina na Turaga ena veikacivi, ilesilesi, se itavi tale eso ni Lotu. Kerei ira me ra wasea na yatuvosa era a digitaka kei na vuna e vakaibalebale kina vei ira. Era na tutaka vakacava na ka era sa vulica ena gauna oqo kei na veisiga ni mataka?

• Era na rairai vakarautaka tiko eso na lewe ni kuoramu se kalasi mera veiqaravi vakadaulotu. O na via kerei ira me ra wasea na sala era sa vakarau tu kina ni veiqaravi. Mo vakauqeti ira ena nodra sasaga, o na via wasea na taro a kaya o Elder David A. Bednar e dau ciqoma wasoma: “Na cava au rawa ni cakava meu vakarau vinaka sara kina ni veiqaravi vakadaulotu tudei?“(”Yaco me Dua na Daukaulotu,“ Liaona, Nove. 2005, 45). Era na sauma vakacava na lewe ni kuoramu se kalasi na taro oqo? Na raidonu cava so a vakarautaka o Elder Bednar? O rawa ni sureta e dua se sivia na daukaulotu lesu mai me wasea na ka era cakava mera vakavakarau kina ki na kaulotu kei na ka era se diva tu me ra a vakayacora.

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

• Maciu 28:19–20; Vunau kei na Veiyalayalati 18:9–16; 50:13–14; 88:81 (Sa noda itavi meda wasea na kosipeli)

• Dieter F. Uchtdorf, “O Koya Sa Turaga vei Kemudou,” Liaona, Me 2017, 78–81

• Carl B. Cook, “Veiqaravi,” Liaona, Nove. 2016, 110–12

• “Preparing to Serve,” ChurchofJesusChrist.org/topics/missionary-preparation