“Atamai i Aoaoga Faavae Toefaamanatu 25: Faaaoga Fuaitau o le Atamai i Aoaoga Faavae,” Tusi Lesona a le Faiaoga o le Tusi a Mamona (2024)

“Atamai i Aoaoga Faavae Toefaamanatu 25,” Tusi Lesona a le Faiaoga o le Tusi a Mamona

Atamai i Aoaoga Faavae Toefaamanatu 25

Faaaoga Fuaitau o le Atamai i Aoaoga Faavae

vaega o talavou o loo taaalo i se taaloga i fafo

I le Ekalesia, ua valaaulia i tatou ia tuputupu aʼe e pei ona sa faia e le Faaola—faaleagaga, faaleagafesootai, faaletino, ma faaleatamai. O le setiina o sini e mafai ona fesoasoani ia te oe e alualu ai i luma. Ua tuuina mai tusitusiga paia e le Tama Faalelagi e fesoasoani ia te oe ia avea e faapei o Iesu Keriso i nei auala. O lenei lesona o le a tuuina atu ia te oe se avanoa e faataitai ai le faaaogaina o fuaitau o le atamai i aoaoga faavae i au sini ia avea e faapei o le Faaola.

Fesoasoani i tagata aoao ia avea ma tagata auai toaaga. Mo le toatele o tamaiti aoga, o le faia o taumafaiga e aoao ai mai tusitusiga paia e foliga e le masani ai ma e ono faigata. Peitai, e mafai e tamaiti aoga ona tuputupu a’e i o latou tomai ma faasolosolo malie ai lava ona tauaveina le tele o tiutetauave mo lo latou lava aoaoina. Vaavaai mo avanoa e fesoasoani ai i tamaiti aoga e tauave se matafaioi mataalia i le vasega ma viia a latou taumafaiga ma le alualu i luma.

Sauniuniga a le tamaitiiti aoga: Mafaufau e valaaulia tamaiti aoga e talanoa i o latou mātua po o se taitai o le Ekalesia e uiga i sini ua latou faatutuina. E mafai ona latou talanoaina faamanuiaga ma luitau o loo feagai ma i latou.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina o lesona ua saunia e le eria po o le faatonu o le eria po o le taitai faamaopoopo ina ia mautinoa ai o lesona taitasi o fuaitau o le atamai i aoaoga faavae o le a aoaoina a o faia vasega seminare.

Tuputupu aʼe e pei ona sa faia e Iesu Keriso

Mafaufau e faaali atu i tamaiti aoga le Atinaʼega Faaletagata Lava Ia: Tusitaiala mo le Autalavou ma talanoaina sini e mafai ona latou setiina. E mafai foi ona e faaali atu le ata lenei:

Manulauti o le polokalama a Tamaiti ma le Autalavou

I le Luka 2:52 tatou te faitau ai “Ua tupu le poto ma le tino o Iesu, [ma] ua alofagia o ia e le Atua atoa ma tagata.” E finagalo lo tatou Tama Faalelagi mo i tatou ia tuputupu aʼe e pei ona sa faia e le Faaola i nei lava vaega uma taitasi. Ua talosagaina i tatou e taitai o le Ekalesia e faatutu ni sini e fesoasoani ia i tatou e atiaʼe ai faaleagaga, faaleagafesootai, faaletino, ma faaleatamai.

Mafaufau i sini ua e setiina pe e te manao e seti.

O a nisi o taumafaiga faamanuiaina ua e oo i ai?
O a nisi o luitau na feagai ma oe a o e taumafai e ausia nei sini?

A o saunoa e uiga i nei sini, na aoao mai Peresitene Russell M. Nelson:

Nai lo le tuu atu ia te outou o le tele o tofiga faapitoa, … ua matou valaauliaina outou ia fefautuaai faatasi ma le Alii i auala e mafai ai ona outou tuputupu aʼe i se ala paleni. O le a tauia ma malie, ae o le a alu ai foi se taumafaiga i lau vaega. O le a manaomia ona e saili atu i faaaliga patino. O le a manaomia ona e filifili mo oe lava pe faapefea ona e faatinoina. O nisi taimi e ono uunaia oe e le Agaga e fai ni mea faigata. Ou te manatu ua e mafaia le lu’i. E mafai ona e faia mea faigata. (Russell M. Nelson, “Faasalalauga Faapitoa mo Tamaiti ma le Autalavou o loo Faaalia ai Peresitene M. Russell Ballard” [folasaga i le ta’imua fou mo tagata ma le Autalavou, Sete. 29, 2019], broadcasts.ChurchofJesusChrist.org)

O le a sou manatu e uiga i le fautuaga a Peresitene Nelson?

A o e suesue i le asō, o le a mafai ona e faaaogaina fuaitau o le atamai i aoaoga faavae i au sini ia avea atili e pei o le Faaola i le faaleagaga, faaleagafesootai, faaletino, po o le faaleatamai.

E mafai ona fesoasoani fuaitau o le atamai i aoaoga faavae

E mafai ona talosagaina tamaiti aoga e lisi mai ni fuaitau se tele o le atamai i aoaoga faavae mai mea e mafai ona latou manatua pe faasoa mai ni fuaitau na aafia ai o latou olaga. Lisi ia fuaitau latou te faasoa mai i luga o le laupapa.

Fesoasoani i tamaiti aoga e sue ia fuaitau o le atamai i aoaoga faavae mai le Alema i le Moronae i le Pepa Autu o le Atamai i Aoaoga Faavae (2023), pe faaali atu le siata lenei.

Atamai i Aoaoga Faavae o le Tusi a Mamona: Alema–Moronae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino Alema 7:11–13	Fasifuaitau Autu o le Mau “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.”
Mau Faasino Alema 34:9–10	Fasifuaitau Autu o le Mau “E ao ona faia o se togiola, … o se taulaga e ao ina le gata ma faavavau.”
Mau Faasino Alema 39:9	Fasifuaitau Autu o le Mau “Aua e te toe saili atu i tuinanau o ou mata.”
Mau Faasino Alema 41:10	Fasifuaitau Autu o le Mau “E lei avea lava le amioleaga ma fiafia.”
Mau Faasino Helamana 5:12	Fasifuaitau Autu o le Mau “O luga lava o le papa o lo tatou Togiola … e ao ina oulua atiinaa’e ai lo oulua faavae.”
Mau Faasino 3 Nifae 11:10–11	Fasifuaitau Autu o le Mau “Na ou tuu atu ai i le finagalo o le Tamā i mea uma mai le amataga.”
Mau Faasino 3 Nifae 12:48	Fasifuaitau Autu o le Mau “Ia outou atoatoa e pei lava o aʼu, po o lo outou Tamā o le o i le lagi e atoatoa.”
Mau Faasino 3 Nifae 27:20	Fasifuaitau Autu o le Mau “O mai ia te au ma ia papatiso … ina ia faapaiaina outou i le taliaina o le Agaga Paia.”
Mau Faasino Eteru 12:6	Fasifuaitau Autu o le Mau “Aua tou te le maua se molimau seia uma ona tofotofoina o lo outou faatuatua.”
Mau Faasino Eteru 12:27	Fasifuaitau Autu o le Mau “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.”
Mau Faasino Moronae 7:45–48	Fasifuaitau Autu o le Mau “O le alofa mama o le alofa le ponā lea o Keriso.”
Mau Faasino Moronae 10:4–5	Fasifuaitau Autu o le Mau “Ole atu ma le loto faamaoni, ma le manatu moni i ai, ma le faatuatua ia Keriso … [ma] o le mana o le Agaga Paia e mafai ona outou iloa ai le moni o mea uma lava.”

Valaaulia tamaiti aoga e sue fuaitau o le atamai i aoaoga faavae e mafai ona fesoasoani ia i latou e ausia ai a latou sini.

Talanoaina mau na maua e tamaiti aoga ma pe faapefea ona latou fesoasoani. Mafaufau e faaaoga nisi o fesili nei.

E le manaomia e tamaiti aoga ona faasoa mai ni faamatalaga patino e uiga i a latou sini. Fautuaina i latou e faasoa atili atu e uiga i mau ma mataupu faavae ae itiiti e uiga i mea patino o le sini.

O le fea fuaitau o le atamai i aoaoga faavae e mafai ona fesoasoani ia te oe e ausia ai lau sini? E faapefea?
O le fea fuaitau o le atamai i aoaoga faavae e mafai ona fesoasoani ia te oe e tuputupu a’e ai “i le poto ma le tino, ma alofagia e le Atua atoa ma tagata” e pei ona sa faia e le Faaola?
E mafai faapefea e se faitau se tasi pe sili atu o le atamai i aoaoga faavae ona fesoasoani ia te oe e faaaoga se mataupu faavae se tasi pe sili atu o le mauaina o le malamalama faaleagaga?

Mafaufau e faasoa atu lau molimau i auala na fesoasoani ai fuaitau o le atamai i aoaoga faavae i lou olaga.